1-2. (a) Amunu kɛ̄tɔɔ̄ na Pɔɔl bee le bu sɔ̄ a bee ɛm kpa ma pya Ɛfɛsɔs a, e ena anua a bee ɛm kpa ama a? (b) Amunu ebip na i kɔnia a?

 SƆ̄ A bee lu e’aa nɛɛ lɛɛratam Pɔɔl bie tɔ li Rom, a bee yere mɛm loo pya ye wuga bu yira. A naa bee dap wa inaloo sī le sī, nyɔɔwo, a bee wa ɛm lɛta ma. A bee ɛm ziī lo lɛta ma bɔŋanaloo pya Ɛfɛsɔs bu zua 60 ale 61 C.E.—Ɛfɛs 1:1; 4:1.

² Nu alu lop zua lɛɛ a gae lu lo sɔ̄, Pɔɔl bee tɔɔ̄ Ɛfɛsɔs bu pio sɔ̄, zue le yereue sa tɔgɛ nu pya nɛɛ. (Doonu 19:1, 8-10; 20:20, 21) A bee wereloo pya ye wuga kaāna sa bee gbī eyerebah wa nɛ lokwa ba kiisī lo etɔɔ̄ agara nɛ Jɛhova. Mɛ ena anua a bee ɛm nu akiiloo zii le ɛɛdee ma Pya Nɛɛ Kraist alu etɔ̄ nɔɔ̄ bee a? E ena dɛ̄dɛɛ̄ Pya Nɛɛ Kraist dap nɔ aāloo ye zuurabahtɔ̄ ama a? Dooraa i naa kɔnia pya ebip ama.

AĀBU ZII YII BU ƐƐDEE

3. Pya amunu ue a tɔɔ̄dɔ nu na Pɔɔl bee su kɔā ue bu kpa a bee ɛm ma pya Ɛfɛsɔs a?

³ Pɔɔl bee ɛm ma pya Ɛfɛsɔs kɔ: “Nyɔnɛbee ziī sɔ̄ bui bee le bu zii, mɛ nyaawo bui lu ɛɛdee.” (Ɛfɛs 5:8) Pɔɔl su zii le ɛɛdee a tɔɔ̄dɔ nu baātɛ̄ kɛ̄tɔɔ̄ alu kee loo ziī. Dooraa i naa ɛp nu anua Pɔɔl bee kɔ pya Ɛfɛsɔs “bee le bu zii tua sɔ̄.”

4. Bu mɛ sīdee na pya Ɛfɛsɔs bee le bu zii nyɔɔ ekwɔ sīdee taāŋabah a?

⁴ Ekwɔ sīdee taāŋabah. Pya Ɛfɛsɔs lo Pɔɔl bee ɛm kpa ma ama bee le bu ekwɔ sīdee taāŋabah sa aa bee doo edɔɔ̄ lɛɛ ba gae nɔ kaka ue sa lu Pya Nɛɛ Kraist. Tɔ ziī nwībari pya Grik a kura Atɛmis bee le buɛ̄ Ɛfɛsɔs, e  gbɛnɛ-edo nɛɛ a bee le bu nyɔuwe lo sɔ̄ wee ɛp lo tɔ nua ziī gbɛnɛ nu a le kaɛ sa lu nyɛŋia bu yube nyɔuwe. Pya nɛɛ wee kii bu lo tɔ wee taāŋabah nwīnɛɛpie. Pya a wee para kwanu le tɔ̄nu wee ɛrɛ gbɛnɛ-edo kpugi aāloo e’oo pya nwīnɛɛpie ba wee su taāŋabah nwībari Atɛmis ama. (Doonu 19:23-27) Gbaāloo wo, gbɛnɛ-edo pya a bee le buɛ̄ Ɛfɛsɔs bee le pya alu esuāloo nua pya a wee doo edonu.—Doonu 19:19.

