Nɔ̄ pya Russia bee bɔātɛ̄ eyii Ukraine aā 24 biradee bu Baɛ Enɔɔ̄, 2022, lo a doo kɔ gbɛnɛ-edo miliɔn pya nɛɛ a nwanabah gbī dee lo e’aa lo edo, lokwa ba dap kpɔā wa dum. a

 “Ba bee tā keekee bee ebɛm naā lo pya beke kure bomb sa gbeesī gbɛnɛ-edo nu. Bɔɔ bee aa pya nɛɛ mmɛ kɛ̄ bee a kɔ naale loo. Sɔ̄ i bee dā kɔ ziī fah pya beke kure train esugara pya nɛɛ aā i edo, i bee biaɛfii lo e’aa. I bee lɛɛbaloo dɛ̄dɛɛ̄ nu bie dumɛ nyɔɔbee aba ziī ka bɛrɛ kɛra dumɛ na a bee lu elɛɛbaloo kɔ ziī ziī nɛɛ a su a. Aba nu i bee dap su na pio kpa a kuī, pie, maā, le pio nu etagi. I bee lɛɛbaloo dɛ̄dɛɛ̄ nu bie dumɛ sa kii kɛ̄ fah wee yira sɔ̄ aa bee lu etā lo ebɛm naā.”​—Nataliia, a lu Kharkiv, li Ukraine.

 “I bee kɛɛrɛ kɔ a naale ewaɛ kɔ nɔ̄ a dɔ, mmɛ taɛ sɔ̄ i bee muɛ kɔ lo nɔ̄ ebɔātɛ̄. M bee dā gbɛnɛ muɛ nu a pɔm bie dɔɔ̄na barasī loo i buɛ̄, e pya i nwī-bū bee le gaa nyɔŋa. M bee biaɛfii lo esu aba pio nu a mɛ kuīloo gbɛnɛ su aā. M bee aa be 8:00 lɔɔrɛ sa yii bu train kii Lviv lɛɛ m sikɛ̄ yii bu dɔɔ̄na fah kii Poland.”​—Nadija, a lu Kharkiv, li Ukraine.

Bu ekobee ue ama

•  Ena a nua taāŋa a doo kɔ pya nɛɛ a teera aa wa be ama a?

•  Mɛ kɛ̄ na pya a aa wa be ama e’ɛrɛ bɛābu aā a?

•  Baibol dapge yerebah nɛ pya a teera aa wa be aniī’ee?

 Ena a nua taāŋa a doo kɔ pya nɛɛ a teera aa wa be ama a?

 Taāŋa a doo kɔ pya nɛɛ a teera aa wa be li Ukraine bee bɔātɛ̄ sɔ̄ nɔ̄ pya Russia bee yii lo buɛ̄. Kerewo, Baibol kɔ pya dɔɔ̄na nu a nua pya taāŋa ama:

•   Bɛbɛɛ miɔ̄ŋɔ nɛɛ bu yube nyɔuwe elɔgara miɔ̄ŋɔ nɛɛ. Pya a le dɔ ekpo bu bɛbɛɛ esua wa dɔ bima pya nɛɛ kuma kɛ̄.​—Eklisiastis 4:1; 8:9.

•   Setan lo a le Pɔrɔ Edɔɔ̄, “nɛɛ-bee lo nyɔuwe,” ama eyere pya pɔrɔ ekɛɛrɛ ama bu miɔ̄ŋɔ nɛɛ, e Baibol kɔ: “Dɛ̄dɛɛ̄ nyɔuwe tɔɔ̄ kɛ̄bah nɛɛ pɔrɔ a.”​—Jɔn 14:30; 1 Jɔn 5:19.

•   Kaɛlɛɛ pya dɔɔ̄na taāŋa miɔ̄ŋɔ gaa kpesī bu gbɛnɛ-edo zua lo, nyaawo i gaa tɔɔ̄dum sɔ̄ Baibol bee kɔ nu kumaloo kɔ: “Bu kpɛdumɛ dee gbɛnɛ taāŋa gaa le le.” (2 Timɔti 3:1) Gbaāloo wo, nu i su yeā nukuādɛɛ̄ loo lo dee na tɛ̄maloo nɔ̄, bugia siranu, kii, le pɔrɔ dumɛ, pya nu a dap doo kɔ pya nɛɛ a aa wa be.​—Luk 21:10, 11.

 Mɛ kɛ̄ na pya a aa wa be ama e’ɛrɛ bɛābu aā a?

