1. Amunu nu finiabah na dɛ̄dɛɛ̄ ii wee kpesī a?

 ALU ebɛɛ̄ kɔ i biaɛ nu fii ziī ziī biradee. Pio biaɛfii wee waɛ edoo, doodoo nu i de lɔɔrɛ, le sɔ̄ i daa uunɛ. Kerewo, a ɛrɛ pio nu a wee aga ebiaɛfii. Pya nu i biaɛfii dap ɛrɛ pah nyɔɔ i kɛ̄tɔɔ̄ nwanaloo, pya i butɔ, le i gbānialoo kiikɛ̄ Jɛhova le. I gbī kɔ i biaɛfii a dɔbiī i nɛ sa dɔnage biī nɛ pya i butɔ. Elo a kuī eera na bee i gbī kɔ i biaɛfii alu lo a nia Jɛhova.—Rom 12:1, 2.

 2. Pya ena eyerebah a nɛ kɔ o biaɛ nu fii bu sīdee suānu le loo a?

² O dap biaɛ nu fii bu sīdee suānu le loo lo a le o (1) dasī suā dɛ̄dɛɛ̄ nu akiiloo, (2) suā nu alu ekɛɛrɛ Jɛhova akiiloo lo kɛ̄tɔɔ̄, sa(3) ɛrɛ kaāna ekɛɛrɛ kiiloo pya nu o gbī edoo. Bu ekobee ue ama i gaa le kɔnia taa kpog-bee nu alu ebɛɛ̄ kɔ i doo ama, e eyerebah i nɛ kɔ i muɛ kɛ̄ i dap nyimɛ kɛ̄ ebuā bee nyɔɔ nu doo.—Kam 2:11.

DASĪ SUĀ DƐ̄DƐƐ̄ NU AKIILOO

 3. Naa nɛ edobah a tɔgɛ nu anua a lee lo esuā dɛ̄dɛɛ̄ nu akiiloo ziī kɛ̄tɔɔ̄ lɛɛ o gaɛ biaɛ nu fii.

³ Tuatua nu eyerebah a nɛ kɔ o biaɛ nu fii bu sīdee suānu le loo na edasī suā dɛ̄dɛɛ̄ nu a kiiloo nu o gaa gbī ebiaɛfii. Ena anua lo ama lu ebɛɛ̄ a? Naa su kɔ ziī nɛɛ loo aa dumɛ siloo dɔktɔ nyɔɔbee a ɛrɛ gbɛnɛ dumɛloo a ye le loo. Ekɔ lo dɔktɔ enwaagebah biaɛfii pie edoo ye loo sɔ̄ a sii dasī ɛp lo nɛɛ sa ye bip ue ni? Eeye, naale edoo wo. O dap biaɛ nu fii bu sīdee a lee lo o dasī suā  dɛ̄dɛɛ̄ nu akiiloo lo kɛ̄tɔɔ̄. Ena eyerebah a nɛ kɔ o dap doo wo a?

 4. Dookɛ̄ kpa Kam 18:13 kɔ doo, ena o dap doo lo esuā dɛ̄dɛɛ̄ nu akiiloo nu o gaa gbī ebiaɛfii a? (Ɛpnage foto.)

⁴ O dap suā dɛ̄dɛɛ̄ nu akiiloo tɛ̄maloo ebip ebip. Naa su kɔ alu ekue a loo ziī gbaa zɔ̄ŋia lo e’ɛrɛ ekpeloo. O sige ni? Lo a le oo suāloo nɛɛ a le bee lo gbaa zɔ̄ŋia, ale oo suā kɛ̄ alu enɔɔ nu doo, o dap bip pya ebip a doodoo: “Mɛ kɛ̄ na elu e’ɛrɛ lo gbaa zɔ̄ŋia a, e mɛ sɔ̄ na ebɔātɛ̄ a? Ku nɛɛ a ele lo kɛ̄? Mɛɛ na ekuūdɛɛ̄loo pya nu elu edoo bie li a? Ba mɛɛ na esi a? Ena pya nɛɛ edoo bie lo kɛ̄ a? Elu e’ɔ̄ miī a dap būmɛ nɛɛ ni?” Ture loo pya ebip ama eyerebah anɛ kɔ o biaɛ nu fii bu sīdee suānu le loo.—Buū Kam 18:13.

