1. Pya amunu leelee na i ɛrɛ nyɔɔbee i le bu bɔŋanaloo Jɛhova a?

 ALU kaāna le nu a i siraloo kɔ i le yɛɛ pya a le bu bɔŋanaloo Jɛhova bu pya lo kpɛdumɛ dee etɛɛrɛloo mma bu ama. Kuma sɔ̄ kɛ̄tɔɔ̄ nyɔuwe ama aa gbedee a, Jɛhova nɛ i ziī butɔ bu edɔɔ̄ a le bu gbaaloo, lo pya wuga nɛɛdam le nɛɛwa le bu. (Yɔɔ 133:1) Jɛhova yerebah i nɛ kɔ ziī ziī pya i butɔ a le bu ɛɛbu le gbaaloo. (Ɛfɛs 5:33–6:1) A nɛnage i suānu i su tāma pya i taāŋa sa kiisī lo elebu ɛɛbu.

2. Ena i ɛrɛ edoo a, e ena anua a?

² I ɛrɛ ebiibahkɛ̄ kaāna lokwa i dap kiisī lo etaāŋabah Jɛhova bu bɔ ture nyiɛ loo. Ena anua a? Nyɔnɛbee pio nu pya dɔɔ̄na kɔ ale nu ba doo dap i biirebu. Pya ilii tɛɛ̄ ekwɔ dapnage i ɔɛloo, eetɔɔ̄ na sɔ̄ i bialoo tɛɛ̄ lo ekwɔ aā ziī sɔ̄ yii ziī. Lu ebɛɛ̄ kɔ̄ i biibahkɛ̄ bu i esiatam nɛ Jɛhova (1) sɔ̄ ziī wuga nɛɛdam ale nɛɛwa i biirebu, (2) sɔ̄ i dam ale i wa doo ziī nu ii bee ɛmadɛɛ̄ sa i biirebu (3) sɔ̄ pya ilii tɛɛ̄ ekwɔ i ɔɛloo. Bu ekobee ue ama, i nɔ nu akiiloo ziī ziī pya kɛ̄tɔɔ̄ ama. I kɔnianage nu i dap nɔ aāloo ziī nɛɛ a bee bɔ ture nyiɛ loo a le bu Baibol.

BIIBAHKƐ̄ SA BIA BU BƆ TURE NYIƐ LOO SƆ̄ ZIĪ WUGA A BIIREBU

3. Amunu taāŋa na pya nɛɛ Jɛhova aa kpesī a?

³ Taāŋa. Pio pya i wuga bu bɔŋanaloo ɛrɛ pio elap a dap i biirebu. Pio aba dap doo pio nu ii bee ɛmadɛɛ̄ lo a i biirebu ale aara i bu sīdee a naa lee. Pya kanɛɛ dap tɛɛ̄ ekwɔ. Pya taāŋa ama dap doo kɔ pio nɛɛ a kɛɛrɛ kɔ: “Lege bɔŋanaloo Bari na ama?” E wo dap doo kɔ ba a ɔbɛ egbaaloo ɛrɛgebah nɛɛ a bee wa biirebu ale ɔbɛ esi enɔānu, taā ba kiisī lo enyɔɔnɛ pya wa wuga nɛɛdam le nɛɛwa taāŋabah Bari “bu aba beenyiɛ.” (Zef 3:9) Suānu lege bu dua nu a  le doo wo ni? Doraa i naa ɛp nu i dap nɔ aāloo ziī nɛɛ a le bu Baibol lo a bee tɛɛ̄bu dua kɛ̄tɔɔ̄ a le doo wo.

