Ena o kɛɛrɛ sɔ̄ o dā bee ue a kɔ “mumuuna” a? O dap kɛɛrɛ nu akiiloo ziī gbeerasī lo edɔ nyɔɔ yube nyɔuwe, doodoo lo a dap gbeesī dɛ̄dɛɛ̄ nu a tɔɔ̄dum a kɛnɛkɛ̄. Pio nɛɛ yiga kɔ dua pɔrɔ nu a doowo esah a sira nyɔuwe ama, etɔɔ̄ na pio sɔ̄ ba buū pya kpɛa a aara yereue a doodoo:

•   “Nɔ̄ lo efɛ gbɛnɛ-edo nɛɛ a dap dɔ. A dap tɛ̄maloo sɔ̄ pya nɛɛ ɛmɛnɛbee nɔɔ̄, ale sɔ̄ ba naa suā, e a dapnage tɛ̄maloo kanā.”—Bulletin of the Atomic Scientists.

•   “Bu kunɛ dee ama, buā kpɛa akiiloo e’agabah fii efɔp, miā a taa kuɛ, kagara dee, nu beke kure coral bleaching, kɛ̄ sīdee aramiā doo, le yii maā sikɛ̄ yiiloo tɛ̄ma ɛŋɛnɛ nyɔuwe.”—National Geographic.

•   “Kɛ̄ ekam taa sa gbee nu doo bu Africa sikɛ̄ ee kɛ̄ a wee doo tua sɔ̄.”—The Associated Press.

 Ekɔ kɛnɛkɛ̄ ama eluge egbeesī tɛ̄maloo nɔ̄ edɔ bu yube nyɔuwe ni? Ena Baibol kɔ a?

 Eeye. Baibol alu Muɛ Ue Bari doo suā i nɛ kɔ kɛnɛkɛ̄ ama etɔɔ̄ mmɛ deedee. (Eklisiastis 1:4) Taā Bari gbeesī kɛnɛkɛ̄ a bee dɛm, a gaa le “gbee pya a wee gbee nu lo nyɔuwe.”—Mumuuna 11:18.

 Baibol kɔ, “nyɔuwe” a gaa le ina kuma na nyɔuwe miɔŋɔ nɛɛ a naa nwadɛɛ̄ Bari e ba gbi aba nu elee wa loo. Dookɛ̄ a bee doo bu dee Noa a, Bari gaa le su kuma mmɛ loo “nyɔuwe pya a naa nwadɛɛ̄ Bari.”—2 Pita 2:5; 3:7.

 Dookɛ̄ 1 Jɔn 2:17 kɔ doo, “nyɔuwe etɛɛ aa, le ye taɛ nu.” Dɔ ama tɔgɛ kɔ Bari naale gbeesī taɛ kɛnɛkɛ̄ ama, mɛ pya egbeesī na pya nɛɛ a kiisī lo edoo nu a naa nia ye.

 Baibol naa kɔ taɛ sɔ̄ kuma elu i nɛ. (Matiu 24:36) Kerewo, a kɔ kuma ewaraloo kɛ̄. Baibol ebee kɔ serekɛ̄ kɔ:

•   Pya nu a doodoo nɔ, naɛ nuede, pɔrɔ-pɔrɔ dumɛnu, le e’agaba nyɔŋa kɛnɛkɛ̄ “elegara keekee kɛ̄.”—Matiu 24:3, 7, 14; Luk 21:10, 11; Mumuuna 6:1-8.

•   Pya nɛɛ bu dɛ̄dɛɛ̄ kɛ̄ esikɛ̄ gbī nu elee wa loo ee kɛ̄ ba wee doo. Bu edoba, ba elu pya a “wereloo kpugi,” “naa ɛrɛ yaa,” sa naa “aa wa loo.”—2 Timoti 3:1-5.

 Gbɛnɛ-edo nɛɛ yiga kɔ aā bu zua 1914 a, pya nu a gaa sira bu nyɔuwe lu taɛ pya nu Baibol bee kɔ a gaa le sira sɔ̄ kuma ewara. Lo edā yereloo, ɛp ekobee ue akura “What Does Bible Chronology Indicate About the Year 1914?” le “What Is the Sign of ‘the Last Days,’ ale ‘End Times’?”

 Taɛ nu bee ue pya Grik a lu etap nua “mumuuna” a le bu Baibol kura na “lɛɛ muunɛ nu” ale “lɛɛ nu bu gɔā.” Gbɛnɛ-edo sɔ̄ lo bee ue wee lu esu baāmatɛ̄ sɔ̄ a lu edoo kɔ ziī yereue a bee le bu gɔā a lu esuā. Biabol kɔnage nu akiiloo “sɔ̄ Nɛɛ-a-i-ɛrɛ Jizɔs esira” [ale elu emuuna] ye, lo esudɔ sɔ̄ Jizɔs etɔgɛ ye loo nua nɛɛ a ɛrɛ ekpo lo elɛɛ dɛ̄dɛɛ̄ pɔrɔ bu nyɔuwe sa nɛ ekpɛanu pya a taāŋabah Bari.—2 Pya Tɛsalɔnaika 1:6, 7; 1 Pita 1:7, 13.

 Kpɛdumɛ kpa Baibol lu ekure ye A·po·kaʹly·psis, ale Mumuuna, nyɔnɛbee a kɔ pya nu esira li deesī. (Mumuuna 1:1) Lo kpa aara leyere ue le yereue bɛābu. (Mumuuna 1:3) A tɔgɛ kɔ Bari gaa le lɛɛ dɛ̄dɛɛ̄ pɔrɔ biaɛ sa kiira nyɔuwe nua paradaiz. Lo sɔ̄, miɔ̄ŋɔ nɛɛ naale lena bu ezialoo, tɔga, sa ba naale u na.—Mumuuna 21:3, 4.

 E niage a enɔ nu akiiloo pya keebee yii Baibol ama ni? Pya Ekeebee Jɛhova wee tɔgɛ Baibol pya nɛɛ bu yɔrɔ, e lo ama dap a yerebah nɛ. E nia wa lo o kɔ wa nɛ kɔ ba a nyɔɔnɛ a nɔnu.