•  Ue Nuūnabee 2

•  Pya Zɔ A Aabu Muɛ̄ Ue Bari 3-5

  •  Ekɔaue 3

  •  Nu A Kuī A Le Bu Baibol 4

  •  Buū Baibol 5

•  Su Oloo Nɛ Tam Zue-Ue 6-14

  •  Bɔātɛ̄ Kɔniā Ue 7

  •  Kiā Tura 8

  •  Zue-Ue 9

  •  Kɔ O Yira Siā 10

  •  Ekɔaue 11

  •  Nu A Le Bu 12

  •  Pya Kɛ̄tɔɔ̄ E Su Aābahloo 13

  •  Su Vidio Le Pya I Kpa Daānu 14

•  Tɔɔ̄dum Pya Nɛɛ Kraist 15-16

  •  Enɔānu Baibol Bu Bɔŋanaloo 16

•  Pya Ue Kɔ-Kpaɛ̄ 17

•  Ka’kaɛgɛ Le Zuurabahtɔ̄ 18

•  Sɔ̄ 19

•  Lu’lu Nɛɛ-kuūdɛɛ̄loo Sɛkiut 20

•  Kaɛ Ziī Asɛmbli Ale Kɔnvɛnsɔn 21

•  Kaɛ Doonu Nyɛŋiabu-Luh Jizɔs 22

•  Nɛɛ-kuūdɛɛ̄loo Enɔānu Tɔɔ̄dum Le Tam Zue Ue 23

•  Nɛɛbee-kasi Enɔānu Tɔɔ̄dum Le Tam Zue Ue 24

•  Nɛɛ A Nɛ̄ Zuurabahtɔ̄ Pya A Nɛ Ekɔaue 25

•  Eree Baɛ Kɛ̄ Enɔānu 26

•  Vidio 27

1. Pya zuurabahtɔ̄ a le bu lo kpa ama e yerebah nɛ dɛ̄dɛɛ̄ pya a ɛrɛ nu’edoo bu i Enɔānu Tɔɔ̄dum le Tam Zue Ue. Pya lo nɛɛ a tɛɛ̄nyɔɔ pya zuurabahtɔ̄ a kiiloo wa nu’edoo dookɛ̄ a lu e nɔɔ̄ doo bu Kpa Enɔānu Tɔɔ̄dum le Tam Zue Ue le bu lo ebakpa ama lɛɛ ba gae kpɛnaloo wa nu’edoo. A lu e kue dɛ̄dɛɛ̄ pya wuga kɔ ba a su loo wa nɛ lo e yere bee loo e ɛrɛ nu’edoo doodoo pya nɛɛ tɔkpa. Pya dɔɔ̄na a gaa gbaniāloo lo bɔŋanaloo kaāna dap ɛrɛ dɔ bu lo ale ba yira pya tɔgɛnu bu Baibol sa wa dum sunialoo daakuu pya nɛɛ Kraist. Nɛɛ-kuūdɛɛ̄loo Enɔānu Tɔɔ̄dum le Tam Zue Ue a nyɔɔnɛ ɛrɛgeba nɛɛ a naale nɛɛ lɛakpɛabah kɔnia pya nu a lu e gbi lo e yere bee sa a dookɔ lo nɛɛ a suā lo a nyim tura. Lo ama a lu e doo kɛ̄sī nɛɛ a gaa ye nyɔɔnɛ nɔ Baibol (ale kɛ̄sī ye tɛ ale ka a le bu kaka). Pya nu a lu e gbī aābah pya lɛakpɛabah a sii liamaā na a lunage e gbī wa aābah a.—od 8 ekobee, 8 baraloo.

2. Ziī minit. Ziī ziī kaɛ, sɔ̄ ae lua e uɛ yɔɔ e kpaāna sa yere kara, nɛɛbee-kasi Enɔānu Tɔɔ̄dum le Tam Zue Ue e danā i taɛ lɛɛ kɛ̄ kumaloo lo doonu lo a e nyɔɔnɛtɛ̄. Lo Nɛɛbee-kasi e sere ekɛɛrɛ nyɔɔ pya kpog-bee nu e dɔ biī nɛ bɔŋanaloo eera.

 3. Ekɔaue: Lop minit. Lo ekobee-ue le etaā-ue ziī ale baɛ pya nwigbagbara ekobee-ue a ye yerekpotɛ̄ lu e’ɛm sere bu Kpa Enɔānu Tɔɔ̄dum Le Tam Zue Ue. Lo ekɔaue ama a lu e nɛ ziī nɛɛ kanɛɛ ale nɛɛ yerebah-tam a nyim tura. Sɔ̄ ziī aā kpa a le bu Baibol e lua e nɔɔ̄ sere nua kɛ̄dɔ Baibol ae lu e buū bu lo kaɛ, ziī vidio e lu ebira lo e nuūnabee lo kpa. Lo nɛɛ a gaa nɛ ekɔaue dap kɔ pio nu a le bu lo vidio a ɛrɛ nu edoo kiiloo lo ekobee ue a gaa kɔ ue nyɔɔ. Kerewo, a muɛ̄suākɔ a kɔ ue nyɔɔ dɛ̄dɛɛ̄ kpog-bee ue a lu e nɔɔ̄ sere bu lo kpa enɔānu. Gbaāloowo, dookɛ̄ sɔ̄ ye le bah doo, a kɔ ue nyɔɔ foto a nyɔɔnɛ, lo a lu etɔ̄ lokwa a kɔ mmɛnɛ dɛɛ̄ lo ekɔaue. A dap nage yere pya dɔɔ̄na ue ae luanage e’ɛm serekɛ̄, legebah kɔ e yerebah lo e kɔ siŋana pya kpog-bee nu a le bu lo kpa ekɔa-ue.