5. Bu mɛ sīdee na dogo a naa ɛɛ bee bie pya Ɛfɛsɔs bu zii a?

⁵ Dogo a naa ɛɛ. Buɛ̄ Ɛfɛsɔs bee lu buɛ̄ ba wee doo keekee pɔrɔ dogo, e kɛɛ naa wee wa bɔp loo pya lo dogo. Pya nɛɛ wee kɔgara ue a naa bɔloo bie kɛ̄ pya nɛɛ wee tɔɔ̄ bira bii si-ee, le bie kɛ̄ ba wee tɔɔ̄ taāŋabah wa bari. (Ɛfɛs 5:3) Gbɛnɛ-edo aba ebee “aga doodoo dɛɛ̄-kpa-kop,” lo a kura kɔ ba le doodoo bee “ba naa ɛrɛna lɔgɔ ezialoo.” (Ɛfɛs 4:17-19) Lɛɛ pya Ɛfɛsɔs gae lu Pya Nɛɛ Kraist sa suā nu a lee le nu a bee piya, wa beenyiɛ naa wee wa bege ue sɔ̄ ba doo nu a bee piya, le kɔ ba naa wee kɛɛrɛ nu akiiloo sɛh wa dogo ebɛā Jɛhova ale a naale ebɛā ye. Lo ama bee doo kɔ Pɔɔl a su wa kure pya “wa suānu le bu zii doodoo pya saanɛɛ aāloo dum Bari.”

6. Ena anua Pɔɔl bee kɔ nɛ pya Ɛfɛsɔs kɔ “nyaawo bui lu ɛɛdee” a?

⁶ Kerewo, pio pya nɛɛ Ɛfɛsɔs naa bee bia bu zii. Pɔɔl bee ɛm kɔ “nyaawo bui lu ɛɛdee bu Nɛɛ-a-i-ɛrɛ.” (Ɛfɛs 5:8) Ba esua zuurabahtɔ̄ a le bu Muɛ̄ Ue Bari yere bu wa dogo, lo a le doodoo ɛɛdee wa nɛ. (Yɔɔ 119:105) Ba elɛrabahloo wa ekwɔ sīdee taāŋabah le pya dogo a naa ɛɛ lo ba wee doo. Ba “[elua] pya ba nɔ Bari” sa gaa piiga kaāna lo etaāŋabah Jɛhova sa doo nu e’ɛɛrɛ ye bu.—Ɛfɛs 5:1.

7. Bu mɛ sīdee na ilii kɛ̄tɔɔ̄ bee lo gbɛnɛ-edo Pya Nɛɛ Kraist a bee le Ɛfɛsɔs a?

⁷ Kɛ̄ a lenage doolo loo pio ii, sɔ̄ i sii bee nɔ kaka ue, i bee le bu keekee ekwɔ  sīdee taāŋabah sa gaa doogi pya dogo a naa ɛɛ. Pio ii wee sudɔ bu pya doonu dee seseea lo pya ekwɔ sīdee taāŋabah wee doo; e pio ii wee tɔɔ̄dum a naa ɛɛ. Mɛ sɔ̄ i nɔ nu akiiloo daakuu Jɛhova nyɔɔ nu a lee le nu a bee piya, i bee nyaana i sīdee tɔɔ̄dum. I bee bɔātɛ̄ etɔɔ̄dum a gbaaloo pya ye daakuu. E wo edora kɔ i ɛrɛ gbɛnɛ-edo biī. (Ais 48:17) Kere i gaa kpesī keekee finiabah anyaawo, alu ebɛɛ̄ kɔ i kpooraloo lɛɛloo zii i bee aa bu sa kiisī lo “[ekiā] doodoo miɔŋɔ ɛɛdee.” Bu mɛ sīdee na i dap doo lo ama a?

KPOORALOO LƐƐLOO ZII

8. Dookɛ̄ alu e’ɛm bu kpa Pya Ɛfɛsɔs 5:3-5 doo, ena a bee lu ebɛɛ̄ kɔ pya Ɛfɛsɔs a kpooraloo lɛɛloo a?

⁸ Buū Pya Ɛfɛsɔs 5:3-5. Lokwa Pya Nɛɛ Kraist a bee le Ɛfɛsɔs dap kpooraloo lɛɛloo zii, a bee lu ebɛɛ̄ kɔ ba a kiī pya dogo ebɛā Jɛhova, doodoo kunagā le kɔgara pya ue alu saāŋa. Pɔɔl bee kɔ nɛ pya Ɛfɛsɔs kɔ alu ebɛɛ̄ kɔ ba a kiī pya dogo ama lokwa ba “ɛrɛ kɛ̄tɔɔ̄ bu Buɛ̄-mɛnɛ Kraist le Bari.”