 Baibol doo kɔ i suā kɔ Nɛɛ-a-bee-i-dɛm lo a le Jɛhova, b ; lu Bari a ɛrɛ wereloo le toesaɛ̄ kumaloo pya a le bu taāŋa le pya nɛɛ kɛ̄tɔɔ̄ doo kɔ ba a aa wa be. (Deuteronomi 10:18) A yira yii kɔ esue ye bɛbɛɛ a le li bunyɔɔ a lu ekue Buɛ̄-mɛnɛ Bari lɛma taāŋa pya a teera aa wa be, e lo bɛbɛɛ ama na esudɔ bɛbɛɛ miɔ̄ŋɔ nɛɛ a. (Daniel 2:44; Matiu 6:10) Jɛhova esu ye Buɛ̄-mɛnɛ lɛma Setan lo a le Pɔrɔ-edɔɔ̄. (Pya Rom 16:20) Lo Buɛ̄-mɛnɛ ebɛɛ mmɛ dɛ̄dɛɛ̄ kɛ̄ a le bu nyɔuwe, sa doo kɔ lɔgɔ epoo epoo aa lena. Dɛ̄dɛɛ̄ miɔŋɔ nɛɛ ele lo sɔ̄ egbaa sa lu aba ziī butɔ bu yube nyɔuwe. Lɔgɔ nɛɛ naale eteerana aa ye tɔ, nyɔnɛbee Baibol yira yii kɔ: “Ɛrɛgeba nɛɛ gaa le ɛŋɛtɛ̄ kɛɛ̄ ye te-vine le kɛɛ̄ ye te-fig, e lɔgɔ nɛɛ naale doo kɔ ba a ɛrɛ bɔɔ; nyɔnɛbee egā Jɛhova lo gbɛnɛ gbo nɔ ekɔa.”​—Maika 4:4.

 Aba Buɛ̄-mɛnɛ Bari na edap lɛɛ dɛ̄dɛɛ̄ taāŋa a aaloo ebeanɔ̄ i gaa tɛɛ̄bu anii’ee a. Jɛhova esu ye Bɛbɛɛ lɛma pya taāŋa a doo kɔ pya nɛɛ a teera aa wa be sa lu pya a le dee-tee. Naa ɛp pio edoba ama:

•   Ebea nɔ̄. “[Jɛhova] doo kɔ dɛ̄dɛɛ̄ be-nɔ a ɔp.” (Le-yɔɔ 46:9) Lo esuā kɛ̄ Bari edoo kɔ be-nɔ a ɔp doo, buū ekobee ue a kɔ “Peace on Earth—How Will It Come?”

•   Biīnɛ̄kɛ̄ le dogo lumiī. “Aāloo su kuma kɛ̄ le ekpo na [Jɛhova] agara wa dum a.” (Le-yɔɔ 72:14) Lo edābeeloo kɛ̄ pya nɛɛ edap nyaana pya pɔrɔ elap dogo ebiɛ̄a wa bu ama doo, buū pya ue a le kɛɛ̄ ekobee ue a kɔ “Breaking the Cycle of Hatred.”

•   Naɛbah. “[Jɛhova] ezuura nɛɛ a ɛrɛ ebɛɛ̄ lɛɛ sɔ̄ a ye to loo.” (Le-yɔɔ 72:12) Lo emuɛ kɛ̄ Bari elɛɛ pya nu a doo kɔ nɛɛ a dɔ bu naɛbah doo, buū ekobee ue a kɔ “Is a Fair Economic System Possible?”

•   Naɛ nuede. “Gbɛnɛ-edo kpakpaa le buɛ̄ a.” (Le-yɔɔ 72:16) Lo esuā kɛ̄ Bari edoo kɔ lɔgɔ nɛɛ aa le bu lɛɛraloo doo, buū ekobee ue a kɔ “A World Without Hunger?”

 Baibol dapge yerebah nɛ pya a le dee-tee ni?

 Aiī. Kaɛlɛɛ kɔ Baibol nɛ bɛābu akiiloo deesī pya a le dee-tee, a yerenage bah wa nɛ kɔ ba a dap tāma pya nu finiabah ba kpesī sɔ̄ ba le dee-tee.

 Daakuu Baibol: “Bui aa ɛrɛ etɛɛrɛloo bu ɛrɛgeba nu, mɛ bu dɛ̄dɛɛ̄ nu tɛ̄maloo yere kara le bara bara gbaāloo doo yaa, doolo Bari suā dɛ̄dɛɛ̄ nu bui bara. E efɛɛloo Bari, lo a eenyɔɔ dɛ̄dɛɛ̄ suānu, esere bui beenyiɛ le bui ekɛɛrɛ.”​—Pya Filipai 4:6, 7.

 Nu a kura: Bu ɛrɛgeba kɛ̄tɔɔ̄ o gbī oloo muɛ, bara Bari kɔ a nɛ a efɛɛloo beenyiɛ le ziīnɛloo. Buū ekobee ue a kɔ “Philippians 4:6, 7—‘Do Not Be Anxious About Anything.’”