1-2. (a) E na anua a naale elu i nyɛŋia loo lo pya bɛbɛɛ kpaɛ̄ i tam ani? (b) E na i gaa le nɔ bu ekobee ue ama a?

BU ZUA 2018 a, nu a eeloo 223,000 pya zue ue Buɛ̄-mɛnɛ bee le barasī a bee lu ekpaɛ̄ i tam. Lo ama naa lu i nyɛŋialoo. Dookɛ̄ i bee nɔ doo bu lo ekobee ue akii adumɛ a, i suā kɔ elu etɛ̄ŋaloo pya kaka Nɛɛ Kraist. (2 Tim 3:12) Kaɛlɛɛ ɛrɛgeba kɛ̄ i tɔɔ̄, pya bɛbɛɛ dap bugia i kpaɛ̄ lɛɛloo etaāŋabah ilii Bari Jɛhova.

² Lo pya bɛbɛɛ a le barasī o tɔɔ̄ biaɛfii lo e’ɔbɛ a lɛɛloo etaāŋabah Jɛhova, o dap bip aba ɔɔ kɔ: ‘Kurage kɔ bu Bari biira i loo na anua alu etɛ̄ŋa i loo ani? Kpaɛ̄ i tam edooge kɔ i aa taāŋa na bah Jɛhova ni? M kii dɔɔ̄na edo kɛ̄ a naa lu etɛ̄ŋa i loo ni?’ I gaa le agara pya ebip ama bu ekobee ue ama. I nɔnage kɛ̄ i dap kiisī lo etaāŋabah Jɛhova doo sɔ̄ a lu ekpaɛ̄ i tam, le pya nu ii le edoo.

3. Dookɛ̄ 2 Pya Kɔrint 11:​23-27 kɔ doo, mɛ dua tɛ̄ŋaloo na nɛɛ lɛɛratam Pɔɔl bee kpesī a, E na nu a bee ye sira loo i tɔgɛ a?

³ Lo pya bɛbɛɛ kpaɛ̄ i lɛɛloo etaāŋabah Bari, dap i tɔɔ̄loo kɔ bu Bari biira i loo. Mɛ nyɛŋiabu kɔ, tɛ̄ŋaloo naa kura kɔ bu Bari biira i loo. Naa kɛɛrɛbu nu akiiloo nɛɛ lɛɛratam Pɔɔl. Bu Bari bee ye ɛɛ loo kaāna. Bari bee ye su ɛma 14 kpa a le bu naɛsī Kpa Kaɛ a bee lu e’ɛm bu muɛ̄ ue Grik, sa a bee lu nɛɛ lɛɛratam nɛ  pya dɔɔ̄na buɛ̄. Kerewo, a bee kpesī e’agabah tɛ̄ŋaloo. (Buū 2 Pya Kɔrint 11:​23-27.) Aāloo nu a bee sira loo nɛɛ lɛɛratam Pɔɔl, i nɔ kɔ Jɛhova lɛɛbaloo kɔ alu etɛ̄ŋaloo pya ye zooro ba ye tɔɔ̄ agara nɛ.

4. E na anua nyɔuwe baa i loo a?

⁴ Jizɔs bee baatɛ̄ nu anua i ɛrɛ e ɛmadɛɛ̄ tɛ̄ŋaloo. A bee kɔ, elu ebaa i loo nyɔɔbee ii nuuna nyɔuwe. (Jɔn 15:​18, 19) Tɛ̄ŋaloo naa kura kɔ bu Jɛhova biira i loo. Mɛ a tɔgɛ kɔ i gaa doo nu a lee!

