1. Amunu pah na ziī ekɔaue a bee lu enɛ bie kɔnvɛnsɔn bu zua 1935 bee ɛrɛ nyɔɔ ziī zege nwiīnɛɛdam a?

ZIĪ zege nwiīnɛɛdam bee le 18 zua sɔ̄ a bee liamaā bu zua 1926. Ye tɛ le ka bee le Pya Nɔ Baibol, dookɛ̄ a wee lu ekure Pya Ekeebee Jɛhova doo lo sɔ̄. Ba bee ɛrɛ taa miɔŋɔ nɛɛdam le baɛ miɔŋɔ nɛɛwa lo ba bee kpɔā kɔ ba a taāŋabah Jɛhova sa nɔ edoba Jizɔs Kraist. Dookɛ̄ Pya Nɔ Baibol bee le doo lo sɔ̄, lo zege nwiīnɛɛdam wee de fituru sa ɔ̄ mii bie Doonu Nuede Loo Uunɛ Nɛɛ-a-i-ɛrɛ yube zua. Kerewo, ye bɛābu akiiloo deesī bee nyaa sɔ̄ a dā ekobee ue a kɔ “Gbɛnɛ-edo Nɛɛ.” Bee lu enɛ ekɔaue ama bu zua 1935 tɛ̄mabah J. F. Rutherford bie kɔnvɛnsɔn li Washington, D.C., U.S.A. E na a bee lu emuuna bie lo kɔnvɛnsɔn ani?

2. Amunu kaka ue na a bee lu ebaatɛ̄ bu ekɔaue Wuga Rutherford a?

² Bu lo ekɔaue, Wuga Rutherford bee kɔ nu akiiloo pya nɛɛ ba lu “gbɛnɛ-edo nɛɛ” alu ekɔ bu kpa Mumuuna 7:9. Lɛɛ a gae lu lo sɔ̄, bee lu ekɛɛrɛ kɔ pya nɛɛ ama lu eree baɛ eku pya nɛɛ ba ɛrɛ nwīgbagbara yira lo ba ekiinage bunyɔɔ. Wuga Rutherford bee su Baibol baātɛ̄ kɔ a naa lu esagɛ gbɛnɛ-edo nɛɛ ama kɔ ba ekii bunyɔɔ, mɛ ba lu dɔɔ̄na eku naana pee Kraist * lo etɛɛ̄ yeebah “gbɛnɛ etɛɛrɛloo” sa tɔɔ̄dum a kɛnɛkɛ̄ mmɛ deedee. (Mum 7:14)  Jizɔs bee yira yii kɔ: “E m ɛrɛ lo dɔɔ̄na gbo naana pee, lo a naa luere lo gɔh ama; m tuunɛ wa ge nua, sa ba egbaɛ̄tɔ̄ loo na muɛ̄, sa ziī eku naana pee gaa ele, le ziī nɛɛ tɔɔ̄loo naana pee.” (Jɔn 10:16) Lo eku naana pee na pya zooro Jɛhova ba ye tɔɔ̄ agara nɛ, lo ba ɛrɛ bɛābu lo etɔɔ̄ bu Paradais a kɛnɛkɛ̄ mmɛ deedee. (Mat 25:31-33, 46) Doraa i naa ɛp kɛ̄ lo aā edaābeeloo nu nyaana dum gbɛnɛ-edo pya nɛɛ Jɛhova, gbaānage loo lo wuga nɛɛdam ebee lu 18 zua a doo.—Yɔɔ 97:11; Kam 4:18.

3-4. Bie kɔnvɛnsɔn bu zua 1935, e na booboo nɛɛ bee dābeeloo akiiloo wa bɛābu a, e e na anua a?

