1. Ena paradais bu edɔɔ̄ a, e ena i biaɛfii lo edoo a?

 A ƐRƐ paradais a tɔɔ̄dɔ nu a le a kɛnɛkɛ̄ anii’ee lo pya nɛɛ le bu sa gaa doo nu a lee. Gbɛnɛ-edo miliɔn pya a le bu ɛrɛ kaka efɛɛloo. Pya a le bu paradais ama ebiaɛrafii kɔ ba naale aae bu doo pippip. Ba gbīnage kɔ booboo pya dɔɔ̄na a nyɔɔnɛ wa le bu kɛ̄tɔɔ̄ alu keebee ama. Ena alu lo kɛ̄tɔɔ̄ alu keebee a? Ɛɛna paradais bu edɔɔ̄! a

2. Ena alu keebee akiiloo paradais bu edɔɔ̄ a?

² Paradais bu edɔɔ̄ lu keebee, nyɔnɛbee kereadoo i le bu nyɔuwe Setan lo alu gɛɛgɛɛloo sa mma tɛ̄maloo baaloo, erabee le dogo lumiī, Jɛhova kwa ziī kɛ̄ a tɔɔ̄dɔ nu lo pya ye nɛɛ le bu efɛɛloo le gbaaloo. (1 Jɔn 5:19; Mum 12:12) Ilii Bari a i wereloo muɛ kɛ̄ lo sɔ̄ eku ama gaa i nua taāŋa loo doo, nyɔɔwo, a doo kɔ pya ye zooro a le bu kpoogaloo lokwa ba dap su ɛɛbu ye taāŋabah. Ye Muɛ̄ Ue baatɛ̄ lo paradais bu edɔɔ̄ kɔ a le doodoo “kɛ̄ gɔā” le “gɔh alu etɔ̄ maā loo.” (Ais 4:6; 58:11) Tɛ̄maloo leelee a aabah Jɛhova, pya nɛɛ a le bu paradais bu edɔɔ̄ ama le bu ɛɛbu le kpoogaloo, kereadoo ba le bu kpɛdumɛ dee kɛ̄tɔɔ̄ aga ama.—Ais 54:14; 2 Tim 3:1.

3. Bu mɛ sīdee na mɔmanudɛɛ̄ a le bu kpa Aisaia 65 ekobee bee dooa gbɔ̄mɛɛ̄ a dee kere bu buɛ̄ Izrɛl a?

³ Tɛ̄maloo nɛɛ mɔmanudɛɛ̄ Aisaia, Jɛhova baatɛ̄ kɛ̄ kɛ̄tɔɔ̄  pya a tɔɔ̄ bu paradais bu edɔɔ̄ ele doo. O dap muɛ kɛ̄ a baatɛ̄ doo bu kpa Aisaia 65 ekobee. Tua dooa gbɔ̄mɛɛ̄ loo mɔmanudɛɛ̄ ama bee dooa bu zua 537 B.C.E. Bu lo sɔ̄, pya Juu a bee kiiya bee lu e’agara wa lɛɛbu zooro li Babilɔn ture wa buɛ̄. Jɛhova bee nɛ leelee pya ye nɛɛ sa wa yerebah nɛ kɔ ba a kwa Jerusalɛm a bee lu egbee sa doo kɔ a sikɛ̄ kpedɛɛ̄, sa sinagekɛ̄ wu tɔkaɛ nua kɛ̄ etɔɔ̄ taāŋabah Jɛhova bu Izrɛl.—Ais 51:11; Zek 8:3.

