1. Zue ue nɛ pya nɛɛ bie uwe zue ue wee tɔɔ̄loo pio nɛɛ doodoo wa? (Ɛpnage foto.)

 ILI pya nɛɛ Jɛhova wee zue ue nɛ pya nɛɛ nyɔnɛbee i wereloo i Tɛ a le li bunyɔɔ, le kɔ i gbī eyerebah nɛ pya dɔɔ̄na kɔ ba a suā ye loo. Tam zue ue wee kpeloo gbɛnɛ-edo pya zue ue, mɛ kerewo, a naa kpeloo pio nɛɛ. Ena anua a? Nyɔɔbee kɛɛ wee wa bɔp, le kɔ ba kɛɛrɛ kɔ ba naa parae tɔgɛ nu, e a naa wee suloo pio nɛɛ lo esi tɔ pya nɛɛ sɔ̄ a naa lu ekue wa. Bɔɔ wee aa pio nɛɛ kɔ bu pya nɛɛ ebiira ale kɔ ba dabe wa kpo. E a bee lu etɔgɛ pio nɛɛ kɔ ba aa doo nu ebiirebu pya dɔɔ̄na. Kereadoo pya wuga nɛɛdam le nɛɛwa ama wereloo Jɛhova kaāna, a lege aa wa agabah ezue le yereue nɛ pya nɛɛ ba naa suāloo. Kerewo, ba suā kɔ tam ama kuī, e ba gaa piiga lo ezue ue gbɛnɛ-edo sɔ̄. Bu Jɛhova ɛɛ wa loo kaāna!

2. Lo a sira kɔ pio sɔ̄ oo ɛrɛ ɛɛbu bu tam zue ue, ena anua loo a aa ɔ a?

² Ekɔ a wee a agabah lo e’ɛrɛ ɛɛbu bu o tam zue ue nyɔɔ pya nu i ekɔa ama ni? Lo a le wo, loo a aa ɔ. Sɔ̄ a a tɔɔ̄loo doo wo tɔgɛ kɔ o kumaloo kɛ̄ sa oo gbī ekue ekɛɛrɛ pya nɛɛ kumaloo aba ɔɔ, e a tɔgɛnage kɔ oo gbī enyɔɔnɛ pya nɛɛ amkɛ̄. A naa ɛrɛ lɔgɔ nɛɛ a wee ye nia sɔ̄ alu ekpo ye ale sɔ̄ alu esi saŋ ye nyɔɔnɛ, eetɔɔ̄ na sɔ̄ a gaa gbī edoo lenu loo nɛɛ aa ye kpo a. O Tɛ a le li buunyɔɔ suā taɛ kɛ̄ a a tɔɔ̄loo doo, e a gbī eyerebah a nɛ. (Ais 41:13) Bu ekobee ue ama, i kɔ nu akiiloo o’oo nu eyerebah i nɛ kɔ i ɛrɛ ɛɛbu bu i tam zue ue.

 DOOLO MUƐ̄ UE BARI A YERE MƐM LOO

3. Ena a bee yerebah nɛ nɛɛ mɔmanudɛɛ̄ Jeremaia kɔ a zue ue nɛ pya nɛɛ a?

³ Aā kere, yereue a aabah Bari eyere mɛm loo pya ye zooro kɔ ba a si tam a aga. Bu edobah, naa kɛɛrɛbu nɛɛ mɔmanudɛɛ̄ Jeremaia. Tua sɔ̄ Jɛhova bee ye kɔ nɛ kɔ a zue ue, bɔɔ bee ye aa, e a bee kɔ: “Mm suā kɛ̄ ekɔ ue doo, nyɔnɛbee m lege nwiī.” (Jer 1:6) Mɛ ena a bee ye yerebah nɛ kɔ a su e’agaloo zuema ue a? A bee le ue Jɛhova bee ye kɔ nɛ na a bee ye yere mɛmloo a. Jeremaia bee kɔ: “Bee kɔ miā a bɛ le bu na beenyiɛ lo a lu ekpaɛ̄ bie bu dɛ̄dɛɛ̄ na ekpo, e ekpo etaa mɛ loo e’aara ye.” (Jer 20:8, 9) Kereadoo pya nɛɛ Jeremaia aa bee zue ue nɛ naa bee gbī egbaɛ̄ ye tɔ̄, yereue Bari bee kɔ a kɔ wa nɛ bee ye agɛrɛloo.

