Ẹmro na “ọkobaro” omevirhọ ihworho ra guọlọ ekete ekpokpọ, jeghwai dje izede harẹn awọr. Jesu oghẹnren ọkobaro ọrana re dje rhiẹ otọrakpọ na, nọ ha aghwoghwo-arhọ phia neneyo o dje izede ro suẹn riẹ usimirhọ harẹn ihworho. (Matthew 20:28) Inyenana, erẹ a nyalelie a hẹrokele udje yi nyoma ọke buebun rẹ aye a ghwọghọ rhẹ owian re ‘ru idibo.’ (Matthew 28:19, 20) Ezẹko e sabu vwobọ rhẹ oborẹ ame e se iruo ọkobaro na.

Ọkobaro ọ yẹ oghwoghwẹmro ọke-vuọnvuọn. Iseri Jehova ephian ighwoghwẹmro iyẹnrẹn esiri na. Ọrẹn, ezẹko e sabu kwaphiẹ ọke aye rhọ nẹ aye sabu ga jerẹ ekobaro ọke-ephian, rẹ aye a wian unọke 70 ubiamo owuowu uvuẹn owian aghwoghwo na. Nẹ a sabu ru ọnana, buebun na wian owian uphrophro-ọke. A je sanọ ezẹko nẹ aye ga jerẹ ekobaro oghẹnrensan, uvuẹn ekete ra mai guọlọ ighwoghwẹmro Uvie na, aye a wian unọke 130 yanghene ghwẹ omaran uvuẹn owian aghwoghwo na ubiamo owuowu. Ekobaro na, aye e nyerẹn akpọ ọlolọhọ, rhẹ imwuẹro taghene Jehova ono ru ọdamẹ ọrẹ aye harẹn aye. (Matthew 6:31-33; 1 Timothy 6:6-8) Ihworho re vwa sabu ga jerẹ ekobaro ọke-vuọnvuọn ena sabu ga jerẹ ekobaro ibiọke, aye e rha sabu ru te omaran. Aye a wian unọke 30 yanghene 50 uvuẹn ubiamo.

Ẹguọlọ e vwo kpahen Osolobrugwẹ ọrhẹ ihworho yẹ o mwu ọkobaro. Jerẹ i Jesu, ame mẹrẹn vwrurhe taghene ihworho buebun e guọlọ rhe kpahen Osolobrugwẹ rhẹ egbemwu ro vwori harẹn ọwan. (Mark 6:34) Jọrẹn, ame vwo irherhe rẹ ọnọ yẹ aye userhumu ọke ọnana, r ọnọ yẹ aye ifiẹrorhọ ọgbogbanhon kpahen obaro na. Ẹguọlọ rẹ ọkobaro o vwori kpahen ihworho yẹ o mwuie yẹ awọrọ userhumu e rhe iyẹnrẹn esiri na. (Matthew 22:39; 1 Thessalonians 2:8) Nyoma ọnana rhe, esegburhomẹmro ọkobaro na nọ gbanhanrhọ, ọye no ti kẹrẹ Osolobrugwẹ rhọ, nọ jeghwai mẹrẹn omamerhomẹ omamọ.—Acts 20:35.

• Ọrọmo yẹ ọkobaro?

• Me yẹ o mwu ihworho ezẹko rhirhiẹ ọkobaro ọke-vuọnvuọn?