5 EKOBEE UE ENƆ
YƆƆ 108 Wereloo A Naa Wee Nyaa Bari Ɛrɛ
Kɛ̄ Wereloo Jɛhova I Dɔbiī Nɛ Doo
“Kraist bee lu bu nyɔuwe lo ekpɔā pya pɔrɔ.”—1 TIM 1:15.
NU I NƆ
Biī i ɛrɛ aāloo waara zɔɔ a’agara, le kɛ̄ i dap tɔgɛ Jɛhova nia i ɛrɛ kumaloo doo.
1. Ena i dap doo lo edoo kɔ bu Jɛhova a ɛɛ a?
NAA su kɔ o dɔɔ̄ ziī keebee nu a dɔbiī sa kpedɛɛ̄ nɛ ziī nɛɛ. Ɛp kɛ̄ bu a ebiira lo a le a yere bu ekpo sa naa su daā lɔgɔ nu doo a! Bu kiiya sī, bu a e’ɛɛ lo a le a su lo dɔɔ̄nu daānu leere sa tɔgɛ nialoo. Ena edobah ama i tɔgɛ akiiloo waara zɔɔ a’agara Jɛhova i nɛ a? Jɛhova enɛa i ye Nwiīnɛɛdam kɔ a u i bee. Ɛp kɛ̄ bu Jɛhova e’ɛɛ doo sɔ̄ i tɔgɛ nia loo lo dɔɔ̄nu a kuī le ye wereloo, lo a doo kɔ a nɛ i dɔɔ̄nu waara zɔɔ a’agara!—Jɔn 3:16; Rom 5:7, 8.
2. Ena i kɔnia bu ekobee ue ama a?
2 Kuma sɔ̄ zua aa tɛɛ̄ a, i dap ɔbɛ etɔgɛ nia loo dɔɔ̄nu waara zɔɔ a’agara. Mɛ lo ii tɔgɛ nialoo dɔɔ̄nu a’agara, a doodoo bee i su le dɔɔ̄nu Bari kpooge kɛ̄ ii le edap gbī muɛ ale kɛɛrɛbu loo. Lokwa a naa sira doo wo, i ɛrɛ ekiisī lo etɔgɛ nia loo nu Bari le Kraist edoora i nɛ. Ekobee ue ama eyerebah i nɛ kɔ i doo wo. I gaa le kɔnia kɛ̄ i ɛrɛ biī aāloo waara zɔɔ a’agara anyaawo le deesī li doo. I gaa le kɛɛrɛnage bu kɛ̄ i dap tɔgɛ nia kumaloo wereloo Jɛhova i tɔgɛ kumaloo eetɔɔ̄ na sɔ̄ Mɛmorial.
KƐ̄ I ƐRƐ BIĪ AĀLOO ANYAAWO DOO
3. Ziī amunu sīdee na i ɛrɛ biī aāloo waara zɔɔ a’agara anyaawo a?
3 I gaa ɛrɛ biī aāloo waara zɔɔ a’agara Jizɔs. Bu edobah, tɛ̄maloo waara zɔɔ a’agara, Jɛhova aaloo pya i pɔrɔ i nɛ. A naale ebee i aaloo nɛ. Mɛ a gbī edoo wo. Nɛɛ uɛ le-yɔɔ bee tɔgɛ doo yaa loo kɛ̄ Jɛhova aaloo pɔrɔ doo, a bee kɔ: “Nyɔnɛbee olo, Aa Nɛɛ-a-i-ɛrɛ, lu le sa aaloo pɔrɔ.”—Yɔɔ 86:5; 103:3, 10-13.
4. Nyɔɔ ba mɛɛ na Jɛhova bee nɛ waara zɔɔ a’agara a? (Luk 5:32; 1 Timɔti 1:15)
4 Pio nɛɛ dap kɛɛrɛ kɔ a naa bɔloo kɔ Jɛhova a aaloo pɔrɔ ye nɛ. Bu kaka, lɔgɔ ii naa bɔloo. Nɛɛ lɛɛratam Pɔɔl bee dābeeloo kɔ “mm bɔloo ekue mɛ nɛɛ lɛɛratam.” Kerewo, a bee kɔ yereloo kɔ: “Tɛ̄maloo ewonu Bari, mda le dookɛ̄ mda le doo.” (1 Kɔr 15:9, 10) Sɔ̄ i kiiya aaloo pya i pɔrɔ, Jɛhova aaloo i nɛ. Ena anua a? Naa doo wo nyɔɔbee a bɔ i loo, mɛ nyɔɔbee a were i loo. Lo o ekɛɛrɛ nɛ a taāŋa kɔ a naa bɔloo kɔ a aaloo a nɛ, nyɛŋiabu kɔ Jɛhova nɛ dɔɔ̄nu a’agara, naale nyɔɔ pya a naa doo pɔrɔ, mɛ pya a kiiya aaloo wa pɔrɔ.—Buū Luk 5:32; 1 Timɔti 1:15.
