Osolobrugwẹ ọguọlọre taghene ọwan i nyerẹn ọrẹ ufuoma rhẹ omamerhomẹ uvuẹn i paradais otọrakpọ na bẹmẹdẹ!

Wu na sabu roro, ‘Marhẹ ọrana ono ru sabu phia?’ Baibol na ọtare taghene Uvie Osolobrugwẹ ọnọ sabu ha ye phia, ọ jeghwai ta taghene Osolobrugwẹ ọguọlọre nẹ ihworho ephian i yono kpahen Uvie na rhẹ egbemwu ọnẹyen harẹn ọwan.—Psalm 37:11, 29; Isaiah 9:7.

Osolobrugwẹ ọguọlọre taghene ọwan e mẹrẹn erere harẹn omobọ ọwan.

Jerẹ oborẹ ọsẹ ro vwo ẹguọlọ ọguọlọ oborẹ ọmai rhomu harẹn emọ yen, omaran Ọsẹ ọwan rọ ha obẹ odjuwu, ọ je guọlọ taghene oma ọ merhen ọwan bẹmẹdẹ. (Isaiah 48:17, 18) O verhọ taghene ‘ọrẹ o ruẹ ọhọre ọrẹ Osolobrugwẹ ono nyerien bẹmẹdẹ.’—1 John 2:17.

Osolobrugwẹ ọguọlọre taghene ọwan i nyalele izede ọnẹyen.

Baibol na ọtare taghene, Ọmemama na ọguọlọ ‘yono ọwan kpahen izede ọnẹyen’ neneyo ọwan sabu ‘nyalele izede yi.’ (Isaiah 2:2, 3) Ọye okoko ‘ihworho harẹn odẹ ọnẹyen’ nẹ aye sabu dje ọhọre ọnẹyen phia lele ekete akpọ na okeri te.—Acts 15:14.

Osolobrugwẹ ọguọlọre taghene ọwan i koko ha ogame riẹn ọrẹ okugbe.

Ẹga ọfuanfon ọrẹ i Jehova o ku ihworho kugbe ọrẹ ẹguọlọ ukperẹ ọnọ hra aye. (John 13:35) Ayọmo inyenana yẹ e yono ihworho ekete ephian oborẹ ene ru sabu ga Osolobrugwẹ ọrẹ okugbe? Wu na mẹrẹn ẹkpahenrhọ onọ ọrana uvuẹn i broshọ ọnana.