4. Bu mɛ sīdee na kpa Aisaia 65 ekobee gaa dooa gbɔ̄mɛɛ anii’ee a?

⁴ Eree baɛ dooa gbɔ̄mɛɛ̄ loo mɔmanudɛɛ̄ Aisaia ama bee bɔātɛ̄ edooa bu zua 1919 C.E. sɔ̄ Jɛhova bee agara pya a ye taāŋabah bu ilii dee ama lɛɛbu zooro bu Babilɔn lo Gbɛnɛ. Aāge lo sɔ̄, paradais bu edɔɔ̄ bee bɔātɛ̄ enyim bu yube nyɔuwe. Pya zue ue a ɛrɛ mɛm bee yere gbɛnɛ-edo bɔŋanaloo sa bee bɔātɛ̄ etɔgɛ elap Pya Nɛɛ Kraist. Pya nɛɛdam le nɛɛwa lo ba wee tɔɔ̄dum lumiī sa kunagā tua sɔ̄ bee sikɛ̄ “yaa . . . aa dee dum, lo a bee lu edɛm aāloo bera Bari bu kaāna le dogo le kaɛ.” (Ɛfɛs 4:24) Kerewo, gbɛnɛ-edo leelee Aisaia baatɛ̄ ama gaa le dooa gbɔ̄mɛɛ bu namloo li deesī bu aā nyɔuwe. Mɛ kere nyaawo i ɛrɛnage biī aāloo ele bu paradais bu edɔɔ̄. Doraa i naa kɔ pya biī i dap ɛrɛ aāloo paradais bu edɔɔ̄, le nu anua a naa lee kɔ i aabu doo pippip.

KƐ̄TƆƆ̄ PYA A LE BU PARADAIS BU EDƆƆ̄ LE BU

5. Dookɛ̄ yii a le bu kpa Aisaia 65:13 kɔ doo, pya amunu ekpeloo na i ɛrɛ sɔ̄ i le bu paradais bu edɔɔ̄ a?

⁵ Ba ɛrɛ gbɛnɛkpo nuede bu edɔɔ̄ sa loo wa ziīna. Mɔmanudɛɛ̄ Aisaia tɔgɛ kɔ kaāna kee le yɛɛ kɛ̄tɔɔ̄ pya a le bu paradais bu edɔɔ̄ le pya a naale bu. (Buū Aisaia 65:13.) Jɛhova aa yaari baɛ bah sa nɛ dɛ̄dɛɛ̄ nu a bɛɛ̄ pya a ye taāŋabah lokwa ba kiisī lo etɔɔ̄ ye waɛloo. A nɛ i ye kaɛ edɔɔ̄, Baibol, le pya i kpa a baatɛ̄ Baibol lokwa i dap “denu, . . . ɔ̄ nu, . . . [sa] ɛɛŋa.” (Dooreloo Mumuuna 22:17.) Mɛ kɛ̄tɔɔ̄ pya a naale bu paradais bu edɔɔ̄ lu kee. Loo pya a naale bu paradais bu edɔɔ̄, “elɛɛ . . . , oo [wa] ekaga . . . , [e ba] ele bu bɔp kɛɛ.” Ba naa ɛrɛ gbanialoo kiikɛ̄ Bari le.—Amos 8:11.

6. Bu mɛ sīdee na Joel 2:21-24 baatɛ̄ i nuede bu edɔɔ̄ a, e i ɛrɛ biī aāloo doodoo wa?

⁶ Joel bee kue bee pya nu a le doodoo kpakpaa, mii-vine le nɔɔ̄ bu ye mɔmanudɛɛ̄, e pya nu ama tɔgɛ kɛ̄ Jɛhova wee nɛ nu a bɛɛ̄ pya ye nɛɛ bu yaari bah doo, gbaānage loo nuede bu edɔɔ̄. (Joel 2:21-24) A doo wo tɛ̄maloo Baibol, pya i kpa a baatɛ̄ Baibol, i dɔ intanɛt, pya i enɔānu, asɛmbli, le kɔnvɛnsɔn. Lo i de dɛ̄dɛɛ̄ pya nuede ama, edoo kɔ i le bu nwanāloo, e loo i e sukɛ̄.

7. Ena a i nɛ kaāna “ɛɛbu beenyiɛ” a? (Aisaia 65:14)

⁷ Ba ɛrɛ ɛɛbu le iīnaloo. Pya nɛɛ Bari “uɛ yɔɔ [bu] ɛɛbu” nyɔɔbee bu wa ɛɛ sa ba tɔgɛ nialoo pya nu Jɛhova aa wa doo nɛ. (Buū Aisaia 65:14.) Pya kaka ue a i yere mɛm loo, pya yii a le bu Muɛ̄ Ue Bari, le bɛābu i ɛrɛ a dɛɛa nyɔɔ waara zɔɔ̄ a’agara Jizɔs nɛ i “ɛɛbu beenyiɛ.” Lo i nyɔɔnɛ pya i wuga nɛɛdam le nɛɛwa gbaa kɔnia pya nu ama edoo kɔ i ɛrɛ kaāna ɛɛbu!—Yɔɔ 34:8; 133:1-3.

