1. Ena alu ziī sīdee Job bee su suāloo Jɛhova leere a?

 YƐƐ dɛ̄dɛɛ̄ pya Job ewee nyɔɔnɛ kɔnia ue bu dum, a ɛrɛ lo a sirapie kaāna, ɛɛ ye na lo a bee nyɔɔnɛ Jɛhova Bari kɔnia. Jɛhova bee kɔ nu akiiloo gbɛnɛ gbɛnɛ nu a bee dɛm nɛ Job lokwa a dap suā kɛ̄ Ye suānu kuī doo, le kɔ a dap doo dɛ̄dɛɛ̄ nu alu ebɛɛ̄ nɛ pya ye zooro. Bu edoba, Bari bee nyɛŋiabu Job kɔ alɛ na a doo kɔ dɛ̄dɛɛ̄ nam a ɛrɛ nuede a, nyɔɔwo, a dapnage kuūdɛɛ̄loo Job. (Job 38:39-41; 39:1, 5, 13-16) Tɛ̄maloo enɔ nu akiiloo dɛmnu, Job bee nɔ gbɛnɛ-edo nu akiiloo pya dogo Bari ɛrɛ.

2. Ena anua a dap i aga bah lo enɔ nu akiiloo pya nu Jɛhova dɛm a?

² Ili dapnage suā gbɛnɛ-edo nu akiiloo Bari sɔ̄ i nɔ nu akiiloo pya nu a bee dɛm. Kerewo, a naa waɛ edoo wo pio sɔ̄. Lo alu kɔ i tɔɔ̄ bu gbɛnɛ buɛ̄, pio sɔ̄ bu ziī ziī biradee ii le edap muɛ gbɛnɛ-edo nu Jɛhova dɛm. Kere i tɔɔ̄ kɛ̄ a waɛ emuɛ pya nu alu edɛm, a dap i aga bah esu sɔ̄ nɔā nu akiiloo pya nu Jɛhova dɛm. Nyɔɔwo, doraa i kɔnia nu anua a lee kɔ i piiga lo esu sɔ̄ nɔā nu akiiloo nu a bee lu edɛm. I gaa le nɔ kɛ̄ Jɛhova le Jizɔs bee su dɛmnu tɔŋɛnu doo, le nu i dap doo lokwa i nɔnu akiiloo dɛmnu yereloo.

3. Ena a tɔgɛ kɔ Jɛhova bee gbī kɔ Adam a ɛrɛ ɛɛbu aāloo dɛmnu a?

³ Jɛhova bee gbī kɔ tua nɛɛ a bee dɛm a ɛrɛ ekpeloo aāloo nu a bee dɛm. Sɔ̄ Bari bee dɛm Adam, a bee ye nɛ  paradais a kpedɛɛ̄ kɔ a tɔɔ̄ bu sa si tam bu, sa yɛgɛ mmɛ pya dɔɔ̄na kɛ̄ bu nyɔuwe. (Jɛn 2:8, 9, 15) Naa kɛɛrɛ kɛ̄ bu Adam bee ɛɛ doo sɔ̄ a muɛ sɔ̄ eyuu te simɛɛ̄ le sɔ̄ flawa yere yuuri. Mɛ dua dee Adam bee ɛrɛ lo ekuūdɛɛ̄loo gɔh Idɛn sɛh! Jɛhova bee kɔnage nɛ Adam kɔ a nɛ bee ziī ziī nam. (Jɛn 2:19, 20) Jɛhova ebee dap su alɛɛ loo wa nɛā bee; kerewo, a bee nɛ lo tam Adam. Baɛbaɛ beenyiɛ naale loo kɔ lɛɛ Adam gae nɛ wa bee, a bee ɛp wa elap dogo le kɛ̄ wa mɛā le doo. Nu Adam bee doo ama bee ye dap kpeloo kaāna. A bee doo kɔ a ɛrɛ dee lo etɔgɛ nia loo kɛ̄ ye Tɛ suānu doo, le kɛ̄ pya nu a dɛm lee doo.

4. (a) Ziī ena anua i ɛrɛ ekɛɛrɛ nyɔɔ pya nu alu edɛm a? (b) Amunu nu alu edɛm na a a nia kaāna a?

