Tɛɛ̄ ɛŋɛnɛ dɛ̄dɛɛ̄ nyɔuwe, gbɛnɛ-edo nɛɛ gaa tɔga kɛ̄bah yii maā a gbeesī nu. Yere nukuādɛɛ̄ loo nu kpɛa kɔ ama:

•   “Dua boo a sii bee dɔɔ bu nu alu 140 zua lo edɔɔra beekɛ̄ loo China, e sɔ̄ a lu edo aā Dee Nwīpinikaɛ mmɛ Taa Deelookaɛ nu a lu 744.8 millimeters (29.3 inches) boo edɔɔra lo kɛ̄.”—AP News, August 2, 2023.

•   “Lo Nia Deelookaɛ na eree baɛ dee efɔp Typhoon Khanun edoora kɔ gbɛnɛ dɔɔ boo le gbɛnɛ fii efɔp a dɔɔ sa dɔ naɛsī kɛ̄ a kiikɛ̄ loo Japan a, e lo ama efɛa yira baɛ nɛɛ. . . . Lu e’ɛmadɛɛ̄ kɔ lo fii efɔp edoo kɔ gbɛnɛ dɔɔ boo a dap lu 0.6 meters (2 feet) a dɔɔ bu naɛsī kɛ̄ egu le loo central Taiwan.”—Deutsche Welle, August 3, 2023.

•   “Nu a bee doo kɔ maā a yii buɛ̄ [Nova Scotia] a takaɛ a na gbɛnɛ e’agabah boo a gaa le dɔɔ barasī Atlantic Canada bu 50 zua.”—BBC News, July 24, 2023.

 Ena Baibol kɔ kumaloo pya siranu a le doowo ama a?

 Baibol doo kɔ i suā kɔ i gaa tɔɔ̄dum bu sɔ̄ alu ekure “kpɛdumɛ dee.” (2 Timɔti 3:1) Jizɔs bee kɔ serekɛ̄ kɔ bu ilii sɔ̄ ama, i gaa le muɛ̄ “gbɛnɛ edobah nu,” ale pya nu a yere bɔɔ. (Luk 21:11) Kɛ̄ budee nyaa doo edoora kɔ gbɛnɛ-gbɛnɛ nu a yere bɔɔ lo nɛɛ naa gaa bee ɛmadɛɛ̄ a bialoo sira bu sīdee a agabah ee kɛ̄ a wee sira doo.

 Baibol kɔ i nɛ kɔ booboo nu a yere bɔɔ a gaa sira bu nyɔuwe aniī’ee doo kɔ i ɛrɛ bɛābu. Ena anua? Jizɔs bee kɔ: “Ɛrɛgeba sɔ̄ bui muɛ pya lo nu ama a gaa su dɔ, bui suā kɔmɛ Buɛ̄-mɛnɛ Bari ewara.”—Luk 21:31; Matiu 24:3.

 Pya nu i muɛ a gaa sira tɔgɛ kɔ sɔ̄ sɔ̄ naa binia Buɛ̄-mɛnɛ Bari ebaɛbee kɛ̄ dɛ̄dɛɛ̄ nu a le sīdee, gbaānage loo kɛ̄ maā tɛ̄na doo sa doo ba aa gbeenasī nu.—Job 36:27, 28; Le-yɔɔ 107:29.

 Lo enɔ kɛ̄ Buɛ̄-mɛnɛ Bari e obia nyɔuwe doo yereloo, buū ekobee ue a kura “Who Will Save the Earth?”