5. Miɔŋɔ nɛɛ ɛrɛge ekpo lo ekpaɛ̄ i lɛɛ loo etaāŋabah Jɛhova ni? Naa nɛ edoba.

⁵ Miɔŋɔ nɛɛ naale edap i kpaɛ̄ lɛɛ loo etaāŋabah Jɛhova ilii Bari a eenyɔɔ dɛ̄dɛɛ̄ nu. Gbɛnɛ-edo nɛɛ epiiga lo ɔbɛ i mɛ ba naa dap. Naa kɛɛrɛ nu a bee sira bu II Sɔ̄ Nɔ Nyɔuwe a. Lo sɔ̄, pya bɛbɛɛ a le gbɛnɛ-edo barasī bee tɛ̄ŋaloo pya nɛɛ Bari bu e’agabah. Naale aba pya bɛbɛɛ Nazi na a bee kpaɛ̄ tam Pya Ekeebee Jɛhova a, mɛ pya bɛbɛɛ a le Australia, Canada, le pya dɔɔ̄na barasī bee kpaɛ̄ nage wa tam. Mɛ yere nukuādɛɛ̄ loo nu a bee sira aabu. Sɔ̄ lo nɔ̄ bee bɔātɛ̄ a bu zua 1939 a, buā pya zue ue a bee le tɛɛ̄ ɛŋɛnɛ nyɔuwe bee lu 72,475. Mɛ kpɛa tɔgɛ kɔ sɔ̄ lo nɔ̄ ina kuma bu zua 1945, buā pya zue ue sikɛ̄ lu 156,299. Jɛhova nɛ leelee pya ye nɛɛ doo kɔ ba a yiiloo baɛ sɔ̄ ee kɛ̄ ba bee le doo!

6. Taā tɛ̄ŋaloo i yere bɔɔ bu, pya amunu le nu na a wee sira aabu a? Naa nɛ edoba.

⁶ Tɛ̄ŋaloo dap i yere mɛm loo lo etaāŋabah Jɛhova mmɛɛ̄, taā alu kɔ a yere i bɔɔ bu. Bu edoba, ziī dam le wa le wa gbagbara nwiīnɛɛdam bee le barasī pya bɛbɛɛ bee kpaɛ̄ i tam. Taā ba ɛrɛ bɔɔ sa ɔbɛ si tam nɛ Jɛhova, ba bee yii bu tam sɛmdee. Lo wa bee ɔbɛ tam a gaa bee lu ekpɛ ye gbɛnɛkpo kpugi loo. Ye dam bee kɔ, nyɔɔbee a bee lu e’ɔbɛ tam Pya Ekeebee Jɛhova a, pya nɛɛ bee bip gbɛnɛ-edo ebip. Wo bee doo kɔ a waɛ ye bah esere gbɛnɛ-edo enɔānu Baibol. Dɔɔ̄na le nu bee sira nage aabu lo ɔ’ɔbɛ ama. Ziī  nɛɛ kanɛɛ a le lo barasī bee kɔ, gbɛnɛ-edo pya nɛɛ a bee ɔbɛ etaāŋabah Jɛhova e’ina gaa si enɔānu sa sinage uwe zue ue.

7. (a) E na kpa Levitikɔs 26:​36, 37 i tɔgɛ a? (b) E na o doo sɔ̄ a lu e’ɔbɛ i tam a?

⁷ Sɔ̄ pya i baa ɔbɛ i tam, nu ba gbī na bee bɔɔ a aa i lo etaāŋabah Jɛhova. Gbaā nage loo lo ɔ’ɔbɛ, ba dap i kɔ esah loo, yere pya polisi kɔ ba a yii i be sa i su bah ekpo aā kuma tɔbiaɛ ale yere pio ii kpɔgɔrɔ. Ba kɛɛrɛ kɔ yere pio ii kpɔgɔrɔ edoo kɔ bɔɔ a aa i. Lo i ɛrɛ wa bɔɔ loo le loo nu ba edoo i, i dap “ɔbɛ” esitam nɛ Jɛhova. Ii gbī ebee pya alu ekɔ nu kumaloo bu kpa Levitikɔs 26:​36, 37. (Buū.) Ii le e’iye kɔ bɔɔ a ɔbɛ i lɛɛ loo esitam nɛ Jɛhova. I dɛrɛ nyiɛ nyɔɔ Jɛhova sa ii le e ɛrɛ bɔɔ. (Ais 28:16) I yere kara bara kɔ Jɛhova a baɛ i loo. I suā kɔ kuma sɔ̄ Jɛhova gaa i yere kpotɛ̄ a, lɔgɔ kɛ̄ bɛbɛɛ miɔŋɔ nɛɛ ɛrɛ ekpo doo, ba naale edap i kpaɛ̄ lɛɛ loo esitam nɛ ilii Bari bu bɔloo ture nyiɛ loo.​—⁠Hib 13:⁠6.

