•  Ẹmro Ọtonrhọ 2

•  Efe ri nẹ Ẹmro Osolobrugwẹ Rhe 3-5

  •  Ẹmro 3

  •  Efe Erẹ Ẹhẹn 4

  •  Isese i Baibol 5

•  Fiomarhọ Iruo Aghwoghwo Uvie na 6-14

  •  Ra Tuẹn Ikuegbe Rhọ 7

  •  Ẹrharhumu Bru 8

  •  Re Ruẹ Idibo 9

  •  Re Dje Imwẹro Ọwan Fiotọre 10

  •  Ẹmro 11

  •  Oborẹ wu na ta Kpahen 12

  •  Ena wu na Sabu ha Ruiruo 13

  •  Ividio Ọrhẹ Ẹbe ra na ha Ruiruo 14

•  Enyerẹn Ilele Kristi 15-16

  •  Uyono i Baibol Ọrẹ Ukoko 16

•  Ifuen Ẹmro 17

•  Urhebro Ọrhẹ Ọkpọvi 18

•  Oke 19

•  Ẹrhiọ Oniruo Okinhariẹ 20

•  Ọkprughwre Omẹvwa Okinhariẹ Yanghene Ọrẹ Ẹkwotọre 21

•  Ọkprughwre Ẹkarorhọ Uhwu i Jesu 22

•  Oniruo Uyono Akpenyerẹn Ọrhẹ Iruo Uvie na 23

•  Osiyaga Uyono Akpenyerẹn Ọrhẹ Iruo Uvie na 24

•  Obrurhe 25

•  Iklasi Erọrọ 26

•  Ividio 27

1. Ọkpọvi ri ha uvuẹn ọbe ọnana, ina ha userhumu rẹn ihworho ra ghalẹ ẹmro te uvuẹn uyono Akpenyerẹn Ọwan Ilele Kristi Ọrhẹ Iruo Uvie na. Era ghalẹ ẹmro te, i se ọbe ọkpọvi ọnana ọrhẹ ọkpọvi ri sekpahen ẹmro aye ri ha uvuẹn Ọbe-Owian Uyono Akpenyerẹn Ọrhẹ Iruo Uvie na, bọmọke aye ine ki mwuegbe ẹmro aye. Jena ha urhebro rẹn ighwoghwẹmro ephian, nẹ aye i damoma vwobọrhọ ẹmro emọ isukuru. Awọrọ ra rhiẹ uyono ọke ephian, ina ji sabu ha ẹmro phia orhianẹ aye i kwerhọ oborẹ i Baibol na o yonorin, jeghwai nyerẹn akpọ aye lele iruemru-urhi re suẹn Olele Kristi. Ohworho ro vwo ji rhiẹ oghwoghwẹmro ọrhọ ta taghene ọ guọlọ ha ẹmro phia, oniruo Uyono Akpenyerẹn Ọrhẹ Iruo Uvie na ogbo lelie ta kpahiẹn, ji lẹrhiẹ rhe sẹ o mwuovwan. Ruẹ ọnana udaro ohworho rọ ha i Baibol yonie (yanghene udaro eri vwiẹriẹ orhianẹ aye Iseri Jehova). Ọravwọ ọnọ vi nyamwu evwan rẹ ohworho rọ guọlọ rhiẹ oghwoghwẹmro ro vwo ji bromarhame ọnọ nyamwu.—od urhomu-ẹmro 8 udjoghwẹ 8.

2. Iminiti owu. Kọkprughwre kọkprughwre, arha so ijoro re ne rhie uyono na ji nẹrhomo hin, osiyaga Uyono Akpenyerẹn Ọrhẹ Iruo Uvie na, ọnọ ta kpahen oborẹ ene yono ẹdẹ ọrana. Osiyaga na ọgbọ hunute ihwẹnmro ri na mai rhua erere vwe imizu ukoko na.

