1. Ena gbɛnɛ-edo nɛɛ anii’ee gaa doo a?

 O SUĀGE kɔ pio nɛɛ kuūdɛɛ̄loo aba aba ee pya dɔɔ̄na ni? Bu edobah, gbɛnɛ-edo nɛɛ yere booboo ue nyɔɔ intanɛt sa kue ekɛɛrɛ pya nɛɛ kumaloo aba aba, le nu ba edoora. Kerewo, pio nɛɛ anii’ee gaa nɛ ka Jɛhova Bari. Bu ekobee ue ama, i gaa le kɔnia nu nɛ ka Jɛhova kura le nu ezū i kɔ i doo wo. I gaa le nɔnage kɛ̄ i dap nɛ ka Bari dookɛ̄ a ye bɔloo doo, le kɛ̄ alɛ enɛ ka ye bee doo li deesī.

ENA AKURA LO ENƐ KA JƐHOVA A?

 2. Bu mɛ sīdee na Jɛhova bee muuna ye ka siā bie nyɔɔ Kpokɛ̄ Sinai a? (Ɛpnage foto eko.)

² Ena akura ka a? Bu Baibol, bee ue akura “ka” dap lu esu dooreloo ɛrɛgebah nu a doo kɔ bu nɛɛ a ɛɛ. Jɛhova bee tɔgɛ ye ka nwīgbagbara aā sɔ̄ a bee agara edonyɔɔ Izrɛl lɛɛ bu zooro li Ijipt. Naa kɛɛrɛbu lo ama: Miliɔn pya Izrɛl bee bɔŋia nyɔɔ Kpokɛ̄ Sinai lo edā nu Bari gaa le kɔ wa nɛ. Bā-biira bunyɔɔ bee uuwa nyɔɔ kpokɛ̄ a. Aba lo sɔ̄, gbɛnɛ nyɔŋa kɛnɛkɛ̄ bee le, ɛnɛm dee, naanyɔɔ, le gbɛnɛ muɛ dɔɔ̄ni. (A’aa 19:16-18; 24:17; Yɔɔ 68:8) Naa kɛɛrɛ kɛ̄ bu pya Izrɛl bee ɛɛ doo sɔ̄ Jɛhova bee muuna ye ekpo le ka siā doo.

 3. Ena akura nɛ ka Jɛhova a?

³ E kiiloo miɔŋɔ nɛɛ ni ā? I dapge nɛ ka Jɛhova ni? Aiī, bu kaka i dap. Ziī sīdee i dap nɛ ka Jɛhova na tɛ̄maloo ekɔ pya nyɛŋianu edoora le pya ye le le elap nɛ pya dɔɔ̄na. I wee nɛnage ka Bari sɔ̄ a i yerebah nɛ  kɔ i doo pya nu i dap doo. (Ais 26:12) Mɛnɛ Devid bee lu nɛɛ a tɔgɛ le edobah tɛ̄maIoo enɛ ka Jɛhova. Bu kara a bee yere kɛ̄sī dɛ̄dɛɛ̄ bɔŋanaloo Izrɛl, Devid bee kɔ nɛ Bari kɔ: “Lo olo, Aā Jɛhova, na gbɛnɛ kɛ̄tɔɔ̄, le ekpo, le ka, le eebah, le dāna nɛ nyɔɔ le a; nyɔɔnɛbee dɛ̄dɛɛ̄ nu a le bunyɔɔ le bu nyɔuwe lu oloo.” Sɔ̄ Devid eyere lo kara sah, “dɛ̄dɛɛ̄ bɔŋanaloo a bee nɛ leelee Jɛhova.”—1 Edoo 29:11, 20.

