KIISĪ LO ETƆƆ̄ BAƐ!
Tā Naa Bie Tɔkpa—Ena Baibol Kɔ A?
Nyɔɔ 24 biradee bu O’oo Enɔɔ̄, 2022, ziī gbɛnɛ pɔrɔ siranu bee sira bu nwīgbagbara buɛ̄ a kura Uvalde, li Texas, U.S.A. Dookɛ̄ The New York Times kɔ doo, “ziī gbara bee tā naa sa fɛ 19 pya miɔŋɔ tɔkpa le baɛ pya nɛɛ tɔgɛ nu . . . bie Robb Elementary School.”
Lu ekiɛ̄nu kɔ pɔrɔ pɔrɔ siranu a le doo wo ama aa siragi gbɛnɛ-edo sɔ̄. USA Today kɔ bie aba United States “elua etā naā nu alu 249 sɔ bie tɔkpa bu zua i aa a—ee dɛ̄dɛɛ̄ zua aage bu zua 1970.”
Ena anua pya pɔrɔ nu ama siragi a? Bu mɛ sīdee na i dap tama pya pɔrɔ siranu ama a? I ɛrɛge bɛābu kɔ dogo lumiī e’ina kuma ziī dee ni? Baibol agara pya ebip ama.
Ena anua dogo lumiī aa agɛrɛbah sira bu nyɔuwe a?
Baibol baatɛ̄ sɔ̄ i le ama kɔ i le bu “kpɛdumɛ dee” sɔ̄ gbɛnɛ-edo nɛɛ elu pya a naa “kɛɛrɛ pya dɔɔ̄na” e ba elu “pya a doo dogo nam kuɛ” lo a kura kɔ ba edoo bag dogo sa doo dogo lumiī. Pya a ɛrɛ dua dogo ama “enyim kiisī bu pɔrɔ dogo.” (2 Timɔti 3:1-5, 13) Lo enɔ yere loo, buū ekobee ue a kɔ “Did the Bible Predict the Way People Think and Act Today?”
Pio nɛɛ dap bura kɔ, ‘Ena anua Bari naa ɔbɛ pɔrɔ pɔrɔ siranu doodoo tā naā bie tɔkpa kɔ aa sirana a?’ Lo esuā ture Baibol nɛ, buū ekobee ue a kɔ “Bad Things Happen to Good People—Why?”
Bu mɛ sīdee na i dap tama pya pɔrɔ siranu ama a?
“Ɛrɛgeba nu a bee lu e’ɛm tua sɔ̄, bee lu e’ɛm lo enɔɛ̄ i nu, lokwa . . . tɛ̄mloo e’aga nyiɛ aā bu kpa kaɛ i ɛrɛ bɛābu.”—Pya Rom 15:4.
Pya zuurabahtɔ̄ a le bu Baibol dap a yerebah nɛ kɔ o tama pya pɔrɔ pɔrɔ siranu a gaa siragi bu nyɔuwe. Lo esuā yereloo, buū Awake! ye ekobee ue kɔ “Will Violence Ever End?”
Lo esuā pio ue akiiloo kɛ̄ pya tɛ le ka dap yerebah nɛ pya wa miɔŋɔ kɔ ba a tama pɔrɔ pɔrɔ yereue ba dāŋana doo, buū ekobee ue a kɔ “Disturbing News Reports and Your Children.”
Ekɔ dogo lumiī e’inage kuma ni?
“Aāloo su kuma kɛ̄ le ekpo na a agara wa dum a.”—Le-yɔɔ 72:14.
“Ba gaa le dɛm dɛ̄dɛɛ̄ wa gɛ̄ nɔ̄ nua ploughshare, le dɛ̄dɛɛ̄ wa kɔ̄ nua kɔbɛ-gɛ̄ kama te. Edonyɔɔ naale dana gɛ̄ nɔ̄ lo edoo edonyɔɔ, e ba naale esinakɛ̄ nɔ be nɔ̄ lɔgɔ sɔ̄.”—Maika 4:3.
Bari edoo nu lɔgɔ nɛɛ sii dap doo. Ye Buɛ̄-mɛnɛ gaa le lɛɛ dɛ̄dɛɛ̄ nu nɔ̄ sa yere kuma loo dɛ̄dɛɛ̄ bee bag dogo. Lo esikɛ̄ nɔ nu akiiloo pya nu Buɛ̄-mɛnɛ Bari edoo, buū ekobee ue a kɔ “Under God’s Kingdom ‘Peace Will Abound.’”