9. Ena anua a bɔloo kɔ i kiī ɛrɛgebah nu a dap doo kɔ i kunagā a?

⁹ Alunage ebɛɛ̄ kɔ ili i kiisī lo ekpooraloo lɛɛloo pya “tam a le bu zii.” (Ɛfɛs 5:11) Aā ziī sɔ̄ yii ziī, pya nu esira tɔgɛ kɔ sɔ̄ ziī nɛɛ kiisī lo e’ɛp, gbaɛ̄tɔ̄, ale kɔgara pya ue alu saāŋa, ale kɔ nu akiiloo pya dogo a naa ɛɛ, edoo kɔ a waɛbah lo nɛɛ lo edoo nu a bee piya. (Jɛn 3:6; Jɛm 1:14, 15) Bie ziī barasī, gbɛnɛ-edo pya wuga nɛɛdam bee yii “gbo” nyɔɔ intanɛt sa wee kɔnia ue bie lo kɛ̄. Tua sɔ̄, gbɛnɛ-edo aba wee kɔ nu akiiloo Jɛhova sɔ̄ ba gaa kɔnia ue. Mɛ sɔ̄ sɔ̄ aa kiisī, ba bee bɔātɛ̄ ekɔgara pya nu a naa bɔloo le nu a naa nia Jɛhova. Ba bee bɔātɛ̄ ekɔ aba nu akiiloo maniākɛ̄. Sɔ̄ sɔ̄ etɛ̄na, gbɛnɛ-edo aba bee kɔ nu a bee doo kɔ ba a yiie bu dum kunagā na pya pɔrɔ pɔrɔ sɔh ba gaa bee kɔe.

10. Mɛ sīdee na Setan gaa piiga lo edag i a? (Pya Ɛfɛsɔs 5:6)

¹⁰ Nyɔuwe Setan gbī edag i kɔ i yiga kɔ dogo Jɛhova kɔ a naa ɛɛ, naa bee piya doo pippip. (2 Pit 2:19) Lo ama naa lu i nyɛŋialoo! Ziī kiāŋana Setan esua daānu bu nyɔɔnyɔɔ sɔ̄ na lo ekwɔɔgɛ pya nɛɛ lokwa ba naa dapna suā kee a le yɛɛ nu a lee le nu a bee piya. (Ais 5:20; 2 Kɔr 4:4) Nu anua a lo gbɛnɛ-edo film, pya nu alu etɔgɛ nyɔɔ tɛlɛvisɔn, le pya nu a le nyɔɔ intanɛt nyimɛ pya nu alu kiiyasī loo pya daakuu Jɛhova. Setan aa gbī edag i kɔ i yiga kɔ pya elap dogo le tɔɔ̄dum a naa ɛɛ lu nu a bɔloo sa kpeloo, le kɔ a naale eyere i muū loo.—Buū Pya Ɛfɛsɔs 5:6.

11. Ena nu a bee siraloo Angela i tɔgɛ akiiloo kɛ̄ a kuī doo lo egbaɛ̄tɔ̄loo zuurabahtɔ̄ a le bu Pya Ɛfɛsɔs 5:7 a? (Ɛpnage foto.)

¹¹ Setan gbī kɔ i yii gbo pya nɛɛ edoo kɔ a aga i bah edoo nu Jɛhova kɔ. Pɔɔl bee yere mɛm loo Pya Nɛɛ Kraist a bee le Ɛfɛsɔs kɔ: “Bui aa wa gbaaloo,” lo a le pya nɛɛ a doo nu a naa nia Bari. (Ɛfɛs 5:7) Kɛ̄adoo, a bɔloo kɔ i nwaɛdɛɛ̄ kaāna ee pya a bee le Ɛfɛsɔs, nyɔnɛbee nii’ee i dap yii gbo pya nɛɛ nyɔɔ intanɛt kere ii wa le kpaɛ̄ sī le sī. Ziī wuga nɛɛwa a kura Angela, a lo a tɔɔ̄ Asia bee muɛ kɛ̄ nyɔɔnɛ pya nɛɛ kɔnia ue nyɔɔ intanɛt dap ɛrɛ pɔrɔ pah nyɔɔ  nɛɛ doo. A kɔ: “A dap lu zaɛ̄, e kinakina a bee gbee na ekɛɛrɛ. Sɔ̄ sɔ̄ aa kiisī, mm bee ɛpna ‘yii gbo’ pya a naa nwadɛɛ̄ daakuu Baibol nua nu a bee piya, a naa bee mɛ luna lɔgɔ nu loo. E kinakina m bee bɔātɛ̄ e’ɛp tɔɔ̄dum a naa nia Jɛhova nua nu a naa bee piya.” Pya kanɛɛ bee yerebah nɛ Angela kɔ a nyaana ye sīdee tɔɔ̄dum. Angela kɔ: “Nyaawo m bie ekɛɛrɛ nyɔɔ Jɛhova le kɛ̄ a kɛɛrɛ nu doo, taā m bie ekɛɛrɛ nyɔɔ nyɔɔnɛ pya nɛɛ kɔnia ue nyɔɔ intanɛt.”

