UYONO 19
Ọrọmo Yẹ Ọvrẹn Ro Vwo Esegburhomẹmro Rhẹ Ẹghwanren Na?
Bomọke oki hwu, Jesu nọ tẹmro odjanhen rhẹ idibo yi awan ẹne—Peter, James, John kugbe Andrew. Rẹ i Jesu ọ tẹmro kpahen oka ẹrhiọ ye uvuẹn ẹdẹ oba na, ọrhọ nọ onọ ọghoghanren owu: ‘Ọrọmo yẹ ghini ọvrẹn ro vwo esegburhomẹmro rhẹ ẹghwanren rẹ ọga ye ọ ha mwu rhẹ enyerẹn ye, nọ yẹ aye emaren aye ọke ro fori?’ (Matthew 24:3, 45; Mark 13:3, 4) Jesu ọ yẹ idibo yi imwuẹro taghene ọye jerẹ ‘ọga’ aye, ọye ọnọ ha ihworho mwu, nẹ aye rha ha emaren ọrẹ ẹhẹn harẹn erẹ e lele udje yi uvuẹn ọke oba na. Ọrọmo yẹ ono rhirhiẹ ọvrẹn ọnana?
Ọnana i biẹ otu ra djẹre usuẹn erẹ ine lele i Jesu sun. “Ọvrẹn” na e rherie rhẹ Ugboma Usuon ọrẹ Iseri Jehova. Ọ tiobọ nẹ emaren ọrẹ ẹhẹn harẹn erẹ ọye rhẹ aye a gba ga i Jehova kugbe ọke ro fori. Ame hẹroso ọvrẹn ro vwo esegburhomẹmro ọnana, nọ rhọ yẹ ame ‘uche emaren ra guọlọre ọke ro fori.’—Luke 12:42.
Ọ hẹrote enyerẹn-oghwa ọrẹ Osolobrugwẹ. (1 Timothy 3:15) Jesu ọ yẹ ọvrẹn na ohwan ọghwaghwa ọrẹ ọnọ hẹrote ukoko i Jehova uvuẹn otọrakpọ na, ọnana yẹ ẹro-ete ekwakwa ukoko na, e dje oborẹ ana wian owian aghwoghwo na lele, jeghwai yono ọwan nyoma ikoko na. Omaran na, neneyo ame sabu mẹrẹn oborẹ ame guọlọre rhẹ ọke ame a guọliẹ, ‘ọvrẹn ro vwo esegburhomẹmro rhẹ ẹghwanren na’ no tiobọ nẹ emaren ọrẹ ẹhẹn nyoma ẹbe sansan rẹ ame a ha wian owian aghwoghwo na, ọrhẹ ẹmro a ha phia uvuẹn iyono rhẹ emẹvwa.
Ọvrẹn na o vwo esegburhomẹmro kpahen urhomẹmro i Baibol rhẹ owian urhomu e dje ene ghwoghwo iyẹnrẹn esiri na, ọ je ghwanren nyoma izede ọ hẹrote ọdamẹ erẹ i Kristi uvuẹn akpọ na. (Acts 10:42) Jehova o fi ebrurhọ rhẹ owian ọvrẹn na, jeghwai yẹ ye userhumu tiobọ nẹ emaren ọrẹ ẹhẹn buebun.—Isaiah 60:22; 65:13.
-
Ọrọmo yẹ i Jesu ọ ha mwu nọ ghẹrẹ idibo yi izede ọrẹ ẹhẹn?
-
Izede ego yẹ ọvrẹn na o vwo esegburhomẹmro rhẹ ẹghwanren?