³ Bie lo kɔnvɛnsɔn, ziī gbɛnɛ nu ɛɛbu bee sira sɔ̄ nɛɛ a gaa nɛ ekɔaue bee kɔ nɛ pya a le kɛ̄ kɔ: “Dɛ̄dɛɛ̄ pya a ɛrɛ bɛābu lo etɔɔ̄dum ina deedee a kɛnɛkɛ̄ a naa yira yah.” Dookɛ̄ ziī i wuga a bee le kɛ̄ kɔ doo, bia kina alu dɛ̄dɛɛ̄ nɛɛ na a bee yira yah a. Lo sɔ̄ wuga Rutherford bee kɔ siā kɔ: “Ɛbaa! Gbɛnɛ-edo nɛɛ!” e gbɛnɛ muɛ̄ ekpaabah bee dɔ. Pya a bee yira yah bee dābeeloo kɔ a naa lu esagɛe wa kɔ ba a tɔɔ̄dum li bunyɔɔ. Ba bee suā kɔ a sii lu etɔ̄e wa nɔɔ̄ bee tɛ̄maloo kaɛ edɔɔ̄ Bari. Lo dee a za nyɔɔnɛ bie lo kɔnvɛnsɔn, 840 pya aā nɛɛ bee liamaā, e gbɛnɛ-edo aba bee le pya a nuuna lo dɔɔ̄na eku naana pee a.

⁴ Sɔ̄ elua enɛ lo ekɔaue sah, zege nɛɛdam i bee kɔ ue kumaloo tua sɔ̄ a le booboo pya dɔɔ̄na bee ɔbɛ ede fituru sa ɔ̄ mii bie Doonu Nuede Loo Uunɛ Nɛɛ-a-i-ɛrɛ. Lo etɔgɛ kumalookɛ̄, ziī wuga nɛɛdam bee kɔ nu alɛ le booboo nɛɛ kɛɛrɛ sɔ̄ a bee kɔ: “Bie Doonu Nyɛŋiabu Loo Luh Jizɔs bu zua 1935 na a bee lu kpɛdumɛ sɔ̄ m de fituru sa ɔ̄ mii a wee lu esu daā lo doonu a. M bee dābeeloo kɔ a naa lu etubo mɛ baloo tɛ̄maloo kaɛ edɔɔ̄ Jɛhova nua nɛɛ a ɛrɛ bɛābu lo ekii bunyɔɔ; taāwo, m bɛābu lo etɔɔ̄dum a kɛnɛkɛ̄ sa ɛrɛ epoo bu tam doo kɔ kɛnɛkɛ̄ alu paradais li deesī.” (Rom 8:16, 17; 2 Kɔr 1:21, 22) Aā lo sɔ̄, pya gbɛnɛ eku nɛɛ kiisī lo enyim yii loo bu buā sa gaa nyɔɔnɛ pya a siga * yɛɛ pya a bee lu etɔ̄ nɔɔ̄ bee ba lege a kɛnɛkɛ̄ siniatam.

5. Jɛhova ɛp pya a ɔbɛ ede fituru sa ɔ̄ mii bie Doonu Nyɛŋiabu Loo Luh Jizɔs doodoo wa?

⁵ Jɛhova ɛp pya a bee ɔbɛ ede fituru sa ɔ̄ mii a wee lu esu daā Doonu Nyɛŋiabu Loo Luh Jizɔs sɔ̄ zua 1935 etɛ̄na doodoo wa? E lo a le ziī nɛɛ Ekeebee eliamaā bu ilii dee ama de fituru sa ɔ̄ mii bie Doonu Nuede Loo Uunɛ Nɛɛ-a-i-ɛrɛ, sa bu kaka a sikɛ̄ dābeeloo kɔ a naa lu etɔ̄e ye nɔɔ̄ bee a? (1 Kɔr 11:28) Pio nɛɛ edea fituru sa ɔ̄ mii a wee lu esu daā lo doonu nyɔnɛbee ba naa bee dābeeloo bɛābu ba ɛrɛ. Mɛ, lo ba yiga wa ekwɔ, ɔbɛ ede, sa kiisī lo etaāŋabah Jɛhova bu bɔ ture nyiɛ loo, esu wa yere yɛɛ pya lo dɔɔ̄na eku naana pee a. Kere ba naa de lo fituru sa ɔ̄ mii a, ba si Doonu Nyɛŋiabu Loo Luh Jizɔs nyɔɔbee bu wa ɛɛ loo nu Jɛhova le Jizɔs edora wa nɛ.