5. Ekɔ ziī i ekɛɛrɛge kɔ a bɔloo kɔ Jɛhova a aaloo i pɔrɔ i nɛ ni? Naa baatɛ̄.
5 Lɔgɔ ii naale ekɛɛrɛ kɔ Jɛhova tɔgɛ toesaɛ̄ i kumaloo nyɔnɛbee i esua gbɛnɛ-edo zua ye taāŋabah. Bu kaka Jɛhova tɔgɛ nialoo dɛ̄dɛɛ̄ le tam i ye si nɛ. (Hib 6:10) A nɛ i ye Nwiīnɛɛdam doodoo dɔɔ̄nu ii kpɛ lɔgɔ nu loo, naale lo ekpɛnu loo i tam i ye si nɛ. Nyɔɔwo a bee piya lo ekɛɛrɛ kɔ i edoora gbɛnɛ-edo nu nɛ Jɛhova, mɛ a bɔloo kɔ a aaloo i nɛ. Lo i kɛɛrɛ doo wo, kura kɔ waara zɔɔ a’agara naa bɛɛ̄ i.—Dooreloo Pya Galetia 2:21.
6. Ena anua Pɔɔl bee kiisī lo esi e’aga tam nɛ Jɛhova a?
6 Pɔɔl bee suā kɔ kaɛlɛɛ ɛrɛgebah kɛ̄ a sietam nɛ Jɛhova doo, ewonu Bari naa ye bɔe loo. Lo a le wo, ena anua a bee kiisī lo esi e’aga tam nɛ Jɛhova a? Naale lo etɔgɛ ye loo kɔ a bɔloo, mɛ lo etɔgɛ doo yaa lo ewonu Jɛhova. (Ɛfɛs 3:7) Doodoo Pɔɔl, i kiisī bu i esiatam, naale lo e’ɛrɛ toesaɛ̄ Jɛhova, mɛ lo etɔgɛ doo yaa.
7. Amunu dɔɔ̄na sīdee na i ɛrɛ biī aāloo waara zɔɔ a’agara anyaawo a? (Pya Rom 5:1; Jemes 2:23)
7 Dɔɔ̄na sīdee i ɛrɛ biī aāloo waara zɔɔ a’agara na ɛrɛ le gbanialoo kiikɛ̄ Jɛhova le a nyaawo. a Dookɛ̄ a bee lu ekɔ doo bu ekobee ue i aa a, sɔ̄ i bee mɛā, ii bee ɛrɛ gbanialoo kiikɛ̄ Bari le. Mɛ nyɔnɛbee waara zɔɔ a’agara, i dap nyɔɔnɛ “Bari ɛrɛ efɛɛloo” sa ye tɔɔ̄ waɛloo.—Buū Pya Rom 5:1; Jemes 2:23.
8. Ena anua i doo yaa Jɛhova lo dee a i nɛ lo eyere kara a?
8 Naa kɛɛrɛbu loo ziī sīdee i nyɔɔnɛ Jɛhova ɛrɛ le gbanialoo, lo a le yere kara. Jɛhova naa gbaɛ̄tɔ̄ kara aba pya ye nɛɛ sɔ̄ ba bɔŋana, mɛ a gbaɛ̄nagetɔ̄ kara ziī ziī pya ye nɛɛ yere sɔ̄ ba le aba aba. Yere kara dap i nɛ ziīnɛloo le efɛɛloo beenyiɛ, mɛ a naale aba biī i ɛrɛ aāloo yere kara lo. A dap agɛrɛtɛ̄ i gbanialoo kiikɛ̄ Bari le. (Yɔɔ 65:2; Jem 4:8; 1 Jɔn 5:14) Sɔ̄ Jizɔs bee le a nyɔɔ kɛnɛkɛ̄, a bee yere kara dɛ̄dɛɛ̄ sɔ̄ nyɔnɛbee a suā kɔ Jɛhova wee dā kara le kɔ kara edoo kɔ ye gbanialoo kiikɛ̄ ye Tɛ le a agatɛ̄. (Luk 5:16) Ɛp kɛ̄ bu i ɛɛ doo kɔ nyɔɔ waara zɔɔ a’agara Jizɔs, i dap lu gbo Jɛhova sa ye kɔnage ue nɛ bu kara doo a!