4. Pya amunu taāŋa na nɛɛ lɛɛratam Pɔɔl bee kpesī a?

⁴ Edobah a le bu Baibol. Nɛɛ lɛɛratam Pɔɔl bee muɛ nu a tɔgɛ kɔ pya ye wuga nɛɛdam le nɛɛwa naa mma. Bu edobah, nwīgbagbara sɔ̄ aā sɔ̄ a bee kiiya sa lu Nɛɛ Kraist, pio pya a bee le bu bɔŋanaloo naa bee yiga kɔ elua nɛɛ a gaa nyɔɔnɛ dumɛ Kraist. (Doonu 9:26) Sɔ̄ esaa, pio nɛɛ bee ye gɔmgɔm loo sa kɔ pɔrɔ pɔrɔ nu ye kumaloo lo egbee ye bee. (2 Kɔr 10:10) Pɔɔl bee muɛnage sɔ̄ ziī nɛɛ kanɛɛ bee doo nu a dap doo kɔ pya dɔɔ̄na a le bu bɔŋanaloo a dɔ. (Gal 2:11, 12) E a ɛrɛ nu ziī koo Pɔɔl a kura Maak, lo a ye tɔɔ̄ waɛloo kaāna bee doo, lo Pɔɔl naa bee ɛmadɛɛ̄ kɔ edap ye dooeloo. (Doonu 15:37, 38) Pɔɔl ebee dap le nyɔɔ pya kɛ̄tɔɔ̄ ama sa ɔbɛ egbaaloo ɛrɛgebah pya a bee ye biirebu. Mɛ Pɔɔl naa bee doo wo. A bee kiisī lo esu le dɛɛ̄ ɛma pya ye wuga nɛɛdam le nɛɛwa sa kiinagesī lo etaāŋabah Jɛhova bu bɔ ture nyiɛ loo. Ena a bee yerebah nɛ Pɔɔl kɔ a biibahkɛ̄ sa bia bu bɔ ture nyiɛ loo a?

5. Ena a bee yerebah nɛ Pɔɔl kɔ a kiisī lo etɔɔ̄ waɛloo pya ye wuga nɛɛdam le nɛɛwa a? (Pya Kɔlɔsi 3:13, 14) (Ɛpnage foto.)

⁵ Pɔɔl bee wereloo pya ye wuga nɛɛdam le nɛɛwa. Wereloo Pɔɔl bee wa ɛrɛ kumaloo bee ye yerebah nɛ kɔ a bie ekɛɛrɛ nyɔɔ wa lele elap dogo, taā a bie dɛɛ̄ nyɔɔ aba pya kɛ̄ ba dɔ kiikɛ̄. Wereloo ama bee ye yerenage bah nɛ kɔ a aaloo nɛ pya dɔɔ̄na dookɛ̄ alɛ bee su alɛɛ bah ɛma bu Pya Kɔlɔsi 3:13, 14 doo. (Buū.) Naa kɛɛrɛbu kɛ̄ Pɔɔl bee aaloo pɔrɔ nɛ Maak doo. Kereadoo Maak bee aa dumɛ Pɔɔl sɔ̄ a bee si uwe zue ue dɔɔ̄na edo, a naa bee biea lo saŋ nyiɛ. Sɔ̄ esaa, sɔ̄ Pɔɔl bee ɛm kpa ma bɔŋanaloo a bee le Kɔlɔsi, a bee leera Maak kɔ alu le nɛɛ a ye nyɔɔnɛ siniātam sa ye “agɛrɛ nyiɛ.” (Kɔl 4:10, 11) Sɔ̄ Pɔɔl bee le kpɔgɔrɔ li Rom, a bee kɔ Maak alu wee yerebah ye nɛ. (2 Tim 4:11) Bu kaka, Pɔɔl bee aaloo pɔrɔ nɛ pya wuga, sa wa yiiloo. Ena i dap nɔ aāloo Pɔɔl a?

6-7. Bu mɛ sīdee na i dap kiisī lo etɔgɛ wereloo kumaloo pya i wuga nɛɛdam le nɛɛwa kaɛlɛɛ wa tɛɛ̄ ekwɔ a? (1 Jɔn 4:7)

⁶ Nu i nɔ aāloo. Jɛhova gbī kɔ i kiisī lo etɔgɛ wereloo kumaloo pya i wuga nɛɛdam le nɛɛwa. (Buū 1 Jɔn 4:7.) Lo a sira kɔ ziī wuga nɛɛdam ale nɛɛwa naa aara i bu sīdee a bɔloo doodoo Nɛɛ  Kraist, ii lee aadee kɔ kpaɛ̄ kɔ a naa gaa nyɔɔnɛ zuurabahtɔ̄ a le bu Baibol. (Kam 12:18) Bari tɔgɛ wereloo kumaloo pya ye zooro kaɛlɛɛ pya i tɛɛ̄ ekwɔ. Kere sɔ̄ i tɛɛ̄ ekwɔ, a kiisī lo elu i gbo sa naa lɛɛ i bahloo bie. (Yɔɔ 103:9) Ɛp kɛ̄ a kuī kɔ i kiisī lo enɔ i Tɛ a para e’aaloo pɔrɔ doo a!—Ɛfɛs 4:32–5:1.