4. Ena esira lo i buū Muɛ̄ Ue Bari sa ɛrɛ ekɛɛrɛ nyɔɔ a? (Pya Kɔlɔsi 1:9, 10)

⁴ Pya ue a le bu Baibol wee yere mɛm loo Pya Nɛɛ Kraist. Sɔ̄ nɛɛ lɛɛratam Pɔɔl aa bee ɛm kpa ma pya a bee le bu bɔŋanaloo Kɔlɔsi, a bee wa kɔ nɛ kɔ nɔ nu akiiloo Jɛhova yereloo eyerebah wa nɛ kɔ ba a kiisī lo “emum bee bu dɛ̄dɛɛ̄ le tam,” e wo edoo kɔ ba a “kiā bu dee a bɔloo Nɛɛ-a-i-ɛrɛ.” (Buū Pya Kɔlɔsi 1:9, 10.) E ziī lo le tam na tam zue le yereue. Sɔ̄ i buū Muɛ̄ Ue Bari sa ɛrɛ ekɛɛrɛ nyɔɔ, edoo kɔ yira i ɛrɛ bu Jɛhova a agatɛ̄, sa edoonage kɔ tam zue le yereue a agɛrɛbah i kuī loo.

5. Bu mɛ sīdee na i dap ɛrɛ gbɛnɛ biī aāloo bubuū le nɔnɔ Muɛ̄ Ue Bari a?

⁵ Lokwa i ɛrɛ gbɛnɛ biī aāloo Muɛ̄ Ue Bari, ii le egbara sɔ̄ i aa buū, sɔ̄ i aa nɔ, le sɔ̄ i aa ɛrɛ ekɛɛrɛ nyɔɔ. Su sɔ̄ nɔā. Lo a ɛrɛ ziī dɔ Kpa Kaɛ oo dābeeloo sɔ̄ o aa buū, o aa aadee tɛɛ̄ yee. Taāwo, su kpa a kura Watch Tower Publications Index ale Research Guide for Jehovah’s Witnesses gbiātɛ̄ lo dɔ Kpa Kaɛ. Lo o su sɔ̄ nɔā Muɛ̄ Ue Bari, edoo kɔ o suā leere kɔ Muɛ̄ Ue Bari lu kaka. (1 Tɛs 5:21) Kɛ̄ o agɛrɛbah suā leere doo, kɛ̄ bu a e’ɛɛnage doolo lo ekɔ nu o enɔā nɛ pya dɔɔ̄na.

KPƐ̄NALOO LEERE LƐƐ O GAE KII UWE ZUE UE

6. Ena anua i kpɛ̄naloo leere lɛɛ i gae kii uwe zue ue a?

⁶ Lo o kpɛ̄naloo leere lɛɛ o gae kii uwe zue ue, bɔɔ naale e’aa a lo ezue ue nɛ pya  nɛɛ, e o suā nu o kɔ. Lɛɛ Jizɔs gae yere pya a wee ye nyɔɔnɛ dumɛ ture uwe zue ue, a bee kɔ nu ba edoo le nu ba ekɔ wa nɛ. (Luk 10:1-11) Nyɔnɛbee ba bee doo nu Jizɔs bee wa tɔgɛ a, wa tam bee kiā leere sa a bee doo kɔ ba a ɛrɛ gbɛnɛ ɛɛbu.—Luk 10:17.

7. Bu mɛ sīdee na i dap kpɛ̄naloo lɛɛ i gae kii uwe zue ue a? (Ɛpnage foto.)

⁷ Bu mɛ sīdee na i dap kpɛ̄naloo lɛɛ i gae kii uwe zue ue a? Alu ebɛɛ̄ kɔ i dasī kɛɛrɛ nu i zue le kɛ̄ i kɔ doo bu sīdee pya nɛɛ edābeeloo. Ziī nu eyerebah i nɛ na lo edasī kɛɛrɛ ziī ale baɛ nu pya a le i kɛ̄ zue ue wee doo sɔ̄ ba gaa gbī ekpo i, sa i suā nu i kɔ le kɛ̄ i doo dogo doo. E sɔ̄ i gaa wa kɔ ue nɛ, a lee i ziīnɛloo, baa bɛɛ, sa kɔ ue dookɛ̄ i wee kɔ ue nɛ i gbo doo.