⁴ Ziī nu anua i ɛrɛ ekɛɛrɛ nyɔɔ nu alu edɛm na bee Jɛhova gbī kɔ i doo wo. A kɔ i nɛ kɔ: “Danaa bui dɛɛ̄ nɛ nyɔɔ sa muɛ!” Lɛɛ a bip kɔ: “Mɛɛ na a bee dɛm pya lo nu ama a?” Ye ture sirapie leere. (Ais 40:26) I dap nɔ nu aāloo gbɛnɛ-edo nu Jɛhova dɛm a le bunyɔɔ, le kɛnɛkɛ̄ le bu pɛnɛ. (Yɔɔ 104:24, 25) E naa kɛɛrɛ kɛ̄ Bari i dɛm doo. A dɛm i doo kɔ i ɛrɛ ɛɛbu loo pya nu a kpedɛɛ̄ a i tɛɛ̄ ɛŋɛnɛ. A doonage kɔ i dap ɛrɛ ekpeloo aāloo keekee nu a bee dɛm tɛ̄ma o’oo sīdee, lo a le muɛ nu, dānu, daabaloo nu, suā egā nu, le dānu loo nu.

5. Dookɛ̄ Pya Rom 1:20 kɔ doo, mɛ sīdee na i ɛrɛ biī aāloo nɔnɔ pya nu Jɛhova dɛm a?

⁵ Baibol kɔnage dɔɔ̄na nu anua alu ebɛɛ̄ kɔ i ɛrɛ ekɛɛrɛ nyɔɔ nu a bee lu edɛm. A tɔgɛ i nu akiiloo pya elap dogo Jɛhova. (Buū Pya Rom 1:20.) Bu edoba, naa kɛɛrɛ kɛ̄ pya nu Jɛhova dɛm kpedɛɛ̄ doo. Ekɔ ba naa tɔgɛ kɛ̄ Bari suā nu doo ni? Naa kɛɛrɛnage keekee bee nuede i aa de. Lo ama tɔgɛ leere kɔ a wereloo miɔŋɔ nɛɛ. Mumuɛ kɛ̄ dogo Jɛhova sira bu pya nu a bee dɛm doo, doo kɔ i suā ye loo leere sa ye agɛrɛbah tɔɔ̄ waɛloo. Nyaawo, dooraa i kɔ nu akiiloo pio sīdee Jɛhova esua nu a bee dɛm tɔŋɛ nu a kuī pya nɛɛ.

6. Ena i dap nɔ aāloo kɛ̄ enuɛ wee pɛɛ aa ziī barasī kii ziī doo a?

⁶ Jɛhova esere sɔ̄ loo dɛ̄dɛɛ̄ nu. Dɛ̄dɛɛ̄ zua, aā tah Baɛ Enɔɔ̄ mmɛ tah O’oo Enɔɔ̄, pya Izrɛl wee muɛ ewera a gaa pɛɛ kii barasī mmnyɔɔ. Bari bee kɔ nɛ pya  Izrɛl kɔ: “Kunɛ ewera a pɛɛ bunyɔɔ suā ye sɔ̄.” (Jer 8:7) Dookɛ̄ Jɛhova sere sɔ̄ pya enuɛ ama pɛɛ kii ziī ziī barasī doo, a esere sɔ̄ a gaa le su ye biaɛ nua. Nii’ee sɔ̄ i muɛ pya enuɛ a pɛɛ aa ziī barasī kii ziī, a doo kɔ i suā kɔ i dap dɛrɛ nyiɛ nyɔɔ kɔ Jɛhova esere taɛ “sɔ̄” esu kuma mmɛ loo lo pɔrɔ nyɔuwe ama.—Hab 2:3.

7. Ena i dap nɔ aāloo kɛ̄ enuɛ pɛɛ doo a? (Aisaia 40:31)

⁷ Jɛhova enɛā ekpo pya ye zooro. Tɛ̄maloo Aizaia, Jɛhova bee yira yii kɔ enɛe ekpo pya ye nɛɛ sa doo kɔ ba a “su laba pɛā kuma nyɔɔ doodoo goh” sɔ̄ loo wa ɔ ale alu ebii wa nɛ kɛ̄. (Buū Aisaia 40:31.) Pya Izrɛl wee muɛ sɔ̄ goh yaari ye laba bu efɔp sa pɛɛ kii bunyɔɔ e a naa fub ye laba. Lo ama nyɛŋia i bu kɔ lo Jɛhova nɛ ekpo pya enuɛ ama, e nɛnage ekpo pya ye zooro! Sɔ̄ o muɛ ziī gbɛnɛ ka enuɛ a gaa pɛɛ kii taɛ bunyɔɔ e a naa fub ye laba, nyɛŋiabu kɔ Jɛhova dap a nɛ ekpo lo ebeā eebah pya o taāŋa.