 3. Ẹmro: Iminiti ikpe. Urhomu-ẹmro na kugbe ihwẹnmro eva yanghene esa, i ha uvuẹn Ọbe-Owian Uyono Akpenyerẹn Ọrhẹ Iruo Uvie na. Ọkpako yanghene odibo owian ro mwuovwan yọ nọ ha ẹmro ọnana phia. Ene kporo ividio orhianẹ ọbe i Baibol ọkpokpọ ya guọlọ tuanrhọ uvuẹn ọkprughwre ọrana. Ọtẹmro na ọnọ sabu ta kpahen oborẹ ividio ọrhẹ ẹmro na, i ru surhobọmwu ọwan. Ọrẹn, ọgbọ dabu ta kpahen ihwẹnmro ri ha uvuẹn ọbe-owian na. Habaye, orho vwo ọke, ọ ji ta kpahen ifoto ri ha ọbe-owian na ri surhobọmwu ẹmro na. Ọnọ ji sabu ta kpahen ihwẹnmro erọrọ ra rionbọrhọ, ri ne toroba amerhen ẹmro na.

 4. Efe Erẹ Ẹhẹn: Iminiti ikpe. Oghọn ọnana, onọ ọrhẹ ẹkpahenrhọ, o vwo ẹmro ọtonrhọ yanghene ifue-en. Ọkpako yanghene odibo owian ro mwuovwan yọ nọ haye phia. Ọtẹmro na ọgbọ nọ otu na enọ eva na. Habaye, ono ji brorhiẹn sẹ ono se ekete i Baibol ra rionbọrhọ yanghene o se yi-i. Ihworho re seri ni kpahenrhọ enọ, i ha ibrẹro 30 yanghene riotọre kpahenrhọ ye.

 5. Isese i Baibol: Iminiti ẹne. Omizu ọhworhare yọ nọ ha ẹmro ọnana phia. Ọ vwọ tẹmro ọtonrhọ yanghene ifuen kpahen ekete ro no se na-a. Osiyaga uyono na ọnọ ha userhumu rẹn emọ isukuru na nẹ aye i se isese na fiotọre, ghwrarara, gorigori, nẹ aye i kanrunumwu ọhọ ẹmro na, ji dunuji uvuẹn ekete ro fori, na jeghwai vwẹruọ ye. Ra mẹriẹn taghene isese i Baibol ezẹko i seri ghwẹ erọrọ na, oniruo Uyono Akpenyerẹn Ọrhẹ Iruo Uvie na, ọgbọ dabu djokarhọ omẹgbanhon owuowọnwan ọke rọ ghalẹ ẹmro ọnana.

6. Iminiti ikpesionrin. A kwaphiẹ oghọn ọnana rhọ, nọ ha userhumu rẹn otu na ephian riẹnrioma rhọ oborẹ a wian owian aghwoghwo na lele, neneyo aye i sabu tẹn ona oborẹ a tuẹn ikuegbe rhọ, kugbe oborẹ e ghwoghwo ji yono ihworho lele. Orho serhọ, ana sabu ghalẹ ẹmro enana rẹn ekpako ukoko. Emọ isukuru na i wian kpahen irorẹdjẹ re fi rhẹ ibrakẹti uvuẹn obaro ẹmro rọ ha uvuẹn Ọbe-Owian Uyono Akpenyerẹn Ọrhẹ Iruo Uvie na, rọ rionbọrhọ ibroshọ na Fiomarhọ Isese Ọrhẹ Uyono yanghene Ẹguọlọ wu Vwo Kpahen Ihworho​—Ono Mwuo Ruẹ Idibo. Ọkezẹko, ana sabu ruie no rhiẹ ẹmro rẹ otu ine vwobọrhọ. Orho rhiomaran, ọkpako ukoko yanghene odibo owian ro mwuovwan yọ nọ haye phia.—Se  udjoghwẹ 15 orhianẹ wu guọlọ rhe oborẹ ana ha aruẹ ẹmro ọnana phia lele.

 7. Ra Tuẹn Ikuegbe Rhọ: Ọhworhare yanghene ọmase ọnọ sabu ha ẹmro ọnana phia. Orhianẹ omizu ọhworhare yo vwo ẹmro na, omizu ọhworhare ọrọrọ yanghene ohworho ekrun ọnẹyen yo no rhiẹ ọrovwoghwa hariẹn, [ọnana o ji sekpahen imizu emẹse]. Ọro vwo ẹmro na, ọrhẹ ọrovwoghwa na ina sabu siyẹ yanghene mevi.—Wu rha guọlọ yono rhọ kpahen oborẹ wu na ta ọrhẹ ena wu na sabu ha ruiruo, se  idjaghwẹ 12 ọrhẹ  13.

