KIISĪ LO ETƆƆ̄ BAƐ!
2022: Ziī Zua Gbɛnɛ-edo Taāŋa Bee Sira—Ena Baibol Kɔ A?
Bu zua 2022, i bee dāŋana kpɛa akiiloo nɔ̄, kɔ kpugi naale, le kɛ̄ elua egbee kɛnɛkɛ̄ doo gbɛnɛ-edo sɔ̄. Aba Baibol na a kɔ taɛ nu anua pya nu ama gaa sira a.
Taɛ nu pya nu a bee sira bu 2022 gaa tɔgɛ
Pya nu a bee sira bu zua i aa a tɔgɛ kaāna leere kɔ i gaa tɔɔ̄dum bu sɔ̄ Baibol kure “kpɛdumɛ dee.” (2 Timɔti 3:1) Eku sɔ̄ ama bee bɔātɛ̄ bu zua 1914. Yere nukuādɛɛ̄ loo kɛ̄ pya nu a bee sira ama gbaaloo pya nu Baibol bee kɔ kumaloo sɔ̄ ama doo:
“Nɔ̄.”—Matiu 24:6.
“2022 Na Zua Pɔrɔ Pah A Aaloo Nɔ̄ Bee Obia Yii Barasī Europe A.” a
Buū ekobee ue a kura “Pya Russia Yii Ukraine.”
“Kii.”—Matiu 24:7.
“2022: Zua E’agabah Kii Bee Dɔ.” b
Buū ekobee ue a kura “Nɔ̄ A Dɔ Li Ukraine Sikɛ̄ Doo Kɔ Nuede A Naɛ Ee Kɛ̄ A Wee Doo.”
“Pɔrɔ Dumɛ.”—Luk 21:11.
“I bee sikɛ̄ muɛ̄ dumɛ polio, dumɛ monkeypox bee yiiloo kaāna, e COVID-19 bee kiisī lo e’ɛrɛ pɔrɔ pah nyɔɔ pya nɛɛ, pya nu ama bee doo kɔ i muɛ̄ kɛ̄ pya dumɛloo a wee yee bee piya doo le kɛ̄ a dap waɛ eyii loo pya nɛɛ doo.” c
Buū ekobee ue a kura ee the article “COVID Efɛa 6 Miliɔn Pya Nɛɛ.”
“Gbɛnɛ aabɔɔ.”—Luk 21:11.
“Aramiā bu dee, sɔ̄ boo naa dɔɔ, miā a taa kuɛ, le yii maā. Elu enyɛŋiabu pya sɔ̄ a bee aramiā bu zua 2022 nyɔɔ kɛ̄ pya nu a bee sira ama bee gbeesī nu, fɛh pya nɛɛ, sa doo kɔ gbɛnɛ-edo miliɔn pya nɛɛ aa ɛrɛna tɔ etɔɔ̄ doo.” d
Buū ekobee ue a kura “Keebee Aramiā Efɔp Tɛ̄ma Ɛŋɛnɛ Nyɔuwe.”
“Gbɛnɛ kɔma bɔɔ.”—Luk 21:9.
“Pya nɛɛ ɛrɛ saŋ kumaloo kɛ̄ naɛbah sikɛ̄ yiiloo doo, eetɔɔ̄ na kɛ̄ nu sikɛ̄ sidu doo, e lo ama edora kɔ buā pya a be pya bɛbɛɛ a yiiloo kaāna bu zua 2022.” e
Buū ekobee ue a kura “Kɛ̄ Dɛ̄dɛɛ̄ Nu Skikɛ̄ Sidu Doo Tɛɛ̄ Ɛŋɛnɛ Nyɔuwe.”
Ena esira bu zua i gaa yii li a?
Lɔgɔ nɛɛ naale edap kɔ taɛ nu esira bu zua 2023. Nu i suā na kɔ sɔ̄ sɔ̄ naa binia, Buɛ̄-mɛnɛ Bari, ale bɛbɛɛ a le li bunyɔɔ gaa le nyaana kɛ̄tɔɔ̄ nyɔuwe. (Daniel 2:44) Lo bɛbɛɛ gaa le lɛɛ nu a doo kɔ miɔŋɔ nɛɛ a tɔga, sa doo kɔ nu a lu ekɛɛrɛ Bari a dooa a kɛnɛkɛ̄.—Matiu 6:9, 10.
I gaa a yere mɛm loo kɔ o gbaɛ̄tɔ̄loo zuurabahtɔ̄ Jizɔs Kraist sa o kiisī lo e ‘tɔɔ baɛ’ sa muɛ kɛ̄ pya nu aa sira bu nyɔuwe gaa mmɛ pya mɔmanudɛɛ̄ Baibol doo. (Maak 13:37) Lo enɔ yereloo, soosoo o dap i zɔŋia lo enɔ kɛ̄ Baibol a dap yerebah nɛ doo anyaawo le kɛ̄ Baibol dapnage doo kɔ olo le pya o butɔ a ɛrɛ kaāna bɛābu kɔ deesī li e lee doo.
a AP News, “2022 Was Year the Horror of War Returned to Europe,” by Jill Lawless, Lop Le Baɛ Enɔɔ̄ 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” by Lawrence O. Gostin, JD, Ɛrɛnia Enɔɔ̄ 22, 2022.
d Earth.Org, “What’s Behind the Record-Breaking Extreme Weather Events of Summer 2022?” by Martina Igini, Lop Enɔɔ̄ 24, 2022.
e Carnegie Endowment for International Peace, “Economic Anger Dominated Global Protests in 2022,” by Thomas Carothers and Benjamin Feldman, Lop Le Baɛ Enɔɔ̄ 8, 2022.
You May Also Like
NU AI KIILOO
Kɔ A Lu E’inae A Loo
Gbaa kɔnia ziī ebip a aabu Baibol, ale o nɔ nu akiiloo Pya Ekeebee Jɛhova yereloo.
