4 EKOBEE UE ENƆ
YƆƆ 18 Tɔgɛ Nia Loo Waara Zɔɔ A’agara
Ena Waara Zɔɔ A’agara I Tɔgɛ A?
“Bu lo bah ama wereloo Bari bee sira.”—1 JƆN 4:9.
NU I NƆ
Nu i nɔ aāloo luh Jizɔs akiiloo pya lele elap Jɛhova le Jizɔs tɔgɛ.
1. Bu mɛ sīdee na i ɛrɛ biī aāloo si nyɛŋiabu loo luh Jizɔs ziī ziī zua a?
BU KAKA o yiga kɔ waara zɔɔ a’agara lu ziī gbɛnɛ dɔɔ̄nu! (2 Kɔr 9:15) Nyɔnɛbee Jizɔs bee su ye dum i waara zɔɔ bee, olo dap nyɔɔnɛ Jɛhova Bari ɛrɛ le gbanialoo. Olo dapnage ɛmadɛɛ̄ lo e’ɛrɛ dum anaatah. Ɛp kɛ̄ a bɔloo doo lo etɔgɛ nia loo waara zɔɔ a’agara le nia kumaloo Jɛhova, lo wereloo ye zū kɔ a nɛ i lo dɔɔ̄nu doo a! (Rom 5:8) Lo eyerebah i nɛ kɔ i kiisī lo etɔgɛ doo yaa sa ii ɛp waara zɔɔ a’ agara tɛrɛ, Jizɔs bee i nɛ lok kɔ i wee si doonu nyɛŋiabu loo ye luh.—Luk 22:19, 20.
2. Ena i kɔnia bu ekobee ue ama a?
2 Bu zua ama, elu edoo Mɛmorial nyɔɔ Dee Nwīpinikaɛ, 12 biiradee bu Nia Enɔɔ̄, 2025. Baɛbaɛ beenyiɛ naale loo kɔ dɛ̄dɛɛ̄ ii gaa nɔɔ lo esi. I ɛrɛ gbɛnɛ biī sɔ̄ Mɛmorial lo i ɛrɛ ekɛɛrɛ a nyɔɔ nu Jɛhova le ye Nwiīnɛɛdam edoora i nɛ. Bu ekobee ue ama i gaa le kɔnia nu waara zɔɔ a’agara i tɔgɛ akiiloo Jɛhova le ye Nwiīnɛɛdam. Ekobee ue i nɔ li, eyerebah i nɛ kɔ i dābeeloo kɛ̄ i dap ɛrɛ biī aāloo waara zɔɔ a’agara le kɛ̄ i dap tɔgɛ nia kumaloo doo.
NU WAARA ZƆƆ A’AGARA I TƆGƐ AKIILOO JƐHOVA
3. Bu mɛ sīdee na luh ziī nɛɛ dap agara gbɛnɛ-edo miliɔn pya nɛɛ a? (Ɛpnage foto.)
3 Waara zɔɔ a’agara tɔgɛ i nu akiiloo kaāna biaɛ Jɛhova. (Deut 32:4) Bu mɛ sīdee ni? Naa kɛɛrɛ: Aāloo lɛɛbeekɛɛ̄ Adam, na i ɛrɛ pɔrɔ a i nua luh loo a. (Rom 5:12) Lo e’agara i lɛɛ kɛ̄bah pɔrɔ le luh, Jɛhova bee nɔɔ kɔ Jizɔs a nɛ waara zɔɔ a’agara. Kerewo, bu mɛ sīdee na waara zɔɔ ziī nɛɛ a mmana e’agara gbɛnɛ-edo miliɔn pya nɛɛ a? Nɛɛ lɛɛratam Pɔɔl baatɛ̄ kɔ: “Nyɔnɛbee dookɛ̄ anna anna aba ziī nɛɛ [Adam] bee doo bee su booboo nɛɛ kue pya pɔrɔ doo, kɛ̄ ziī nɛɛ [Jizɔs] a gbaɛ̄tɔ̄ gae sunage dɛ̄dɛɛ̄ nɛɛ kue pya kaāna doolo.” (Rom 5:19; 1 Tim 2:6) Bu dɔɔ̄na sīdee, lɛɛbeekɛɛ̄ aba ziī nɛɛ a bee mmana na a doo kɔ i lu zooro nɛ pɔrɔ le luh a. Nyɔɔwo, ziī nɛɛ a mmana a gbaɛ̄tɔ̄loo na e’agara i a.