 4. Bu mɛ sīdee na Jizɔs bee nɛ ka Jɛhova a?

⁴ Sɔ̄ Jizɔs bee le a nyɔɔ kɛnɛkɛ̄, a bee nɛ ka ye Tɛ tɛ̄maloo ekɔ nɛ pya dɔɔ̄na kɔ Jɛhova na a ye nɛ ekpo esu siā pya nyɛŋiatam ama a. (Maak 5:18-20) Jizɔs bee yerebah nɛ pya dɔɔ̄na kɔ ba a muɛ kɛ̄ Jɛhova lu nyɛŋia doo. Bu ziī kɛ̄tɔɔ̄, sɔ̄ Jizɔs gaa bee tɔgɛ nu bie tɔ bɔŋanaloo. Ziī wa pɔrɔ edɔɔ̄ bee nɛ taāŋa bu 18 zua bee lenage yɛɛ pya a gaa bee gbaɛ̄tɔ̄loo Jizɔs. Lo pɔrɔ edɔɔ̄ ebee bɛɛra lo wa sa a naa dap yira ya leere. Mɛ dua e’aga kɛ̄tɔɔ̄ sɛh! Jizɔs bee ɛrɛ toesaɛ̄ ye kumaloo, e a bee si loo lo wa sa ye kɔ ue nɛ bu fɛgɛ, kɔ: “Nɛɛ wa, elua edoo kɔ o aa bu o e’ɔaloo.” E a dɛrɛ ye bah nyɔɔ, e aba lo sɔ̄ a yira ya “nɛ ka Bari,” a doo yaa Jɛhova kɔ a bo ye sa doo kɔ loo ye a aga! (Luk 13:10-13) Wa ama bee ɛrɛ kaāna nu anua a nɛ ka Jɛhova, e ili edoonage doo wo.

ENA A I ZŪ KƆ I NƐ KA JƐHOVA A?

 5. Ena anua i nɛ enwadɛɛ̄ Jɛhova a?

⁵ I nɛ ka Jɛhova nyɔnɛbee i ɛrɛ togatoga enwadɛɛ̄ ye kumaloo. I ɛrɛ gbɛnɛ-edo nu anua i nɛ ye enwadɛɛ̄. Jɛhova eenyɔɔ dɛ̄dɛɛ̄ nu, e ye ekpo naa wee ina kuma. (Yɔɔ 96:4-7) Ye suānu sira bu pya nu a dɛm. A nɛ i dum le dɛ̄dɛɛ̄ pya nu i su tɔma dum. (Mum 4:11) A wee i tɔɔ̄ agara nɛ. (Mum 15:4) Dɛ̄dɛɛ̄ pya nu a doo kiisī leere, e a wee doo kɔ pya nu a bee yira yii loo a doo a. (Josh 23:14) Nu anua a lo nɛɛ mɔmanudɛɛ̄ Jeremia kɔ kumaloo Jɛhova kɔ: “Nyɔɔbee taɛ yɛɛ dɛ̄dɛɛ̄ pya suānu lo dɛ̄dɛɛ̄ edonyɔɔ le bu dɛ̄dɛɛ̄ wa buɛ̄-mɛnɛ lɔgɔ nɛɛ a bee olo naale”! (Jer 10:6, 7) Bu kaka, i ɛrɛ kaāna nu anua i nɛ enwadɛɛ̄ i Tɛ a le li bunyɔɔ. Mɛ a naale aba nɛ enwadɛɛ̄ Jɛhova na i doo a, i were ye loo kaāna.

 6. Ena anua i wereloo Jɛhova a?

⁶ I nɛ ka Jɛhova nyɔnɛbee i were ye loo gbɛnɛ. Naa kɛɛrɛbu loo pya le le elap dogo Jɛhova a doo kɔ i were ye loo. A ɛrɛ toesaɛ̄ le fɛgɛ dogo. (Yɔɔ 103:13; Ais 49:15) A kiɛ̄ Jɛhova sɔ̄ nu i ziloo, le sɔ̄ i le bu etɛɛrɛloo. (Zek 2:8) A doo kɔ a waɛ i bah lo esuā ye loo sa lu ye Gbo. (Yɔɔ 25:14; Doonu 17:27) E a lu nɛɛ a kumaloo kɛ̄; sa kumaloo kɛ̄ “ɛp dɛ̄dɛɛ̄ bunyɔɔ le nyɔuwe, a edana pya kporo lɛɛ bu esaā.” (Yɔɔ 113:6, 7) Nyɔɔ dɛ̄dɛɛ̄ nu ama i gbī enɛ ka Bari, bu mɛ sīdee ni?—Yɔɔ 86:12.

