Jizɔs Bee Uge Nyɔɔ Mda Ni?
BAIBOL aara e’ɛma akiiloo pya nɛɛ ba bee yira agɛrɛ lo ba i “bee bu namloo.” (Jem 5:17) Bu edoba, i dap nwaabah dābeeloo pya ue Pɔɔl a le bu kpa Pya Rom 7:21-24 lo a kɔ: “Kere sɔ̄ m gbī edoo nu a lee a, pɔrɔ tɔɔ̄ mɛ bialoo. . . . Nɛɛ-muɛ̄-saa-dɛɛ̄ na mda a!” Sɔ̄ i gbī ebebe loo i namloo a naa mmana, a yere i mɛm loo sɔ̄ i suā leere kɔ Pɔɔl bee lenage doo wo.
Pɔɔl bee kɔnage pya dɔɔ̄na kɛ̄ nu bee ye tɔɔ̄ loo doo. Bu kpa Pya Galetia 2:20, a bee kɔ Jizɔs “were mɛ loo, sa su ye loo mɛ nɛ nyɔɔ!” Olo kɛɛrɛge doo wo ni? Naa daba naale dɛ̄dɛɛ̄ sɔ̄.
Lo a le i kɛɛrɛ kɔ ii le e dɛɛ̄ lɔgɔ nu nyɔɔbee ekwɔ i bee tɛɛ̄ sɔ̄ akii adumɛ, e aga i bah eyiga kɔ Bari were i loo le kɔ a e’aaraloo i nɛ, sa e aga nage i bah esu waara zɔɔ Jizɔs nua dɔɔ̄nu Bari nɛ taɛ ili. Jizɔs gbīge kɔ i suā kɔ ye waara zɔɔ a’agara lu dɔɔ̄nu alu enɛ ziī ziī ii ni? Lo a le wo, e na eyerebah i nɛ kɔ i doo wo a? I naa kɔ ue nyɔɔ baɛ ebip ama.
KƐ̄ JIZƆS ƐP YE WAARA ZƆƆ A’AGARA DOO
Bu kaka, Jizɔs gbī kɔ i ɛp ye waara zɔɔ nua dɔɔ̄nu a lu enɛ ziī ziī ii. I tɛɛ̄ doodoo wa suā doo wo? Naa kɛɛrɛbu nu a gaa bee sira bu e’ɛma a le bu kpa Luk 23:39-43. Lu eka ziī gbara loo te kpaɛ̄ Jizɔs. A kɔ a bee sie pɔrɔ. A bee si gbɛnɛ pɔrɔ nyɔnɛbee aba pya nɛɛ a si gbɛnɛ pɔrɔ na a wee lu eka loo te sa fɛ a. Beenyiɛ lo gbara bee ye begee ue mmɛ lo kɛ̄ a bara Jizɔs kɔ: “Kɛɛrɛ mɛ bu sɔ̄ o lu bu o Buɛ̄-mɛnɛ.”
E na Jizɔs bee ye agara nɛ a? Naa kɛɛrɛ dua ezialoo Jizɔs bee le bu sɔ̄ a kiira ye ekobee sa gbīge e’ɛp sī lo nɛɛ bag dogo. Kere adoo Jizɔs bee le bu gbɛnɛ ezialoo, a bee baa bɛɛ lɛɛ a nɛ egbɔ̄nyiɛ lo gbara sa ye kɔ nɛ kɔ: “Kaka m kɔ a nɛ anii’ee, o le mɛ loo bu Paradais.” Jizɔs ebee dap nyɛŋiabu lo gbara kɔ “Nwiī nɛɛ bee lu . . . lo esu ye dum nua nu a elu esu agara booboo nɛɛ.” (Mat 20:28) Mɛ o yerege nukuādɛɛ̄ loo kɔ Jizɔs kɔ ue doodoo bee ye waara zɔɔ a’agara dɔ nage biī nɛ lo gbara ni? A fɛɛrɛloo kɔ ue tɛ̄maloo esu bee ue a doodoo, “o” le “m” kɔā ue. E a kɔ nɛ lo gbara kɔ a gaa le tɔɔ̄ dum bu paradais a kɛnɛkɛ̄.
Baɛbaɛ beenyiɛ naale loo, Jizɔs bee gbī kɔ lo gbara a suā kɔ ye waara zɔɔ a’agara edɔ biī nɛ taɛ alɛ. Lo a le Jizɔs kɛɛrɛ nu doo wo ama kumaloo nɛɛ bag dogo lo a naa ɛrɛ dee lo etaāŋabah Bari, e aa nage loo nɛ Nɛɛ Kraist eliamaā a gaa taāŋabah Bari. E na eyerebah i nɛ kɔ i suā kɔ waara zɔɔ a’agara Jizɔs edɔbiī nɛ ziī ziī ii kaɛlɛɛ pɔrɔ i ebee si sɔ̄ akii adumɛ a?