 8. Ẹrharhumu Bru: Ọhworhare yanghene ọmase ọnọ sabu ha ẹmro ọnana phia. Orhianẹ omizu ọhworhare yo vwo ẹmro na, ọrovwoghwa na ogbo ji rhiẹ ọhworhare [ọnana o ji sekpahen imizu emẹse]. (km 5/97 p. 2) Ọro vwo ẹmro na ọrhẹ ọrovwoghwa na, ina sabu siyẹ yanghene mevi. Ọmọ isukuru na ogbo dje udje oborẹ ọnọ sabu ta, orhianẹ o lele ọravwọ tẹmro vrẹn ne.—Wu rha guọlọ yono rhọ kpahen oborẹ wu na ta ọrhẹ ena wu na sabu ha ruiruo, se  idjaghwẹ 12 ọrhẹ  13.

 9. Re Ruẹ Idibo: Ọhworhare yanghene ọmase ọnọ sabu ha ẹmro ọnana phia. Orhianẹ omizu ọhworhare yo vwo ẹmro na, ọrovwoghwa na ogbo ji rhiẹ ọhworhare [ọnana o ji sekpahen imizu emẹse]. (km 5/97 p. 2) Ọro vwo ẹmro na ọrhẹ ọrovwoghwa na, ina sabu siyẹ yanghene mevi. Oghọn ọnana ono dje kpahen uyono i Baibol ra tonrhọ bi ne. O vwo ẹmro ọtonrhọ yanghene ẹmro re ne fuie-en, jokpanẹ a ta riẹn taghene ọ wian kpahiẹn. Ghwai rhẹ ọsoso ekete ra bọn ẹmro na kpahen ye ne se-e, ọrẹn ọkezẹko ana sabu se aye phia.

 10. Re Dje Imwẹro Ọwan Fiotọre: Orho rhiẹ ẹmro, omizu ọhworhare yọ nọ haye phia. Orho rhiẹ udje, omizu ọhworhare yanghene ọmase ọnọ sabu haye phia. Orhianẹ omizu ọhworhare yo vwo ẹmro na, omizu ọhworhare ọrọrọ yanghene ohworho ekrun ọnẹyen yo no rhiẹ ọrovwoghwa hariẹn, [ọnana o ji sekpahen imizu emẹse]. Ọmọ isukuru na ọgbọ dabu ha iyẹnrẹn ri ha uvuẹn ekete ra rionbọrhọ na, kpahenrhọ onọ ra nọren uvuẹn oghọn ọnana. Ọmọ isukuru na ọnọ sabu brorhiẹn sẹ ọnọ rionbọrhọ iyẹnrẹn ra bọn ẹmro na kpahen, uvwrọke rọ ha ẹmro na phia.

 11. Ẹmro: Omizu ọhworhare yọ nọ ha oghọn ọnana phia, ono mevi ta ye rẹn otu na. Arha bọn ẹmro na kpahen ihwẹnmro owu rọ ha uvuẹn iyẹnrẹn ra habaye A uvuẹn ibroshọ na Ẹguọlọ wu Vwo Kpahen Ihworho—Ono Mwuo Ruẹ Idibo, ọmọ isukuru na ọgbọ ta kpahen oborẹ ene ru ha eghwẹmro i Baibol na ruiruo uvuẹn owian aghwoghwo na. Jerẹ udje, ọnọ sabu dje kpahen ọke ra na ha oghwẹmro i Baibol ruiruo, oborẹ oghwẹmro na o mevirhọ, ọrhẹ oborẹ ene ru lele ohworho ta kpahiẹn. Arha bọn ẹmro na kpahen uyono owu uvuẹn ibroshọ na Ẹguọlọ wu Vwo Kpahen Ihworho—Ono Mwuo Ruẹ Idibo, ọmọ isukuru na ọgbọ tẹnrovi oborẹ ene ru ha ihwẹnmro na ruiruo uvuẹn owian aghwoghwo. Ọnọ sabu ta kpahen udje rọ ha udjoghwẹ ọrukaro uvuẹn uyono ọrana yanghene hunute ekete i Baibol erọrọ ri ha uvuẹn uyono na ri na ha userhumu phia.