BU MƐ SĪDEE NA I ƐRƐ BIĪ LI DEESĪ A
9. Bu mɛ sīdee na pya a taāŋabah Jɛhova bu bɔ ture nyiɛ loo e’ɛrɛ biī aāloo waara zɔɔ a’agara li deesī a?
9 Bu mɛ sīdee na pya nɛɛ Jɛhova a bɔloo eture nyiɛ loo e’ɛrɛ biī aāloo waara zɔɔ a’agara li deesī a? Elu enɛ wa dum a naatah. Gbɛnɛ-edo nɛɛ kɛɛrɛ kɔ a naale ewaɛ nyɔnɛbee aā booboo zua akii adumɛ miɔŋɔ nɛɛ gaa u. Mɛ kaāna ekɛɛrɛ Jɛhova ɛrɛ na kɔ miɔŋɔ nɛɛ a tɔɔ̄dum mmɛ deedee. Lo Adam naa bee si pɔrɔ, lɔgɔ nɛɛ naale ebee kɛɛrɛ kɔ tɔɔ̄dum mmɛ deedee naale ewaɛ. Kereadoo a naa waɛ ekɛɛrɛ kɔ i tɔɔ̄dum mmɛ deedee anyaawo, i dap ɛrɛ yira kɔ ewaɛ, nyɔnɛbee Jɛhova bee nɛ nu a kuī eera lo a le dum ye nwiīnɛɛdam a si gbɛnɛ du lokwa lo ama dap waɛ.—Rom 8:32.
10. Ena pya alu etɔ̄ nɔɔ̄ bee le pya dɔɔ̄na eku naana pee ɛmadɛɛ̄ li deesī a?
10 Kereadoo i ɛrɛ dum a naatah li deesī, Jɛhova gbī kɔ i kɛɛrɛbu leelee ama anyaawo. Pya alu etɔ̄ nɔɔ̄ bee ɛmadɛɛ̄ lo etɔɔ̄dum li bunyɔɔ sa nyɔɔnɛ Kraist bɛɛ bu dɛ̄dɛɛ̄ nyɔuwe. (Mum 20:6) Pya dɔɔ̄na eku naana pee ɛrɛ bɛābu lo etɔɔ̄dum a nyɔɔ kɛnɛkɛ̄ kɛ̄ ekiɛ̄nu ale to naale ele. (Mum 21:3, 4) Ekɔ o le yɛɛ pya dɔɔ̄na eku naana pee a ɛrɛ bɛābu lo etɔɔ̄dum mmɛ deedee a nyɔɔ kɛnɛkɛ̄ ni? Lo ama naa kiikɛ̄ loo ɛrɛ ekpɛanu lo etɔɔ̄dum li bunyɔɔ! Jɛhova bee dɛm miɔŋɔ nɛɛ kɔ ba a tɔɔ̄dum mmɛ deedee. Nyɔɔwo tɔɔ̄dum mmɛ deedee edoo kɔ i ɛrɛ kaāna ɛɛbu.
11-12. Pio amunu leelee na i gaa ɛmadɛɛ̄ bu paradais li deesī a? (Ɛpnage foto.)