8. Ena Job bee nɔ aāloo ɛrɛ ekɛɛrɛ nyɔɔ pya nu Bari dɛm a, e ena ili dap nɔ aāloo a?

⁸ A bɔloo kɔ i dɛrɛ nyiɛ nyɔɔ Jɛhova. Jɛhova bee yerebah nɛ Job kɔ a kiisī lo edɛrɛ ye nyiɛ nyɔɔ. (Job 32:2; 40:6-8) Sɔ̄ Bari bee nyɔɔnɛ Job kɔnia ue, a bee kɔ nu akiiloo gbɛnɛ-edo nu a bee dɛm doodoo zina, tɔ̄dee, le ɛnɛmdee. Jɛhova bee kɔnage ue akiiloo keekee bee nam, doodoo nam le enyanya. (Job 38:32-35; 39:9, 19, 20) Dɛ̄dɛɛ̄ pya nu ama tɔgɛ kɔ Bari ɛrɛ ekpo sa ɛrɛnage wereloo le suānu. Wa kɔnia ue ama bee doo kɔ Job a dap dɛrɛ nyiɛ nyɔɔ Jɛhova eekɛ̄ a wee doo tua sɔ̄. (Job 42:1-6) Bu aba lo sīdee, sɔ̄ i nɔ nu akiiloo dɛmnu, a nyɛŋia i bu kɔ Jɛhova ɛrɛ gbɛnɛ suānu le ekpo i ee. E a dap, sa gaa le su kuma nua loo dɛ̄dɛɛ̄ i taāŋa. Susuā lo ama edoo kɔ i agɛrɛbah ye dɛrɛ nyiɛ nyɔɔ.

9-10. Ena zue le boo i tɔgɛ akiiloo Jɛhova a?

⁹ Jizɔs bee suā nu akiiloo dɛmnu kaāna. Doodoo “nɛɛ kari,” a bee ɛrɛ dee lo enyɔɔnɛ ye Tɛ dɛm pya nu a le bu nyɔuwe. (Kam 8:30) Sɔ̄ esaa, sɔ̄ Jizɔs bee le a kɛnɛkɛ̄, a bee su dɛmnu tɔŋɛ pya a wee ye nyɔɔnɛ dumɛ nu akiiloo ye Tɛ. Naa kɛɛrɛ pio nu a bee tɔgɛ ama.

¹⁰ Jɛhova yɛgɛ ye wereloo mmɛ loo dɛ̄dɛɛ̄ nɛɛ. Bu ye Ekɔaue Nyɔɔ Egu, Jizɔs bee kue ekɛɛrɛ pya a wee ye nyɔɔnɛ dumɛ kumaloo baɛ dɛmnu pya nɛɛ wee ɛp tɛrɛ lo a le: zue le boo. Baɛ nu ama lu ebɛɛ̄ lokwa i dap tɔɔ̄ dum. Jɛhova ebee dap doo kɔ pya a naa taāŋa ye bah aa ɛrɛ zue le boo. Taāwo, a doo kɔ zue le boo a mɔ sa dɔɔ nɛ dɛ̄dɛɛ̄ nɛɛ. (Mat 5:43-45) Jizɔs bee su nu ama tɔŋɛ pya a wee ye nyɔɔnɛ dumɛ kɔ Jɛhova gbī kɔ i tɔgɛ wereloo kumaloo dɛ̄dɛɛ̄ nɛɛ. Ɛrɛgeba sɔ̄ zue mɔ ale boo dɔɔ sa i nɛ ziinɛloo, i dap kɛɛrɛ kɛ̄ Jɛhova i ɛrɛ togatoga wereloo kumaloo doo. Edoba Jɛhova dap i zū kɔ i tɔgɛ dua wereloo ama kumaloo dɛ̄dɛɛ̄ pya nɛɛ tɛ̄maloo ezue ue wa nɛ.