 5. Ena o doo sɔ̄ o ekɛɛrɛbu dɛ̄dɛɛ̄ nu akiiloo sah a?

⁵ Lo dɔɔ̄na, sɔ̄ o esuā dɛ̄dɛɛ nu akiiloo sah, kɛɛrɛ nu akiiloo kaāna. Bu edobah, e lo o suā kɔ pya nɛɛ a naa wee nwadɛɛ̄ daakuu Baibol esi lo gbaa zɔ̄ŋia, ale elu e’ɔ̄ miī a dap būmɛ nɛɛ sa lɔgɔ nɛɛ naale ebaɛbee kɛ̄ ba e’ɔ̄ doo ni ā? O kɛɛrɛ kɔ lo gbaa zɔ̄ŋia elu lo pya nɛɛ edoo dogo ɛrɛgebah kɛ̄ a wa nia doo ni? (1 Pit 4:3) Ale lo sɔ̄ ba sere kɔ lo gbaa zɔ̄ŋia esudɔ edoo kɔ o obia enɔānu ale uwe  zue ue lo dee ni ā? Sɔ̄ o ekɛɛrɛ dɛ̄dɛɛ̄ nu ama sah, ewaɛ a bah ebiaɛ nu fii bu le sīdee. Mɛ a ɛrɛ dɔɔ̄na nu alunage ebɛɛ̄ kɔ o doo. O esuā kɛ̄ pya nu ama a tɔɔ̄ loo doo, mɛ bip oloo kɔ, a tɔɔ̄loo Jɛhova doodoo wa ni?—Kam 2:6.

SUĀ NU ALU EKƐƐRƐ JƐHOVA

 6. Dookɛ̄ kpa Jemes 1:5 kɔ doo, Ena anua i yere kara kɔ Jɛhova a yerebah i nɛ a?

⁶ Bara Jɛhova kɔ a yerebah a nɛ lo esuā nu alu ye ekɛɛrɛ. Jɛhova e yira yii kɔ enɛ i suānu lo ebiaɛ nu fii bu sīdee a ye nia. A wee nɛ dua suānu ama “ bu ɛɛ beenyiɛ ebee bee naale loo.”—Buū Jemes 1:5.

 7. Bu mɛ sīdee na o dap nɔ kɛ̄ Jɛhova kɛɛrɛ nu doo a? Naa nɛ edobah.

⁷ Sɔ̄ o eyere kara bara leredee a aabah Jɛhova sah, ɛp pya sīdee a agara lo kara. Lo enɛ edobah: Lo a le o dag sɔ̄ o gaa kii ziī kɛ̄, o dap bip nɛɛ a le lo kɛ̄ kɔ a yerebah a nɛ. Mɛ o kiāge aa sɔ̄ a sii a agara ue nɛ ni? Eeye. O gbaɛ̄tɔ̄loo kɛ̄ etɔgɛ a dee doo leere. Bu aba lo sīdee, sɔ̄ o ebara Jɛhova kɔ a nɛ a suānu, piiga lo egbī ye ture tɛ̄maloo egbī pya daakuu Baibol a kɔ nu akiiloo o kɛ̄tɔɔ̄. Bu edobah, sɔ̄ o gaa kɛɛrɛ lo o si lo gbaa zɔ̄ŋia a bee lu ekɔ tua sɔ̄ a, o dap kɛɛrɛ bu loo nu Baibol kɔ akiiloo pya gbaa  zɔ̄ŋia pya nɛɛ doo ɛrɛgebah nu a wa nia, pɔrɔ gbānialoo, le ebɛɛ̄ lo esu nu bu edɔɔ̄ nua tuatua ee nu a a nia.—Mat 6:33; Rom 13:13; 1 kɔr 15:33.

 8. Ena o doo lo o gbī yerebah lo esuā nu alu ebɛɛ̄ a? (ɛpnage foto.)

⁸ Pio sɔ̄, a dap lu ebɛɛ̄ kɔ o gbī yerebah lo esuā nu alu ebɛɛ̄. O dap ɛrɛ yerebah a aābah pya wuga nɛɛdam le nɛɛwa a dābeeloo nu. Kerewo, o ɛrɛnage biī aāloo gbītɛ̄nu nyɔɔ oloo. Ɛrɛ gbɛnɛ-edo nu eyerebah i nɛ a le bu pya i kpa, doodoo Research Guide for Jehovah’s Witnesses le Scriptures for Christian Living. Nyɛŋiabu kɔ nu o seea sī na: lo e biaɛ nu fii bu sīdee enia Jɛhova.