 4. Nu A Kuī A Le Bu Baibol: Lop minit. Lo ama lu gah ebip-le-ture lo a naa ɛrɛ nuūnabee ale kɔ-kpaɛ̄. A lu e aabahloo tɛ̄mabah ziī nɛɛ kanɛɛ ale nɛɛ yerebah-tam a nyim tura. Lo wuga nɛɛdam a bip baɛ lo ebip pya a le kɛ̄. Gbaāloowo, a dap biaɛfii lo ale ae lu e buū pya dɔ kpakaɛ a le bu ale a naale e lu e buū. Pya a agara pya lo ebip a su yira 30 sɛkon ale a kiikɛ̄ eewo agara.

 5. Buū Baibol: Niā minit. Lo nu’edoo bah nɛɛ tɔkpa ama a lu e aabahloo tɛ̄mabah ziī wuga nɛɛdam. Lo wuga e buū lo kɛ̄dɔ̄ sa a naale e nuūnabee ale kɔ kpaɛ̄. Nɛɛbee-kasi lo enɔ̄anu e ture ekɛɛrɛ kaāna nyɔɔ ye’yerebah nɛ pya lo wuga lo e buū nu leere, dābeeloo, buūnu ɔgɛrɛ-bu, kɔ siŋbah-dɛɛ̄ kpog-bee ue, nyaāna muɛ̄, yi’yira kina kɛ̄ a bɔloo e doowo lɛɛ o gae kiisī, le kɔ ue taɛ sīdee lo nɛɛ wee kɔ ue doo. Kumasɔ̄ pio kɛ̄dɔ e buū bu Baibol kpugia sa pio aba nyɔɔ a, lo nɛɛ a kuūdɛɛ̄loo Enɔānu Tɔɔ̄dum Le Tam Zue Ue a kɛɛrɛbu kɛ̄ ziī ziī nɛɛ para e buū nu doo sɔ̄ a gaa nɛ pya lo nu’edoo ama.

6. Lop le o’oo minit. Lo gah enɔānu lu e nɔɔ̄ lo e nɛ dee dɛ̄dɛɛ nɛɛ kɔ ba a kpɛ̄naloo zue-ue le lo e yereloo i kari kɛ̄ e zue ue sa tɔgɛnu doo. Dookɛ̄ a bɔloo doo, pya kanɛɛ dap ɛrɛ nu’edoo bu enɔānu tɔkpa. Pio sɔ̄, dap lu e nɔɔ kɔ alu e kɔniaue nyɔɔ ziī vidio lo a naale vidio edoba kɛ̄ e zue ue doo. Ziī ziī nɛɛ tɔkpa a sitam nyɔɔ kpog-bee nu’enɔ aā bu nwiekpokpa Tɔgɛnu ale Wereloo Pya Nɛɛ a lu e’ɛm baraloo lo nu’edoo bu brakɛt bu Kpa Enɔānu Tɔɔ̄dum Le Tam Zue Ue. Pio sɔ̄, dap lu e nɔɔ ziī gah nu’edoo a bu lo kɛ̄dɔ ama kɔ a lu e aabaloo doodoo gbaa-kɔnia. Dua lo nu’edoo ama a lu e aabahloo tɛ̄mabah ziī nɛɛ kanɛɛ ale nɛɛ yerebah-tam a nyim tura.—Ɛp  15 baraloo kiiloo kɛ̄ e aabahloo pya nu’edoo a gbī gbaa-kɔnia.

7. Bɔātɛ̄ Kɔniā Ue Lo nu’edoo bah nɛɛ tɔkpa ama dap lu e aabahloo tɛmabah ziī nɛɛdam ale nɛɛwa. Lo nɛɛ a ye nyɔɔnɛ doo a lu ɛŋiā nɛɛdam ale nɛɛwa ale ziī nɛɛ bu ye tɔ. Lo nɛɛ tɔkpa le nɛɛ a gaa ye nyɔɔnɛ doo dap ɛŋɛtɛ̄kɛ̄ ale ba e yira-ya.—Lo e ɛrɛ pya dɔɔ̄na ue akiiloo nu a le bu le pya kɛ̄tɔɔ̄ e su aābahloo lo nu’edoo ama, ɛp  12 le  13 baraloo.

