Nyɔɔ 27 biradee bu Tua Enɔɔ̄, 2023, gbɛnɛ-edo nɛɛ bee nyɛŋiabu loo dee ba wee kure International Holocaust Remembrance Day. Gbɛnɛ e’agabah dogo luh mii a bee sira nu a yeeloo 75 zua akii adumɛ ama, e doo kɔ o bura taɛ nu anua Bari bee lɛɛbahloo kɔ a lu efɛ gbɛnɛ-edo nɛɛ doowo lo sɔ̄.

•   Lo o gbī esuā nu Baibol kɔ, Buū ekobee ue a kura “Ena Anua A Bee Lu Efɛ Gbɛnɛ-edo Nɛɛ Bie Europe A? Ena Anua Bari Naa Bee Wa Kpaɛ̄ A?”

 Gbɛnɛ-edo pya Juu bee tɔga kaāna bu lo sɔ̄. A bee lu enɔɔ sa fɛ gbɛnɛ-edo aba. Bee lunage etɛ̄ŋaloo sa fɛ gbɛnɛ-edo pya dɔɔ̄na a naale pya Juu bu lo sɔ. Gbɛnɛ-edo pya Ekeebee Jɛhova a bee lu etɛ̄ŋaloo nyɔɔ wa yira bu Baibol bee wa le yɛɛ.

•   Lo o gbī esikɛ̄ nɔ yereloo, buū ekobee ue a kura “Ena A Bee Siraloo Pya Ekeebee Jɛhova Bu Sɔ̄ A Bee Lu Efɛ Gbɛnɛ-edo Nɛɛ Li Europe A?”

 Bɔɔ aa gbɛnɛ-edo nɛɛ kɔ nu a bee sira ama dapnage sikɛ̄ sira dɔɔ̄na sɔ̄. Kerewo, bu i ɛɛ kɔ Baibol kɔ deesī li lɔgɔ pɔrɔ siranu a doo wo naale esira na.

•   “Nyɔnɛbee mda suā na ekɛɛrɛ m ɛrɛ i kumaloo, Jɛhova kɔ, ekɛɛrɛ m ɛrɛ loo bui le, a naale loo bui pɔrɔ, lo enɛ i sɔ̄ a le sī le bɛābu.”—Jeremia 29:11. a

 I gaa le ɛrɛ nu i bɛābu loo ama sɔ̄ Jɛhova Bari edoo dogo lo eyere kuma loo pɔrɔ sa kwa dɛ̄dɛɛ̄ pɔrɔ a ye sira aaloo. Sɔ̄ sɔ̄ naa binia, a gaa le:

•   Lɛɛ pya pɔrɔ ba si bag loo pya dɔɔ̄na.—Kam 2:22.

•   Bo dɛ̄dɛɛ̄ pya a gaa tɔga.—Mumuuna 21:4.

•   Obara pya ebee u sere duma a kɛnɛkɛ̄.—Jɔn 5:28, 29.

 O dap dɛrɛ nyiɛ nyɔɔ pya ue egbɔnyiɛ a le bu Baibol. Lo esuā nu anua o dap doo wo, i kue a kɔ o doo i nyɔɔnɛ a nɔ Baibol bu yɔrɔ.