 9. Bu mɛ sīdee na i dap suā leere kɔ i biaɛfill e’ɛɛrɛbu Jɛhova a? (Pya Ɛfɛsɔs 5:17)

⁹ I doodoo wa suā kɔ i baɛfii e’ɛɛrɛ bu Jɛhova ni? Tuatua, alu ebɛɛ̄ kɔ i suā yeloo leere. Baibol kɔ “suānu lo Nɛɛ Kaɛ na Suā bu-kɛ̄-ue.” (Kam 9:10) Aiī, kaāna buābee aaloo suāloo pya elap dogo Jɛhova, ye ekɛɛrɛ, le pya nu a wereloo ale pya nu a baaloo. Bip oloo kɔ, ‘Aāloo pya nu m suā akiiloo Jɛhova amunu biaɛfii na m doo lo e’ɛɛrɛ ye bu a?’—Buū Pya Ɛfɛsɔs 5:17.

10. Ena anua daakuu Baibol kuī ee doonu i butɔ ale i barasī a?

¹⁰ I dap doo nu ebiirebu pya dɔɔ̄na pio sɔ̄, nyɔɔbee i gbī edoo nu enɛ ka Jɛhova. Bu edobah, pio pya tɛ le ka a ɛrɛ le ekɛɛrɛ dap gbī kɔ pya wa nwiīnɛɛwa a iya nɛɛ a ɛrɛ kpugi ale nɛɛ ekpɛ gbɛnɛ kpugi wa nɛ kere lo wuga nɛɛdam naa ɛrɛ le gbānialoo kiikɛ̄ Jɛhova le. Bu kaka, ba gbī kɔ alu ekuūdɛɛ̄loo wa nwiīnɛɛwa leere bu namloo, mɛ nɛɛ ama eyeregebah ye nɛ kɔ a ɛrɛ le gbānialoo kiikɛ̄ Jɛhova le ni? Bu mɛ sīdee na Jɛhova ɛp kɛ̄tɔɔ̄ ama a? I gbī ye ture muɛ bu kpa Matiu 6:33. Lo kɛ̄ Jizɔs yere mɛm loo Pya Nɛɛ Kraist kɔ i “dasī gbī ye Buɛ̄-mɛnɛ.” Kerewo i yere ka loo i tɛ le ka sa nɛ enwadɛɛ̄ pya nɛɛ a le bu i buɛ̄, mɛ nu a i kuīloo na doo kɔ bu Jɛhova a ɛɛ.

ƐRƐ KAĀNA EKƐƐRƐ KIILOO PYA NU O GBĪ EDOO

11. Amunu elap dogo alu ekɔ bu Pya Filipai 1:9, 10 na eyerebah a nɛ kɔ o ɛrɛ kaāna ekɛɛrɛ kiiloo pya nu o gbī edoo a?

¹¹ Sɔ̄ o ekɛɛrɛ bu loo pya daakuu Baibol kiiloo pya nu o biaɛfii, a bɔloo kɔ o ɛrɛ kaāna ekɛɛrɛ nyɔɔ pya nu o gbī edoo. (Buū Pya Filipai 1:9, 10) Elap dogo suānu le loo eyerebah a nɛ kɔ o suā pya nu edap sira aabu. Pio sɔ̄ o dap nwaabah biaɛ nu fii. Mɛ a naale dɛ̄dɛɛ̄ biaɛfii na a wee waɛ a. Buābee eyerebah a nɛ kɔ o doo kaāna biaɛfii kere sɔ̄ lo kɛ̄tɔɔ̄ naa waɛ.

12-13. Bu mɛ sīdee na buābee eyerebah a nɛ kɔ o biaɛ nu fii leere kiiloo tam o gbī esi a?

¹² Naa kɛɛrɛbu edobah ama. O gaa gbī tam esi lokwa o dap kuūdɛɛ̄loo o butɔ leere. O muɛ baɛ ka tam esi. O kɛɛrɛbu loo dɛ̄dɛɛ̄ kɛ̄ lo tam mɛā doo, doodoo dua lo tam, kɛ̄ ba nɔɔ lo tam doo, le kuma sɔ̄ esu a bah lo ekii uwe lo tam le aa dee le pya dɔɔ̄na nu o kɛɛrɛbu loo. E baɛ lo tam naa gbee daakuu Baibol. Naadabah o dap sagɛ ziī aba nyɔɔbee lo tam nia a ale ba kpɛ gbɛnɛ kpugi. A ɛrɛ pya dɔɔ̄na nu a bɔloo kɔ o kɛɛrɛbu loo, lɛɛ o gaɛ biaɛfii.