8. Baɛ amunu gbɛnɛ nu na a tɔgɛ kɔ i le bu paradais bu edɔɔ̄ a?

⁸ Wereloo le gbaaloo a le yɛɛ pya nɛɛ Jɛhova lu baɛ gbɛnɛ nu a tɔgɛ kɔ i le bu paradais bu edɔɔ̄. Dua ‘gbaaloo’ ama doo  kɔ i suā kɛ̄ dum emɛā doo bu aā nyɔuwe, kɛ̄ pya nɛɛ Jɛhova e’ɛrɛ gbɛnɛ wereloo le gbaaloo eekɛ̄ ba doo aniī’ee. (Kɔl 3:14) Ziī wuga nɛɛwa baatɛ̄ nu a bee muɛ loo pya nɛɛ Jɛhova tua sɔ̄ a bee wa zɔ̄ŋia, a kɔ: “Mm wee ɛrɛ ɛɛbu, kere bie na butɔ. Tua sɔ̄ m bee muɛ kɛ̄ pya nɛɛ tɔgɛ wereloo doo na yɛɛ Pya Ekeebee Jɛhova.” Ɛrɛgebah nɛɛ a gbī e’ɛrɛ kaāna ɛɛbu le iīnaloo ɛrɛ eyiibu i paradais bu edɔɔ̄. Kaɛlɛɛ ɛrɛgɛbah nu nyɔuwe ama kɔ ale kɛɛrɛ kumaloo pya a gaa taāŋabah Jɛhova, i ɛrɛ le bee kiikɛ̄ Jɛhova le, le kiikɛ̄ dɛ̄dɛɛ̄ pya a gaa ye taāŋabah le, aā bunyɔɔ mmɛ kɛnɛkɛ̄.—Ais 65:15.

9. Ena kpa Aisaia 65:16, 17 yira yii kumaloo pya nu a i nua ezialoo le tɔga loo anyaawo a?

⁹ Loo wa sukɛ̄ sa beenyiɛ wa naa nyɔŋa. Aisaia 65:14 kɔ pya a naa gbī eyii bu paradais bu edɔɔ̄ gaa le “wiikpā tɛ̄maloo eyɔnu bu beenyiɛ, sa toto tɛ̄maloo etaŋiloo bu edɔɔ̄.” E lo a le wo, dɛ̄dɛɛ̄ pya nu a doo kɔ pya nɛɛ Bari a le bu ezialoo le tɔga ni a? Nwīgbagbara sɔ̄ aā anyaawo, pya nu ama “[e’ibere]” i sa ii le nyɛŋianabu. “E a elu egɔ̄ wa lɛɛ loo [baɛ dɛɛ̄ Bari].” (Buū Aisaia 65:16, 17.) Jɛhova gaa le lɛɛ dɛ̄dɛɛ̄ i taāŋa, e kina kina, i gaa le ibere kɛ̄ pya lo taāŋa bee i nua ezialoo loo doo.

10. Ena anua a ɛɛrɛ a bu kɔ o le yɛɛ pya wuga nɛɛdam le nɛɛwa ba lu Pya Nɛɛ Kraist a? (Ɛpnage foto.)

¹⁰ Kere nyaawo, i wee ɛrɛ iīnaloo sɔ̄ i le bu enɔānu Pya Nɛɛ Kraist, e loo i wee sukɛ̄ sa i lɛɛ nyiɛ nyɔɔ pya i taāŋa. Sɔ̄ i tɔgɛ wereloo, ɛɛbu, efɛɛloo, fɛgɛ dogo, le beenyiɛ a kumaloo kɛ̄, lo alu pio gah loo eyuu edɔɔ̄ Bari, edoo kɔ pya i wuga nɛɛdam le nɛɛwa a le bu ɛɛbu le iīnaloo. (Gal 5:22, 23) A ɛɛrɛ i bu kɔ i le bu bɔŋanaloo Bari. Pya nɛɛ a tɔɔ̄ bia bu paradais bu edɔɔ̄ gaa le muɛ dooa gbɔ̄mɛɛ yii Bari akiiloo “aā bunyɔɔ le aā nyɔuwe.”