8-9. (a) Amunu biaɛfii na ziī ziī Nɛɛ Kraist edoo nɛ ye loo ale tɛ bee tɔ edoo nɛ ye butɔ ani? (b) E na eyerebah nɛ ziī ziī nɛɛ kɔ a biaɛ nu fii bu suānu a?

⁸ Lo pya bɛbɛɛ a le kɛ̄ o tɔɔ̄ kpaɛ̄ i tam, o dap kɛɛrɛ kɔ o kiie dɔɔ̄na edo kɛ̄ o ɛrɛ oloo bu taāŋabah Jɛhova. Lo ama lu nu ziī ziī nɛɛ ebiaɛfii. Pio nɛɛ e ɛrɛ kaāna biī aāloo sɔ̄ ba dasī nɔ nu akiiloo nu pya Nɛɛ Kraist bu tua sɔ̄ o’oo tup zua bee doo, lɛɛ ba gae biaɛfii nu ba edoo. Sɔ̄ a bee lu etubo dɛm Stivin fɛ, pya a wee nyɔɔnɛ dumɛ Jizɔs a bee le Jerusalɛm bee yaara bu Judia, Sameria, sa ina nage kɛ̄ a binia doodoo Finisia, Saiprɔs, le Antiɔk. (Mat 10:23; Doonu pya Nɛɛ lɛɛratam 8:1; 11:19) Ba dap nage nɔ nu akiiloo kɔ sɔ̄ dɔɔ̄na tɛ̄ŋaloo bee sikɛ̄ aakɛ̄ nyɔɔ pya Nɛɛ Kraist bu tua sɔ̄ o’oo tup zua a, nɛɛ lɛɛratam Pɔɔl bee biaɛfii kɔ a naale e’aa e barasī a gaa lu egbanasī tam zue ue. Kere a bee suā kɔ ba dabe ye fɛ, a biaɛfii lo ezue ue sa yere mɛmloo pya wuga a bee le lo barasī sɔ̄ lo tɛ̄ŋaloo le e’aga bu.​—⁠Doonu pya Nɛɛ lɛɛratam 14:​19-23.

⁹ E na i nɔ aāloo e’ɛma ama a? Ziī ziī tɛ bee tɔ na ebiaɛfii lo ba e’aa lo barasī ale ba naale e’aa a. Lɛɛ a gae biaɛfii, a yere kara sa ɛrɛ ekɛɛrɛ nyɔɔ kɛ̄tɔɔ̄ pya ye butɔ, sa kɛɛrɛ bu loo pah edap wa ɛrɛ nyɔɔ. Bu kɛ̄tɔɔ̄ ama, ziī ziī Nɛɛ Kraist gaa le “toora alɛɛ toh.” (Gal 6:⁠5) Ii le ebiaɛ pya dɔɔ̄na nyɔɔ wa biaɛfii.

10. Amunu zuurabahtɔ̄ na tɔ-naatam le pya kanɛɛ enɛ a?

¹⁰ Bu mɛ sīdee na o dap kiisī lo etaāŋabah Jɛhova sɔ̄ alu ekpaɛ̄ i tam ani? Tɔ-naatam e kɔ nu pya kanɛɛ a le bu o bɔŋanaloo edoo le kɛ̄ ba e ɛrɛ nuede bu edɔɔ̄ aā, sīdee ba e ɛrɛ enɔānu, le kɛ̄ ba esi uwe zue ue doo. Lo tɔ-naatam naa dap mmɛ ue loo pya kanɛɛ, lo sɔ̄ pya o kanɛɛ eyerebah a nɛ le dɛ̄dɛɛ̄ pya a le bu bɔŋanaloo lokwa bui kiisī lo etaāŋabah Jɛhova. Ba edoo kɔ wa zuurabahtɔ̄ a dɛɛa nyɔɔ nu a le bu Baibol le nu a le bu pya i kpa.​—⁠Mat 28:​19, 20; Doonu pya Nɛɛ lɛɛratam 5:29; Hib 10:​24, 25.