   12. Oborẹ wu na ta Kpahen: Ọkpọvi rọ ha uvuẹn udjoghwẹ ọnana ọrhẹ ọrọ ha kpahiẹn, o sekpahen eri vwo ẹmro na “Ra Tuẹn Ikuegbe Rhọ” ọrhẹ “Ẹrharhumu Bru.” Jokpanẹ e tiobọnẹ ọkpọvi ọrọrọ, ọmọ isukuru na ọgbọ damoma ta kpahen urhomẹmro i Baibol ro surhobọmwu erhirhiẹ ohworho na, ji gbẹn izede firhọ rọ nọ tẹmro na riarorhọ ọke ọrọrọ. Ọmọ isukuru na ọ sanọ urhomẹmro ro mwidjẹn ji serhọ uvuẹn okogho na. Ọnọ sabu brorhiẹn sẹ ọnọ ha ọbe yanghene ividio ri ha usuẹn Ekwakwa ra ha Yono Ihworho ruiruo. Ukperẹ ọmọ isukuru na ono yono udje na rhẹ urhomu, ogbo ruẹ ena aghwoghwo yi rhomurhọ nyoma rọ nọ ha ẹmro na phia izede ikuegbe, ji dje ọdamẹ phia rẹn awọrọ.

   13. Ena wu na Sabu ha Ruiruo: Ọmọ isukuru na ọnọ sabu ha irorẹdjẹ enana ruiruo sekpahen erhirhiẹ okogho na. Jerẹ udje:

1.  (1) Nẹ Oghwa Riẹ Oghwa: Ọnana o sekpahen owian aghwoghwo ọrẹ nẹ oghwa riẹ oghwa—sẹ wu bru ohworho riẹ oghwa ye, wu serie nyoma ifonu, yanghene wu ya ileta vwe yi—o ji sekpahen ẹrharhumu bru re ruẹ rẹn ohworho re lele tẹmro vrẹn ne, uvuẹn aghwoghwo ọrẹ nẹ oghwa riẹ oghwa.

2.  (2) Aghwoghwo Kpregede: Ọnana o sekpahen ọra ha ona dẹrẹ ikuegbe kpekpa rhiẹ aghwoghwo. Wu na sabu ruẹ ọnana nyoma wu ne dje ekete i Baibol rẹn ihworho ri ha ekete wa wian, isukuru ọnọ, ere rhirhiẹ kẹruọ, ihworho wu lele ruẹ imoto yanghene erhirhiẹ erọrọ wu nyerẹn vwa uvuẹn ẹdẹ na.

3.  (3) Aghwoghwo Afiede: Ọnana o sekpahen aghwoghwo nyoma ophanphan re je ẹbe rhọ, aghwoghwo uvuẹn ekete ra sueyi, aghwoghwo udumu, yanghene ekete imoto e gbo rhọ, ọrhẹ ekete ephian ra mẹrẹn ihworho.

 14. Ividio Ọrhẹ Ẹbe ra na ha Ruiruo: Sekpahen erhirhiẹ na, ọmọ isukuru na ọnọ sabu ha ividio yanghene ọbe ro jerie ruiruo. Ẹmro na orho vwo ividio yanghene ọmọ isukuru na no brorhiẹn taghene ọnọ ha ividio ruiruo, ọgbọ haye phia ji dje kpahiẹn ọrẹn o vwo kporie-e.

15. Arha so ijoro hin, oghọn ọnana o vwo ẹmro owu yanghene eva ra na ha iminiti 15 ta, ri na ha userhumu rẹn otu na ha Ẹmro Osolobrugwẹ ruiruo. Jokpanẹ a hunute yi, ọkpako ukoko yanghene odibo owian ro mwuovwan yọ nọ haye phia, ọrẹn, orho rhiẹ edamẹ ukoko, ọkpako ukoko yọ nọ haye phia. Orho rhiẹ ẹmro otu ine vwobọrhọ, omizu rọ nọ ha ẹmro na phia ọnọ sabu nọ enọ erọrọ ba eri ha uvuẹn ọbe-owian na. Ọtonrhọ ẹmro na o rhirhiẹ ye kpeke, neneyo ọ sabu vwo ọke rọ nọ ha ihwẹnmro na phia, ọnana ọnọ ji yẹ otu uphẹn aye ine vwobọrhọ ye. Orho vwo erhonmie, ono rhomu neneyo ohworho ra guọlọ rhonmie na nọ rhiẹ ubiukpe na, ukperẹ ono ruie uvuẹn ekete ro siyẹ.