 7. Amunu keebee dee na a i kpaānɛ a?

⁷ I nɛ ka Jɛhova nyɔnɛbee i gbī kɔ pya dɔɔ̄na a suā ye loo. Gbɛnɛ-edo nɛɛ naa suā kaka akiiloo Jɛhova. Ena anua? Nyɔnɛbee Setan ezimɛ ekɛɛrɛ pya nɛɛ, sa kɔ gbɛnɛ gbɛnɛ esah a Ye kiiloo. (2 Kɔr 4:4) Setan edoora kɔ pya nɛɛ a kɛɛrɛ kɔ Jɛhova agabah, sa naa kuūdɛɛ̄loo pya miɔŋɔ nɛɛ, le  kɔ alɛ na a gaa doo kɔ i mɔna dɛ̄dɛɛ̄ taāŋa ama a. Mɛ ili suā kaka akiiloo Bari! E i ɛrɛ dee a i kpaānɛ lo ekɔ nu akiiloo nyɛŋiatam Bari nɛ pya dɔɔ̄na. (Ais 43:10) Le-yɔɔ 96 kɔ sīdee i dap nɛ ka Jɛhova. I gaa le nɔ aābu kpa Le-yɔɔ sīdee i dap nɛ Jɛhova ka a ye kuu.

BU MƐ SĪDEE NA I DAP NƐ JƐHOVA KA A YE KUU A?

 8. Ziī amunu sīdee na i dap nɛ ka Jɛhova a? (Le-yɔɔ 96:1-3)

⁸ Buū Le-yɔɔ 96:1-3. I dap nɛ ka Jɛhova tɛ̄maloo pya nu i kɔ a ye akiiloo. Bu dɔ ama, alu ekɔ nɛ pya nɛɛ Jɛhova kɔ “ɔraa nɛ Jɛhova,” nɛaa “leelee ye bee,” “zoraa ye kpɔā,” e “zoraa ye ka yɛɛ dɛ̄dɛɛ̄ edonyɔɔ.” I dap su dɛ̄dɛɛ̄ pya sīdee ama nɛa ka i Tɛ a le li bunyɔɔ. Pya Juu a bɔloo eture nyiɛ loo le Pya Nɛɛ Kraist bu tua sɔ̄ o’oo tup zua a naa bee pee sɔ̄ lo ekɔ nɛ pya dɔɔ̄na dɛ̄dɛɛ̄ le nu Jɛhova edoora wa nɛ sa kpɛga ye le bee. (Dan 3:16-18; Doonu 4:29) Bu mɛ sīdee na i dap doo wo?

9-10. Ena o nɔ aāloo nu a bee siraloo Angelena a? (Ɛpnage foto.)