⁷ Nyɛŋianage bu kɔ, kuma sɔ̄ kuma aa tɔɔ̄ waɛloo kɛ̄ a, alu ebɛɛ̄ kɔ i kiisī lo etɔɔ̄ waɛloo pya wuga nɛɛdam le nɛɛwa. I tɛ̄ŋaloo dap le aa yiiloo. Dap lu eyere i tɔkpɔgɔrɔ nyɔɔ i yira. Lo a sira doo wo, i gbī pya i wuga nɛɛdam le nɛɛwa eekɛ̄ i wee doo. (Kam 17:17) Naa kɛɛrɛbu loo nu a bee siraloo ziī nɛɛ kanɛɛ a le Spain ye bee kura Josep. a Bee lu e’aa ye gbaāloo pya dɔɔ̄na wuga nɛɛdam yere kpɔgɔrɔ nyɔɔ wa tɔɔ̄ kee. Josep bee kɔ: “Bie tɔkpɔgɔrɔ, a wee waɛ kɔ i biirebu ziī pio sɔ̄, nyɔɔbee i le kpaɛ̄ ziī dɛ̄dɛɛ̄ sɔ̄. I bee tāma ɛnia ii sa aaloo nɛ ziī. Lo ama bee doo kɔ i dap tɔɔ̄ bu gbaaloo sa kpega ɛnia ii nyɔɔbee pio pya i bee gbaa tɔɔ̄ bu aba tɛm bie lo tɔkpɔgɔrɔ naa bee le pya a gaa taāŋabah Jɛhova. A ɛrɛ sɔ̄ muū bee mɛ yii bah, sa mm bee dapna su lo bah daā lɔgɔ nu. Mɛ a bee le ziī wuga bu yira na a bee log na bɛloo sa mɛ kuūdɛɛ̄loo a. A bee lu etɔgɛ kaka wereloo mɛ kumaloo taɛ sɔ̄ a bee lu ebɛɛ̄ mɛ loo.” Ɛp kɛ̄ a lee sɔ̄ i nwaabah kwa taāŋa a yii yɛɛ ɛnia ii doo a!

BIIBAHKƐ̄ SA BIA BU BƆ TURE NYIƐ LOO SƆ̄ O DAM ALE O WA A BIIREBU

8. Amunu taāŋa na pya e’iya ziī wee kpesī a?

⁸ Taāŋa. Naa ɛrɛ lɔgɔ iya dam le wa a naa wee ɛrɛ taāŋa. Baibol ebee kɔ sere kɛ̄ kɔ pya a iya ziī e’ɛrɛ “etɛɛrɛloo.” A naa gɔ̄ egā loo. (1 Kɔr 7:28) Ena anua a? Nyɔnɛbee baɛ aba naa mma, e wa elap dogo, pya nu a wa nia le nu a naa nia wa lu kee loo ziī. Ba aa keekee butɔ. E lo ba aa keekee edo, wa sīdee doonu dap lu kee loo ziī. Sɔ̄ sɔ̄ aa kiisī ba dap bɔātɛ̄ emuɛ pya elap ba naa bee muɛ bu ɛnia aba lɛɛ ba gae iya ziī. Pya nu ama dap tɛrɛ taāŋa. E taā ziī ziī aba muɛ wa tɛɛ̄ ekwɔ sa piiga lo esitam nyɔɔ, ba dap bɔātɛ̄ ebege ue ɛnia aba sa kɛɛrɛ kɔ aaloo ziī na ekwa lo taāŋa a. Mɛ aaloo ziī doo wo ekwage lo taāŋa ni? b Doraa i nɔ nu aāloo ziī nɛɛ alu ekɔ nu kumaloo bu Baibol, lo a bee kiisī lo e’egerebu kereadoo ye dam bee bee piya yeeke.

9. Amunu taāŋa na Abigail bee kpesī a?

⁹ Edobah a le bu Baibol. Dam Abigail bee le Nabal, e gbara ama bee lu nɛɛ a agabah sa ɛrɛ pɔrɔ dum. (1 Sam 25:3) Bu kaka, Abigail bee mɔ̄na saadɛɛ̄ bie bah gbara ama. Ekɔ Abigail bee ɛrɛge dee lo e’aaloo ye dam ama ni? Aiī. Dee bee ye kpaānɛ sɔ̄ Devid le pya ye nɛɛ bee lu wee fɛ ye dam nyɔɔ kɛ̄ a bee wa gbɛ doo. (1 Sam 25:9-13) Abigail ebee dap teera sa lɛɛbahloo Devid kɔ a fɛ Nabal. Mɛ a naa bee doo wo, taāwo, a bee taāŋaloo Devid kɔ aa ye fɛ. (1 Sam 25:23-27) Ena anua Abigail bee doo wo a?

