Nyɔɔ 19 biradee bu O’oo Enɔɔ̄, 2022, pya United Nations Security Council edaā ue aānu nu a eeloo 75 pya gbɛnɛ gbɛnɛ nɛɛ a le dɔ ekpo kɔ “kɔ dumɛloo COVID-19 edoora kɔ nuede a naɛ kɛ̄, e nɔ̄ a le Ukraine edoora kɔ bu dee a bee piya gbɛnɛ lo a sikɛ̄ doo kɔ nuede a naɛ kɛ̄ bu dɛ̄dɛɛ̄ nyɔuwe.” Sɔ̄ nwīgbagbara sɔ̄ etɛ̄na, ziī kpa a kura The Economist kɔ “nyɔuwe taāŋa le e’eeloo bu ama, gbɛnɛ-edo nɛɛ aa le esikɛ̄ tɔɔ̄ bu lɛɛraloo nyɔɔ ebea nɔ̄.” Baibol ebee kɔ serekɛ̄ kɔ dua naɛ nuede a le doo wo gaa le le bu ilii sɔ̄ ama, kerewo, a kɔnage pya nu eyerebah i nɛ kɔ i dap tāma pya lo kɛ̄tɔɔ̄.

•    Jizɔs bee kɔ: “Edonyɔɔ e’aakɛ̄ loo edonyɔɔ, e buɛ̄-mɛnɛ loo buɛ̄-mɛnɛ, e booboo kii” ele.—Matiu 24:7.

•    Kpa Mumuuna kɔ nu akiiloo nia nɛɛ a tɔɔ̄ dɔ nu a le nyɔɔ enyanya. Ziī yɛɛ pya lo nɛɛ yira dɔ ebea nɔ̄. Lo dɔɔ̄na a ye nyɔɔnɛ yira dɔ kii, sɔ̄ e’aga e’ɛrɛ nuede sa pya a ɛrɛ lo e’oo ekɔ gbɛnɛ du loo. “M bee muɛ . . . ziī biira enyanya, e nɛɛ a ye ɛŋɛtɛ̄ nyɔɔ bee ɛrɛ nu doā nu a ye le bah. M bee dā nu a bee ziī muɛ . . . a kɔ, ‘Ziī nu doā kpakpaa a kura quart esi kpugi a wee lu ekpɛ loo ziī biradee tam! Taa quart barley esinage kpugi a wee lu ekpɛ loo ziī biradee tam.’”—Mumuuna 6:5, 6, Contemporary English Version.

 Pya mɔmanudɛɛ̄ Baibol ama akiiloo kɛ̄ nuede enaɛ doo ama are ɛrɛ ye dooa gbɔ̄mɛɛ̄ bu ilii sɔ̄ ama lo Baibol kure “kpɛdumɛ dee.” (2 Timɔti 3:1) Lo enɔ nu akiiloo “kpudumɛ dee” yereloo, le nia nɛɛ a le nyɔɔ enyanya lo kpa Mumuuna kɔ nu akiiloo, si ee vidio a kura The World Has Changed Since 1914 sa buū ekobee ue a kɔ “The Four Horsemen—Who Are They?”

•    Baibol aaraa pya zuurabahtɔ̄ a dɔbiī lo a i dap yerebah nɛ lo etāma pya kɛ̄tɔɔ̄ a aga, gbaānage loo sɔ̄ nuede sikɛ̄ sidu ale sɔ̄ kii dɔ. Buū pio edoba a le bu ekobee ue a kɔ “How to Live on Less.”

•    Baibol nɛnage i bɛābu kɔ kɛ̄tɔɔ̄ nyɔuwe esa a lee. A yira yii kɔ “gbɛnɛ-edo kpakpaa ele buɛ̄ a,” e dɛ̄dɛɛ̄ nɛɛ e’ɛrɛ nuede a wa gbɔɛ̄ loo. (Le-yɔɔ 72:16) Lo enɔ nu akiiloo bɛābu Baibol nɛ akiiloo deesī li, le nu anua o dɛrɛ nyiɛ nyɔɔ, buū ekobee ue a kɔ “A Real Hope for a Better Tomorrow.”