 8. Kiā Tura: Lo nu’edoo bah nɛɛ tɔkpa ama dap lu e aabahloo tɛmabah ziī nɛɛdam ale nɛɛwa. Nɛɛ a ye nyɔɔnɛ doo a lu ɛŋiā nɛɛdam ale nɛɛwa. (km 5/97 p. 2) Lo nɛɛ tɔkpa le nɛɛ a gaa ye nyɔɔnɛ doo dap ɛŋɛtɛ̄kɛ̄ ale ba e yira-ya. Lo nɛɛ tɔkpa a tɔgɛsiā nu e kɔ sɔ̄ a gaa lu e kiā tura sɔh a bee lu e kɔniā sɔ̄ a kii a dumɛ.—Lo e ɛrɛ pya dɔɔ̄na ue akiiloo nu a le bu le pya kɛ̄tɔɔ̄ e su aābahloo lo nu’edoo ama, ɛp  12 le  13 baraloo

 9. Zue-Ue: Lo nu’edoo bah nɛɛ tɔkpa ama dap lu e aabahloo tɛmabah ziī nɛɛdam ale nɛɛwa.Nɛɛ a ye nyɔɔnɛ doo a lu ɛŋiā nɛɛdam ale nɛɛwa. (km 5/97 p. 2) Lo nɛɛ tɔkpa le nɛɛ a gaa ye nyɔɔnɛ doo dap ɛŋɛtɛ̄kɛ̄ ale ba e yira-ya. Lo gah ama a tɔgɛsiā ziī sɔ̄dɔ enɔānu Baibol a gaa kiisī. Lɔgɔ ebɛɛ̄ naale lo e nuūnabee ale e kɔ kpaɛ̄ lo ale lo nɛɛ tɔkpa naa gaa sitam nyɔɔ ziī yɛɛ pya lo nu’enɔ ama. A naa lu ebɛɛ̄ e buū dɛ̄dɛɛ̄ lo kɛ̄dɔ a bee lu e nɛ siā ee, keresɔ̄ lo ama dap lu e doo.

 10. Kɔ O Yira Siā: Sɔ̄ a lu e nɔɔ̄ kɔ a lu e nɛ nuā ekɔaue, lo nu’edoo bah nɛɛ tɔkpa ama a lu e aabahloo tɛmabah nɛɛ tɔkpa a lu nɛɛdam. Sɔ̄ a lu e nɔɔ̄ kɔ a lu e nɛ nuā edoba nu e’ɛp, a dap lu e aabahloo tɛmabah nɛɛ tɔkpa a lu nɛɛdam ale nɛɛwa. Nɛɛ a ye nyɔɔnɛ doo a lu ɛŋiā nɛɛdam ale nɛɛwa ale ziī nɛɛ bu ye tɔ. Lo nɛɛ tɔkpa a kɔsiā ture ebip a le loo lo ekobee ue bu sīdee a lera sa aara kari aāloo ue a le bu i kpa a lu e’ɛm sere loo. Lo nɛɛ tɔkpa dap biaɛfii lo e tubemuɛ̄loo lo kpa a lu e ɛrɛ ye ue aā ale a naale e doo wo.

 11. Ekɔaue: Lo nu’edoo bah nɛɛ tɔkpa ama a lu e aabahloo tɛ̄mabah ziī wuga nɛɛdam sa a lu e nɛ doodoo ekɔaue bu bɔŋanaloo. Sɔ̄ lo ekɔaue dɛɛanyɔɔ ziī kpogkɛ̄ a aa bu 1 kɛ̄ a baatɛ̄ nū loo nwiekpokpa Wereloo Pya Nɛɛ, lo nɛɛ tɔkpa a daamuɛ̄loo kɛ̄ (pya) lo baraloo kpa dap lu e su daā nu bu esiatam doo. Doodoo edobah, a dap kɔ baatɛ̄ kɛ̄ lo baraloo kpa dap lu e su daānu doo, nu lo baraloo kura, le kɛ̄ e nyɔɔnɛ nɛɛ ɛrɛ ekɛɛrɛ nyɔɔ doo. Sɔ̄ lo ekɔaue dɛɛanyɔɔ ziī kpogkɛ̄ a aa bu ziī nu’enɔ bu nwiekpokpa Wereloo Pya Nɛɛ, lo nɛɛ tɔkpa a sere ekɛɛrɛ nyɔɔ kɛ̄ e su lo kpogkɛ̄ daānu bu esiatam zue-ue doo. A dap tubemuɛ̄loo edobah a lu e tɔgɛ 1 kpogkɛ̄ loo lo nu’enɔ ale a e daamuɛ̄loo ɛrɛgeba ziī pya baraloo a kɔ gbaāloo a le bu lo nu’enɔ, lo a e yerebah ye nɛ.

   12. Nu a le Bu: Pya nu a le bu lo baraloo ama le lo a nyɔɔnɛ kiiloo nu’edoo “Bɔātɛ̄ Kɔnia Ue” le “Kiā Tura”. Etaāgebee a lu e sikɛ̄ nyaāna, nu a le kɛ̄sī nɛɛ tɔkpa na lo e poniā ziī kaka ale bu Baibol a waɛ e dābeeloo a suniā loo kɛ̄tɔɔ̄ nɛɛ a gaa nyɔɔnɛ kɔnia ue le lo e kwakɛ̄ loo gbaa kɔnia ue sɔ̄ a gaa lu sī. Lo nɛɛ tɔkpa a sagɛ ekobee-ue a bɔloo-sɔ̄ sa dɔbiī lo sīloo. A dap biaɛfii naɛ e bɔātɛ̄ e tɔgɛ ziī i kpa ale vidio aā bu i Ekpotam Tɔgɛnu ale a naale e doowo. Taā a lu e doo nu e’ɛp a bee lu e nɔ̄ aā ekobee, nɛɛ tɔkpa a nɔ̄ sa tɛɛ̄nyɔɔ pya kari kɔnia-ue, doodoo tɔgɛ niā loo pya nɛɛ le tɔgɛ nu bu sīdee a lee.

