Bagara lɔɔrɛ 24 biradee bu Baɛ Enɔɔ̄, 2022, pya nɔ̄ pya Russia bee bɔɛ̄tɛ̄ yii Ukraine, kaɛlɛɛ dɛ̄dɛɛ̄ epiaga pya mɛnɛ nyɔuwe bee doo lo e’ɔbɛ wa lokwa nɔ naa dɔ. Amunu pah na nɔ̄ ama dap ɛrɛ nyɔɔ dɛ̄dɛɛ nyɔuwe a? Nɛɛ ɛm kpa nɛ pya United Nations a kura António Guterres, bee kɔ pio dee akii a dumɛ kɔ: “Tɔga miɔŋɔ nɛɛ etɔga, gbeesī nu esira aaloo nɔ ama, le kɛ̄ dɛ̄dɛɛ̄ edo a le Europe le yube nyɔwu ama naale e’ɛrɛna kpega doo e eeloo.”

•   Jizɔs Kraist bee kɔ a ɛrɛ sɔ̄ “edonyɔɔ e’aakɛ̄ loo edoo edonyɔɔ, e buɛ̄-mɛnɛ loo buɛ̄-mɛnɛ.” (Matiu 24:7) Buū ekobee ue a kɔ “What Is the Sign of ‘the Last Days,’ ale ‘End Times’?” lo emuɛ̄ kɛ̄ Baibol tɔgɛ doo kɔ nɔ̄ lu nu a doo gbɔ̄mɛɛ̄ ue mɔmanudɛɛ̄ Jizɔs bee kɔ sere kɛ̄ doo.

•   Kpa Mumuuna tɔgɛ kɔ nɔ̄ na a lu nɛɛ a le ɛŋɛtɛ̄ nyɔɔ enyanya “a kum miī kaāna” sa “su efɛɛloo lɛɛ bu nyɔuwe” a. (Mumuuna 6:4) Buū ekobee ue a kɔ “The Four Horsemen—Who Are They?” lo emuɛ̄ kɛ̄ mɔmanuɛɛ̄ ama kiiloo nɔ̄ doo anii’ee.

•   Kpa Daniel kɔ nu akiiloo be ele yɛɛ “mɛnɛ-buɛ̄ dee mmnyɔɔ” le “mɛnɛ-buɛ̄ dee kerekɛ̄.” (Daniel 11:25-45) Si ee vidio a kura Mɔmanudɛɛ̄ Edooa Gbɔ̄mɛɛ̄—Daniel 11 Ekobee lo emuɛ̄ nu anua a dap lu esu Russia le pya a wa gbaaloo kure mɛnɛ-buɛ̄ dee mmnyɔɔ. a

•   Mumuuna kɔnage nu akiiloo “nɔ̄ lo gbɛnɛ dee Bari Lo-a-bɛɛ-dɛ̄dɛɛ̄ nu.” (Mumuuna 16:14, 16) Kerewo, lo ama naa le doodoo pya nɔ a gaa su dɔ anii’ee. Buū ekobee ue a kɔ “What Is the Battle of Armageddon?” lo edā pya dɔɔ̄na yereue akiiloo pya nu esira li deesī.

•   Baibol kɔ Bari gaa le “doo kɔ dɛ̄dɛɛ̄ be-nɔ̄ a ɔp mmɛ kuma dɛ̄dɛɛ̄ nyɔuwe.” (Le-yɔɔ 46:9) Buū ekobee ue a kɔ “A Real Hope for a Better Tomorrow” lo edā pya dɔɔ̄na yereue akiiloo pya yii Bari yira akiiloo deesī li.

•   Jizɔs bee kɔ pya awee ye nyɔɔnɛ dumɛ a yere kara kɔ Buɛ̄-mɛnɛ Bari a lu. (Matiu 6:9, 10) Lo Buɛ̄-mɛnɛ ɛɛ ziī bɛbɛɛ a le li bunyɔɔ lo a gaa le doo gbɔ̄mɛɛ̄ ekɛɛrɛ Bari kumaloo kɛnɛkɛ̄, e ziī nu a lu ekɛɛrɛ Bari na kɔ efɛɛloo a le bu dɛ̄dɛɛ̄ nyɔuwe. Lo esuā kɛ̄ lo Buɛ̄-mɛnɛ dap a dɔbiī nɛ doo, si ee vidio a kura Ena A Kura Buɛ̄-mɛnɛ Bari Ani?

 Nu a eeloo 129,000 Pya Ekeebee Jɛhova le Ukraine. Dookɛ̄ Pya Ekeebee Jɛhova ba le dɔɔ̄na barasī le doo, Pya Ekeebee Jɛhova a le Ukraine nɔ Jizɔs tɛ̄maloo etɔɔ̄ kee aaloo bira bɛbɛɛ sa naa su dɔ bu be nɔ̄. (Jɔn 18:36) Tɛɛ̄ ɛŋɛnɛ nyɔuwe, Pya Ekeebee Jɛhova kiisī lo ezue “le yereue . . . Buɛ̄-mɛnɛ” kɔ aba lo Buɛ̄-mɛnɛ na elɛɛ dɛ̄dɛɛ̄ taāŋa miɔŋɔ nɛɛ a, gbaānage loo nɔ̄. (Matiu 24:14) I kɔ o zɔŋia ziī ii lo edā pya dɔɔ̄na yereue Baibol a nɛ bɛābu.