  16. Uyono i Baibol Ọrẹ Ukoko: Iminiti 30. Ọkpako ro mwuovwan yọ nọ haye phia. (Odibo owian ro mwuovwan ọnọ sabu ha uyono ọnana phia orhianẹ ekpako e bun uvuẹn ukoko na-a.) Ugboma ekpako na yi ne brorhiẹn ọro mwuovwan rọ nọ ha Uyono i Baibol Ọrẹ Ukoko na phia. O fori taghene eri mwuovwan yen, i dabu nyamwu ọke, ha uyono na phia izede ro fiotọre, kanrunumwu eghwẹmro i Baibol kirighwo, jeghwai ha userhumu rẹn ihworho ephian riamerhen oghwẹmro re yono na. Eri mwuovwan, ina mẹrẹn userhumu nyoma aye ine se ọkpọvi rọ ta kpahen oborẹ a ha uyono ro vwo enọ ọrhẹ ẹkpahenrhọ phia lele. (w23.04 aruọbe 24, ekpeti) Wu rhe ruẹ uyono na hin bọmọke ọke ra yẹruọ o ki te, wu na sabu fuen oghọn ọnana ukperẹ wu na ha iyẹnrẹn erọrọ ba ye neneyo ọsoso ọke na ọ sabu hin. Lele oborẹ erhirhiẹ na ọ havwọ, imizu sansan ina sabu ha uyono na phia kọkprughwre kọkprughwre, imizu sansan ina ji sabu vwobọrhọ isese na. Orhianẹ osiyaga Uyono Akpenyerẹn Ọrhẹ Iruo Uvie na ọ tare taghene e bru ọke uyono na kpẹtẹ, ọrọ ha uyono na phia no no brorhiẹn oborẹ ono ruie lele. Ọnọ sabu nyaji isese idjaghwẹ ezẹko vwo, ji nọ enọ na ọvo.

17. Iminiti esa. Osiyaga Uyono Akpenyerẹn Ọrhẹ Iruo Uvie na ọnọ ta kpahen oborẹ e yonorin nẹ uyono na, rọ nọ sabu sa ọwan erhumu. Ọgbọ hunute oborẹ ene yono ọkprughwre rọ sa na. Orho vwo ọke, ọnọ sabu se edẹ emọ isukuru ri vwo ẹmro uvuẹn uyono ọrọ sa na. Jokpanẹ a hunute yi, osiyaga na ogbo ruẹ aghwoghwo ji se ileta ri havwiẹ harẹn ukoko na uvwrọke rọ tẹmro ifuen yi. Iyẹnrẹn jerẹ ẹkwaphiẹrhotọre owian aghwoghwo ọrhẹ erufon Aghwẹlẹ Uvie na, o fo ne ghwoghwo aye nẹ ubiukpe na-a, ukpomaran, e fi aye rhẹ ophanphan iyẹnrẹn na. Orhianẹ o vwo ọke re ne ruẹ aghwoghwo yanghene ileta uvwrọke osiyaga na ọ tẹmro ifuen yi-i, osiyaga na ọgbọ ta rẹn imizu ri ne vwobọrhọ Enyerẹn Ilele Kristi nẹ aye i nyajẹ ibiọke vwo riẹn. (Se  idjaghwẹ 16 ọrhẹ  19.) Ana ha ijoro ọrhẹ ẹrhomo fuen uyono na.