Nyɔɔbee pɔrɔ Adam, dɛ̄dɛɛ̄ ii gaa doo pɔrɔ sa u. Nyɔɔbee Jizɔs, i dap lu puɛ aā kɛ̄bah pɔrɔ le luh (Ɛp 3 barakpaɛ̄)
4. Ena anua Jɛhova naa aadee lɛɛbahloo kɔ miɔŋɔ Adam a ɛrɛ le beenyiɛ a tɔɔ̄dum mmɛ deedee a?
4 Ekɔ a bee luge ebɛɛ̄ kɔ Jɛhova a yere Jizɔs kɔ a u i bee ni? Ekɔ Jɛhova naale ebee dap biaɛfii lo elɛɛbahloo miɔŋɔ Adam a ɛrɛ le beenyiɛ kɔ ba a tɔɔ̄dum mmɛ deedee ni? I dap kɛɛrɛ kɔ lo ama lu le sīdee lo ekpɔā miɔŋɔ nɛɛ. Kerewo lo ama naale ebee tɔgɛ kɔ Jɛhova lu Bari kaāna biaɛ. Mɛ nyɔnɛbee Jɛhova lu Bari kaāna biaɛ a, a naale e’ɛp pɔrɔ Adam bee si tɛrɛ.
5. Ena anua i dap suā leere kɔ Jɛhova edoo nu a kaāna dɛ̄dɛɛ̄ sɔ̄ a?
5 E lo a le Jɛhova naa bee nɛ waara zɔɔ a’agara, sa lɛɛbahloo kɔ miɔŋɔ Adam a naa mmana a tɔɔ̄dum mmɛ deedee taā ba u ni ā? Pya nɛɛ ebee kɛɛrɛnage kɔ a naale enyɔɔnɛ ye daakuu kaāna biaɛ akiiloo pya dɔɔ̄na nu a bee kɔ. Bu edobah, pya nɛɛ ebee ɛrɛ baɛbaɛ beenyiɛ lo a le Jɛhova edooge pya yii a bee yira naa e. Mɛ a naa lu ebɛɛ̄ kɔ i nɛ taāŋa loo i kɔ esira doo wo. Nyɔɔbee Jɛhova bee nyɔɔnɛ kaāna biaɛ a, kere a zi ye loo lo esu ye Nwiīnɛɛdam waana zɔɔ doo kɔ i suā leere kɔ edoo nu a kaāna dɛ̄dɛɛ̄ sɔ̄.
6. Ziī amunu sīdee na waara zɔɔ a’agara tɔgɛ kɔ Jɛhova were i loo a? (1 Jɔn 4:9, 10)
6 Sɔ̄ waara zɔɔ a’agara i yerebah nɛ kɔ i dābeeloo kɛ̄ Jɛhova kaāna doo a, a doonage kɔ i muɛ kɛ̄ Jɛhova i wereloo doo. (Jɔn 3:16; buū 1 Jɔn 4:9, 10.) Tɔgɛnu akiiloo waara zɔɔ a’agara muuna i nɛ kɔ naale aba bee i ɛrɛ dum a naatah na Jɛhova gbī a, mɛ i lenage yɛɛ pya ye butɔ. Naa kɛɛrɛ bu sɔ̄ Adam bee si pɔrɔ, Jɛhova bee ye lɛɛ yɛɛ pya Ye butɔ a gaa ye taāŋabah. Lo ama doo kɔ, i aa le yɛɛ butɔ Jɛhova sɔ̄ i bee mɛa. Kerewo, aāloo waara zɔɔ a’agara, Jɛhova aaloo i pɔrɔ i nɛ sa su dɛ̄dɛɛ̄ pya nɛɛ a ɛrɛ yira sa gbaɛ̄tɔ̄loo yerebu ye bu tɔ. Kunɛ nyaawo i dap ɛrɛ le gbanialoo kumaloo Jɛhova le pya i gaa gbaa taāŋabah Bari. Bu kaka, Jɛhova etɔgɛ ye wereloo i kumaloo!—Rom 5:10, 11.