⁹ Naa kɛɛrɛbu loo edobah ziī wuga nɛɛwa a tɔɔ̄ United States, a lo ye bee kura Angelena. A bee su e’agaloo kpɛga bee Jɛhova bie kɛ̄ a wee sitam. Doodoo nɛɛ alu esu loo tam aā, a bee lu ekue Angelena nua zɔ̄zɔ̄ŋia loo pya aā nɛɛ alu esu loo tam ɛrɛ dee lo ekɔ nu akiiloo aba aba le wa kɛ̄tɔɔ̄. Angelena bee kpɛ̄naloo ekɔ nu a ye nɛ ɛɛbu doodoo ziī nɛɛ Ekeebee Jɛhova. Kerewo, lɛɛ a gae kii wee kɔ ue, ziī nɛɛ bee kuealoo ye doodoo nɛɛ a bee lu ekpɔā nua ziī nɛɛ Ekeebee Jɛhova. A bee bɔātɛ̄ ekɔ pɔrɔ pɔrɔ nu akiiloo pya Ekeebee Jɛhova le nu i yira. Angelena kɔ: “Bɔɔ bee mɛ aa. M bee bip aba mm kɔ: ‘Ekɔ m aaloo ziī nɛɛ kɔ a kɔ esah kumaloo Jɛhova ni? Ale m kɔ kaka a Ye kiiloo ni?’”

¹⁰ Sɔ̄ ye koo ekɔa ue sah, Angelena bee nwaabah yere kara bu beenyiɛ ye. A bee ye kɔ ue nɛ bu fɛgɛ, kɔ: “Na kɛ̄tɔɔ̄ bee olo. A bee lu ekpɔā mɛ  doodoo ziī yɛɛ Pya Ekeebee Jɛhova, e m lu nɛɛ Ekeebee mmɛ nii’ee.” Mɛ kɛ̄tɔɔ̄ ama naa bee waɛ, kerewo Angelena bee fɛɛrɛloo. E a bee tɔgɛ pya ye koo kɛ̄tam foto pya ye koo le ɛɛ bee yii bu sɔ̄ ba gaa taāŋabah Bari bu ɛɛbu sa su efɛɛloo kɔā ue bee ye yira wa nɛ. (1 Pit 3:15) Ena a bee sira aabu a? Sɔ̄ Angelena ekɔa ue sah, lo gbara bee kuma nyiɛ kɛ̄. A kɔnage kɔ a nyɛŋiabu sɔ̄ a gaa bee nyim aakɛ̄ bu ɛɛbu doodoo ziī yɛɛ Pya Ekeebee Jɛhova. Angelena kɔ: “Bɔloo ekɔ ue bee Jɛhova. Alu nu ka mɛ nɛ lo ekɔ ue kumaloo ye bee.” Ili ɛrɛnage dee lo eleera sa nɛ ka Jɛhova. Lo ama lu gbɛnɛ dee a i kpaā nɛ.

11. Bu mɛ sīdee na pya a taāŋabah bu kaka sīdee wee doo nu a le bu kpa Le-yɔɔ 96:8 aage a dee kere a?

¹¹ Buū Le-yɔɔ 96:8. I dap nɛ ka Jɛhova tɛ̄maloo pya nu i ɛrɛ a si gbɛnɛ du. Pya a taāŋabah Bari bu kaka sīdee wee nɛ ka Jɛhova tɛ̄maloo pya nu ba ɛrɛ. (Kam 3:9) Bu edobah, pya Izrɛl bee lɛra nu lo ewuā sa kwaloo tɔkaɛ. (2 Mɛnɛ 12:4, 5; 1 Edoo 29:3-9) Pio pya a wee nyɔɔnɛ dumɛ Jizɔs bee nɛ “aābu wa nu” lo ekuūdɛɛ̄loo Jizɔs le pya ye nɛɛ lɛɛratam. (Luk 8:1-3) Pya Nɛɛ Kraist bu tua sɔ̄ o’oo tup zua bee lɛranage nu lo eyerebah nɛ pya wuga nɛɛdam le nɛɛwa bu bɔŋanaloo sɔ̄ kii bee dɔ. (Doonu 11:27-29) Nii’ee, ili dapnage nɛ ka Jɛhova tɛ̄maloo pya nu i lɛra aābu i beenyiɛ.