11. Dɛɛa nyɔɔ ue a le bu kpa Aisaia 65:18, 19, mɛ sīdee na i ɛrɛ biī nyɔɔbee i le bu paradais bu edɔɔ̄ lo Jɛhova ekwa a?

¹¹ Ba tɔgɛ nialoo wa kɛ̄tɔɔ̄ sa ɛrɛ ɛɛŋa. Aisaia kiisī loo ekɔ nu anua i ɛrɛ “ɛɛbu sa ɛɛŋa” bu paradais bu edɔɔ̄. Nɛɛ a kwa paradais a tɔɔ̄dɔ nu ama na Jɛhova. (Buū Aisaia 65:18, 19.) Kɛ̄ a doo a lo a gaa i su kuema pya nɛɛ lɛɛ bu pya bɔŋanaloo a naa tɔgɛ kaka a bu nyɔuwe ama yerebu ekpedɛɛ̄ paradais a tɔɔ̄dɔ nu ama! Bu i ɛɛ loo pya leelee i ɛrɛ nyɔɔbee i le bu kaka, e lo ama  zū i kɔ i kɔ nu akiiloo nɛ pya dɔɔ̄na.—Jer 31:12.

12. Pya yii alu e’ɛm bu kpa Aisaia 65:20-24 tɔɔ̄ a loo doodoo wa, e ena anua a?

¹² Bu i ɛɛ sa i tɔgɛ nialoo bɛābu i ɛrɛ kɔ i nyɔɔnɛ Bari ɛrɛ kaāna le gbanialoo li deesī. Naa kɛɛrɛ bu dɛ̄dɛɛ̄ lele nu i muɛ sa doo bu aā nyɔuwe Bari a! Baibol yira yii kɔ: “Aā nwiī a tɔɔ̄dum [bu] aba pio nwī dee” “naale esinakɛ̄ ye le bu,” “ale nama nɛɛ a naa tɔɔ̄ ye dee dum eree.” I gaa le “wugara tɔ sa wa tɔɔ̄ bu; [sa] fogara kere uwe vine sa de bee a wa lu bu.” Ii le “[esitam] bu yɔrɔ” nyɔnɛbee i gaa le lu “pya Jɛhova enɛa leelee.” Jɛhova yira yii i nɛ kɔ i gaa le le bu kpoogaloo, e loo i esukɛ̄ sa i dum e’ɛrɛ kaāna nu a kura. “Lɛɛ ba [gae] kue,” a gaa le suā nu a bɛɛ̄ ziī ziī nɛɛ, “sa nɛ dɛ̄dɛɛ̄ nu a le dum nu a wa taɛ.”—Ais 65:20-24; Yɔɔ 145:16.

13. Bu mɛ sīdee na kpa Aisaia 65:25 baatɛ̄ kɛ̄ pya nɛɛ wee kwabaloo wa sīdee tɔɔ̄dum doo sɔ̄ ba bɔātɛ̄ etaāŋabah Jɛhova a?

¹³ Ba le bu efɛɛloo le kpoogaloo. Tɛ̄maloo yerebah a aaloo kaɛ edɔɔ̄ Bari, gbɛnɛ-edo nɛɛ a wee tɔɔ̄dum lumiī, ɛrɛ gbɛnɛ saŋ sa ziā pya dɔɔ̄na enyaana wa sīdee tɔɔ̄dum. (Buū Aisaia 65:25.) Nyaawo, ba epiiga kaāna lo enyaana wa pɔrɔ pɔrɔ elap dogo. (Rom 12:2; Ɛfɛs 4:22-24) Mɛ nyɔɔbee pya nɛɛ Bari sii mma, i kiisī lo etɛɛ̄ ekwɔ. Kerewo, Jɛhova edoora kɔ “dɛ̄dɛɛ̄ nɛɛ” a ye wereloo sa wereloo ɛnia aba a le bu gbaaloo, e lo ama doo kɔ ba a le bu kaāna efɛɛloo. (Taitɔs 2:11) Aba lo Bari a dap doo dɛ̄dɛɛ̄ nu na a dap doo nyɛŋia tam ama a!