8. Bu mɛ sīdee na Pya Nɛɛ Kraist le doodoo ka-bā lo nɛɛ lɛɛratam Pɔɔl bee kɔ ue kumaloo a?

⁸ Nɛɛ lɛɛratam Pɔɔl bee kɔ nɛ pya ye wuga a bee lu Pya Nɛɛ Kraist kɔ: “I ɛrɛ zɔ ama bu ka-bā.” (2 Kɔr 4:7) Ena alu lo zɔ a? Ɛɛ na tam zue le yereue Buɛ̄-mɛnɛ lo a kpɔā dum pya nɛɛ. (2 Kɔr 4:1) E ena alu lo ka-bā a? Lo ka-bā na pya zooro Bari lo ba zue le yereue nɛ pya dɔɔ̄na. Bu dee Pɔɔl, pya uradu wee su pya nu a si gbɛnɛ du doodoo kpugi, mii le nuede yerebu ka-bā alu esu baɛ̄ kwaā, sɔ̄ ba gaa kiā aa ziī kɛ̄ kii ziī. Bu aba lo sīdee, Jɛhova esua le yereue a si gbɛnɛ du i yere kɛ̄ bah. Nyɔɔbee Jɛhova le i loo, i ɛrɛ mɛm esu zuema le yereue.

BARA JƐHOVA KƆ A NƐ A E’AGALOO

9. Ena i doo lo bɔɔ aa i loo pya nɛɛ ale bɔɔ aa i kɔ ba egbānā i sī a? (Ɛpnage foto.)

⁹ Pio sɔ̄ bɔɔ dap i aa loo pya nɛɛ, ale bɔɔ dap i aa kɔ ba egbānā i sī. Bu mɛ sīdee na i dap be eebah taāŋa ama a? Naa kɛɛrɛbuloo kara pya nɛɛ lɛɛratam bee yere sɔ̄ a bee lu e’ɔbɛ wa kɔ ba aa zuena ue. Taā bɔɔ wa aa sa ba ɔbɛ zue ue, ba bee bara Jɛhova kɔ a yerebah wa nɛ lokwa ba dap “su e’agaloo kɔā ue Bari.” Aba lo sɔ̄, Jɛhova bee agara wa kara. (Doonu 4:18, 29, 31) Lo bɔɔ aa i loo pya nɛɛ sɔ̄ i aa zue ue, elee kɔ i yere kara sa bara Jɛhova kɔ a yerebah i nɛ. Bara Jɛhova kɔ a agɛrɛtɛ̄ wereloo o ɛrɛ kumaloo pya nɛɛ lokwa bɔɔ naa aa a lo ezue le yereue wa nɛ.

10. Bu mɛ sīdee na Jɛhova i yerebah nɛ lokwa i dap ye yira ekeebee loo a? (Aisaia 43:10-12)

 ¹⁰ Jɛhova esua i nua pya ye Ekeebee, e a yira yii kɔ eyereebah i nɛ kɔ i ɛrɛ e’agaloo. (Buū Aisaia 43:10-12.) Doraa i naa kɔ nu akiiloo nia sīdee Jɛhova i su yeā mɛm loo. Lo tuatua na tɛ̄maloo Jizɔs. A wee i le loo ɛrɛgebah sɔ̄ i zue le yereue. (Mat 28:18-20) Eree baɛ na tɛ̄maloo pya ɛnjɛl. Jɛhova etubo wa bahloo kɔ ba a yerebah i nɛ. (Mum 14:6) Eree taa na tɛ̄maloo kaɛ edɔɔ̄ Jɛhova. Jɛhova su ye kaɛ edɔɔ̄ ama i yeābah nɛ lokwa i dap nyɛŋiabu pya nu i ebee nɔ. (Jɔn 14:25, 26) Eree nia na tɛ̄maloo pya i wuga nɛɛdam le nɛɛwa bu bɔŋanaloo. Jɛhova enɛa i pya wuga ama kɔ ba a le i loo sa i yerebah nɛ. Nyɔɔbee Jɛhova le pya i wuga ba i wereloo aa i yerekpotɛ̄ a, i ɛrɛ dɛ̄dɛɛ̄ nu edoo kɔ i ɛrɛ e’agaloo sa kiisī lo ezue ue.