12. Bu mɛ sīdee na pya nu i lɛra su ka nua loo Jɛhova a? (Ɛpnage foto.)

¹² Naa kɛɛrɛbu loo ziī nu a bee sira a tɔgɛ kɛ̄ pya nu i lɛra su ka nua loo Jɛhova doo. Kpɛa akiiloo zua 2020 bee baatɛ̄ kɛ̄ kagara dee bee ɛrɛ pah nyɔɔ pya nɛɛ li Zimbabwe doo. Gbɛnɛ-edo Miliɔn pya nɛɛ bee le bu lɛɛra loo nyɔɔbee kii, gbaāloo ziī wuga nɛɛwa ye bee kura Prisca. Kaɛlɛɛ lo kagara dee, Prisca bee kiisī lo ezue ue Taa deelookaɛ le O’oo deelookaɛ kere sɔ̄ fonu. Pya nɛɛ le ɛɛ bee le bee ye kɛgɛ kɔ akii uwe zue ue taā a kii wii. Ba bee kɔ, “O kaɛ ziā e.” Prisca wee agara bu e’agaloo kɔ, “Jɛhova naa wee ibere pya ye zooro.” Sɔ̄ sɔ̄ naa binia  bɔŋanaloo bee dɔɔ̄ pio nu ye nɛ. Prisca le pya dɔɔ̄na bee ɛrɛ nuede alu edɔɔ̄ tɛ̄mabah bɔŋanaloo Jɛhova. Lo nu bee tɔāloo pya nɛɛ, sa ba kɔ ye nɛ kɔ, “Bari sii a ibere, nyɔɔwo i gbī enɔnu a ye akiiloo.” Ɛrɛba pya nɛɛ bee bɔātɛ̄ esi enɔānu bu bɔŋanaloo.

13. Bu mɛ sīdee na i elap dogo su ka nua loo Jɛhova a? (Le-yɔɔ 96:9)

¹³ Buū Le-yɔɔ 96:9. I dap nɛ ka Jɛhova tɛ̄maloo i elap dogo. A bee lu ebɛɛ̄ kɔ pya ewɔp a sitam bu tɔkaɛ Jɛhova a le ɛɛ bu namloo. (A’aa 40:30-32) Kerewo, naale ɛɛ bu namloo na a kuī gbɛnɛ a, mɛ ɛɛ bu elap dogo. (Yɔɔ 24:3, 4; 1 Pit 1:15, 16) Kpa Baibol kɔ a bɔloo kɔ i lɛa “nama mɛā” loo i, lo a le—elap dogo a naa ɛɛ—sa yaa “aā mɛā”—i nɔ lo ekɛɛrɛ nu sa doo pya nu a tɔgɛ kɔ i gaa nɔ pya elap dogo Jɛhova. (Kɔl 3:9, 10) Tɛ̄maloo yerebah Jɛhova, kere nɛɛ a doo gbɛnɛ pɔrɔ nu dap kiiya sa yaa aā mɛā.

14. Ena o nɔ aāloo nu a bee sira loo Jack a? (Ɛpnage foto.)

¹⁴ Naa kɛɛrɛbu edobah Jack, nɛɛ a wee doo dogo lumiī sa a bee lu ekure ye Pɔrɔ edɔɔ̄. Nyɔɔ ye pɔrɔ dogo, a bee lu ebiaɛ kɔ alu efɛ Jack. Kerewo, sɔ̄ a gaa tɔɔ̄ baɛ dee elu efɛ ye, Jack bee yiga lo eyɔɔnɛ ziī wuga nɛɛdam a bee ina tɔ kpɔgɔrɔ nɔ Baibol. Kaɛlɛɛ ye kɛ̄tɔɔ̄, Jack bee lɛa ye nama mɛā loo e sɔ̄ sɔ̄ naa binia a bee nyim tura lo eliamaā. Jack bee nyaa kaāna mmɛ kɛ̄ dee alu efɛ ye, pio pya baɛloo tɔ kpɔgɔrɔ bee to sɔ̄ ba gaa ye kɔ nɛ kɔ a doowo. Ziī nɛɛ nɔ̄ a wee si tam lo tɔ kpɔgɔrɔ bee kɔ: “Jack bee le ziī nɛɛ a bee piya kaāna. Nyaawo elua le nɛɛ.” Kaɛ a nyɔɔnɛ dee elu efɛ ye a, pya wuga a wee lu tɔ kpɔgɔrɔ wee sere enɔānu bu ziī ziī kaɛ bee muɛ ziī nɛɛ a le lo tɔ kpɔgɔrɔ alu lo enɔānu tua sɔ̄. Ena a bee ye zū kɔ a si lo enɔānu a? Kɛ̄ Jack bee nyaa bu dogo doo bee ye tɔaloo e a bee gbī esuā pya nu a bɔloo ɔ a doo lo etaāŋabah Jɛhova. Bu kaka, ilii elap dogo dap su ka nua loo i Tɛ a le li bunyɔɔ!—1 Pit 2:12.

