Jesu Kristi ọ ta rẹn idibo yi: ‘Jenẹ ukpẹ are lo obaro ihworho, neneyo aye sabu mẹrẹn omamọ owian are, nẹ aye ha odidi harẹn Ọsẹ are rọ ha obẹ idjuwu.’ (Matthew 5:16) Fọkiẹ ọrana, ame na dabu ha itẹknọlọji ọrhẹ itanẹti wian. Iwẹbsaiti ame jw.org yẹ ekete a sabu mẹrẹn iyẹnrẹn ro sekpahen irueru Iseri Jehova rhẹ oborẹ aye i vwo esegburhomẹmro kpahen. Me yẹ wu na mẹrẹn uvuẹn iwẹbsaiti na?

Ẹkpahenrhọ i Baibol harẹn enọ ihworho anọ omamọ. Wu na sabu mẹrẹn ẹkpahenrhọ harẹn enọ eghoghanren ezẹko rẹ ihworho enọ ne. Enọ erhan usuẹn enana, ẹkpahenrhọ aye ọ ha uvuẹn itrati Would You Like To Know the Truth? rọ ha uvuẹn itanẹti uvuẹn edjadjẹ re vrẹn 400. Wu na ji sabu mẹrẹn New World Translation uvuẹn edjadjẹ re vrẹn 100 kugbe ẹbe sansan ra ha yono i Baibol na, ọrhẹ ọbe re se What Does the Bible Really Teach? Habaye, wu na ji sabu mẹrẹn Watchtower rhẹ Awake! ekpokpọ. Buebun ẹbe enana, ana sabu se aye yanghene kerhọ aye uvuẹn itanẹti, yanghene danlodu ikpekporo aye, PDF yanghene EPUB. Wu na sabu fomu aro-ẹbe ezẹko ghalẹ harẹn ohworho ro vwo ọdamẹ ye uvuẹn edjadjẹ ọnẹyen. Ividio edjadjẹ-idienrhọ sansan e havwiẹ. Wu na sabu danlodu iruẹn-udje isese i Baibol, iruẹn-udje i Baibol, ọrhẹ ijoro imemerhen wu na sabu kporo ọke omeromo ọnọ.

Iyẹnrẹn urhomẹmro ro sekpahen Iseri Jehova. E ji fi iyẹnrẹn rhẹ ividio ekpokpọ ro sekpahen owian ame ekete akpọ na okeri te, oborẹ ọ phia harẹn Iseri Jehova, ọrhẹ userhumu ame a ha phia ọke ukpokpogho. Wu na je sabu mẹrẹn okarorhọ ro sekpahen emẹvwa ra sa, kugbe iyẹnrẹn kpahen eghọn ukoko ame.

Nyoma enana rhe, ame na lẹrhẹ ukpẹ urhomẹmro na lo riẹ ekete ri tiomanu omamọ uvuẹn ọsoso akpọ na. Ihworho ri ne eketẹ akpọ na okeri te rhe, tobọ te Antarctica, a mẹrẹn erere nie sa. Ame a nẹ ẹrhomo taghene ‘ẹmro i Jehova o kerabọ phẹphẹrẹ’ lele ekete akpọ na okeri te nọ ha odìdi vwe Osolobrugwẹ.—2 Thessalonians 3:1.

• Marhẹ jw.org ọ ha userhumu harẹn ihworho buebun yono urhomẹmro i Baibol na?

• Me yẹ wu guọlọ rhe kpahen uvuẹn Iwẹbsaiti ame?