11 Naa kɛɛrɛ kɛ̄ dum emɛa a loo doo bu paradais a nyɔɔ kɛnɛkɛ̄. Oo le e’ɛrɛ lɔgɔ ekɛɛrɛ kiiloo eyɔloo ale luh. (Ais 25:8; 33:24) Bu kaka, Jɛhova enɛ a dɛ̄dɛɛ̄ le nu o gbī. Pya ena enia a enɔ nu akiiloo a? Nɔ nu akiiloo nu a bee lu edɛm ni? Nɔ kɛ̄ ebira yɔɔ doo ni? Sɛh nɔ kɛ̄ etɔ̄nu doo ni? Lɔgɔ baɛbaɛ beenyiɛ naale loo kɔ, bu paradais, pya a para tɔ̄ tɔ, pya wu tɔ, le pya fo nu elu ebɛɛ̄. Bu kaka, elunage egbī pya nɛɛ efoh nu sa bui nuede, pya ekwa nu esiātam, le pya efo ebie le flawa sa kuūdɛɛ̄loo. (Ais 35:1; 65:21) Sɔ̄ o tɔɔ̄dum mmɛ deedee, o ɛrɛ dee lo edoo dɛ̄dɛɛ̄ nu ama le emanyɔɔ wo.
12 Ɛp kɛ̄ bu a e’ɛɛ lo esu baɛbah suā pya e’aakɛ̄ bu luh doo a! (Doonu 24:15) Kɛɛrɛnage bu kɛ̄ enia a, lo enɔ pya dɔɔ̄na nu akiiloo Jɛhova tɛ̄maloo e’ɛp gbɛnɛ-edo nu a dɛm doo a. (Yɔɔ 104:24; Ais 11:9) Lo a eetɔɔ̄, ɛp kɛ̄ ekpe a loo lo etaāŋabah Jɛhova sɔ̄ oo doo lɔgɔ pɔrɔ doo a! Eniage a epeere pya leelee ama nyɔɔ doo nu a a nia anyaawo ni? (Hib 11:25) Naale enia a doo pippip! A bɔloo kɔ i doo ɛrɛgebah nu i dap a nyaawo lo e’ɛrɛ pya leelee ama. Nyɛŋiabu kɔ ii lee tɔɔ̄loo bɛābu kɔ paradais gaa lu li deesī. Esah a dooa. Lɔgɔ nu ama naale ebee dap waɛ lo Jɛhova naa bee i wereloo mmɛ kɛ̄ a i nɛ ye Nwiīnɛɛdam!
Pya amunu leelee na o gaa ɛmadɛɛ̄ gbɛnɛ bu paradais li deesī a? (Ɛp 11-12 barakpaɛ̄)
TƆGƐ NIA KUMALOO WERELOO JƐHOVA
13. Bu mɛ sīdee na i dap tɔgɛ nia kumaloo wereloo Jɛhova i ɛrɛ kumaloo a? (2 Pya Kɔrint 6:1)
13 Bu mɛ sīdee na i dap tɔgɛ nia kumaloo Jɛhova kɔ a nɛ i waara zɔɔ a’agara a? Tɛ̄maloo esu ye tam nua tuatua bu i dum. (Mat 6:33) Nyɔnɛbee Jizɔs bee u “lokwa pya a tɔɔ̄dum naa sinakɛ̄ tɔɔ̄ loo alaba loo, mɛ loo nɛɛ a bee u nyɔɔ wa bee, e a bee lu edana ye lɛɛ kɛ̄.” (2 Kɔr 5:15) Bu kaka i gbī etɔgɛ kɔ i suā pya nu a edoora i nɛ le kɔ a ɛɛrɛ i bu kaāna.—Buū 2 Pya Kɔrint 6:1.
14. Mɛ sīdee na i dap tɔgɛ nia kumaloo tɔgɛ dee a aabah Jɛhova a?
14 I dapnagɛ tɔgɛ nia kumaloo wereloo Jɛhova tɛ̄maloo edɛrɛ ye nyiɛ nyɔɔ sa nyɔɔnɛ ye tɔgɛ dee. Bu mɛ sīdee ni? Sɔ̄ i gaa biaɛ nu fii, doodoo doa tɔkpa i si ale dua tam i si, i kɛɛrɛ nu enia Jɛhova. (1 Kɔr 10:31; 2 Kɔr 5:7) Sɔ̄ i doo dogo lo etɔgɛ i yira, nu alu nyɛŋia wee sira, lo sɔ̄ i yira le gbanialoo i ɛrɛ kiikɛ̄ Jɛhova le e’agatɛ̄. E i bɛābu lo etɔɔ̄dum mmɛ deedee e’agatɛ̄.—Rom 5:3-5; Jem 2:21, 22.