18. Emọ isukuru na i rha ghwai ha ẹmro aye phia hin, osiyaga Uyono Akpenyerẹn Ọrhẹ Iruo Uvie na ọnọ ha iminiti owu kpẹmẹ aye, jeghwai ha urhebro rẹn aye sekpahen ekete ra ta rẹn aye nẹ aye i wian kpahen. Osiyaga na orho se ọmọ isukuru nọ mọ ha ẹmriẹn phia, ọ vwọ hunute ekete ra ta riẹn nọ wian kpahe-en. Ọrẹn, ọmọ isukuru na ọrhọ tẹmro na hin, osiyaga na ọrhọ ji kpẹmiẹ ne, ọnọ sabu ta kpahen ihwẹnmro rẹ ọmọ isukuru na ọ wian kpahen, ọrhẹ oborẹ ọnọ sabu ruie lele arha ha ẹmro riẹn ọke ọrọrọ. Osiyaga na ọnọ ji sabu hunute ekete erọrọ ro rorori taghene otu na ina sabu yono nẹ udje na. Lele oborẹ ọmọ isukuru owuowu ọ havwọ, ọnọ ji sabu ha ibroshọ na Ẹguọlọ wu Vwo Kpahen Ihworho—Ono Mwuo Ruẹ Idibo, yanghene Fiomarhọ Isese Ọrhẹ Uyono, yanghene ọbe na Benefit From Theocratic Ministry School Education bruie urhe uvuẹn ekete odjahen ọke uyono na orho fuen hin yanghene ọke ọrọrọ, ọnọ sabu rhiẹ ekete rọ wian kpahen na yanghene ada erọrọ uvuẹn ẹmro ọnẹyen.—Wu rha guọlọ rhe iyẹnrẹn erọrọ kpahen owian osiyaga Uyono Akpenyerẹn Ọrhẹ Iruo Uvie na ọrhẹ obrurhe, se  idjaghwẹ 19,  24, ọrhẹ  25.

19. Ohworho owuorowu ọ vwọ riẹ ọke-e, omaran ji te osiyaga Uyono Akpenyerẹn Ọrhẹ Iruo Uvie na. Dedevwo Ọbe-Owian Uyono Akpenyerẹn Ọrhẹ Iruo Uvie na o bru ọke rhẹ ẹmro owuowu, ọrẹn wu rha tẹmro ọnọ hin bọmọke ọke ra yẹruọ o ki te, wu na sabu fuen ẹmro na, ukperẹ wu na ha iyẹnrẹn erọrọ ba ye neneyo ọsoso ọke na ọ sabu hin. Ohworho owuorowu ọrhọ riẹ ọke, obrurhe na yanghene osiyaga Uyono Akpenyerẹn Ọrhẹ Iruo Uvie na ọ ha urhebro riẹn ọrẹ odjahen. (Se  idjaghwẹ 24 ọrhẹ  25.) Ọsoso uyono na ephian te ijoro ọrhẹ ẹrhomo o rhiẹ unọke owu gbẹ iminiti 45.

20. Oniruo okinhariẹ orho rhiẹ ọpha ruẹ ukoko na, ẹkwaphiẹrhotọre uyono na ono ji rhirhiẹ oborẹ ọ havwọ uvuẹn Ọbe-Owian Uyono Akpenyerẹn Ọrhẹ Iruo Uvie na: Ọrẹn, e ruẹ Uyono i Baibol Ọrẹ Ukoko-o, ukpomaran oniruo okinhariẹ na ọnọ ha iminiti 30 ha ẹmro ọnẹyen phia. Oniruo okinhariẹ ọ ki mọ tẹmro ọnẹyen, osiyaga Uyono Akpenyerẹn Ọrhẹ Iruo Uvie na ọ hunute oborẹ e yonorin ẹdẹ ọrana, ọrhẹ oborẹ ene yono ọkprughwre ọrọ sa na, ọnọ ji sabu ru aghwoghwo vwẹre, jeghwai se ileta ri havwiẹ, no ki se oniruo okinhariẹ na nọ mọ ha ẹmro ọnẹyen phia. Oniruo okinhariẹ ọrhọ tẹmro hin, ogbo fuen uyono na rhẹ ijoro rọ sanọ rhotọre ne. Ọnọ sabu ha use rẹn omizu ọhworhare ọrọrọ nọ nẹrhomo fuen uyono na. O fo nẹ iklasi erọrọ uvuẹn edjadjẹ ukoko na, i ruẹ uyono uvuẹn ọkprughwre ẹrhiọ oniruo okinhariẹ na-a. Ẹko rọ ha ekete ọrọrọ ọnọ sabu ru uyono yi san uvuẹn ẹdẹ oniruo okinhariẹ ono rhiẹ ọpha ruẹ aye. Ọrẹn, orho te ọke oniruo okinhariẹ na ọnọ ha ẹmro ọnẹyen phia, aye i gba ya homaba ukoko rẹ aye i ha otọriẹ na.