10. Ena anua Abigail naa bee teera aaloo ye dam a?

¹⁰ Abigail bee wereloo Jɛhova sa nwadɛɛ̄  pya ye daakuu nyɔɔ iya dam le wa. Baɛbaɛ beenyiɛ naale loo kɔ a bee suā nu Bari bee kɔ nɛ Adam le Iv sɔ̄ a bee wa su gbaloo ziī nua dam le wa. (Jɛn 2:24) Abigail bee suā kɔ Jɛhova ɛp nɔɔnɔɔnu iya dam le wa nua nu a le kaɛ. A bee gbī edoo nu a nia Bari, e wo bee ye zū kɔ a doo ɛrɛgebah nu a dap doo lo ekpɔā ye dam le dɛ̄dɛɛ̄ pya ye butɔ. A naa bee pee sɔ̄ lo edoo dogo lokwa Devid naa fɛ Nabal. A bee bara aaloo nyɔɔ pɔrɔ a naa bee si. Bu kaka, Jɛhova bee wereloo wa a bee ɛrɛ e’agaloo sa naa gbī aba alɛɛ leeloo ama. Ena pya wa le pya dam edap nɔ aāloo edobah Abigail a?

11. (a) Ena Jɛhova ɛmadɛɛ̄ aābah pya e’iya ziī a? (Pya Ɛfɛsɔs 5:33) (b) Ena o nɔ aāloo kɛ̄ Carmen bee piiga lo ekpɔā ye iya dam le wa doo a? (Ɛpnage foto.)

¹¹ Nu i nɔ aāloo. Jɛhova nɛ lok pya e’iya kɔ ba a nwadɛɛ̄ nɔɔnɔɔnu iya dam le wa sa ba aa aaloo ziī kereadoo wa dam ale wa wa agabah. A ɛɛrɛbu Bari kaāna sɔ̄ a muɛ pya e’iya ziī a gaa piiga lo ekwa wa taāŋa, sa tɔgɛ wereloo a naa lu baɛsī le enwadɛɛ̄ kumaloo ɛnia aba. (Buū Pya Ɛfɛsɔs 5:33.) Naa kɛɛrɛ nu akiiloo edobah Carmen. Sɔ̄ nu alu ini’ī zua etɛ̄na aā sɔ̄ a bee iya dam, a bee bɔātɛ̄ enyɔɔnɛ Pya Ekeebee Jɛhova nɔ nu, e sɔ̄ sɔ̄ aa kiisī, a bee liamaā. Lo wuga nɛɛwa kɔ: “Na biaɛfii naa bee nia na dam doo pippip. Bu ye bee biira kɔ m aa su sɔ̄ m bee ye tɔ̄maekpaɛ̄ kuma enɔānu sa siā tam nɛ Bari. A bee mɛ gbɛ sa mɛ kɔ nɛ kɔ elɛae mɛ bah.” Kaɛlɛɛ dɛ̄dɛɛ̄ pya nu ama, Carmen naa bee teera aaloo ye dam. Bu 50 zua, a bee piiga lo ewereloo sa nwadɛɛ̄ ye dam. Carmen kɔ yereloo kɔ: “Sɔ̄ sɔ̄ aa kiisī, m bee sikɛ̄ piiga lo edābeeloo kɛ̄ nu tɔɔ̄loo na dam doo, sa ye kɔ ue nɛ bu enwadɛɛ̄ le fɛgɛ. M bee piiga lo edoo ɛrɛgebah nu m dap doo lokwa i iya dam le wa lee nyɔɔbee m suā kɔ Jɛhova ɛp iya dam le wa nua nu a le kaɛ. Mm bee teera aaloo na dam nyɔɔbee m wereloo Jɛhova.” c Lo taāŋa aakɛ̄ bu o iya dam le wa, dɛrɛ nyiɛ nyɔɔ Jɛhova kɔ eyerebah a nɛ kɔ o egerebu sa tāma.