6. E na Jizɔs enɛa lok pya ɛnjɛl kɔ ba a doo a?

⁶ Kuma sɔ̄ gbɛnɛ etɛɛrɛloo ewaraloo  kɛ̄ a, elee i kɔ ue nyɔɔ nu a le bu kpa Mumuuna 7 ekobee lo a kɔ nu akiiloo pya alu etɔ̄ nɔɔ̄ bee le pya gbɛnɛ eku nɛɛ a nuuna dɔɔ̄na eku naana pee a. Jizɔs nɛ lok kɔ pya ɛnjɛl a kiigesī lo e’aabaloo efɔp gbeā nu a le nia bee gah loo nyɔuwe. Ba naale elɛɛbaloo lo efɔp mmɛ sɔ̄ elua eyere nukuādɛɛ̄ loo dɛ̄dɛɛ̄ pya Nɛɛ Kraist alu etɔ̄ nɔɔ̄ bee a le a kɛnɛkɛ̄, lo a kura kɔ, Jɛhova esua wa nyɔɔ wa e’agatɛ̄ yira. (Mum 7:1-4) Ekpɛanu alu enɛ pya wuga Kraist alu etɔ̄ nɔɔ̄ bee nyɔɔ wa e’agatɛ̄ yira na bee alu esu wa nua pya mɛnɛ le pya ewɔp ba ye le loo li bunyɔɔ. (Mum 20:6) E taɛ dɛ̄dɛɛ̄ pya a nuuna butɔ Bari a le li bunyɔɔ lo emuɛ̄ 144,000 pya alu etɔ̄ nɔɔ̄ bee ba ɛrɛ wa ekpɛanu li bunyɔɔ.

7. Dookɛ̄ a le bu kpa Mumuuna 7:9, 10 doo, ba mɛɛ̄ na Jɔn bee muɛ̄ bu mɔmanudɛɛ̄ a, e e na ba gaa bee doo a? (Ɛp foto ale nyɔɔ eko.)

⁷ Sɔ̄ Jɔn ekɔa nu akiiloo 144,000 pya mɛnɛ le pya ewɔp sah, a bee muɛ̄ nu a lee gbɛnɛ, lo a le “gbɛnɛ-edo nɛɛ” a tɛɛ̄ yeebah Amagidɔn. Ba naa bee lo tua eku nɛɛ a, eree baɛ eku nɛɛ ama kuīkpo sa naa lu esuā wa buā. (Buū Mumuuna 7:9, 10.) Ba “yaa ɛɛ bɛloo,” lo a tɔgɛ kɔ ba esere wa loo lɛɛ loo nu “eyere wa kpu loo” a aabu nyɔuwe Setan sa ba ekirasī lo etɔɔ̄ agara nɛ Bari le Kraist. (Jem 1:27) Ba wiikpā kɔ elua ekpɔā wa nyɔɔ nu Jɛhova le Jizɔs, lo a le Nwiī naana pee Bari edoora. Gbaāloo wo, ba aara lah zoo, lo a tɔgɛ kɔ ba su ɛɛbu suā Jizɔs nua Mɛnɛ Jɛhova etubobaloo.—Dooreloo Jɔn 12:12, 13.