7. Bu mɛ sīdee na tɔga Jizɔs i yerebah nɛ kɔ i suā kɛ̄ Jɛhova i wereloo gbɛnɛ doo a?
7 I dap dābeeloo kɛ̄ Jɛhova i wereloo gbɛnɛ doo sɔ̄ i kɛɛrɛbu nu a ye su bah lo enɛ i waara zɔɔ a’agara. Setan kɔ lɔgɔ zooro Jɛhova naale ekiisī lo etɔɔ̄ agara Ye nɛ sɔ̄ kɛ̄tɔɔ̄ aga. Lo e’amana ue ama, Jɛhova bee lɛɛbahloo Jizɔs kɔ a tɔga lɛɛ a gae u. (Job 2:1-5; 1 Pit 2:21) Jɛhova bee muɛ pya zaasī yiga bari ba lu ye baa ba gaa kɛgɛ Jizɔs, ye zip tɛ̄mabah pya nɔ̄, sa ye kaloo te. Lo sɔ̄ Jɛhova bee ɛp sɔ̄ ye wereloo Nwiīnɛɛdam gaa tɔga sa u ezialoo luh. (Mat 27:28-31, 39) Jɛhova bee ɛrɛ ekpo lo e’ɔbɛ. Bu edobah, sɔ̄ pya a ye gbānasī bee kɔ: “Doolo [Bari] ye kpɔā anyaawo, lo a gbī,” Jɛhova ebee ye kpɔā. (Mat 27:42, 43) Mɛ lo a doo wo, waara zɔɔ a’agara naale ebee lu ekpɛ, e ii le ebee ɛrɛ lɔgɔ bɛābu. Nyɔɔwo, Jɛhova bee lɛɛbahloo ye Nwiīnɛɛdam kɔ a egerebu tɔga mmɛ sɔ̄ a zuura ye kpɛdumɛ efɔp.
8. Ekɔ a bee kiɛ̄ Jɛhova sɔ̄ a bee muɛ ye Nwiīnɛɛdam a gaa tɔga ni? Naa baatɛ̄. (Ɛpnage foto.)
8 Ii le ekɛɛrɛ kɔ nyɔɔbee Bari dap doo dɛ̄dɛɛ̄ nu a, nu naa wee ye kiɛ̄! A bee i dɛm bu ye bera, lo edap ɛrɛ ekɛɛrɛ, nyɔɔwo a bɔloo lo ekɔ kɔ Jɛhova ɛrɛ kɛ̄ nu ye tɔɔ̄loo doo. Baibol kɔ nu bee ye “biirebu” sa a ɛrɛ “saŋ.” (Yɔɔ 78:40, 41) Kɛɛrɛnage bu nu a bee sira kiikɛ̄ Abraham le Aizik le. O nyɛŋiabu kɔ a bee lu enɛ lok Abraham kɔ a su aba ye nwiīnɛɛdam waāna zɔɔ. (Jɛn 22:9-12; Hib 11:17-19) Naa kɛɛrɛ bu dua ekiɛ̄nu Abraham bee ɛrɛ sɔ̄ a gaa kpɛ̄naloo lo esu zīma fīma Aizik fɛ aba sɔ̄. Naa ɛp kɛ̄ Jɛhova bee dap ɛrɛ gbɛnɛ ekiɛ̄nu doo sɔ̄ a muɛ ye Nwiīnɛɛdam a gaa lu etɔg, sa ye fɛ tɛ̄mabah pya a naa nwadɛɛ̄ Bari doo a!—Si ee vidio akura Imitate Their Faith—Abraham, Part 2 aā nyɔɔ jw.org.
A kiɛ̄ Jɛhova sɔ̄ a muɛ ye Nwiīnɛɛdam a gaa tɔga (Ɛp 8 barakpaɛ̄)
9. Ena Pya Rom 8:32, 38, 39 a yerebah nɛ kɔ o dābeeloo a kiiloo kɛ̄ wereloo Jɛhova a ɛrɛ kumaloo le pya le ɔɔ gaa gbaa taāŋabah toga doo a?