   13. Pya Kɛ̄tɔɔ̄ E Su Aābahloo: Nɛɛ tɔkpa a su kɛ̄tɔɔ̄ e su aābahloo a lu e nɛ ye kɔ a sitam nyɔɔ daānu bu sīdee a suniāloo kɛ̄tɔɔ pya lo sīloo. Doodoo nu edobah:

1.   (1) Aa Ziī Tɔ Yii Ziī: Lo kɛ̄tɔɔ̄ ama ɛrɛ nage zue-ue aā ziī tɔ yii ziī—dap lu sī-le-sī, tɛmaloo fon, ale tɛmaloo lɛta—le kiā tura sɔh a bee lu e nyɔɔnɛ ziī nɛɛ kɔnia tua sɔ̄ bu esiatam zue-ue aā ziī tɔ yii ziī.

2.  (2) Zue Ue Sɔ̄ Oo Ɛmadɛɛ̄: Lo kɛ̄tɔɔ̄ ama tɔgɛ siā kɛ̄ e su sɔ̄ a kpaā sa kiira kunɛ̄ ekɔasɔh zuema ue doo. A dap lu bee a lu e nyɔɔnɛ pya o zɔŋiā kɛ̄tam, tɔkpa, kɛ̄ bui tɔɔ̄, bu fah-biibii ɔma dee, ale ɛrɛgeba dɔɔ̄na kɛ̄ sɔ̄ nɛɛ gaa doo pya biibii zii ziī biradee, ponia ziī ekɛɛrɛ aā bu Kpakaɛ.

3.  (3) Zue-ue Taɛyɛɛkɛ̄: Lo kɛ̄tɔɔ̄ ama dap ɛrɛ zue-ue tɛmaloo kart, kɔ ue nɛ pya nɛɛ a le kɛ̄dɔ uradu, zue-ue nyɔɔ-kɛ̄dee, ale zue-ue kɛ̄ nɔɔ̄ fah, kɛ̄ kpogeloo fah sere bu nwikeresɔ̄, ale ɛrɛgeba kɛ̄ nɛɛ dap lu e muɛ̄.

14. Su Vidio Le Pya I Kpa Daānu: Dɛɛanyɔɔ kɛ̄ kɛ̄tɔɔ̄ le doo, nɛɛ tɔkpa dap biaɛfii lo e tɔgɛ vidio ale i kpa. Lo nu’edoo bah nɛɛ tɔkpa ɛrɛ vidio ale lo nɛɛ tɔkpa sagɛ lo e tɔgɛ ziī aba, a nuũnabee vidio sa kɔ ue nyɔɔ mɛ a naale e bira ye.

 15. Sɔ̄ ae lua e uɛ ziī yɔɔ sa, 15 minit a nyɔɔnɛ lo kɛ̄dɔ ama e ɛrɛ ziī ale baɛ gah a lu e nɔɔ̄ loo e yerebah nɛ pya a le kɛ̄ kɔ ba a su Muɛ̄-ue Bari yere bu wa dum. Etaāgebee a lu e nɛ dɔɔ̄na tɔgɛdee kumaloo, pya lo gah enɔānu ama dap lu e nɛ pya kanɛɛ ale pya yerebah-tam a nyim tura, mɛ a naale e lu e nɛ pya yerebah-tam lo gah enɔānu ebɛɛ̄ a le bu bɔŋanaloo, lo a e lu e aabahloo tɛmabah nɛɛ kanɛɛ. Sɔ̄ ziī gah lu e nɔɔ̄ nua gbaa kɔnia-ue, nɛɛ a aabahloo dap bip ebip dɛ̄dɛɛ̄sɔ̄ bu lo gah gbaānageloo pya lo ebip a lu e’ɛm serekɛ̄. A kpuree ye ue nuũnabee lo e nɛ kaāna sɔ̄ e kɔ siā pya kpog-bee nu a lu gbɛnɛ a le bu sa nɛ dee pya a le kɛ̄ lo e gbaa kɔniā. Lo ale bip-ue aā nu nɛɛ le loo, e lee kɔ nɛɛ a gaa lu e bip ue a kɔ ue aā nyɔɔ platfɔm, naale aā kɛ̄ a ɛŋɛ̄tɛ̄, lo a waɛ doo wo.