12. Ena eyerebah i nɛ kɔ i tɔɔ̄ nyɔɔ daakuu Jɛhova akiiloo nu a lee le nu a bee piya a?

¹² I ɛrɛ ekiī ekɛɛrɛ nyɔuwe lo a kɔ dogo a naa ɛɛ lu nu a bɔloo. I suā kɔ pya lo elap dogo naa lee. (Ɛfɛs 4:19, 20) A lee i bip aba ii kɔ: ‘M suge nua nu a mɛ kuīloo lo e’ɔbɛ eyii pɔrɔ gbo bie kɛ̄tam, bie tɔkpa, ale yii gbo pya dɔɔ̄na a naa tɔgɛ enwadɛɛ̄ kumaloo pya daakuu Jɛhova ni? Ekɔ m gaa piigage lo etɔɔ̄ nyɔɔ daakuu Jɛhova kere pio nɛɛ gbɛ mɛ ni?’ Dɛɛa nyɔɔ ue a le bu 2 Timɔti 2:20-22, a bɔnageloo kɔ i nwaɛdɛɛ̄ sɔ̄ i gaa sagɛ pya gbo i yii bu bɔŋanaloo. A bɔloo kɔ i suā kɔ pio nɛɛ a le bu bɔŋanaloo naale edap i yerebah nɛ kɔ i kiisī lo esitam nɛ Jɛhova bu bɔ ture nyiɛ loo.

KIĀ “DOODOO MIƆŊƆ ƐƐDEE”

13. Ena kiā doodoo “miɔŋɔ ɛɛdee” kura a? (Pya Ɛfɛsɔs 5:7-9)

¹³ Pɔɔl bee yere mɛm loo Pya Nɛɛ Kraist ba bee le Ɛfɛsɔs kɔ a naale aba kɔ ba a aabu zii, mɛ ba a kiisī lo “[ekiā] doodoo miɔŋɔ ɛɛdee.” (Buū Pya Ɛfɛsɔs 5:7-9.) Ena lo ama kura a? Nu a kura na kɔ i tɔɔ̄dum doodoo kaka Pya Nɛɛ Kraist dɛ̄dɛɛ̄ sɔ̄. Ziī sīdee i dap doo lo ama na lo ebuū Baibol sa nɔ pya i kpa a dɛɛa nyɔɔ Baibol aā ziī sɔ̄ yii ziī. Alu ebɛɛ̄ kaāna kɔ i nyɔɔnɛ edobah le pya tɔgɛnu Jizɔs Kraist, nɛɛ alu “ɛɛdee nyɔuwe.”—Jɔn 8:12; Kam 6:23.

14. Mɛ sīdee na kaɛ edɔɔ̄ edap i yerebah nɛ a ?

¹⁴ I gbīnage yerebah a aaloo kaɛ edɔɔ̄ Bari lokwa i dap sere i loo doodoo  “miɔŋɔ ɛɛdee.” Ena anua a? Nyɔnɛbee a aga lo etɔɔ̄ bia ɛɛ bu nyɔuwe dogo a naa ɛɛ mma bu ama. (1 Tɛs 4:3-5, 7, 8) Kaɛ edɔɔ̄ dap i yerebah nɛ kɔ i bebeloo nyɔuwe a naa ɛɛ ama, gbaāloo kɛ̄ ba ɛp nu doo le wa dogo a naa nia Bari. Kaɛ edɔɔ̄ Bari dapnage i yerebah nɛ kɔ i ɛrɛ “le dogo, le kaāna dogo.”—Ɛfɛs 5:9.

15. Pya ena i dap doo lokwa i ɛrɛ kaɛ edɔɔ̄ a? (Pya Ɛfɛsɔs 5:19, 20)

¹⁵ Ziī sīdee i dap ɛrɛ kaɛ edɔɔ̄ na tɛ̄maloo eyere kara bara Bari kɔ a nɛ i. Jizɔs bee kɔ Jɛhova gaa le “nɛ kaɛ edɔɔ̄ pya a ye bara.” (Luk 11:13) E sɔ̄ i gbaaloo pya i wuga leera Jɛhova bie enɔānu doonage kɔ i ɛrɛ kaɛ edɔɔ̄. (Buū Pya Ɛfɛsɔs 5:19, 20.) Kaɛ edɔɔ̄ Bari eyerebah i nɛ kɔ i tɔɔ̄ dum a nɛ ka bee Bari.