NYAANA BAHLOO O ZUE UE DƐƐA NYƆƆ EBƐƐ̄ PYA NƐƐ SA ƐMADƐƐ̄ LE NU

11. Ena o dap doo lokwa o muɛ gbɛnɛ-edo nɛɛ tɔ a? (Ɛpnage foto.)

¹¹ Ekɔ loo a wee ɔ sɔ̄ oo muɛ gbɛnɛ-edo nɛɛ tɔ ni? Naa bip aba ɔɔ kɔ: ‘Taɛ mɛ kɛ̄ na pya a le na kɛ̄ zue ue le a taɛ nyaawo a?’ (Doonu 16:13) ‘Ekɔ ba le uwe tam sɛh ba si du ni?’ Lo a le wo, ekɔ zue ue nyɔɔ dee edoo kɔ o muɛ gbɛnɛ-edo nɛɛ ni? Ziī wuga nɛɛdam a kura Joshua bee kɔ: “M emɔna kɔ a waɛ emuɛ gbɛnɛ-edo nɛɛ ezue ue nɛ sɔ̄ o zue ue bie kɛ̄ ba gaa oo nu le bie ɛrɛgebah kɛ̄ pya nɛɛ mma.” Alɛ le ye wa Bridget emɔna kɔ ba muɛe gbɛnɛ-edo nɛɛ tɔ sɔ̄ ba zue ue loo uunɛ ale sɔɔ̄pie Deekaɛ.—Ɛfɛs 5:15, 16.

12. Bu mɛ sīdee na i dap suā nu pya nɛɛ yiga ale nu a wa taɛ̄ŋɛ a?

¹² Lo nɛɛ o aa zue ue nɛ naa tɔgɛ taɛ tua sɔ̄ o ye kɔ ue nɛ, piiga lo esuā pya nu a yiga ale nu aa ye taɛ̄ŋɛ. Pio sɔ̄ Joshua le Bridget wee su ebip a le nyɔɔ pya i nwīepɛɛ kpa bɔātɛ̄ kɔniaue. Bu edobah, sɔ̄ ba aa su nwīepɛɛ kpa a kura O Ɛmadɛɛ̄ Baibol Doodoo Wa Ni? zuema ue, ba wee kɔ: “Pio nɛɛ ɛmadɛɛ̄ kɔ Baibol lu kpa a aabah Bari, kerewo pya dɔɔ̄na naa yiga doo wo. Olo kɛɛrɛ doodoo wa ni?” Gbɛnɛ-edo sɔ̄, ebip ama wee wa  kpaāna dee nɛ kɔ ba a nyɔɔnɛ tɛ-ɛrɛ-tɔ kɔnia ue.

13. Ena anua i dap kɔ i esia i tam leere kereadoo pya nɛɛ naa gbaɛ̄tɔ̄ yereue i wa zue nɛ a? (Kam 27:11)

¹³ Kereadoo pya nɛɛ naa gbaɛ̄tɔ̄ yereue i wa zue nɛ, i esia i tam leere. Ena anua i kɔ doo wo a? Nyɔnɛbee i edoora nu Jɛhova le ye Nwiīnɛɛdam bee i lɛɛra kɔ i doo, lo a le lo eyira ekeebee a wa kiiloo. (Doonu 10:42) Kere ii muɛ lɔgɔ nɛɛ i zue ue nɛ, ale ba kiī i yereue, i ɛrɛ ɛɛbu nyɔɔbee i suā kɔ i aa doo nu a nia i Tɛ a le li bunyɔɔ.—Buū Kam 27:11.

14. Ena anua bu i wee ɛɛ sɔ̄ ziī wuga zɔŋia nɛɛ a tɔgɛ taɛ bu i kɛ̄ zue ue a?

¹⁴ Bu i wee ɛɛ sɔ̄ ziī wuga zɔŋia nɛɛ a tɔgɛ taɛ bie i kɛ̄ zue ue. Ziī ekpo Tɔ Baɛloo bee su i tam zue ue dooreloo tam gbī nwiī a bee pe. Gbɛnɛ-edo nɛɛ wee kiā aa ziī kɛ̄ yii ziī sɔ̄ ba gaa gbī nwiī a pe. Sɔ̄ elua egbī lo nwiī muɛ—bu dɛ̄dɛɛ̄ nɛɛ a bee ye gbī wee ɛɛ—e a naale aba taɛ nɛɛ a bee ye muɛ a. Bu aba lo sīdee, tam doo kɔ pya nɛɛ a nyɔɔnɛ dumɛ Jizɔs lu tam dɛ̄dɛɛ̄ nɛɛ a le bu bɔŋanaloo aa si. Alu ebɛɛ̄ kɔ dɛ̄dɛɛ̄ nɛɛ a le bu bɔŋanaloo a gbaa si tam mmɛ dɛ̄dɛɛ̄ kɛ̄ a le wa kɛ̄ zue ue, le kɔ bu dɛ̄dɛɛ̄ nɛɛ a ɛɛ sɔ̄ ziī nɛɛ bɔātɛ̄ esi enɔānu.

SERE EKƐƐRƐ NYƆƆ WERELOO O ƐRƐ KUMALOO JƐHOVA LE PYA NƐƐ

15. Bu mɛ sīdee na doo nu a le bu Matiu 22:37-39 eyerebah i nɛ kɔ i nyimɛ taɛ i ɛrɛ bu tam zue ue a? (Ɛpnage foto a le nyɔɔ .)