9 Waara zɔɔ a’agara tɔgɛ kɔ lɔgɔ nɛɛ a i wereloo dookɛ̄ Jɛhova doo naale, kere kunɛ pya i manamana ba i wereloo ale i le gbo. (Buū Pya Rom 8:32, 38, 39.) Lɔgɔ baɛbaɛ beenyiɛ naale loo kɔ Jɛhova were i loo eekɛ̄ ili wereloo aba ii doo. O gbīge etɔɔ̄dum mmɛ deedee ni? Jɛhova gbī kɔ o tɔɔ̄dum mmɛ deedee, mɛ a naale kuma kɛ̄ olo kɛɛrɛ doo. O gbī kɔ alu e’aaloo o pɔrɔ a nɛ ni? Jɛhova gbī e’aaloo a nɛ eekɛ̄ o kɛɛrɛ doo. Aba nu a kɔ i doo na su dɔɔ̄nu a bee i nɛ bu wereloo tɛ̄maloo e’ɛrɛ yira sa ye gbaɛ̄tɔ̄loo. Bu kaka, waara zɔɔ a’agara lu gbɛnɛ nu a tɔgɛ kɔ Bari were i loo. E bu aā nyɔuwe, i nɔ pya dɔɔ̄na nu a tɔgɛ kɔ Jɛhova were i loo.—Eklis 3:11.
NU WAARA ZƆƆ A’AGARA I TƆGƐ AKIILOO JIZƆS
10. (a) Taɛ ena a bee kiɛ̄ Jizɔs akiiloo ye luh a? (b) Pya amunu sīdee na Jizɔs bee sere bee ye Tɛ kaɛ a? (Ɛpnage ekpo a kura “ Tɔɔ Agara Jizɔs Sere Bee Jɛhova Kaɛ.”)
10 Bee ye Tɛ wee kuīloo Jizɔs gbɛnɛ. (Jɔn 14:31) A bee kiɛ̄ Jizɔs kɔ ba bee ye dɛrɛ ue kɔ alu nɛɛ a kɔ Bari gbee le nɛɛ a gbī elap buɛ̄, nyɔnɛbee a dap gbee bee ye Tɛ. Nu anua a lo a bee yere kara kɔ: “Na Tɛ, lo a le a bee lu edap, doolo kɔp ama mɛ tɛɛ̄ yee.” (Mat 26:39) Tɛ̄maloo ɛrɛ e’agatɛ̄ yira mmɛ loo luh, Jizɔs bee doo kɔ bee ye Tɛ a le kaɛ.
11. Bu mɛ sīdee na Jizɔs bee tɔgɛ wereloo kumaloo pya nɛɛ a? (Jɔn 13:1)
11 Waara zɔɔ a’agara tɔgɛnage i kɔ Jizɔs wee kuūdɛɛ̄loo pya nɛɛ gbɛnɛ, eetɔɔ̄ na pya a wee ye nyɔɔnɛ dumɛ. (Kam 8:31; buū Jɔn 13:1.) Bu edobah, Jizɔs bee suā kɔ pio gah loo ye esiatam a nyɔɔ kɛnɛkɛ̄ e’aga gbɛnɛ, eetɔɔ̄ na ye ezialoo luh. Kerewo, Jizɔs bee doo dɛ̄dɛɛ̄ nu ama, naale aba bee Jɛhova bee gbī kɔ a doo mɛ nyɔɔbee a bee wereloo pya nɛɛ. Taāwo, Jizɔs bee su dɛ̄dɛɛ̄ ye beenyiɛ zuema ue, tɔgɛnu sa siātam nɛ pya dɔɔ̄na. Kunɛ dee a gae u, Jizɔs bee su sɔ̄ loŋa tɔ pya ye nɛɛ lɛɛratam sa kɔ gbɛnɛ-edo kpɛdumɛ ue lo egbɔ̄ wa nyiɛ le ue ebaɛloo wa loo wa nɛ. (Jɔn 13:12-15) E sɔ̄ a bee le nyɔɔ te tɔga, Jizɔs bee su kina sɔ̄ kɔā ue enɛ bɛābu nɛɛ pɔrɔ a gaa bee u sa nɔɔ kɛ̄ elu ekuūdɛɛ̄loo ye ka doo. (Luk 23:42, 43; Jɔn 19:26, 27) Nyɔɔwo, Jizɔs bee tɔgɛ gbɛnɛ wereloo tɛ̄maloo ye luh le tɛ̄manage loo yube ye tɔɔ̄dum a nyɔɔ kɛnɛkɛ̄.
