Naa ɛp pio nu pya zaāsī yigabari ba siābee kɔ sa doo kumaloo nɔ̄ a gaa kiisī bie Ukraine ama:

•   “Nɛɛ a gaa zaāsī Russian Orthodox Church, lo a le Patriarch Kirill, sii kɔ lɔgɔ piya nu kumaloo nu Russia aa doo. . . . Ye Tɔbari kiisī lo ekɔgara esah ue kumaloo pya Ukraine, e Putin eyira nyɔɔ pio pya lo ue sa kɔ nu a gaa dooe naa bee piya.”—EUobserver, 7 biradee bu Taa Enɔɔ̄, 2022.

•   “Patriarch Kirill . . . kɔ ue leere nu Russia doo lo ebebe pima pya Ukraine, tɛ̄maloo sɔ̄ a kɔ be aa kiisī ama lu nu aa lu esu lɛmā pɔrɔ .”—AP News, 8 biradee bu Taa Enɔɔ̄, 2022.

•   “Nyɔɔ tua dee loo kaɛ, Nɛɛ zaāsī tɔbari Ukrainian Orthodox Church, lo a le Metropolitan Epiphanius I li Kyiv, bee yere kara bee pya wa nɛɛ ‘kɔ ba a bebe pima pya nɔ̄ Russia ba gaa yii wa buɛ̄’ . . . [A] bee kɔnage kɔ fɛfɛ pya nɔ̄ Russia naale pɔrɔ nu.”—Jerusalem Post, 16 biradee bu Taa Enɔɔ̄, 2022.

•   “Ili [lo a le Ukrainian Council of Churches and Religious Organizations (UCCRO)] yerekpotɛ̄ Pya Nɔ̄ Ukraine le dɛ̄dɛɛ̄ pya aa bebe bee i edo, i nɛ leelee wa epiaga lo ebebe bee Ukraine lɛɛbah ye nɛɛbaa, sa i yerenage wa kara bee.”—UCCRO a Statement, 24 biradee bu Baɛ Enɔɔ̄, 2022.

 Ena o kɛɛrɛ a? Ekɔ pya yigabari a kɔ ba gaa nyɔɔnɛe dumɛ Kraist eyerege mɛmloo pya wa nɛɛ kɔ ba a be nɔ̄ ni? Ena Baibol kɔ a?

Eloh kere pya yigabari kiiloo ue nɔ̄

 Eloh kere tɔgɛ kɔ pya yigabari yerekpotɛ̄ sa naa kɔ ue bege kii uwe benɔ̄, kerewo ba gaa doodoo bee ba gaa piigae lo esere efɛɛloo. Bu booboo lop zua akii adumɛ a, Pya Ekeebee Jɛhova eyerebah nɛ pya nɛɛ kɔ ba a muɛ kɔ dodoo wo tɔgɛ dogo baɛsī. Naa ɛp pio edoba alu ekɔ nu akiiloo bu pya i kpa.

•   Ekobee ue a kɔ “The Crusades—A ‘Tragic Illusion’” tɔgɛ kɔ pya tɔbari Roman Catholic na a bee le dumɛ gbɛnɛ fɛ nɛɛ a bee lu edoo bu dodoo bee ba gaa dooe nia Bari le Kraist a.

•   Ekobee ue a kɔ “The Catholic Church in Africa” baatɛ̄ kɛ̄ yigabari naa bee dap ɔbɛ fɛ nɛɛ le benɔ̄ a le yɛɛ baɛ buɛ̄ doo.

•   Pya ekobee ue a kɔ “Is Religion to Blame?,” “Religion’s Role in Man’s Wars,” le “Religion Takes Sides” baatɛ̄ kɛ̄ pya zaāsī yigabari Catholic, Orthodox, le Protestant bee yerekpotɛ̄ baɛ pya a gaa be ziī bu nɔ̄ doo.

Ekɔ pya yigabari alu Pya Nɛɛ Kraist eyerege kpotɛ̄ benɔ̄ ni?

 Nu Jizɔs bee tɔgɛ: “O wereloo o nɛɛ yɔrɔ le doodoo oloo loo.” (Matiu 22:39) “Wereloo pya bui dam baara.”—Matiu 5:44-47.

 Nu Jizɔs bee kɔ: “Mdaa Buɛ̄-mɛnɛ naa aa bu lo nyɔuwe ama, lo a le na buɛ̄-mɛnɛ bee aa bu lo nyɔuwe ama, pya na nɛɛ tam ebee bebe, lokwa a naa lu esu mɛ yere kɛ̄ bah pya Juu.” (Jɔn 18:36) “Dɛ̄dɛɛ̄ pya a su gɛ̄ nɔ̄ epe tɛ̄maloo gɛ̄ nɔ̄.”—Matiu 26:47-52.

 Naa kɛɛrɛ: Lo a le Pya Nɛɛ Kraist naa bee bebe bee Jizɔs lo ekpega ye, ekɔ a ɛrɛge ziī nu enua sa a bɔloo kɔ ba a bebe ni? Buū ekobee ue a kɔ “Is War Compatible With Christianity?” lokwa o muɛ kɛ̄ Pya Nɛɛ Kraist a bee le bu bagara sɔ̄ a bee bia bɔ ture nyiɛ loo sa nyɔɔnɛ edoba le tɔgɛnu Jizɔs doo.

Ena esiraloo pya yigabari a yerekpotɛ̄ benɔ̄ ani?

 Baibol tɔgɛ kɔ Bari kiī pya yigabari a kɔ ba gaa nyɔɔnɛe dumɛ Jizɔs, kerewo ba naa nyɔɔnɛ pya ye tɔgɛnu.—Matiu 7:21-23; Taitɔs 1:16.

•   Kpa Mumuuna tɔgɛ kɔ Bari ɛp kɔ miī “dɛ̄dɛɛ̄ pya a bee lu efɛ wa bu nyɔuwe ama” le bee pya yigabari a le doo wo. (Mumuuna 18:21, 24) Lo enɔ nu anua a le doo wo, buū ekobee ue a kɔ “What Is Babylon the Great?”

•   Jizɔs doo kɔ i suā kɔ dɛ̄dɛɛ̄ sīdee yigabari lo Bari kiī elu egbeesī nyɔɔ wa pɔrɔ tam, dookɛ̄ piya te a mum pɔrɔ bee wee lu “eku ye tɛrɛ kɛ̄ sa a lu etop ye tɛrɛ bu miā” doo. (Matiu 7:15-20) Lo esuā kɛ̄ lo ama esira doo, buū ekobee ue a kɔ “The End of False Religion Is Near!”

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images