¹³ Bu edobah, ekɔ sɔ̄ tam ama egbanasī sɔ̄ o enɔānu bu bɔŋanaloo ni? Ekɔ tam ama esu sɔ̄ o bee yeabah nɛ pya o  butɔ, kɔ ba a le bu kpoogaloo, ɛɛbu, sa tɔɔ̄ waɛloo Jɛhova ni? Sɔ̄ o bip pya ebip ama eyerebah a nɛ kɔ o “doā-ɛp nu a lee”—lo a le su o taāŋabah le ebɛɛ̄ pya o butɔ nua nu a kuī ee kponia zɔ. Lo sɔ̄ Jɛhova enɛ leelee o biaɛfii.

14. Bu mɛ sīdee na tɔgɛ wereloo le su buābee daānu eyerebah i nɛ kɔ i aa tɛrɛ pya dɔɔ̄na a?

¹⁴ Buābee zūnage i kɔ i kɛɛrɛ kɛ̄ i biaɛfii e’ɛrɛ pah nyɔɔ pya dɔɔ̄na doo, lokwa i lu pya “beebee naa i le loo.” (Fil 1:10) Lo ama lunage ebɛɛ̄ kiiloo i yaanu ale zia i sere. Bu edobah, i dap sagɛ lo eyaanu a i nia ale kɛ̄ i sere i zia doo. E lo a naa nia pio pya nɛɛ a le bu bɔŋanaloo ale pya a naale bu bɔŋanaloo ni a? Buābee eyerebah i nɛ kɔ i kɛɛrɛ kɛ̄ nu tɔɔ̄loo pya dɔɔ̄na doo. Wereloo ezū i kɔ i gbī nu e lee loo “nɛɛ [le ii] le” sa kuūnadɛɛ̄. (1 Kɔr 10:23, 24, 32; 1 Tim 2:9, 10) Lo  sɔ̄ i biaɛfii etɔgɛ kɛ̄ i wereloo sa nwadɛɛ̄ pya dɔɔ̄na doo.

15. Ena alu ebɛɛ̄ kɔ o nɔɔ lɛɛ o gaɛ doo biaɛfii alu gbɛnɛ a?

¹⁵ Lo a ɛrɛ zii gbɛnɛ biaɛfii o gbī edoo, kɛɛrɛ nu esu a bah lo edoo ye mmɛɛ. Jizɔs bee i tɔgɛ kɔ i “buū nu a esi.” (Luk 14:28) Nyɔɔwo kɛɛrɛ kuma sɔ̄, epiaga, le nu esu a bah lo edoo kɔ lo biaɛfii a kiā leere. Bu pio kɛ̄tɔɔ̄, o dap dasī nyɔɔnɛ pya o butɔ kɔnia lo esuā nu ziī ziī aba edoo lo eyerekpotɛ̄ lo biaɛfii. Ena anua nɔnɔɔ doo wo lee a? A dap doo kɔ o suā kɔ alu ebɛɛ̄ kɔ o nyaana o biaɛfii lokwa nu kiā leere. E sɔ̄ o nyɔɔnɛ pya o butɔ kɔnia sa gbaɛ̄tɔ̄loo nu ba kɔ edoo kɔ ba a yere a kpotɛ̄ lokwa lo biaɛfii kiā leere.—Kam 15:22.

DOO BIAƐFII LO EKIĀ LEERE

16. Pya ena eyerebah a nɛ kɔ o doo biaɛfii ekiā leere a? (Ɛpnage ekpo a kura “ Kɛ̄ esu suānu biaɛma nu fii doo.”)

¹⁶ Lo o doo pya nu elua ekɔ ama, o ekpɛ̄naloo lo edoo biaɛfii suānu le loo. O esuā pya nu a bɔloo sa ɛp pya nu eyerebah a nɛ kɔ o doo biaɛfii e’ɛɛrɛbu Jɛhova. Nyaawo, o dap bara Jɛhova kɔ a yerebah a nɛ kɔ o doo biaɛfii ekiā leere.

17. Pya ena eyerebah lo edoo kɔ i biaɛ nu fii leere a?

¹⁷ Kere pya nu o bee biaɛfii sɔ̄ akii adumɛ bee kiā leere, nyɛŋiabu kɔ nu edoo kɔ o biaɛfii a lee na suānu a aabah Jɛhova, e a naale kɛ̄ pya nu o bee biaɛfii sɔ̄ akii adumɛ bee kiā leere doo ale kɛ̄ o suā nu doo. Aba alɛ na a dap i nɛ kaka suānu, edaābeeloo, le buābee a, e pya nu ama edoo kɔ i doo nu bu suānu. (Kam 2:1-5) Jɛhova dap i yerebah nɛ kɔ i doo pya biaɛfii enia ye.—Yɔɔ 23:2, 3.