11. Bu mɛ sīdee na nɔ nu akiiloo enuɛ dap i yere mɛm loo a?

¹¹ Jɛhova nɛ i pya nu a i bɛɛ̄ bu namloo. Bu aba lo Ekɔaue Nyɔɔ Egu, Jizɔs bee kɔnage kɔ: “Ɛbaa enuɛ pɛɛ loo bunyɔɔ: ba naa egara eyuu, ale fii nu aā wii, ale bɔŋɛnɛloo nu yerebu nwī-be-gum, kerewo bui Tɛ lo a le li bunyɔɔ gaa wa kpɔā.” Bu kaka, pya nɛɛ Jizɔs aa bee kɔ ue nɛ  bee dap muɛ enuɛ aa pɛɛ bunyɔɔ sɔ̄ a bee wa bip kɔ: “Bɔɔlo buii si du wa ee ni?” (Mat 6:26) Naa ɛp kɛ̄ Jizɔs su wereloo daā kɔ i suā kɔ Jɛhova dap i nɛ pya nu a i bɛɛ̄ bu namloo doo a! (Mat 6:31, 32) Pya nu enɔ a aaloo dɛmnu ama kiisī lo eyere mɛm loo pya zooro Jɛhova a yira agɛrɛ. Ziī zege wuga nɛɛwa a wee sɛmdee lo a tɔɔ̄ Spain bee ɛrɛ e’ɔaloo nyɔɔbee a naa bee muɛ kɛ̄ etɔɔ̄ a lee. Mɛ a bee sīkɛ ɛrɛ mɛm sɔ̄ a muɛ pya enuɛ a gaa de nu. Alɛ bee kɔ, “Sɔ̄ m muɛ pya enuɛ ama, a nyɛŋia mɛ bu kɔ Jɛhova kuūdɛɛ̄loo pya nu a bee dɛm le kɔ a gaa le kuūnage dɛɛ̄ loo mda.” Bu kaka, lo wuga nɛɛwa bee muɛ tɔ etɔɔ̄.

12. Dookɛ̄ Matiu 10:29-31 kɔ doo, ena nwī-kpɛɛ̄ i tɔgɛ akiiloo Jɛhova a?

¹² Ziī ziī ii kuī loo Jɛhova. Lɛɛ Jizɔs gae yere pya a wee ye nyɔɔnɛ dumɛ kɔ ba a kii wee zue ue, a bee wa yerebah nɛ kɔ ba a dap be eebah bɔɔ a aaloo gbanasī. (Buū Matiu 10:29-31.) A bee doo wo tɛ̄maloo ekɔ nu akiiloo ziī enuɛ pya Izrɛl wee suāloo, lo a le nwī-kpɛɛ̄. Pya enuɛ ama naa wee si gbɛnɛ kpugi bu dee Jizɔs. Mɛ a bee kɔ nɛ pya a wee ye nyɔɔnɛ dumɛ kɔ: “Ziī aba naale ewɛadɔ kɛnɛkɛ̄ lo a le bui Tɛ naa suā.” Lɛɛ a kɔ yereloo kɔ: “Bɔɔlo bui si du eenyɔɔ booboo nwī-kpɛɛ̄.” Nyɔɔwo Jizɔs bee doo kɔ pya a wee ye nyɔɔnɛ dumɛ a suā kɔ Jɛhova tɔgɛ nia loo ziī ziī aba, nu anua ba naale e’ɛrɛ bɔɔ loo tɛ̄ŋaloo lo. Pya a wee nyɔɔnɛ dumɛ Jizɔs bee dap nyɛŋiabu pya ue Jizɔs bee wa kɔ nɛ sɔ̄ ba muɛ nwī-kpɛɛ̄ a gaa pɛɛ sɔ̄ ba le uwe zue ue bie ziī ziī buɛ̄. Ɛrɛgeba sɔ̄ o muɛ ziī nwīgbagbara enuɛ, nyɛŋiabu kɔ Jɛhova tɔgɛ nia loo taɛ olo, nyɔnɛbee o “si du eenyɔɔ booboo nwī-kpɛɛ̄.” Tɛ̄maloo yerebah Jɛhova oo le e’ɛrɛ bɔɔ sɔ̄ o kpesī gbanasī.—Yɔɔ 118:6.

13. Ena eyerebah i nɛ kɔ i dap nɔ nu aāloo pya nu alu edɛm a?

¹³ I dap nɔ gbɛnɛ-edo pya dɔɔ̄na nu akiiloo Jɛhova tɛ̄maloo nu alu edɛm. Bu mɛ sīdee? Tuatua, alu ebɛɛ̄ kɔ i su sɔ̄ ɛma pya nu alu edɛm. Lɛɛ i kɛɛrɛ pya nu a i tɔgɛ akiiloo Jɛhova. Naale e aadee i dap waɛbah kɔ i wee doo wo dɛ̄dɛɛ̄ sɔ̄. Ziī wuga nɛɛwa a kura Géraldine alu Cameroon kɔ: “Nyɔɔbee m wee tɔɔ̄ bu gbɛnɛ buɛ̄ a, a naa wee mɛ aadee waɛbah lo e’ɛp pya nu a bee lu edɛm.” Ziī nɛɛ kanɛɛ a kura Alfonso baatɛ̄ kɔ, “M enɔā kɔ alu ebɛɛ̄ kɔ m nɔɔ sɔ̄ lo e’ɛp pya nu Jɛhova dɛm sa ɛrɛ ekɛɛrɛ nyɔɔ pya nu a mɛ tɔgɛ a ye kiiloo.”