14. Bu mɛ sīdee na ue a le bu kpa Aisaia 65:25 bee siraloo ziī wuga nɛɛdam a?

¹⁴ Ekɔ pya nɛɛ edapge nyaana wa elap dogo ni? Naa kɛɛrɛbu loo edobah ama. A ɛrɛ ziī zege nɛɛdam, lo elua e’aa ye yere kpɔgɔrɔ gbɛnɛ-edo sɔ̄, aā sɔ̄ a bee le 20 zua, nyɔɔ dum a naa ɛɛ le dogo lumiī. Bee lu e’aa ye yere kpɔgɔrɔ nyɔɔ yib fah, baa tɔ pya nɛɛ sa yib nu le pya dɔɔ̄na e’agabah dogo. A wee kpɛ̄naloo ebebe loo ɛrɛgebah nɛɛ dɛ̄dɛɛ̄ sɔ̄. Tua sɔ̄ a bee dā kaka ue a aabu Baibol sa bɔātɛ̄ esi enɔānu Pya Ekeebee Jɛhova, a bee muɛ nu a bɔloo kɔ a doo bu dum—lo a le taāŋabah Jɛhova bu paradais bu edɔɔ̄. Aā sɔ̄ a bee liamaā sa lu ziī Nɛɛ Ekeebee, a wee bialoo kɛɛrɛ kɛ̄ ue a le bu Aisaia 65:25 ɛrɛ nu edoo kiiloo alɛ doo. Nyaawo, enyaā aabu dogo sasa-ekpo, lɛɛbahloo e’agabah dogo sa fɛɛrɛloo doodoo nwiī naana pee.

15. Ena anua i gbī ekue pya dɔɔ̄na kɔ ba a gbaa i loo bu paradais bu edɔɔ̄ a, e bu mɛ sīdee na i dap doo wo a?

¹⁵ Aisaia 65:13 bɔātɛ̄ tɛ̄maloo ue a kɔ: “Kɛ̄ Nɛɛ-a-i-ɛrɛ Bari kɔ doo na ama.” E ye 25 barakpaɛ̄ kɔ kpaɛ̄ tɛ̄maloo ue a kɔ: “Jɛhova kɔ.” E dɛ̄dɛɛ̄ ye ue wee lu kaka. (Ais 55:10, 11) Pya nɛɛ Bari le bu Paradais bu edɔɔ̄ a taɛ nyaawo. Jɛhova enɛa i ziī gā wuga alu keebee. Efɛɛloo le kpoogaloo le yɛɛ pya nɛɛ Bari, kereadoo i le bu nyɔuwe a naale bu kpoogaloo. (Yɔɔ 72:7) Nyɔɔbee wo, i gbī eyerebah nɛ gbɛnɛ-edo nɛɛ kɔ ba a gbaa i loo sa taāŋabah Bari bu paradais bu edɔɔ̄. I dap doo lo ama tɛ̄maloo esere ekɛɛrɛ nyɔɔ doo kɔ pya nɛɛ a nyɔɔnɛ dumɛ Jizɔs.—Mat 28:19, 20.

NU I DOO LO EZUURA PYA NƐƐ NUA BU PARADAIS BU EDƆƆ̄

16. Ziī ena a wee zuura pya nɛɛ nua bu paradais bu edɔɔ̄ a?

¹⁶ A ɛrɛ nu ziī ziī ii dap doo lo edoo kɔ i paradais bu edɔɔ̄ a nia pya dɔɔ̄na. Lokwa i dap doo lo ama, i ɛrɛ enɔ Jɛhova. Jɛhova  naa wee su bah ekpo zuūnā pya nɛɛ nua bu ye bɔŋanaloo. Taāwo, a wee kɛɛrɛloo “zuura” pya nɛɛ a muɛ kɔ ba gbī eyii ye loo yaa loo ye. (Jɔn 6:44; Jer 31:3) Sɔ̄ pya nɛɛ le beenyiɛ nɔ nu akiiloo pya lele elap dogo Jɛhova, doodoo wereloo, le kɛ̄ alu nyɛŋia doo, ba wee aadee ye tɔɔ̄ waɛloo sa naa baɛ kɔ alu edasī wa tāŋibah. Bu mɛ sīdee na i dap zuura pya nɛɛ nua bu paradais bu edɔɔ̄ tɛ̄maloo pya ilii lele elap dogo a?