 16. Enɔānu Baibol Bu Bɔŋanaloo: Tup-le-lop minit. Lo gah enɔānu ama a lu e nɛ nɛɛ kanɛɛ a nyim tura. (Kɛ̄ buā pya kanɛɛ lu nwiepoo, dap lu e nɛ pya yerebah-tam a nyim tura.) Eku pya kanɛɛ a biaɛfii pya nɛɛ a nyim tura loo e sere Enɔānu Baibol bu Bɔŋanaloo. Pya a lu e tubebahloo ɛrɛ e aabahloo bu sīdee a dɔbiī lokwa a naa lu e de sɔ̄, ba a kɔ siŋanā dɔh kpakaɛ a lu ebɛɛ̄, sa yerebah nɛ dɛ̄dɛɛ̄ nɛɛ kɔ ba a tɔgɛ niā kumaloo biī a le bu kpogkɛ̄ a gaa lu e nɔ̄. Pya a lu e nɛ lo nu’edoo e ɛrɛ biī āaloo e tɛɛ̄nyɔɔ tɔgɛdee a lu e’ɛm serekɛ̄ kiiloo kɛ̄ e aabahloo pya gah enɔānu a ɛrɛ ebip-le-ture. (w23.04 24 naɛ̄sī, ekpo) Sɔ̄ a e lua e aabahloo dɔkɛ̄ enɔānu bu lo kaɛ leere sa, lɔgɔ ebɛɛ̄ naale loo e nyɔɔnɛ lo enɔānu. A dap sagɛ lo e aaloo e buū pio baraloo.

 17. Taa minit. Nɛɛbee-kasi Enɔānu Tɔɔdum le Tam Zue Ue e tɛɛ̄nyɔɔ pya kpog-bee nu a dɔbiī eera aā bu lo enɔānu. ɛ̄ tɛɛ̄ nage nyɔɔ nu a gaale e lu e doo lo kaɛ a za nyɔɔnɛ. A dap kue bee pya nɛɛ a ɛrɛ nu e doo bu lo kaɛ a za nyɔɔnɛ, lo ale sɔ̄ le lo e doo wo. Etaāgebee a lu e nɛ dɔɔ̄na tɔgɛdee kumaloo, ɛrɛgeba nɛ-muɛ̄ a bɔloo ale ɛrɛgeba pya kpa lɛta a bɔloo dap lu e buū tɛmabah nɛɛbee-kasi sɔ̄ a gaa kɔ pya ye ue kɔ kpaɛ̄. Pya ue a kiiloo nu i wee doo dɛ̄dɛɛ̄ sɔ̄, doodoo pya nɔɔ̄nu akiiloo esiatam zue-ue le pya nɔɔ̄nu a kiiloo kwakɛ̄, naale e lu e nɛ doodoo nɛ-muɛ̄ aā nyɔɔ platfɔm mɛ a lu e sere nyɔɔ daɛ̄ kɛ̄ ɛrɛ ue aā. Lo kuma sɔ̄ a le nɛ kɔ kpaɛ̄ naale e dap toora pio nɛ-muɛ ale buū pya kpa lɛta, lo nɛɛbee-kasi a kɔ nɛ pya wuga nɛɛdam ba ɛrɛ nu’edoo bu gah enɔānu Tɔɔ̄dum Doodoo Pya Nɛɛ Kraist kɔ ba a doo-kpuree wa nu’edoo dookɛ̄ ebɛɛ̄ le doo (Ɛp   16 baraloo le  19.) Lo enɔānu e ina kuma tɛmaloo yɔɔ le kara.

 18. Sɔ̄ ziī ziī nɛɛ tɔkpa e saa nu’edoo, nɛɛbee-kasi Enɔānu Tɔɔ̄dum le Tam Zue Ue ɛrɛ nu a dap ina ziī minit ae su nɛā ka’kaɛgɛ le zuurabahtɔ̄ dɛɛanyɔɔ kɛ̄dɔ nu’enɔ a lu e nɛ. Sɔ̄ nɛɛbee-kasi gaa kue nɛɛ a ɛrɛ nu’edoo kɔ a bɔātɛ̄, a naale e kɔ nu’enɔ a gaa sitam nyɔɔ. Kerewo, sɔ̄ lo nɛɛ a ɛrɛ nu’edoo e saa, sa ae kaɛge ye kina doo kɛ̄ a bɔloo doo, nɛɛbee-kasi dap kɔsiā ye nu a gaa sitam nyɔɔ sa kɔ nu a nua a kɔ a doo leere nyɔɔ lo gah-ue ale ae su fɛgɛ sa kɔ baatɛ̄ nu a nua le sīdee lo nɛɛ e sikɛ̄ sitam nyɔɔ taɛ lo kpog-bee nu. Lo nɛɛbee-kasi dap nage kɔ ue kiiloo pya dɔɔ̄na gah lo nu’edoo lo a le a kɛɛrɛ kɔ ae dɔbiī nɛ lo nɛɛ-tɔkpa ale pya a le kɛ̄. Pya dɔɔ̄na zuurabahtɔ̄ a dɛɛanyɔɔ nwiekpokpa Wereloo Pya Nɛɛ, nwiekpokpa Tɔgɛnu, ale kpa Ministry School dap lu e nɛ sī-le-sī sɔ̄ enɔānu e kpɛ̄na ale dɔɔ̄na sɔ̄, nyɔɔ lo kɛ̄dɔ nu’enɔ ale dɔɔ̄na nu’enɔ.—Lo e ɛrɛ pya dɔɔ̄na ue kiiloo dɔtam nɛɛbee-kasi Enɔānu Tɔɔ̄dum le Tam Zue Ue le nɛɛ nɛ zuurabahtɔ̄ pya a nɛ ekɔaue, ɛp  19,  24, le  25 baraloo.

