Ziī sɔ̄ bu ziī ziī zua, Pya Ekeebee Jɛhova le gbɛnɛ-edo miliɔn pya ba kue bu yube nyɔuwe wee gbaa bɔŋia lo esere Doonu Nyɛŋiabu Loo Luh Jizɔs, dookɛ̄ a bee nɛ lok doo. (Luk 22:19) Doonu ama wee i yerebah nɛ kɔ i tɔgɛ nia loo nu Jizɔs bee doo lo esu ye dum nɛ nyɔɔ pya miɔŋɔ nɛɛ. A tɔgɛ nage i kɛ̄ ye waara zɔɔ i dap dɔbiī nɛ doo anyaawo le deesī li—Jɔn 3:16.

 Kere o bee si Doonu Nyɛŋibu Loo Luh Kraist a bu zua ama ale oo bee si, o tɛɛ̄ doodoo wa dap ɛrɛ biī aāloo luh waara zɔɔ a’agara Jizɔs ni? Jizɔs bee kɔ baɛ nu a kuī kɔ i doo:

1.  1. Nɔ nu akiiloo Bari le Jizɔs. Jizɔs bee yere kara ma ye Tɛ ale li bunyɔɔ sa kɔ: “Alɛ ama na dum a naa tah a, lokwa ba suāloo olo aba kaka Bari le Jizɔs Kraist nɛɛ o bee yere.”—Jɔn 17:3.

2.  2. Doo dogo kumaloo pya nu o nɔ. Jizɔs bee baatɛ̄ leere kɔ alu ebɛɛ̄ kɔ i su pya nu a bee tɔgɛ yere bu dogo. Bu edobah, a bee yere kuma loo ye ekɔaue nyɔɔ kpokɛ̄ tɛ̄maloo ekaɛgɛ ɛrɛgeba “nɛɛ a dā pya [ye] ue, sa wa doo.” (Luk 6:46-48) Gbaaloo wo, a ɛrɛnage dɔɔ̄na sɔ̄ a bee kɔ: “Lo a le bui suā dɛ̄dɛɛ̄ pya lo nu ama, leelee a le i nɛ lo a le bui doo wa.”—Jɔn 13:17.

 Eniage a enɔ nu akiiloo Jɛhova le Jizɔs yereloo ni? Ekɔ o gbī esuā pio nu o dap doo lo esu pya nu o gaa nɔ yere bu dogo ni? Pio nu o dap doo lo e’ɛrɛ pya yereue eyerebah a nɛ na ama.

 I nyɔnyɔɔnɛ pya nɛɛ kɔnia nu a aabu Baibol bu yɔrɔ eyerebah nɛ gbɛnɛ-edo nɛɛ kɔ ba a nɔ Baibol sa su pya nu ba nɔ yere bu wa dum.

•   Si kɛɛ̄ Guided Bible Study Course nyɔɔ i dɔ intanɛt lo enɔ yereloo.

•   Si ee vidio a kura O Elua Loo O Enɔānu Baibol lokwa o muɛ kɛ̄ enɔanu Baibol Pya Ekeebee Jɛhova wee mɛa doo.

 Pya Ekeebee Jɛhova wee zɔŋia baɛ sɔ̄ bu ziī ziī kaɛ bie kɛ̄ ba wee tɔɔ̄ ɛrɛ wa enɔānu lo a le wa Tɔ Nɔnu Buɛ̄-mɛnɛ. Bie pya lo zɔ̄zɔ̄ŋia ama, i wee gbaa kɔnia nu a le bu Baibol le kɛ̄ i dap su pya nu i nɔ yere bu dogo doo.

 Ɛrɛgeba nɛɛ dap si lo enɔānu; naa kura kɔ o dasī lu nɛɛ Ekeebee lɛɛ o gae dap si. Dɛɛa nyɔɔ kɛ̄ o kɛ̄tɔɔ̄ a nɛ dee doo, o si lo enɔānu sī-le-sī ale o si tɛ̄ma nyɔɔ vidio.

•   Si ee vidio a kura Ena A Wee Lu Edoo Bie I Tɔ Nɔnu Buɛ̄-mɛnɛ Ani? lo emuɛ pio nu o dap ɛmadɛɛ̄ bie pya enɔānu ama.

•   Gbī ziī kɛ̄ esi enɔānu a a waɛloo tɛ̄maloo ebiibah kɛ̄ a kura Congregation Meetings of Jehovah’s Witnesses.

 Gbɛnɛ-edo ekobee ue le vidio a le dɔ intanɛt ama dap a yerebah nɛ kɔ o nɔ nu akiiloo pya tɔgɛnu Jizɔs le kɛ̄ ye luh waara zɔɔ kuī doo yereloo.

 Bu edobah, lo enɔ nu akiiloo kɛ̄ luh aba ziī nɛɛ dap dɔbiī nɛ gbɛnɛ-edo miliɔn pya nɛɛ doo, buū ekobee ue a kura “Jesus Saves—How?” le “Why Did Jesus Suffer and Die?” ale o si ee vidio a kura Ena Anua Jizɔs Bee U Ani?