15. Bu mɛ sīdee na i dap tɔgɛ i nia bu sɔ̄ Mɛmorial a?
15 Dɔɔ̄na sīdee i dap tɔgɛ nia kumaloo wereloo Jɛhova lege. Ɛɛ na susu sɔ̄ Mɛmorial tɔgɛ Jɛhova kɛ̄ bu i ɛɛ loo waara zɔɔ a’agara doo. Gbaāloo sisi Mɛmorial, i dap kue pya dɔɔ̄na kɔ ba a si. (1 Tim 2:4) Kɔ nɛ pya o kue kɛ̄ elu edoo Mɛmorial doo. E lee lo o tɔgɛ wa vidio akura Ena Anua Jizɔs Bee U A? le Nyɛŋiabu Loo Luh Jizɔs aā nyɔɔ jw.org. Pya kanɛɛ a muɛ kɔ ba kue pya a naa bee si na enɔānu le uwe zue ue. Ɛp kɛ̄ ɛɛbu ele li bunyɔɔ le a kɛnɛkɛ̄ lo ziī naana pee Jɛhova a bee pe obia lu doo a! (Luk 15:4-7) Bie Mɛmorial, i su nua dee a i kpaānɛ lo ekana muɛ dɛ̄dɛɛ̄ pya nɛɛ eetɔɔ̄ na pya aā nɛɛ ale pya a naa bee si na bu nyɔɔnyɔɔ sɔ̄. I gbī kɔ loo wa a sukɛ̄!—Rom 12:13.
16. Ena anua i kɛɛrɛbu lo enyimɛ i tam zue ue sɔ̄ Mɛmorial a?
16 O dapge nyimɛ o esiatam nɛ Bari bu sɔ̄ Mɛmorial ni? Lo i doo wo elu le sīdee i tɔgɛ nia kumaloo dɛ̄dɛɛ̄ nu Bari le Kraist edoora i nɛ. Kɛ̄ i agɛrɛbah si tam nɛ Jɛhova doo kɛ̄ e’agɛrɛ nagebah i yerekpotɛ̄ doo lo. E lo ama edoo kɔ i agɛrɛbah ye dɛrɛ nyiɛ nyɔɔ. (1 Kɔr 3:9) Gbaānageloo wo, piiga lo ebuū dɛ̄dɛɛ̄ dɔ Baibol Mɛmorial alu e’ɛm bu kpa akura Ɛp Nu A Le Bu Kpa Kaɛ Dɛ̄dɛɛ̄ Dee ale bu ekpo a le bu kpa enɔānu taɛ yɛɛ kaɛ. O dapnage biaɛfii lo enɔ nu nyɔɔ pya dɔ Baibol ama.
17. Ena a ɛɛrɛbu Jɛhova a? (Ɛpnage ekpo akura “ Pya Sīdee Etɔgɛ Nia Kumaloo Wereloo Jɛhova.”)
17 Kɛ̄adoo, o kɛ̄tɔɔ̄ naa dap a nɛ dee kɔ o doo dɛ̄dɛɛ̄ nu alu ekɔ bu ekobee ue ama. Nyɔɔwo, nyɛŋiabu kɔ Jɛhova naa ɛp kɛ̄ nu o nɛ kuī ee lo pya dɔɔ̄na doo. A muɛ nu a a le bu beenyiɛ. Bu ye ɛɛ sɔ̄ a muɛ kɔ o tɔgɛ nia kumaloo ye gbɛnɛ dɔɔ̄nu, waara zɔɔ a’agara aābu o beenyiɛ.—1 Sam 16:7; Maak 12:41-44.
18. Ena anua i tɔgɛ nia kumaloo Jɛhova Bari le Jizɔs Kraist a?
18 Ɛɛ aba nyɔɔ waara zɔɔ a’agara na a dap lu e’aaloo i pɔrɔ i nɛ a, e i nyɔɔnɛ Jɛhova gbaa ɛrɛ le gbanialoo, sa bɛābu lo e’ɛrɛ dum a naatah a. Doolo i tɔgɛ nia dɛ̄dɛɛ̄ sɔ̄ kumaloo wereloo Jɛhova, lo a ye zū kɔ a doo kɔ pya leelee ama a waɛ i bah lo e’ɛrɛ. (1 Jɔn 4:19) Doolo i tɔgɛnage nia kumaloo Jizɔs, lo a i wereloo gbɛnɛ lo enɛ ye dum i bee!—Jɔn 15:13.
YƆƆ 154 Wereloo A Naa Wee Dɔ