8. E na kpa Mumuuna 7:11, 12 i kɔ nɛ akiiloo pya butɔ Jɛhova a le bunyɔɔ ani?

⁸ Buū Mumuuna 7:11, 12. E na a bee sira sɔ̄ pya a le bunyɔɔ muɛ̄ lo gbɛnɛ eku nɛɛ a? Jɔn bee muɛ̄ kɔ dɛ̄dɛɛ̄ pya a le bunyɔɔ ɛrɛ ɛɛbu sa ba leera Bari sɔ̄ ba muɛ̄ gbɛnɛ eku nɛɛ a. Bu pya butɔ Jɛhova a le bunyɔɔ e’ɛɛ lo emuɛ̄ dooa gbɔ̄mɛɛ̄ mɔmanudɛɛ̄ ama sɔ̄ gbɛnɛ eku nɛɛ etɛɛ̄ yee gbɛnɛ etɛɛrɛloo.

9. Dookɛ̄ Mumuuna 7:13-15 kɔ doo, e na pya a nuuna gbɛnɛ eku nɛɛ gaa doo anyaawo a?

⁹ Buū Mumuuna 7:13-15. Jɔn bee ɛm kɔ lo gbɛnɛ eku nɛɛ e “loga wa bɛloo sa doo kɔ ba a ɛɛ bu miī Nwiī-naana-pee.” Lo ama kura kɔ ba ɛrɛ ekɛɛrɛ beenyiɛ a loga sa nyɔɔnɛ Jɛhova ɛrɛ le gbanialoo. (Ais 1:18) Ba lu pya Nɛɛ Kraist ba ekīna loo nɛ sa liamaā, lo ba ɛrɛ e’agatɛ̄ yira bu waara zɔɔ Jizɔs sa ɛrɛ le gbanialoo kumaloo Jɛhova. (Jɔn 3:36; 1 Pit 3:21) Nyɔɔwo, ba bɔloo eyira kɛ̄sī kasi mɛnɛ Bari “sa ye si tam nɛ edɛɛ̄ le pie” bu ye tɔkaɛ bu edɔɔ̄ a le a kɛnɛkɛ̄. Kere nyaawo, ba gaa su mɛm siātam zue le yereue Buɛ̄-mɛnɛ le dodoo kɔ pya nɛɛ a nyɔɔnɛ dumɛ Jizɔs, sa su Buɛ̄-mɛnɛ Bari nua tuatua bu wa dum.—Mat 6:33; 24:14; 28:19, 20.

10. E na alu edoo kɔ pya gbɛnɛ eku nɛɛ a suā leere a, e amunu yii na ba gaa le muɛ̄ ye dooa gbɔ̄mɛɛ̄ a?

¹⁰ Lu edoo kɔ pya gbɛnɛ eku nɛɛ a tɛɛ̄ yeebah gbɛnɛ etɛɛrɛloo a suā kɔ Bari gaa le kiisī lo ekuū wa dɛɛ̄loo, nyɔnɛbee “Nɛɛ a . . . ɛŋɛtɛ̄ nyɔɔ kasi mɛnɛ a eyaari ye tɔkpo wa nyɔɔ.” Yii a gaa bee taɛ pya dɔɔ̄na eku naana pee emuɛ̄ ye dooa gbɔ̄mɛɛ̄ a, gaa le dooa, lo a kɔ: “[Bari] e siŋana dɛ̄dɛɛ̄ maato wa lɛɛ dɛɛ̄, e luh naale elena, ale ekiɛ̄nu, ale to, ale yɔyɔ.”—Mum 21:3, 4.

11-12. (a) Dookɛ̄ alu emuuna bu kpa Mumuuna 7:16, 17 doo, amunu leelee na pya gbɛnɛ eku nɛɛ e’ɛrɛ li deesī a? (b) E na pya a nuuna dɔɔ̄na eku naana pee edoo bie Doonu Nyɛŋiabu Loo Luh Jizɔs a, e e na anua a?