 19. Lɔgɔ gah naa ɛrɛ e yee nyɔɔ ye sɔ̄, ale ekpuru ekɔaue nɛɛ-beekasi Enɔānu Tɔɔ̄dum le Tam Zue Ue. Kereadoo Kpa Enɔānu Tɔɔ̄dum le Tam Zue Ue nɔɔ̄ sɔ̄ sere nɛ ziī ziī gah, lo e lua e kɔ nu a lu e’ɛm serekɛ̄ loo lo nu’edoo sa, lɔgɔ ebɛɛ̄ naale loo e yere pya dɔɔ̄na ue loo lokwa a aadee su sɔ̄ a bee lu e nɔɔ̄ sere loo. Lo pio gah yee sɔ̄ a lu e sere nɛ, a lu e nɛ zuurabahtɔ̄ tɛmabah neebeekasi Enɔānu Tɔɔ̄dum le Tam Zue Ue ale Nɛɛ A Nɛ Zuurabahtɔ̄ Pya A Nɛ Ekɔaue. (Ɛp  24 le  25 baraloo.) Dɛ̄dɛɛ̄ lo enɔānu, gbaāloo pya yɔɔ le kara, a su 1 hour le 45 minit.

 20. Sɔ̄ lo bɔŋanaloo ɛrɛ lu’lu nɛɛ-kuūdɛɛ̄loo sɛkiut, lo enɔānu a kiisī dookɛ̄ a lu enɔɔ serekɛ̄ bu Kpa Enɔānu Tɔɔ̄dum le Tam Zue Ue kaɛlɛɛ pya lo gah ama: Lo gah Enɔ̄anu Baibol bu Bɔŋanaloo a le lo kɛ̄dɔ Tɔɔ̄dum Pya Nɛɛkraist a lu e nyaana sa ɛrɛ ziī ekɔaue esiatam ae lu e nɛ bu 30 minit tɛ̄mabah nɛɛ-kuūdɛɛ̄loo sɛkiut. Lɛɛ a gae lu e nɛ lo ekɔaue esiatam, nɛɛbee-kasi Enɔānu Tɔɔ̄dum Le Tam Zue Ue e dasī tɛɛ̄nyɔɔ pya nu ae lua e nɔ bu lo enɔānu, daamuɛ̄loo nu e lu e nɔ bu lo kaɛ a za nyɔɔnɛ, kɔ ɛrɛgeba nɛ-muɛ̄ a bɔloo, buū ɛrɛgeba kpa-lɛta a lu ebɛɛ̄, sa a kue nɛɛ-kuūdɛɛ̄loo sɛkiut. Sɔ̄ ae saa ye ekɔaue esiatam, nɛɛ-kuūdɛɛ̄loo sɛkiut e kpaɛ̄ lo enɔānu tɛmaloo yɔɔ a sagɛ. A dap kue dɔɔ̄na nɛɛ wuga nɛɛdam kɔ a su kara kpaɛ̄ma. Sɔ̄ ae lua e nɛ lo ekɔaue esiatam sa, nɛɛ-kuūdɛɛ̄loo sɛkiut e su lo enɔānu mmɛ kumā tɛmaloo ɛrɛgeba yɔɔ a sagɛ. A dap kue dɔɔ̄na wuga nɛɛdam kɔ a yerekara kpɛma. Lɔgɔ dɔɔ̄na enɔānu tɔkpa bu nwitɛm bu muɛ̄’ue lo bɔŋanalo aa lu e ɛrɛ sɔ̄ lu’lu nɛɛ-kuūdɛɛ̄loo sɛkiut. Ziī eku a gbaaloo bɔŋanaloo dap ɛrɛ wa enɔānu kere sɔ̄ nɛɛ-kuūdɛɛ̄loo sɛkiut gaa lu lo bɔŋanaloo lo eku le loo. Kerewo, lo eku a obia gbaaloo lo bɔŋanaloo sɔ̄ nɛɛ-kuūdɛɛ̄loo sɛkiut gaa nɛ ye ekɔaue esiatam.

 21. Bu kaɛ ziī asɛmbli ale kɔnvɛnsɔn le kɛ̄, lɔgɔ enɔānu bɔŋanaloo naale e lu e ɛrɛ. A lu e nɛ nu-nyɛŋiabu bɔŋanaloo kɔ pya nu a bee lu e nɔɔ̄ serekɛ̄ loo lo enɔānu bu pya lo kaɛ a lu e aabahloo tɛmabah ziī ziī nɛɛ ale butɔ.

 22. Sɔ̄ lo Doonu Nyɛŋiabu-luh Jizɔs dɔ nyɔɔ ziī biradee taɛyɛɛkaɛ a naale ta-kaɛ, lɔgɔ Enɔānu Tɔɔ̄dum le Tam Zue Ue naale e lu e nɔɔ̄.