11. O tɛɛ̄ doodoo wa suā kɔ o gaa le ɛrɛ dɛ̄dɛɛ̄ nu a a bɛɛ̄ lo edoo kɔ o yira a agaloo, e e na o dap doo lokwa lɔgɔ nu naa ina loo o Baibol le pya o kpa a?

 ¹¹ Jɛhova e yira yii kɔ pya ye zooro e ɛrɛ nu a wa bɛɛ̄ lokwa ba agaloo bu yira. (Ais 65:​13, 14; Luk 12:​42-44) Nyɔɔwo, o dap suā leere kɔ ye bɔŋanaloo enɛ a ɛrɛgeba nu a a bɛɛ̄ lo edoo kɔ o yira a agaloo. Mɛ a ɛrɛ nu olo dap nage doo. Sɔ̄ a lu ekpaɛ̄ i tam, gbī kɛ̄ o gɔ̄ o Baibol le ɛrɛgeba i kpa o ɛrɛ. Nwaɛ̄dɛɛ̄ lokwa oo bie dua nu a a kuī loo ama kɛ̄ pya nɛɛ emuɛ̄, kere lo a le bu ekpo ale a le bu fon. Ziī ziī ii ɛrɛ epiiga kuma kɛ̄ i dap doo lo e agaloo bu i yira.

12. Pya kanɛɛ e nɔɔ̄ enɔānu doodoo wa lokwa pya nɛɛ naa suā nu i gaa doo?

¹² E na esira loo pya i enɔānu ani? Pya kanɛɛ e nɔɔ̄ kɔ o si enɔānu bu sīdee pya a i gbānasī naale esuā. Ba dap kɔ bui zɔŋia bu eku eku, sa ba dap nage nyaana sɔ̄ le kɛ̄ etɔɔ̄ ɛrɛ enɔānu aā ziī sɔ̄ yii ziī. O dap yerebah lo ekpega pya o wuga tɛ̄maloo ekuma muɛ̄ kɛ̄ kɔ ue sɔ̄ o gaa yii enɔānu le sɔ̄ o aa. O dap nage yaanu a naale edoo kɔ pya nɛɛ a suā kɔ o gaa kii enɔānu.

13. E na i dap nɔ aāloo pya i wuga ba bee le barasī a bee lu ekure Soviet Union tua sɔ̄ a?

¹³ Kiiloo tam zue ue, kɛ̄tɔɔ̄ ziī ziī barasī elu keekee. Mɛ i wereloo Jɛhova sa a nia i sɔ̄ i zue nu akiiloo ye Buɛ̄-mɛnɛ nɛ pya dɔɔ̄na, nyɔɔwo, i gbī kɛ̄ edoo zue ue. (Luk 8:1; Doonu 4:29) Ziī nɛɛ kɔ eloh kere a kura Emily B. Baran bee kɔ ue kumaloo tam zue ue Pya Ekeebee Jɛhova bu barasī a bee lu ekure Soviet Union tua sɔ̄ a, kɔ: “Sɔ̄ pya bɛbɛɛ kɔ nɛ Pya Ekeebee Jɛhova kɔ ba aa zuena ue, lo sɔ̄ na ba agɛrɛbah zue ue nɛ pya wa kɛ̄ zɔ̄ŋɔ, koo kɛ̄tam, le pya wa gbo a. E sɔ̄ alu eyere wa kpɔgɔrɔ nyɔɔ zue ue, ba zuenage ue nɛ pya a le kpɔgɔrɔ.” Kere a bee lu ekpaɛ̄ wa tam bie Soviet Union, pya i wuga naa bee ɔbɛ zue ue. Lo alu ekpaɛ̄ tam zue ue bie kɛ̄ o tɔɔ̄, piiga lo enɔ wa edoba!