16. Ena eyerebah i nɛ kɔ i biaɛfii a lee a? (Pya Ɛfɛsɔs 5:10, 17)

¹⁶ Sɔ̄ i ɛrɛ gbɛnɛ biaɛfii edoo bu i dum, alu ebɛɛ̄ kɔ i suā “nu Nɛɛ-a-i-ɛrɛ gbī” sa doo dogo a gbaaloo ye ekɛɛrɛ. (Buū Pya Ɛfɛsɔs 5:10, 17.) Sɔ i gbītɛ̄ pya daakuu Baibol a ɛrɛ nu edoo kiiloo i kɛ̄tɔɔ̄, a kura kɔ i gaa gbī ekɛɛrɛ Bari nyɔɔ lo kɛ̄tɔɔ̄. Lo i nyɔɔnɛ pya daakuu Baibol, i biaɛfii elee.

17. Bu mɛ sīdee na i dap su i sɔ̄ daānu leere a? (Pya Ɛfɛsɔs 5:15, 16) (Ɛpnage foto.)

¹⁷ Pɔɔl bee zuuranage bahtɔ̄ Pya Nɛɛ Kraist a bee le Ɛfɛsɔs kɔ ba a su wa sɔ̄ daānu leere. (Buū Pya Ɛfɛsɔs 5:15, 16.) “Nɛɛ pɔrɔ a,” lo a le Pɔrɔ-edɔɔ̄ gbī kɔ i lu kirikiri lo edoo nu nyɔuwe ama gbī lokwa ii ɛrɛ sɔ̄ esiātam nɛ Bari. (1 Jɔn 5:19) Ziī Nɛɛ Kraist dap bɔātɛ̄ esu kponia zɔ, si gbɛnɛ tɔkpa, ale su tam esi nua tuatua ee taāŋabah Jɛhova. Lo a doo wo, a kura kɔ lo nɛɛ e’ina aa kɛɛrɛ nu dookɛ̄ pya nɛɛ a le bu nyɔuwe kɛɛrɛ nu doo. Bu kaka, pya nu ama naa bee piya, kerewo, ii ɛrɛ esu wa nua  tuatua bu i dum. Lokwa i dap kiā “doodoo miɔŋɔ ɛɛdee,” alu ebɛɛ̄ kɔ i ‘su i sɔ̄ daānu leere’ sa su ekɛɛrɛ nɛ nu a kuī kaāna.

18. Ena Donald bee doo lokwa a dap su ye sɔ̄ daānu leere a?

¹⁸ Su ɛrɛgebah dee a a kpaānɛ siātam nɛ Jɛhova leere. Nu Donald a tɔɔ̄ South Africa bee doo lo. A kɔ: “M bee ɛp na kɛ̄tɔɔ̄ sa bara Jɛhova kɔ a yerebah mɛ nɛ lokwa m dap nyimɛ na esiatam zue ue yereloo. M bee yere kara kɔ Jɛhova a doo kɔ m ɛrɛ tam enɛ mɛ sɔ̄ lo ezuema ue. Tɛ̄maloo ye yerebah, m bee muɛ tam a mɛ nɛ sɔ̄. Lo sɔ̄, na wa le mm bee gbaa yii bu tam mmɛɛ sɔ̄.”

19. Bu mɛ sīdee na i dap kiisī lo ekiā doodoo “miɔŋɔ ɛɛdee” a?

¹⁹ Bu kaka, kpa Pɔɔl bee ɛm ma pya Ɛfɛsɔs bee wa yerebah nɛ kɔ ba a tɔɔ̄dum doodoo Pya Nɛɛ Kraist. E zuurabahtɔ̄ a aabah Bari ama dapnage yerebah nɛ ili. Dookɛ̄ i enɔā doo, a dap i yerebah nɛ kɔ i su suānu saŋɛ pya nu ɛā ekpeloo le pya gbo i yii. A yerenage bah i nɛ kɔ i wee buū sa nɔ Baibol lokwa ɛɛdee kaka ue i baɛloo bu dɛ̄dɛɛ̄ nu i doo. E a doo kɔ i muɛ kɛ̄ kaɛ edɔɔ̄ lu ebɛɛ̄ doo, lo a i yerebah nɛ kɔ i ɛrɛ pya elap dogo a lee. Lo i su pya zuurabahtɔ̄ Pɔɔl ama yerebu dogo, eyerebah i nɛ kɔ i biaɛ nu fii leere sa doo pya nu a nia Jɛhova. Tɛ̄maloo edoo pya nu ama, i gaa le aa bu zii lo nyɔuwe ama sa tɔɔ̄ bia bu ɛɛdee!