 ¹¹ Buū Mumuuna 7:16, 17. Taɛ nyaawo, pio pya nɛɛ Jɛhova le bu lɛɛraloo nyɔɔ naɛbah ale nyɔɔbee ba naa dap ɛrɛ kpugi nyɔɔ taāŋa ale ebea nɔ̄. Lu eyere pya dɔɔ̄na kpɔgɔrɔ nyɔɔ wa yira. Kerewo, bu pya a nuuna gbɛnɛ eku nɛɛ ɛɛ lo esuā kɔ aba sɔ̄ ba tɛɛ̄ yeebah gbeerasī lo pɔrɔ sɔ̄ nyɔuwe ama, ba gaa le ɛrɛe gbɛnɛkpo nuede bu namloo le bu edɔɔ̄. Sɔ̄ elu egbeesī nyɔuwe Setan, pya ba nuuna gbɛnɛ eku nɛɛ gaa le sibah “miāmiāloo” a aaloo saŋ Jɛhova, lo a gaa le lu e’egara nyɔɔ dɛ̄dɛɛ̄ edonyɔɔ. Sɔ̄ gbɛnɛ etɛɛrɛloo e’ina kuma, Jizɔs gaa le ture pya a sibah ba le a kɛnɛkɛ̄ mmɛ loo “maa dum [a naa tah].” O muɛ̄ge ama: Pya gbɛnɛ eku nɛɛ ɛrɛ kaāna bɛābu. Yɛɛ yube pya nɛɛ ebee tɔɔ̄dum, alaba ɛrɛ bɛābu dum a naa tah!—Jɔn 11:26.

¹² Pya dɔɔ̄na eku naana pee ɛrɛ kaāna bɛābu a doo kɔ ba a doo yaa Jɛhova le Jizɔs! Naa lu esagɛ wa kɔ ba a tɔɔ̄dum li bunyɔɔ, kerewo, a naa kura kɔ ba naa kuī loo Jɛhova. Pya alu etɔ̄ nɔɔ̄ bee le pya dɔɔ̄na eku naana pee dap leera Bari le Jizɔs. Ziī sīdee ba doo wo na tɛ̄maloo sisi Doonu Nuede Loo Uunɛ Nɛɛ-a-i-ɛrɛ.

13-14. E na anua a lee kɔ dɛ̄dɛɛ̄ nɛɛ a si Doonu Nyɛŋiabu Loo Luh Jizɔs ani?

¹³ Bu pio zua lo, dap lu aba ziī nɛɛ yɛɛ 1,000 nɛɛ a si Doonu Nyɛŋiabu Loo Luh Jizɔs na a wee de lo fituru sa ɔ̄ lo mii a. Lɔgɔ nɛɛ a de lo fituru sa ɔ̄ lo mii naa wee le bu gbɛnɛ-edo bɔŋanaloo. Gbɛnɛ-edo nɛɛ a si Doonu Nyɛŋiabu Loo Luh Jizɔs ɛrɛ bɛābu lo etɔɔ̄dum a kɛnɛkɛ̄. Lo a le wo, e na anua ba si Doonu Nyɛŋiabu Loo Luh Jizɔs ani? Nu anua pya nɛɛ wee si kɛ̄ wa gbo gaa ii wa na anua ba sinage a. Ba wee si lo etɔgɛ pya a gaa iya ziī kɔ ba weree wa loo sa wa yerekpotɛ̄. Nyɔɔwo, pya a nuuna gbɛnɛ eku naana pee si Doonu Nyɛŋiabu Loo Luh Jizɔs lo etɔgɛ kɔ ba wereeloo sa yerekpotɛ̄ Kraist le pya alu etɔ̄ nɔɔ̄ bee.  Pya a nuuna dɔɔ̄na eku naana pee sinage lo etɔgɛ nia loo waara zɔɔ lo doonu gaa wa nyɛŋiabu, lo a le waara zɔɔ a doo kɔ tɔɔ̄dum mmɛ deedee a kɛnɛkɛ̄ a waɛ.

