Wẹwẹ nẹ obiruo wa ha ọke e yono i broshọ ọnana, rọ lẹrhẹ owẹwẹ dabu rhe Iseri Jehova jerẹ ẹko ihworho, dabu yono kpahen irueru aye, rhẹ owian ukoko aye fiotọre. Ame vwo imwuẹro taghene ọbe ọnana ọ ha userhumu wẹn mọ mẹrẹn vwrurhe taghene ame yẹ ihwroho re ru ọhọre i Jehova inyenana. Ame ha riẹ e ru urhebro wẹn ne wu rhe vwo irherhe ọrẹ Osolobrugwẹ, wu jeghwai ta harẹn ekrun ọnọ ọrhẹ igbehian kpahen oborẹ we yono na, ne wu ji rhe kwomakugbe ame uvuẹn uyono ọke ephian.—Hebrews 10:23-25.

Wu rhe yono kpahen i Jehova rhọ, ne wu na mẹrẹn vwrurhe taghene ọye o ghini vwo ẹguọlọ kpahen owẹwẹ. Ọrana nẹ ono mwu owẹwẹ e ru kemru kemru wu na sabu ru e dje ẹguọlọ ọnọ harẹn i Jehova. (1 John 4:8-10, 19) Ne marhẹ wu ne ru sabu dje ọdamẹ ọnana phia uvuẹn akpọ-enyerẹn ọnọ kẹdẹkẹdẹ? Erere ego wu na mẹrẹn wu rhe mwu ọghọ harẹn irhi Jehova? Me yẹ ọnọ ha userhumu wẹn kwomakugbe ame rhe ru ọhọre Osolobrugwẹ? Oma ọnọ merhen ohworho ro lele owẹwẹ yono i Baibol, rẹ ono dje ẹkpahenrhọ harẹn enọ enana wẹn neneyo wẹwẹ rhẹ ekrun ọnọ sabu ‘fi oma are rhẹ ẹguọlọ ọrẹ Osolobrugwẹ, . . . rhẹ arhọ i bẹmẹdẹ ọke rọsa na.’—Jude 21.