14. Ena Devid bee nɔ sɔ̄ a ɛrɛ ekɛɛrɛ nyɔɔ pya nu Bari dɛm a?

¹⁴ Devid bee kɛɛrɛ nu akiiloo pya nu  Bari dɛm kaāna. A bee kɔ nɛ Jɛhova kɔ: “Sɔ̄ m ɛp dɛ̄dɛɛ̄ o bunyɔɔ, lo tam dɛ̄dɛɛ̄ o nwībah, enɔɔ le dɛ̄dɛɛ zina lo o bee kwa sere; ena nɛɛ a, kɔ olo yere ye bu ekɛɛrɛ a?” (Yɔɔ 8:3, 4) Bu kaka, sɔ̄ Devid bee ɛp bunyɔɔ uunɛ, naa bee tɔgɛ nia loo aba kɛ̄ pya nu a le bunyɔɔ lu nyɛŋia doo, mɛ a bee ɛrɛnage ekɛɛrɛ nyɔɔ pya nu gbo zina ye tɔgɛ akiiloo Bari. A bee muɛ kɛ̄ Jɛhova lu gbɛnɛ doo. A ɛrɛnage sɔ̄ Devid bee ɛrɛ ekɛɛrɛ nyɔɔ kɛ̄ ye ekpaloo bee nyim kina kina bie bu ye ka doo. Kuma sɔ̄ a ɛrɛ ekɛɛrɛ nyɔɔ pya nu ama, a bee agɛrɛbah tɔgɛ nia loo kɛ̄ Jɛhova ɛrɛ suānu doo.—Yɔɔ 139:14-17.

15. Naa nɛ edoba a tɔgɛ kɛ̄ pya elap dogo Jɛhova sira bu dɛmnu doo. (Le-yɔɔ 148:7-10)

¹⁵ Doodoo Devid, a ɛrɛ gbɛnɛ-edo nu alu edɛm a i waɛloo i dap ɛrɛ ekɛɛrɛ nyɔɔ. Lo o ɛp pya nu a le kɛ̄ o tɔɔ̄, eyerebah a nɛ kɔ o dābeeloo gbɛnɛ-edo pya elap dogo Jɛhova leere. Bu edoba, sɔ̄ zue a zia, o dap suā kɛ̄ Jɛhova ɛrɛ ekpo doo. (Jer 31:35) Ɛrɛ ekɛɛrɛ nyɔɔ kɛ̄ Jɛhova suānu doo ɛrɛgeba sɔ̄ o muɛ ziī enuɛ̄ a gaa top ye esaɛ tɔ. Kɛɛrɛ kɛ̄ Jɛhova gbī kɔ i ɛrɛ ekpeloo sɔ̄ i muɛ nwiī gbo aa su ye zū biā bii doo, sa o doo yaa Jɛhova ɛrɛgeba sɔ̄ o muɛ wa a gaa nyɔɔnɛ ye nwiī bira bii. I ɛrɛ gbɛnɛ-edo dee a i kpaānɛ i dap su nɔā nu akiiloo Jɛhova nyɔɔbee dɛ̄dɛɛ̄ nu a bee dɛm leera ye, lo a kuī, le lo a tera, lo a i waɛloo le lo a le kɛ̄ a binia.—Buū Le-yɔɔ 148:7-10.

16. Ena i biaɛfii lo edoo a?

¹⁶ Ilii Bari suānu ee dɛ̄dɛɛ̄ nɛɛ, ɛrɛ wereloo sa ɛrɛ ekpo, e dɛ̄dɛɛ̄ nu a dɛm kpedɛɛ̄. Lo i ɛp leere, i muɛ kɔ dɛ̄dɛɛ̄ pya elap dogo ama sira bu nu a bee dɛm. Doraa mɛ i su sɔ̄ ɛā ekɛɛrɛ nyɔɔ pya nu alu edɛm sa kɛɛrɛbu nu ba i tɔgɛ akiiloo Jɛhova. Lo i doo wo, i tɔɔ̄ waɛloo nɛɛ a bee i dɛm kaāna. (Jem 4:8) Bu lo ekobee ue enyɔɔnɛ, i muɛ kɛ̄ pya tɛ le ka dap su dɛmnu yeābah nɛ pya wa miɔŋɔ kɔ ba a tɔɔ̄ waɛloo Jɛhova doo.