NU A BEE YEREBAH NƐ PƆƆL
Pɔɔl bee suā leere kɔ Jizɔs bee u nage nyɔɔ alɛ nyɔnɛbee a bee ye nɛ tam zue ue. Bu mɛ sīdee? A bee baatɛ̄ kɔ: “M doo yaa nɛɛ a bee mɛ nɛ ekpo, Kraist Jizɔs Nɛɛ-a-i-ɛrɛ, nyɔnɛbee a bee mɛ buū nua nɛɛ ture nyiɛ loo esi tam ye nɛ, kere m bee kɔ Bari gbee tua sɔ̄ sa lu nɛɛ tɛ̄ŋaloo sa ye gbee bee.” (1 Tim 1:12-14) Esiatam Pɔɔl bee doo kɔ a suā kɔ Jizɔs ɛrɛ ye toesaɛ̄ loo, ye wereloo, sa ye dɛrɛ nyiɛ nyɔɔ. Jizɔs enɛa nage i tam zue le yereue. (Mat 28:19, 20) I tam zue ue dooge kɔ i suā kɔ Jizɔs bee i u bee ni?
Albert lo a bee lu ekpo lɛɛ bu bɔŋanaloo sa a tɔɔ̄ ee nu a luge 34 zua lɛɛ a obia pii Jɛhova bee kɔ: “Mm wee ibere piya nu m bee doo. Mɛ sɔ̄ m le uwe zue ue, m wee muɛ̄ kɔ Jizɔs enɛa mɛ esiatam zue ue dookɛ̄ a bee nɛ nɛɛ lɛɛratam Pɔɔl doo. A yere mɛ mɛm loo sa doo kɔ bu mɛ a ɛɛ loo aba mm, loo na dum le kiiloo kɛ̄ dum emɛā doo li deesī.”—Yɔɔ 51:3.
Kuma sɔ̄ o gaa nɔɛ̄ Baibol pya nɛɛ a le dɛ̄dɛɛ̄ edonyɔɔ, yerebah wa nɛ kɔ ba a suā kɔ Jizɔs were wa loo sa wa ɛrɛ toesaɛ̄ loo
Allan, nɛɛ lɛɛ a gae nɔ kaka ue, a wee lu nɛɛ a doo bag dogo sa doogi dogo lumiī, bee kɔ: “M lege gaa kɛɛrɛ pɔrɔ pɔrɔ nu m bee doo loo pya nɛɛ. Pio sɔ̄, a wee mɛ nua ekiɛ̄nu loo. Mɛ m doo yaa Jɛhova kɔ a doo kɔ nɛɛ pɔrɔ a le doodoo mda a kiiya sa su le yereue mmɛ loo pya dɔɔ̄na. Sɔ̄ m muɛ̄ kɛ̄ pya nɛɛ su le yereue doo, a nyɛŋia mɛ bu kɛ̄ Jɛhova lee sa ɛrɛ wereloo doo. M muɛ̄ kɔ a su mɛ yeābah nɛ pya nɛɛ ba edora nage pɔrɔ pɔrɔ nu.”
Si uwe zue ue yerebah i nɛ kɔ i doo nu a lee, le kɔ i ɛrɛ le ekɛɛrɛ. A tɔgɛ nage i kɔ Jizɔs to i esaɛ̄, i wereloo, sa i dɛrɛ nyiɛ nyɔɔ.
JƐHOVA KUĪ EE I BEENYIƐ
Sɔ̄ pɔrɔ nyɔuwe Setan gaa bɛɛ ama e’ina kuma na i biewo e’ɛrɛ ekiɛ̄nu loo pɔrɔ i bee si sɔ̄ akii adumɛ a. E na eyerebah i nɛ kɔ i bebe loo dua ekɛɛrɛ ama a?
Jean, lo a wee bialoo bege ue aba ɛɛ loo kɛ̄ a bee tɔɔ̄ baɛsī dum doo sɔ̄ a bee le zege bee kɔ: “Agɛrɛ mɛ loo sɔ̄ m suā kɔ ‘Bari kuī ee i beenyiɛ.’ ” (1 Jɔn 3:19, 20) Ili dap nage ɛrɛ egbɔ̄nyiɛ aāloo esuā kɔ Jɛhova le Jizɔs suā kɔ i lu pya pɔrɔ ee kɛ̄ ili suā doo. Nyɛŋiabu kɔ ba naa nɛ dɔɔ̄nu a’agara nyɔɔ pya nɛɛ a mma, mɛ nyɔɔ pya nɛɛ a kiiya aaloo wa pɔrɔ.—1 Tim 1:15.
I yiga pya kaka ue ama sa su waara zɔɔ a’agara sɔ̄ i yere kara sa ɛrɛ ekɛɛrɛ nyɔɔ kɛ̄ Jizɔs aara pya nɛɛ a naa mmana doo, le sɔ̄ i doo kuma kɛ̄ i dap doo lo esitam Jizɔs ebee i nɛ kɔ i si. Lo i doo wo i le doodoo Pɔɔl sa kɔ: Jizɔs “bee mɛ wereloo sa su ye loo . . . nɛ nyɔɔ mda.”