BIIBAHKƐ̄ SA O AA ƆBƐ ETAĀŊABAH JƐHOVA SƆ̄ O SI GBƐNƐ PƆRƆ

12. Pio ena edap i siraloo lo i si gbɛnɛ pɔrɔ a?

¹² Taāŋa. Lo i si gbɛnɛ pɔrɔ, a dap i ɔɛloo kaāna. Baibol kɔ pɔrɔ i si dap doo kɔ i beenyiɛ a “baara sa ɛrɛ ekiɛ̄nu.” (Yɔɔ 51:17) Ziī wuga nɛɛdam a kura Robert bee le aa piiga aadee lokwa a nyim tura  lo elu nɛɛ yerebahtam. Kerewo, a bee si gbɛnɛ pɔrɔ, e a bee muɛ kɔ gbanialoo a le yɛɛ Jɛhova le ɛɛ naa lena le. Robert kɔ: “Sɔ̄ m esuā loo mɛ sa muɛ kɔ m edora kaāna piya nu, na ekɛɛrɛ beenyiɛ bee bɔātɛ̄ enɛ mɛ taāŋa. Sɔ̄ sɔ̄ aa kiisī a bee mɛ nɛ taāŋa yeekɛ̄. M bee yere kara sa to loo Jɛhova. M bee kɛɛrɛ kɔ Bari naale edāna na kara doo pippip nyɔnɛbee m elɔgara ye.” Lo i si gbɛnɛ pɔrɔ, i beenyiɛ dap i nɛ taāŋa mmɛ kɛ̄ i bɔātɛ̄ ekɛɛrɛ kɔ Jɛhova elɛra i bahloo sa ii le edabena ye taāŋabah. (Yɔɔ 38:4) Lo ebee a tɔɔ̄loo doo wo, naa kɛɛrɛ nu akiiloo ziī nɛɛ Baibol kɔ nu kumaloo, lo a bee biibahkɛ̄ taāŋabah Jɛhova kaɛlɛɛ kɔ a bee si gbɛnɛ pɔrɔ.

13. Amunu gbɛnɛ pɔrɔ na nɛɛ lɛɛrɛtam Pita bee si a, e ena a bee doo kɔ a si lo pɔrɔ a?

¹³ Edobah a le bu Baibol. Kpɛdumɛ uunɛ lɛɛ a gae lu efɛ Jizɔs, nɛɛ lɛɛratam Pita bee tɛɛ̄ gbɛnɛ-edo ekwɔ, e wo bee doo kɔ a si gbɛnɛ pɔrɔ bu kpɛdumɛ. Tuatua, Pita bee dɛrɛ nyiɛ nyɔɔ ye loo yeekɛ̄ sa kɔ kere pya dɔɔ̄na nɛɛ lɛɛratam teera bie Jizɔs, alɛ naale e’aae ye loo. (Maak 14:27-29) Eree baɛ, sɔ̄ ba bee le bu gɔh Gɛtsemani, Pita naa bee dap tɔɔ̄ yeere, a bee daa gbɛnɛkpo sɔ̄. (Maak 14:32, 37-41) E sɔ̄ gbɛnɛ eku nɛɛ bee aara nu nɔ̄ nua wee aa Jizɔs, Pita bee ye teera bie. (Maak 14:50) Bu kpɛdumɛ, Pita bee anna Jizɔs taa sɔ̄, sa yiranage yii dɛrɛ nyɔɔ kɔ a naa suāeloo Jizɔs. (Maak 14:66-71) Pita bee doo dogo doodoo wa sɔ̄ a bee suā kɔ esiae gbɛnɛ pɔrɔ ni? A bee ye kiɛ̄ sa a bee to gbɛnɛ to. Naadabah a bee kɛɛrɛ kɔ epeae sa naa lenaedɛɛ̄ lɔgɔ nu. (Maak 14:72) Naa kɛɛrɛ kɛ̄ a bee tɔɔ̄loo Pita doo sɔ̄ a bee lu efɛ Jizɔs sɔ̄ pio awa etɛ̄na aā sɔ̄ a bee ye anna. Bu kaka, Pita bee kɛɛrɛ kɔ a naa lenaedɛɛ̄ lɔgɔ nu doo pippip!