21. E vwe ruẹ uyono uvuẹn ọkprughwre omẹvwa okinhariẹ yanghene ọrẹ ẹkwotọre-e. Ukpomaran, jena karorhọ imizu ukoko na taghene ekrun yanghene owuowọnwan i ruẹ uyono ra kwaphiẹrhotọre uvuẹn ọkprughwre ọrana harẹn omobọ aye.

22. Ẹkarorhọ Uhwu i Jesu orho se rhẹ ẹdẹ owu usuẹn Mọnde ye te i Fraide, ọkprughwre ọrana orho vwo Uyono Akpenyerẹn Ọwan Ilele Kristi Ọrhẹ Iruo Uvie na-a.

23. Ọkpako rẹ ugboma ekpako na i sanọren, yọ nọ ga ẹrhẹ oniruo Uyono Akpenyerẹn Ọrhẹ Iruo Uvie na. Oniruo na yo vwo owian ra na kwaphiẹ uyono na rhọ, ji ruie lele ọkpọvi enana. Ọye ọrhẹ obrurhe na i rha tẹmro rhoma ọke ephian. Ọbe-Owian Uyono Akpenyerẹn Ọrhẹ Iruo Uvie na ọrhọ ghwai rhe, oniruo Uyono Akpenyerẹn Ọrhẹ Iruo Uvie na ọgbọ ghalẹ ẹmro ephian ri ha uvuẹn ọbe-owian na. Tobọ te ẹmro emọ isukuru ọrhẹ ihworho ri ne rhiẹ osiyaga uyono na, usuẹn ekpako rẹ ugboma ekpako i sanọren ni rhiẹ osiyaga. (Se  idjaghwẹ 3-16 ọrhẹ  24.) Ọke ọrhọ ghalẹ ẹmro emọ isukuru, ọ damoma ghaliẹ lele ẹgbukpe aye ọrhẹ oborẹ aye i tẹn ona te, ji nieso sẹ aye i vwo ugbomọphẹ ẹmro ẹta sekpahen oghwẹmro na. O ji fo no dje aruẹ oniso ọnana phia ọke ọrhọ ghalẹ ẹmro erọrọ uvuẹn ọbe-owian na. Jenẹ ọbe ẹmro na o kiki te emọ isukuru na obọ, orho jiri omamọ ọkprughwre esa bọmọke aye ina ki ha ẹmro aye phia. Ifọmu na Our Christian Life and Ministry Meeting Assignment (S-89), ọyẹ ana ha ghalẹ ẹmro emọ isukuru na. Jenẹ o mwu oniruo Uyono Akpenyerẹn Ọrhẹ Iruo Uvie na ẹro taghene, ọsoso ẹkwaphiẹrhotọre ri ha ọbe-owian uyono na, a hariẹ tamwu ophanphan iyẹnrẹn na. Ugboma ekpako na ina sabu ha ọkpako ọrọrọ mwu yanghene odibo owian, nọ ha userhumu riẹn. Ọrẹn, ekpako ukoko ọvo yi na ghalẹ ẹmro ri vwe rhiẹ erẹ emọ isukuru.