¹⁵ Ziī nu edap nyimɛ i taɛ kumaloo tam zue ue na sɔ̄ i bie ekɛɛrɛ nyɔɔ wereloo i ɛrɛ loo Jɛhova le loo pya nɛɛ. (Buū Matiu 22:37-39.) Naa kɛɛrɛ kɛ̄ bu Jɛhova aa ɛɛ doo sɔ̄ a muɛ kɔ i aa si lo tam, e naa kɛɛrɛnage kɛ̄ bu pya nɛɛ wee ɛɛ doo sɔ̄ ba bɔātɛ̄ enɔ Baibol! E naa kɛɛrɛnage kɛ̄ pya a gbaɛ̄tɔ̄ le yereue e’ɛrɛ kpɔā doo.—Jɔn 6:40; 1 Tim 4:16.

16. Bu mɛ sīdee na i dap ɛrɛ ɛɛbu bu i esiatam sɔ̄ ii dapna aa tɔ nyɔɔbee i kɛ̄tɔɔ̄ a? Naa nɛ edobah.

¹⁶ Ekɔ o lu nɛɛ oo dapna aa tɔ nyɔɔbee o kɛ̄tɔɔ̄ ni? Lo a le wo, bie ekɛɛrɛ nyɔɔ nu o dap doo lo etɔgɛ wereloo kumaloo Jɛhova le pya nɛɛ. Bu sɔ̄ dumɛloo COVID-19 a, Samuel le Dania naa bee dapna aa tɔ nyɔɔ dumɛloo. Bu sɔ̄ ba bee le bu e’aga kɛ̄tɔɔ̄ ama, ba wee zue ue tɛ̄ma nyɔɔ fon le tɛ̄maloo ɛm lɛta, e ba wee sere enɔānu Baibol  tɛ̄ma nyɔɔ Zoom. Samuel bee zue ue nɛ pya a bee zɔŋia bie tɔpie sɔ̄ a gaa bee dooa pie loo nyɔɔ dumɛloo kansa. A bee kɔ: “E’aga kɛ̄tɔɔ̄ wee ɔɛloo nɛɛ sa doo kɔ nɛɛ a ɛrɛ gbɛnɛ ekɛɛrɛ. E a dapnage doā-ɛp i yira le i egerebu. Alu ebɛɛ̄ kɔ i gbī ɛɛbu muɛ bu i esiatam nɛ Jɛhova.” Bu e’aga kɛ̄tɔɔ̄ Samuel le Dania aa bee tɛɛ̄bu ama, a ɛrɛ ziī dee Dania bee dɔ sa naa dapna aakɛ̄ bu taa enɔɔ̄. Nyɔɔwo, a bee lu ebɛɛ̄ kɔ alu eyaɛ kpe-kɔgah ye nɛ lokwa a su kiā bu ini’ī enɔɔ̄. Alɛ bee kɔ: “M bee doo dɛ̄dɛɛ̄ nu na kɛ̄tɔɔ̄ mɛ nɛ dee kɔ m doo. M bee zue ue nɛ ziī nurse a bee mɛ inaloo sa zuenage ue nɛ pya a bee mɛ su nu ma. E m bee zuenage ue nɛ ziī wa a wee si tam betam kwa pie tɛ̄ma nyɔɔ fon.” Kɛ̄tɔɔ̄ Samuel le Dania bee doo kɔ ba aa dapna doo nu ba wee doo bu wa esiatam. Kerewo, ba bee doo kuma nu ba dap doo, e wo bee wa nɛ ɛɛbu.

17. Bu mɛ sīdee na o ɛrɛ gbɛnɛ biī aāloo pya ue elua ekɔ bu ekobee ue ama a?

¹⁷ Piiga lo edoo dɛ̄dɛɛ̄ o’oo ka nu alu ekɔ bu ekobee ue ama. Ziī ziī pya nu i ekɔa ama le doodoo ziī ziī nu a wee lu esu buma maālo. Sɔ̄ alu esu dɛ̄dɛɛ̄ nu a wee lu esu buma maālo gbaloo ziī sa bui, a wee doo kɔ lo maāloo a kpe. Lo o su dɛ̄dɛɛ̄ o’oo nu ama yerebu dogo, edoo kɔ loo a aa ɔ, sa edoonage kɔ o agɛrɛbah ɛrɛ ɛɛbu bu o tam zue ue.