17. Ena i doo lo ezuura pya nɛɛ nua bu paradais bu edɔɔ̄ a?

¹⁷ Ziī sīdee i dap zuura pya nɛɛ nua bu paradais bu edɔɔ̄ na tɛ̄maloo sɔ̄ i wereloo pya i wuga bu yira sa wa lu fɛgɛ loo. Tua sɔ̄ pya nɛɛ si enɔānu bu bɔŋanaloo, i gbī kɔ a kpe wa loo dookɛ̄ a bee dap kpeloo ɛrɛgebah nɛɛ a bee si enɔānu Pya Nɛɛ Kraist bu buɛ̄ Kɔrint a dee kere doo. Ɛrɛgebah nɛɛ a bee si enɔānu Pya Nɛɛ Kraist lo sɔ̄ bee dap kɔ: “Bari le i taɛ yɛɛ bɔɔlo.” (1 Kɔr 14:24, 25; Zek 8:23) Nyɔɔwo, i ɛrɛ enyɔɔnɛ zuurabahtɔ̄ a kɔ: “Tɔɔ̄naa bu efɛɛloo.”—1 Tɛs 5:13.

18. Ena edap zuura pya nɛɛ nua bu i bɔŋanaloo a?

¹⁸ I ɛrɛ epiiga lo e’ɛp pya i wuga nɛɛdam le nɛɛwa bu bɔŋanaloo dookɛ̄ Jɛhova wa ɛp doo. I doo wo tɛ̄maloo ebie ekɛɛrɛ nyɔɔ pya wa lele elap dogo, e a naale wa tɛɛ̄ ekwɔ, lo a naale elena nwīgbagbara sɔ̄ aā anyaawo. I su wereloo kwaā ɛrɛgebah taāŋa a i yii yɛɛ sa lu “fɛgɛ loo ɛnia [ii], ɛɛ beenyiɛ, lo aaloo nɛ ziī.” (Ɛfɛs 4:32) Lo i aara ɛnia ii doo wo, edoo kɔ a taɛ pya dɔɔ̄na eyii bu i paradais bu edɔɔ̄, lokwa alunage e’aara alaba doo wo. b

 TƆƆ̄ BIA BU PARADAIS BU EDƆƆ̄

19. (a) Dɛɛa nyɔɔ pya ue a le bu ekpo a kura, “ Ba Bee Aabu Bɔŋanaloo Sa Sikɛ̄ Obia Lu,” ena pio nɛɛ a sikɛ̄ obia lu bu paradais bu edɔɔ̄ kɔ a? (b) Ena i biaɛfii lo edoo a? (Ɛpnage foto.)

¹⁹ I paradais bu edɔɔ̄ nia i kaāna! A kpedɛɛ̄ anyaawo eekɛ̄ a bee le doo tua sɔ̄. E gbɛnɛ-edo pya nɛɛ a gaa taāŋabah Jɛhova le bu anyaawo ee tua sɔ̄. Dooraa i kiisī lo etɔgɛ nialoo sa tɔɔ̄ bia bu paradais bu edɔɔ̄ lo Jɛhova enɛa i. Ɛrɛgebah nɛɛ a gbī e’ɛrɛ iīnaloo, efɛɛloo, le kpoogaloo ɛrɛ elu yii bu paradais bu edɔɔ̄, sa naa aana bu doo pippip! Kerewo, alu ebɛɛ̄ kɔ i nwaɛ̄dɛɛ̄ kaāna nyɔnɛbee Setan aa doo dɛ̄dɛɛ̄ nu a dap doo lo edag i lɛɛ bu paradais bu edɔɔ̄. (1 Pit 5:8; Mum 12:9) Ii ɛrɛ eyiga kɔ a ee i bah doo pippip. I ɛrɛ epiiga kaāna lo emuɛ kɔ i paradais bu edɔɔ̄ kiisī lo ekpedɛɛ̄, le bu efɛɛloo sa bia ɛɛ.