24. Kọkprughwre kọkprughwre, ọkpako owu ono rhiẹ osiyaga harẹn Uyono Akpenyerẹn Ọrhẹ Iruo Uvie Na. (Orhianẹ ekpako e bu-un, idibo owian ri mwuovwan ina sabu ruie.) Osiyaga na yo no mwuegbe ẹmro ọtonrhọ ọrhẹ ẹmro ifuen rọ nọ haphia. Ọye yo no ji se ihworho ri vwo ẹmro, nẹ aye i ma ha ẹmro aye phia, ekpako na erhe bu-un, ọnọ sabu vwobọrhọ ẹmro erọrọ uvuẹn uyono na, maido ẹmro ri vwo ividio rẹ otu ine je vwobọrhọ. Jenẹ ẹmro rẹ osiyaga na ọnọ ta uvuẹn oghọn owuowu o rhirhiẹ ye kpeke. Ugboma ekpako yi ne brorhiẹn ekpako ri mwuovwan ri ne rhiẹ osiyaga. Ekpako enana ra djẹre, ya na mai ghalẹ ẹmro osiyaga te. Sekpahen erhirhiẹ ukoko na, oniruo Uyono Akpenyerẹn Ọrhẹ Iruo Uvie na ọnọ sabu rhiẹ osiyaga ọgbọ buebun vrẹn ekpako erọrọ ra djẹre na. Orhianẹ ọkpako o mwuovwan rọ nọ ha Uyono i Baibol Ọrẹ Ukoko phia, nọyẹ ọnọ ji sabu ga ẹrhẹ osiyaga uyono. Biko, karorhọ taghene ọkpako rọ nọ ga ẹrhẹ osiyaga na, ọnọ nyoma izede ẹguọlọ ha userhumu ọrhẹ ekpẹmẹ kugbe urhebro rẹn imizu ri vwo ẹmro isukuru. Jenẹ o ji mwu osiyaga na ẹro taghene e fuen uyono na rhẹ ọke. (Se  idjaghwẹ 17 ọrhẹ  19.) Orho je osiyaga na, uphẹn ọrhọ ji ha uvuẹn ubiukpe na, ana sabu ha imaikrofonu ọrọrọ mevi obọ owu ubiukpe na, neneyo ọ sabu mevi avwaye se eri vwo ẹmro, omizu re seri nọ nọ nya riẹ ekete ra tẹmro na bọmọke ene ki seyi hin. Orho je osiyaga na, ọnọ sabu siyẹ ubiukpe na uvwrọke re ruẹ Isese i Baibol ọrhẹ ẹmro ri ha oghọn na Fiomarhọ Iruo Aghwoghwo Uvie na. Ona ọnana ọ vwọ riẹ ọke-e.

25. Orho serhọ, ọkpako ukoko rọ tẹn ona ẹmro ẹta yo fo ẹrhẹ ọnana. Owian obrurhe na o sekpahen ọrẹ ọnọ ha urhebro okokọ phia harẹn ekpako ọrhẹ idibo owian kpahen ẹmro aye i haphia, ro sekpahen Uyono Akpenyerẹn Ọrhẹ Iruo Uvie na, ẹmro otu, kugbe ẹhaphia yanghene isese uvuẹn uyono Oghwa Odẹrẹ yanghene Uyono i Baibol Ọrẹ Ukoko. (Se  udjoghwẹ 19.) Orhianẹ ekpako buebun uvuẹn ukoko na i tẹn ona ẹmro ẹta ọrhẹ uyono, nọyẹ ana sabu rhe wene obrurhe na kukpe kukpe. Ghwai rhẹ ọke ephian ra tẹmro hin, yẹ obrurhe na ọnọ ha urhebro phia-a.

26. Oborẹ emọ isukuru na i bun te, yọ nọ lẹrhẹ ukoko na vwo iklasi erọrọ. Iklasi owuowu ono vwo obrurhe ro mwuovwan, ọkpako ukoko ya mai guọlọ ne fi rhẹ ẹrhẹ ọnana. Orho vwo-o, a gba ha odibo owian ro mwuovwan mwu rhẹ ẹrhẹ na. Ugboma ekpako na yi na sanọ imizu re ne fi rhẹ ẹrhẹ ọnana, ji brorhiẹn sẹ ene rhe wene aye. Obrurhe na ọ nyalele ọkpọvi rọ ha uvuẹn  udjoghwẹ 18. Iklasi erọrọ i rha havwiẹ, a gba ta rẹn emọ isukuru ri ne riẹ iklasi na, nẹ aye i riẹ oboran arha ghwai tẹmro na Efe Erẹ Ẹhẹn hin, rọ ha uvuẹn oghọn na Efe ri nẹ Ẹmro Osolobrugwẹ Rhe. Ọmọ isukuru rọ kẹta ọrhọ ha ẹmro ọnẹyen phia ne, aye i gba rharhumu homaba ukoko na.

27. Ividio sansan ya na ha ruiruo uvuẹn uyono na. Ana sabu mẹrẹn ividio ra na ha ruiruo uvuẹn uyono ọkprughwre na uvuẹn JW Library^® app, ana ji sabu ha ifonu sansan ruiẹ.

© 2023 Watch Tower Bible and Tract Society of Pennsylvania

S-38-OKP 11/23