14. Amunu zuurabahtɔ̄ na kpa Le-yɔɔ 39:1 i nɛ a?

¹⁴ Nwaɛ̄dɛɛ̄ loo ue o kɔ nɛ pya dɔɔ̄na. Sɔ̄ i tam lu ekpaɛ̄, i ɛrɛ esuā sɔ̄ a bɔloo kɔ i “ubepiī.” (Eklis 3:⁠7) Ii le ekɔ ue a le bu gɔā, doodoo kue bee pya i wuga nɛɛdam le nɛɛwa, kɛ̄ i wee tɔɔ̄ ɛrɛ enɔānu, kɛ̄ i wee zue ue doo, le kɛ̄ i gaa tɛɛ̄ doo ɛrɛ nuede bu edɔɔ̄. Ii le ekɔ lɔgɔ nu akiiloo pya nu ama nɛ pya ekpo le bah; ale kɔ nɛ pya i gbo le pya  i manamana ba le dɔɔ̄na barasī ale lo aba a le barasī i tɔɔ̄. Lo i kɔ ziī nu akiiloo, i dap yere pya i wuga bu taāŋa.​—⁠Buū Le-yɔɔ 39:⁠1.

15. E na Setan egbī edoo i loo a, e e na i doo a?

¹⁵ Waa iye kɔ nwīgbagbara nu a kpoora a lɛɛloo pya wuga. Setan suā kɔ butɔ a pooa baɛ naa wee agaloo. (Maak 3:​24, 25) A gaa le piiga lo edoo kɔ epoo epoo a yii i yɛɛ. Nyɔɔbee a kɛɛrɛ kɔ tɛ̄maloo edoo wo i bɔātɛ̄ ebe ziī taā i ye be.

16. Amunu le nu na i nɔ aāloo Wuga nɛɛwa Gertrud Poetzinger a?

¹⁶ Lu ebɛɛ̄ kɔ kere pya nɛɛ e agaloo bu kaka a nwaɛ̄ nage dɛɛ̄ loo kɛ̄tɔɔ̄ ama. Naa kɛɛrɛ nu a bee sira yɛɛ baɛ i wuga nɛɛwa a bee lu etɔ̄ nɔɔ̄ bee a kura Gertrud Poetzinger le Elfriede Löhr. Baɛ aba le pya dɔɔ̄na wuga nɛɛwa bee le kɛ̄ bɛbɛɛ Nazi bee aa pya nɛɛ sere. Gertrud bee ɛrɛ emaanyiɛ kumaloo Elfriede sɔ̄ a bee kɔ ue agɛrɛloo nɛ pya wuga nɛɛwa a bee le lo kɛ̄. Sɔ̄ sɔ̄ etɛ̄na, kɛɛ bee bɔp Gertrud loo nu a bee doo ama sa a bara kɔ Jɛhova a yerebah ye nɛ. A bee kɔ, “Lu ebɛɛ̄ kɔ i su baɛ bah suā pya i wuga sɔ̄ ba ɛrɛ dee edaā ziī nu.” Bu mɛ sīdee na a bee be eebah ye dogo emaanyiɛ ani? Gertrud bee ɛp le elap a le bu Elfriede le kɛ̄ a yiiloo pya dɔɔ̄na doo. Wo bee doo kɔ a sikɛ̄ yiiloo Elfriede. Baɛ aba bee si tam nɛ Jɛhova bu bɔloo ture nyiɛ loo mmɛ sɔ̄ ba u. Lo i piiga lo e’ɛp tɛɛ̄ ekwɔ pya i wuga tɛrɛ, ii le iye kɔ lɔgɔ nu a yere i epoo epoo yɛɛ.​—⁠Kɔl 3:​13, 14.