 23. Ziī nɛɛ kanɛɛ a lu e sagɛ tɛmabah pya kanɛɛ e sitam doodoo nɛɛ-kuūdɛɛ̄loo Enɔānu Tɔɔ̄dum Le Tam Zue Ue. A lu ye totam lo e muɛ̄suākɔ lo enɔānu lu e nɔɔ̄ bɔŋɛnɛbee leere sa lu e aabahloo nyɔɔnɛ kɛ̄ zuurabahtɔ̄ kɔ doo. A ɛrɛ e nyɔɔnɛ nɛɛ a nɛ zuurabahtɔ̄ pya a nɛ ekɔaue ɛrɛ kuūnɛmuɛ̄. Abasɔ̄ Kpa Enɔānu Tɔɔ̄dum le Tam Zue Ue e lua e ɛrɛ, nɛɛ kuūdɛɛ̄loo Enɔānu Tɔɔ̄dum le Tam Zue Ue e nɛ dɛ̄dɛɛ̄ nu’edoo lo gah enɔānu taɛyɛɛkaɛ bu lo baɛ enɔɔ̄. Lo ama gbaanāgeloo gah a naa lu e doo tɛmabah pya nɛɛ tɔkpa, le pya e lu e tubebahloo nua nɛɛbee-kasi enɔānu taɛyɛɛkaɛ aā yɛɛ pya eku pya kanɛɛ e bee gbaa yira, gbaānageloo nu’edoo tɛmabah pya nɛɛ tɔkpa. (Ɛp  3-16 le  24 baraloo.) Sɔ̄ a gaa nɛ nu’edoo pya nɛɛ tɔkpa, a kɛɛrɛbu wa zua, nu ba e tɛ̄nabu, le lo ale ba e dapge kɔ ue nyɔɔ taɛ lo ekobee ue sa pya nɛɛ e lgbaɛ̄tɔ̄ leere dɛɛa nyɔɔ wa dogo. A sunage lo dua buābee ama biaɛma sɔ̄ a gaa nɛ pya lo dɔɔ̄na gah nu’edoo bu lo enɔānu. Ziī ziī lo nu’edoo a lu e nɛ pya a e doo nu a naa kiikɛ̄ ee taa kaɛ lɛɛ dee lo nu’edoo ae ina. Lo nwiɛpɛɛkpa Our Christian Life and Ministry Meeting Assignment (S-89) a lu e su nɛa pya lo nu’edoo a le nɛ pya nɛɛ tɔkpa. Nɛɛ a Kuūdɛɛ̄loo Enɔānu Tɔɔ̄dum le Tam Zue Ue a muɛ̄suākɔ kpa nɔɔ̄nu a tɔgɛ pya a ɛrɛ nu’edoo lu e kah nyɔɔ daɛ̄ ɛrɛ ue aā. Eku pya kanɛɛ dap tubebahloo dɔɔ̄na nɛɛ kanɛɛ ale ziī nɛɛ yerebah-tam kɔ a yerebah ye nɛ. Kerewo, aba pya kanɛɛ na a e lu esu nɛā nu edoo gah a naale lo pya nɛɛ tɔkpa a.

 24. Ziī ziī kaɛ, ziī nɛɛ kanɛɛ e lu nɛɛbee-kasi bu Enɔānu Tɔɔ̄dum le Tam Zue Ue. (Kɛ̄ buā pya kanɛɛ lu epoo, pya yerebah-tam a nyim tura dap lu e tubebahloo doo kɛ̄ ebɛɛ̄ le doo.) A lu ye totam lo e kpɛnaloo pya ue nuūnabɛɛ le ue kɔ-kpaɛ̄. A gae nuūna nage bee dɛ̄dɛɛ̄ gah, sa dɛɛanyɔɔ buā pya kanɛɛ, a dap aanāge bahloo dɔɔ̄na gah loo lo enɔānu, eetɔɔ̄ na gah a gbī tɔgɛ vidio sa lɔgɔ pya dɔɔ̄na ekɔaue naa nyɔɔnɛ. Pya ue a kɔ yɛɛ ziī ziī ekɔaue a lu ekpuru. Eku pya kanɛɛ e biaɛfii pya kanɛɛ a nyim tura loo lo totam ama. Pya kanɛɛ a nyim tura a lu e su wa nua pya neebee-kasi ziī ziī kaɛ. Dɛɛanyɔɔ kɛ̄tɔɔ̄ a i le kɛ̄bah, lo nɛɛ a kuūdɛɛ̄loo Enɔānu Tɔɔ̄dum le Tam Zue Ue dap lu e su nuā nɛɛbee-kasi gbɛnɛedo sɔ̄ ee pya dɔɔ̄na kanɛɛ a nyim tura. Lo ziī nɛɛ kanɛɛ nyim tura lo e aabahloo Enɔānu Baibol bu Bɔŋanaloo, a dap lu kɔ a e nyim tura lo e lu nɛɛbee-kasi enɔānu. Kerewo, soosoo, seea nyiɛ̄ kɔ nɛɛ kanɛɛ a nyim tura lo e lu nɛɛbee-kasi lu e gbī ye bah kɔ a yerebah nɛ sa kaɛgɛ bu sīdee wereloo, sa, doo kɛ̄ ebɛɛ̄ le doo, nɛ tum pya nɛɛ tɔkpa a ɛrɛ nu’edoo. Lo nɛɛbee-kasi Enɔānu Tɔɔ̄dum Le Tam Zue Ue a muɛ̄suākɔ lo enɔānu lu e kpaɛ̄ bu nyɔɔ sɔ̄. (Ɛp  17 le  19 baraloo.) Lo nɛɛbee-kasi gbī doowo sa dee a bɛɛaloo le, a dap lu e sere ziī dɔɔna nu kɔ ue tɛmabu nyɔɔ platfɔm lokwa a dap kue lo nɛɛ a ɛrɛ nu’edoo a nyɔɔnɛtɛ̄ ziī kumasɔ̄ lo nɛɛdam a ɛrɛ ye gah ekɔaue gaa su ye dɔ nyɔɔ kpokɛ̄ kɔ ue aā. Bu aba lo sīdee ama, nɛɛbee-kasi dap sagɛ lo e ɛŋɛtɛ̄kɛ̄ nyɔɔ kasi a le nyɔɔ platfɔm sɔ̄ nɛɛ a ɛrɛ buū Baibol gaa doo wo le lo gah Enɔānu Su Oloo Nɛ Tam Zue Ue. Lo ama e kpooge sɔ̄.