 BU MƐ SĪDEE NA JƐHOVA ENƐ KA YE BEE LI DEESĪ A?

15. Bu mɛ sīdee na Jɛhova enɛ ka ye bee li deesī a? (Le-yɔɔ 96:10-13)

¹⁵ Buū Le-yɔɔ 96:10-13. Pya kpɛdumɛ barakpaɛ̄ loo Le-yɔɔ 96 baatɛ̄ kɔ Jɛhova lu nɛɛ Biaɛ le Mɛnɛ a kaāna. Bu mɛ sīdee na Jɛhova enɛ ka ye bee li deesī a? Tɛ̄maloo ye kaāna biaɛ. Sɔ̄ sɔ̄ naa binia a gaa le gbeesī Babilɔn lo Gbɛnɛ nyɔnɛbee ba kɔ esah kumaloo bee Bari a le kaɛ. (Mum 17:5, 16; 19:1, 2) Pio pya a muɛ gbeerasī Babilɔn lo Gbɛnɛ dap i gbaaloo bu kaka taāŋabah. Bu kpɛdumɛ, bu nɔ̄ Armageddon, Jɛhova gaa le gbeesī dɛ̄dɛɛ̄ nɔɔnɔɔnu Setan, sa lɛɛ dɛ̄dɛɛ̄ pya a ye gbānasī sa gbee ye bee, mɛ a gaa le kpɔā dɛ̄dɛɛ̄ pya a ye wereloo sa ye gbaɛ̄tɔ̄loo le dɛ̄dɛɛ̄ pya a su ka nua loo ye bee. (Maak 8:38; 2 Tɛs 1:6-10) Sɔ̄ kpɛdumɛ doā ɛp lo ebɔātɛ̄ sɔ̄ Bɛbɛɛ Kraist bu Baɛ Boo Le Lop Tup Zua e’ina kuma, Jɛhova esere ye bee kaɛ. (Mum 20:7-10) Bu lo sɔ̄, “nyɔuwe gaa le mma tɛ̄maloo suānu lo nyɛŋia Jɛhova, doodoo kɛ̄ maā wee uu gbɛnɛ pɛnɛ doo.”—Hab 2:14.

16. Ena o biaɛfii lo edoo a? (Ɛpnage foto.)

¹⁶ Ɛp kɛ̄ ekpeloo doo sɔ̄ dɛ̄dɛɛ̄ nɛɛ a le dum enɛ ka Jɛhova dookɛ̄ a ye bɔloo doo a! Kere nyaawo, i dap su dɛ̄dɛɛ̄ dee a i kpaānɛ nɛa ka Bari. Lo etɔgɛ kɛ̄ lo ama lu gbɛnɛ doo, Eku A Baɛ Bee esagɛ kpa Le-yɔɔ 96:8 nua i ekobee ue zua 2025 lo a kɔ: “Nɛaa Jɛhova ka a bɔloo ye bee.”