¹⁴ Dɔɔ̄na gbɛnɛ nu anua pya dɔɔ̄na eku naana pee si Doonu Nyɛŋiabu Loo Luh Jizɔs na lo egbaɛ̄tɔ̄loo lok Jizɔs. Sɔ̄ a bee nyɔɔnɛ pya a wee ye nyɔɔnɛ dumɛ ba bɔloo eture nyiɛ loo bɔātɛ̄ keebee doonu ama, a bee wa kɔ nɛ kɔ: “Dooraa lo ba ama bu kɛkɛɛrɛ mɛ bu.” (1 Kɔr 11:23-26) Nyɔɔwo, ba kiisī lo esi Doonu Nyɛŋiabu Loo Luh Jizɔs kuma sɔ̄ pya a bee lu etɔ̄ nɔɔ̄ bee lege a kɛnɛkɛ̄. Bu kaka, pya dɔɔ̄na eku naana pee wee kue dɛ̄dɛɛ̄ nɛɛ kɔ ba a nyɔɔnɛe wa si Doonu Nyɛŋiabu Loo Luh Jizɔs.

15. E na ili i doo lo eleera Bari le Kraist bie Doonu Nyɛŋiabu Loo Luh Jizɔs ani?

¹⁵ Bie Doonu Nyɛŋiabu Loo Luh Jizɔs, i ɛrɛ dee lo eleera Bari le Kraist tɛ̄maloo yɔɔ le kara. Ekobee ue ekɔaue elu enɛ bu zua ama na “Tɔgɛ Nia Loo Nu Bari Le Kraist Edoora A Nɛ!” A gaa le doo kɔ i agɛrɛbah tɔgɛ nia loo Jɛhova le Jizɔs. Sɔ̄ a gaa lu etɛ̄ma lo fituru le mii, elu enyɛŋiabu pya a le kɛ̄ kɔ a tɔɔ̄dɔ namloo le miī Jizɔs. Elu enyɛŋia i bu kɔ Jɛhova bee lɛɛbaloo kɔ ye Nwiī a u i bee lokwa ili tɔɔ̄dum. (Mat 20:28) Dɛ̄dɛɛ̄ nɛɛ a wereloo i Tɛ a le li bunyɔɔ le ye Nwiīnɛɛdam epiiga lo ele kɛ̄ loo Doonu Nyɛŋiabu Loo Luh Jizɔs.

16. Bu amunu sīdee na pya alu etɔ̄ nɔɔ̄ bee le pya dɔɔ̄na eku naana pee bee ziī a?

¹⁶ Pya a bee lu etɔ̄ nɔɔ̄ bee le pya dɔɔ̄na eku naana pee bee ziī bu pio sīdee, e Jɛhova tɔgɛ nia loo baɛ aba. Jɛhova naa wereloo ziī aba ema ziī. Nyɔɔbee aba ziī nu na a bee lu esu nyaa baɛ aba a, lo a le dum ye wereloo Nwiīnɛɛdam. Aba kee a le yɛɛ baɛ eku nɛɛ ama na bee ba ɛrɛ keekee bɛābu. Baɛ aba ɛrɛ etɔɔ̄ agara nɛ Bari le Jizɔs lo e’ɛrɛ wa ekpɛanu. (Yɔɔ 31:23) E nyɛŋiabu kɔ Jɛhova nɛ ye kaɛ edɔɔ̄ ziī ziī nɛɛ dɛɛa nyɔɔ ye ebɛɛ̄, kere alu nɛɛ alu etɔ̄ nɔɔ̄ bee ale nɛɛ a nuuna dɔɔ̄na eku naana pee.