14. Ena a bee yerebah nɛ Pita kɔ a kiisī lo etaāŋabah Jɛhova a? (Ɛp foto a le nyɔɔ .)

¹⁴ A ɛrɛ pio nu a bee yerebah nɛ Pita kɔ a kiisī lo etaāŋabah Jɛhova. A naa bee tɔɔ̄ aba ɛɛ; a bee siloo pya ye wuga bu yira, sa ba bee ye yere mɛm loo. (Luk 24:33) Lo dɔɔ̄na, sɔ̄ Jizɔs e’aara kɛ̄ bu luh, a bee siraloo Pita, e naadabah a bee doo wo lo eyere ye mɛm loo. (Luk 24:34; 1 Kɔr 15:5) Sɔ̄ esaa, taā Jizɔs kɔgara ue Pita, a bee ye nɛ tam. (Jɔn 21:15-17) Pita bee suā kɔ esiae gbɛnɛ pɔrɔ, kerewo a bee piiga lo edoo nu a lee sa naa bee ɔɛloo ye. Ena anua a? Nyɔɔbee a bee suā leere kɔ ye Tɛtɔ Jizɔs lege aa ye wereloo. E pya wuga bu bɔŋanaloo bee kiisī lo eyere  ye mɛm loo. Ena i dap nɔ aāloo edobah Pita a?

15. Ena Jɛhova gbī kɔ i suā leere a? (Le-yɔɔ 86:5; Pya Rom 8:38, 39) (Ɛpnage foto.)

¹⁵ Nu i nɔ aāloo. Jɛhova gbī kɔ i suā leere kɔ a weree i loo sa le kpɛ̄naloo e’aaloo i pɔrɔ i nɛ. (Buū Le-yɔɔ 86:5; Pya Rom 8:38, 39.) Sɔ̄ i si pɔrɔ, i ekɛɛrɛ beenyiɛ wee i bege ue. A lee sa bɔloo sɔ̄ a i bege ue doo wo. Kerewo, ii le ekɛɛrɛ kɔ Jɛhova naa werena i loo ale kɔ a naale e’aanaloo i nɛ. Taāwo, i nwaabah gbī yerebah. Robert i bee kɔ nu akiiloo tua sɔ̄ a kɔ: “Nu anua m bee si gbɛnɛ pɔrɔ na kɔ m bee dɛɛa nyɔɔ aba mm kɔ m dabe be eebah doā-ɛp.” Sɔ̄ esaa, a bee muɛ kɔ alu ebɛɛ̄ kɔ a kɔ nɛ pya kanɛɛ. A bee kɔ: “Aba sɔ̄ m bee kɔ nɛ pya kanɛɛ, m bee muɛ kɛ̄ Jɛhova mɛ wereloo doo. E m bee muɛnage kɛ̄ pya kanɛɛ mɛ wereloo doo. Ba bee mɛ yerebah nɛ kɔ m muɛ kɔ Jɛhova sii mɛ kiī.” Ili dapnage muɛ kɛ̄ Jɛhova i wereloo sa i aaloo nɛ doo, lo a le i kiiya aaloo i pɔrɔ, gbī yerebah sa piiga kaāna lo emuɛ kɔ ii sinakɛ̄ si taɛ lo pɔrɔ dɔɔ̄na sɔ̄. (1 Jɔn 1:8, 9) Lo i suā leere kɔ Jɛhova were i loo sa le kpɛ̄naloo e’aaloo i pɔrɔ i nɛ, ii le e’ɔbɛ etaāŋa ye bah kereadoo i etɛ̄na ekwɔ.

16. Ena anua o biaɛfii lo ebiibahkɛ̄ bu esiatam nɛ Jɛhova a?

¹⁶ Jɛhova ɛp pya epiaga i doo lo etaāŋa ye bah bu kpɛdumɛ dee a aga ama nua nu a ye kuīloo kaāna. Tɛ̄maloo yerebah a aabah Jɛhova, i dap biibahkɛ̄ ye taāŋabah sa bia bu bɔ ture nyiɛ loo kaɛlɛɛ pya i tɛɛ̄ ekwɔ ale tɛɛ̄ ekwɔ pya dɔɔ̄na. I dap kiisī lo ewereloo pya i wuga nɛɛdam le nɛɛwa kere sɔ̄ ba i biirebu. I dap tɔgɛ kɛ̄ wereloo i ɛrɛ loo Bari le enwadɛɛ̄ i ɛrɛ loo nɔɔnɔɔnu iya dam le wa toga doo, tɛ̄maloo edoo ɛrɛgebah nu i dap doo lo ekwa taāŋa a aakɛ̄ bu i iya dam le wa. E lo i si pɔrɔ, i gbī yerebah a aabah Jɛhova, doo pya nu edoo kɔ a aaloo i nɛ sa i wereloo, sa kiisī lo etaāŋa ye bah. I suā leere kɔ Jɛhova enɛ i gbɛnɛ-edo leelee lo a le “ii gbaa” aaloo doo nu a lee.—Gal 6:9.