17. E na anua i wee nyɔɔnɛ zuurabahtɔ̄ bɔŋanaloo Jɛhova nɛ a?

¹⁷ Waa lɛɛbeekɛɛ̄ zuurabahtɔ̄. Lo i su zuurabahtɔ̄ pya kanɛɛ, ii le e’ɛrɛ taāŋa. (1 Pita 5:⁠5) Bu edoba, bie barasī alu ekpaɛ̄ i tam, pya kanɛɛ nɛ zuurabahtɔ̄ kɔ pya wuga aa nɛ kpa lɔgɔ nɛɛ sɔ̄ ba gaa zue ue. Mɛ ziī wuga nɛɛdam a lu nɛɛ sɛmdee naa bee nyɔɔnɛ lo zuurabahtɔ̄ sa a kiisī lo enɛ kpa pya a zue ue nɛ. E na a bee sira aabu ani? Sɔ̄ naa bee binia aā sɔ̄ ba bee nyɔɔnɛ nɛɛ kɔnia ue sah, pya polisi bee wa aa. Ba bee wa nyɔɔnɛ tɛɛ̄ dɛ̄dɛɛ̄ kɛ̄ ba bee tɛɛ̄ sa su pya lo kpa. E na lo ama i tɔgɛ a? Lu ebɛɛ̄ kɔ i nyɔɔnɛ zuurabahtɔ̄ kere a naa nia i. Bu Jɛhova wee ɛɛ sɔ̄ a muɛ̄ kɔ i nyɔɔnɛ zuurabahtɔ̄ pya wuga nɛɛdam a tubobaloo kɔ ba a zaā i sī.​—⁠Hib 13:​7, 17.

18. E na anua ii le enɛ pya lok a naa lu ebɛɛ̄ ani?

 ¹⁸ Waa nɛ pya lok a naa lu ebɛɛ̄. Lo pya kanɛɛ nɛ lok a naa lu ebɛɛ̄, ba edoo kɔ nu a agaloo pya dɔɔ̄na. Wuga Juraj Kaminský nyɛŋiabu nu a bee sira kɛ̄ a bee lu ekure Czechoslovakia tua sɔ̄, sɔ̄ ba bee kpaɛ̄ i tam, a bee kɔ: “Sɔ̄ a bee lu e aa pio pya kanɛɛ yere kpɔgɔrɔ, siga pya wuga nɛɛdam a gaa bee zaāsī bu bɔŋanaloo le pya lo sɛkiut bee bɔātɛ̄ yeregi lok nyɔɔ nu pya wuga a doo le nu ba aa doo.” Jɛhova sii i nɛ ekpo kɔ i tɔ̄ nu pya wuga edoo wa nɛ. Nɛɛ a nɛ lok a naa lu ebɛɛ̄ naa gaa kpega pya ye wuga, mɛ a gaa tɔ̄ nu nɛ wa yira.​—⁠2 Kɔr 1:⁠24.

19. Aāloo nu a le bu 2 Nu a bee lu edoo 32:​7, 8, e na anua i kiisī lo e ɛrɛ e’agaloo kaɛlɛɛ ɛrɛgeba nu Setan doo a?

¹⁹ I gbɛnɛ nɛɛ baa, lo a le Pɔrɔ-edɔɔ̄, naale e’ɔbɛ etɛ̄ŋaloo pya nɛɛ a taāŋabah Jɛhova bu bɔloo ture nyiɛ loo. (1 Pit 5:8; Mum 2:10) Setan le pya a ye le loo egbī e’ɔbɛ i lɛɛloo taāŋabah Jɛhova. Mɛ kere bɔɔ aa i, ii le e ɔbɛ etaāŋabah Jɛhova! (Deut 7:21) Jɛhova le i loo, e a gaa le kiisī lo eyerebah i nɛ kere alu ekpaɛ̄ i tam.​—⁠Buū 2 Nu a bee lu edoo 32:​7, 8.

20. E na o ebiarafii lo edoo a?

²⁰ Doraa dɛ̄dɛɛ̄ ii i biaɛfii dookɛ̄ pya i wuga bu tua sɔ̄ o’oo tup zua bee doo sɔ̄ ba bee kɔ nɛ pya a gaa bɛɛ kɔ: “Lo a lee kɛ̄ sī Bari, lo egbaɛ̄ i tɔ̄ loo ee Bari, bui biaraa; nyɔnɛbee ii dap aaloo ekɔ nu i bee muɛ̄ sa dā.”​—⁠Doonu pya Nɛɛ lɛɛratam 4:​19, 20.