 25. Ɛrɛgebah sɔ̄ a waɛ, a lee e su nɛɛ kanɛɛ a para kaāna nɛa ekɔaue lo e aara lo totam ama. To-tam a le bee nɛɛ a nɛ zuurabahtɔ̄ pya a nɛ ekɔaue na lo e nɛ zuurabahtɔ̄ pya kanɛɛ le pya Yerebah-tam kiiloo ɛrɛgeba nu’edoo a lu ekɔaue lo ba aabahloo bu sīdee lɔgɔ dɔɔ̄na nɛɛ naale e dā nu a gaa kɔ, gbaānageloo gah nu’edoo bu Enɔānu Tɔɔdum le Tam Zue Ue, pya ekɔaue taɛyɛɛkɛ̄, se’sere le bu’buū enɔānu Tɔ Baɛloo ale Enɔānu Baibol bu Bɔŋanaloo, lo a lu ebɛɛ̄. (Ɛp  19 baraloo.) Lo a le lesɔ̄bah buā pya kanɛɛ le bu bɔŋanaloo a para nɛ ekɔaue sa tɔgɛnu, lo sɔ̄, bu ziī ziī zua, keekee pya nɛɛ kanɛɛ a nyim tura dap lu nɛɛ a nɛ zuurabahtɔ̄ pya a nɛ ekɔaue. Naā lu ebɛɛ̄ kɔ nɛɛ a nɛ zuurabahtɔ̄ pya a ɛrɛ ekɔaue a nɛ zuurabahtɔ̄ dɛ̄dɛɛ̄ sɔ̄ nɛɛ ɛrɛ nu’edoo e saa.

 26. Dɛɛanyɔɔ buā pya nɛɛ tɔkpa, bɔŋanaloo dap ɛrɛ eree baɛ kɛ̄ nɔnu lo e aabahloo pya nu’edoo bu enɔānu tɔkpa. Ziī ziī lo eree baɛ kɛ̄ nɔnu ama ɛrɛ e ɛrɛ ziī dɔɔna nɛɛ nɛ zuurabahtɔ̄, e lee eera lo a lu nɛɛ kanɛɛ. Sɔ̄ a lu ebɛɛ̄, ziī nɛɛ yerebah-tam a nyim tura kaanā dap lu e nɛ lo dɔtam. Eku pya kanɛɛ a tubebahloo nɛɛ ae lu e nɛ lo dɔtam ama, le naɛ e lu e nyaanā nɛɛ loo lo dɔtam ziī ziī sɔ̄. Lo nɛɛ nɛ zuurabatɔ̄ a nyɔɔnɛ pya tɔgɛdee a lu e nɔɔ̄ sere  18 baraloo. Lo a le a lu e sere enɔānu bu eree baɛ kɛ̄ nɔnu, pya nɛɛ tɔkpa a lu e kɔ ba a kii bu eree baɛ kɛ̄ nɔnu sɔ̄ ae lua edoo lo gah Nu A Kuī A Le Bu Baibol kɛɛ̄ lo gah enɔānu Pya Zɔ A Aabu Muɛ̄-Ue Bari. Ba a obia sikɛ̄ gbaaloo dɛ̄dɛɛ̄ bɔŋanaloo sɔ̄ kpɛdumɛ̄ nɛɛ tɔkpa e saa ye nu’edoo bu lo enɔānu.

 27. Pio vidio a lu e’sagɛ e lu e su daānu bu lo enɔānu ama. Pya vidio lo enɔānu taɛyɛɛkaɛ e le kɛ̄ bu nutam JW Library^® sa a dap lu e ɛrɛ tɛ̄maloo keekee fon ale kɔmputa.

© 2023 Watch Tower Bible and Tract Society of Pennsylvania

S-38-OG 11/23