“Pya nɛɛ aa kiisī lo edoo nu egbee sī-dee. Maā gaa le su gbɛnɛ-edo buɛ̄. Aramiā efɔp a dɔ bu bugia. Gbɛnɛ fii efɔp a yere bɔɔ. Naɛ̄ maā bu booboo kɛ̄. Kɛ̄ gbɛnɛ-edo miliɔn te le nam ugara doo. Pya nu ama naale kunɛ loo ale bee kɔ a lu ekɔ yegɛ yeekɛ̄. A lu nu pya saɛns kɔ kumaloo kɛ̄ a gaa lu esu nu beke kure energy policies daānu doo.”—Ue António Guterres secretary-general Pya United Nations bee kɔ, kumaloo kpɛa pya Intergovernmental Panel on Climate Change bee nɛ nyɔɔ April 4 Nia Enɔɔ̄, 2022.

 “Pya saɛns aa wiikpā doo kɔ dɛ̄dɛɛ̄ nɛɛ a dā kɔ sɔ̄ sɔ̄ naa binia, kɛ̄ bu dee aa nyaa doo mɛ nu a waɛloo dɛ̄dɛɛ̄ 423 national parks [a le United States] dap. Pɔrɔ nu a dap sira ama bee pɔrɔ siranu i wee buū nu akiiloo bu Baibol: miā le yii maā, eba eba ice lege, pɛnɛ bu yiiloo le efɔp maā aramiā.”—“Maā A Yii Yellowstone, Nu A Tɔgɛ Pɔrɔ Siranu A Gaa Le Sira,” The New York Times, 15 Ini’ī Enɔɔ̄, 2022.

 Ekɔ edapge lu ekwa pya nu elua egbee a kɛnɛkɛ̄ ni? Lo a le wo, mɛɛ na ekwa pya lo nu a? Naa ɛp pya nu Baibol kɔ ama.

 Baibol kɔ Bari gaa le “gbee pya a wee gbee nu lo nyɔuwe.” (Mumuuna 11:18) Dɔ Baibol ama tɔgɛ i taa nu:

1.  1. Dogo pya nɛɛ egbee nyɔuwe.

2.  2. Gbee nyɔuwe e’ina kuma.

3.  3. Naale na ekwa dɛ̄dɛɛ̄ taāŋa a le nyɔuwe a, e a naale miɔŋɔ nɛɛ.

 Baibol kɔ “nyɔuwe tɔɔ̄ ina deedee.” (Eklisiastis 1:4) A ɛrɛge ewee lu etɔɔ̄ ye bu.

•   “Pya kaāna dogo e’ɛrɛ kɛnɛkɛ̄ sa tɔɔ̄ bu ina deedee.”—Le-yɔɔ 37:29.

 Elu esikɛ̄ kwabaloo nyɔuwe ama doo kɔ a lee kaāna.

•   “Kpo-sagara wii le kagara kɛnɛkɛ̄ gaa le ɛrɛ ɛɛbu, eko kɛ̄ gaa le ɛɛŋa sa yere yuuri doodoo rose.”—Aisaia 35:1.