12. Bu mɛ sīdee na Jizɔs aa kiisī lo ewaara i zɔɔ bee a?
12 Kuma sɔ̄ Kraist bee u “aba [ziī] sɔ̄ a,” a lege gaa i waara zɔɔ bee. (Rom 6:10) Bu mɛ sīdee? A gaa kiisī lo epee sɔ̄ sa piaga lo edoo kɔ biī a aaloo waara zɔɔ a’agara, a ina i loo. Naa kɛɛrɛ nu a gaa pee sɔ̄ doo anyaawo. A gaa si tam doodoo i Mɛnɛ, i Nɛɛ Tɛsī Ewɔp, le nɛɛbee loo bɔŋanaloo. (1 Kɔr 15:25; Ɛfɛs 5:23; Hib 2:17) A gaa zaāsī tam bɔŋɛnɛloo pya alu etɔ̄ nɔɔ bee le pya gbɛnɛ eku nɛɛ. Tam ama elu esi mmɛnɛ lɛɛ gbɛnɛ etɛɛrɛloo gae ina kuma. b (Mat 25:32; Maak 13:27) A gaa doonage kɔ pya ye zooro a ɛrɛ yira alu enɛ wa nuede bu edɔɔ̄ leere a bu kpɛdumɛ dee ama. (Mat 24:45) E yubeloo bu Bɛbɛɛ Baɛ Boo Le Lop Tup Zua, ekiisī lo edoo nu elee i loo. Bu kaka, Jɛhova nɛ i ye Nwiīnɛɛdam!
O AA ƆBƐ NƆNU
13. Bu mɛ sīdee na ɛrɛ ekɛɛrɛ nyɔɔ pya nu o enɔā eyerebah a nɛ kɔ o muɛ kɛ̄ Bari le Kraist i wereloo doo a?
13 O dap kiisī lo enɔnu akiiloo wereloo Jɛhova Bari le Kraist Jizɔs sɔ̄ o kiisī lo e’ɛrɛ ekɛɛrɛ nyɔɔ nu ba edoora a nɛ. Naadabah sɔ̄ Mɛmorial bu zua ama, o dap buū ziī ale pya dɔɔ̄na dɔ Baibol a nyɔɔnɛ. O aa nɔɔ lo ebuū gbɛnɛ-edo dɔ aba sɔ̄. Taāwo, buū kinakina sa gbī pya dɔɔ̄na nu anua i wereloo Jɛhova le Jizɔs. Sa piiga lo ekɔ pya nu o enɔā nɛ pya dɔɔ̄na.
14. Dookɛ̄ Le-yɔɔ 119:97 le ye footnote kɔ doo, bu mɛ sīdee na gbītɛ̄nu eyerebah i nɛ kɔ i kiisī lo enɔnu akiiloo waara zɔɔ a’agara le pya dɔɔ̄na nu a? (Ɛpnage foto.)
14 Lo o esua gbɛnɛ-edo zua taāŋabah Jɛhova, o dap kɛɛrɛ lo a ɛrɛge pya aā nu o dap nɔ akiiloo kaāna biaɛ Bari, wereloo, le waara zɔɔ a’agara. Kaka a le na kɔ pya nu i nɔ akiiloo ekobee ue ama le pya lo dɔɔ̄na naale etah. Nyɔɔwo, ena o doo a? Buū sa nɔ gbɛnɛ-edo nu a le bu pya i kpa sa ɛrɛ ekɛɛrɛ nyɔɔ. Sɔ̄ o buū ziī nu aābu Baibol sa oo dābeeloo leere gbītɛ̄ yereloo. Dɛ̄dɛɛ̄ lo biradee, ɛrɛ ekɛɛrɛ nyɔɔ pya nu o enɔā le nu a tɔgɛ akiiloo Jɛhova le ye Nwiīnɛɛdam, le kɛ̄ ba a wereloo doo.—Buū Le-yɔɔ 119:97 le ye footnote bu NWT.