17. E na pya a siga yɛɛ pya a bee lu etɔ̄ nɔɔ̄ bee gaa ɛmadɛɛ̄ a?

¹⁷ Pya Nɛɛ Kraist alu etɔ̄ nɔɔ̄ bee naa ɛrɛ bɛābu lo ekii bunyɔɔ sɔ̄ ba mɛā. Bari na a wa nɛ a. Ba kɛɛrɛbu loo wa bɛābu, yere kara kumaloo, sa kpɛ̄naloo e’ɛrɛ wa ekpɛanu li bunyɔɔ. Ba naa suā kɛ̄ wa ekpaloo emɛā doo li bunyɔɔ. (Fil 3:20, 21; 1 Jɔn 3:2) Kerewo, ba gaa ɛmadɛɛ̄ lo ele kpaɛ̄ Jɛhova, Jizɔs, pya ɛnjɛl, le pya dɔɔ̄na nɛɛ ebee lu etɔ̄ nɔɔ̄  bee. A taɛ wa lo ele wa yɛɛ li Buɛ̄-mɛnɛ bunyɔɔ.

18. E na pya dɔɔ̄na eku naana pee gaa ɛmadɛɛ̄ a?

¹⁸ Pya dɔɔ̄na eku naana pee tɔgɛ nia loo bɛābu dɛ̄dɛɛ̄ nɛɛ ɛrɛ, lo a le bɛābu tɔɔ̄ dum mmɛ deedee a kɛnɛkɛ̄. (Eklis 3:11) Ba gaa ɛmadɛɛ̄ taɛ dee ba eyerebah lo edoo kɔ yube kɛnɛkɛ̄ alu paradais. E a taɛ wa emuɛ̄ sɔ̄ ba edap wu alaba tɔ, foh alaba nu, sa kpɔā pya wa miɔŋɔ bu mmɛɛ̄ nwanaloo. (Ais 65:21-23) Ba gaa ɛmanage dɛɛ̄ sɔ̄ ba edap si dɛ̄dɛɛ̄ kɛ̄ a le bu nyɔuwe ama, sa si wee muɛ̄ keekee egu, kuɛ, le pɛnɛ, sa nɔ nu akiiloo dɛ̄dɛɛ̄ nu Jɛhova edɛma. Lo a ee dɛ̄dɛɛ̄ ɛɛ na bee, bu wa ɛɛ lo esuā kɔ gbanialoo ba nyɔɔnɛ Jɛhova ɛnia gaa le kiisī lo enyim sa agaloo.

19. Amunu dee na Doonu Nyɛŋiabu Loo Luh Jizɔs nɛ ziī ziī ii a, e mɛ sɔ̄ na elu edoo lo doonu bu zua ama a?

¹⁹ Jɛhova enɛā bɛābu akiiloo deesī li ziī ziī pya ye zooro ba ye kiīloo nɛ. (Jer 29:11) Doonu Nyɛŋiabu Loo Luh Jizɔs nɛ i gbɛnɛ dee lo eleera Bari le Kraist loo nu ba edora i nɛ lokwa i dap ɛrɛ dum a naa tah. Lɔgɔ baɛbaɛ beenyiɛ naale loo kɔ Doonu Nyɛŋiabu Loo Luh Jizɔs lu doonu a kuī lo pya kaka Nɛɛ Kraist wee doo dɛ̄dɛɛ̄ zua. Elu edoo sɔ̄ zue edɛba kii kɛ̄ taɛ Dee Nwīpinikaɛ, 27 biradee bu Taa Enɔɔ̄, 2021. Bu zua ama, gbɛnɛ-edo nɛɛ esi lo doonu sa lɔgɔ nu naale egbana wa sī. Pya dɔɔ̄na esinage kere alu egbana wa sī. Pio nɛɛ eyiranage bu tɔ kpɔgɔrɔ doo doonu ama. Lu kaāna nia Jɛhova, Jizɔs, pya ɛnjɛl, le pya alu etɔ̄ nɔɔ̄ bee ba e’ina bunyɔɔ, lo emuɛ̄ sɔ̄ dɛ̄dɛɛ̄ bɔŋanaloo, eku pya nɛɛ, le ziī ziī nɛɛ ele kɛ̄ loo Doonu Nyɛŋiabu Loo Luh Jizɔs!