Kereadoo i etɔɔ̄na bu kaka gbɛnɛ-edo zua, i dap kiisī lo etɔgɛ nia loo waara zɔɔ a’agara (Ɛp 14 barakpaɛ̄)
15. Ena anua i kiisī lo egbītɛ̄ nu aābu Baibol a?
15 Loo a aa ɔ lo oo muɛ pya aā nu enɔ ale a naa kpe a loo ɛrɛgebah sɔ̄ o gbī enɔ nu ale gbītɛ̄ yereloo. Bu lo sīdee, o le doodoo nɛɛ a gaa gbī gold. Bu kaka pya a wee gbī gold wee su gbɛnɛ-edo sɔ̄ le biradee gbiā lɛɛ ba gae ɛrɛ. Kerewo, ba wee kiisī lo egbī nyɔnɛbee ɛrɛgebah eba gold ba ɛrɛ kuī wa loo gbɛnɛ. Ɛp kɛ̄ dɛ̄dɛɛ̄ pya aā nu i nɔ aābu Baibol kuī eenyɔɔ gold doo a! (Yɔɔ 119:127; Kam 8:10) Nyɔɔwo kiisī lo ebuū o Baibol sa gbītɛ̄ lo emuɛ aā nu.—Yɔɔ 1:2.
16. Bu mɛ sīdee na i nɔ Jɛhova le Jizɔs a?
16 Sɔ̄ o gaa nɔ nu, gbī pya sīdee o su pya nu o nɔ yerebu dogo. Bu edobah, nɔ kaāna biaɛ Jɛhova tɛ̄maloo e’aara pya dɔɔ̄na bu sīdee a lee. Nɔ wereloo Jizɔs ɛrɛ kumaloo ye Tɛ le pya dɔɔ̄na tɛ̄maloo edoo nu Jɛhova gbī sa yerebah nɛ pya dɔɔ̄na kere a bee kɔ a aga pio sɔ̄. Nɔnage Jizɔs tɛ̄maloo ezue ue nɛ pya dɔɔ̄na lokwa ba ɛrɛnage dee lo e’ɛrɛ dɔɔ̄nu waara zɔɔ a’agara.
17. Ena i gaa le kɔnia bu ekobee ue i yii li a?
17 Kumakɛ̄ i kiisī lo etɔgɛ nia loo waara zɔɔ a’agara doo, kɛ̄ wereloo i ɛrɛ loo Jɛhova le ye Nwiīnɛɛdam e a’aganage tɛ̄ doolo. Nyɔɔbee i were wa loo a, ba ekiinagesī lo ewere i loo eewo. (Jɔn 14:21; Jem 4:8) Dooraa i kiīsī lo esu nu Jɛhova enɛā i nɔā nu akiiloo dɔɔ̄nu waara zɔɔ a’agara. Bu lo ekobee ue a nyɔɔnɛ, i gaa le kɔnia biī i ɛrɛ aāloo dɔɔ̄nu waara zɔɔ a’agara le kɛ̄ i tɔgɛ nia kumaloo wereloo Jɛhova i ɛrɛ kumaloo doo.
YƆƆ 107 Sīdee Jɛhova Tɔgɛ Wereloo
a UE ALU EKƆ BAATƐ̄: Nu “ɛrɛ ekɛɛrɛ nyɔɔ” kura na lo ebura bura nyɔɔ nu o gaa buū kaāna sa gbītɛ̄ yereloo lo edābeeloo leere.
b Dookɛ̄ Pɔɔl kɔ doo bu Pya Ɛfɛsɔs 1:10, lo ebɔŋɛnɛloo dɛ̄dɛɛ̄ “nu a le bunyɔɔ” a lu kee loo bɔŋɛnɛloo “pya a bee sagɛ” lo Jizɔs bee kɔ nu akiiloo bu kpa Matiu 24:31 le Maak 13:27. Pɔɔl gaa kɔ nu akiiloo sɔ̄ Jɛhova sagɛ pya ye miɔŋɔ bu edɔɔ̄ sa su kaɛ edɔɔ̄ wa tɔā nɔɔ̄ bee. Jizɔs gaa kɔ nu akiiloo sɔ̄ elu ebɔŋɛnɛloo pya alu etɔ̄ nɔɔ̄ bee a le a nyɔɔ kɛnɛkɛ̄ kuma bunyɔɔ bu sɔ̄ gbɛnɛ etɛɛrɛloo.
