ỌKEZẸKO, Jehova o ruẹ ekwakwa izede igbevwunu nọ sabu sẹrorẹ emọvwerhe ọrhẹ ihworho ri na ja sabu sẹrorẹ oma aye. Orhianẹ we rhirhiẹ ekete rọ vwọ ji dabu rhie, ọkezẹko wu mẹrẹn ọnana vwrurhe ne. Ọrẹn, ọkezẹko wu sabu vwẹruọ oborẹ ọ phia-a.

Wu mẹrẹn afen rọ dan rhotọre kẹruọ. Ọ họhọ oborẹ ọ konron. Ọke wa guọlọ damoma ha userhumu riẹn, nọ dan nyarhẹn. Ọke we lele afen na, no pho riobaro. Ogege afen na nọ dan nyarhẹn. Emru owuorowu ọ kuẹn ibekpe yi-i! Wu rhe oborẹ afen na o ruẹ?—

Ọkezẹko, emọ afen na i ha ekete rọ kiki dan rhọ na. Ofẹn o mwu izu afen na taghene wu na sabu mẹrẹn emọyen ji kuẹn aye. Omarana nọ gemai ruẹ taghene ọ konron, nọ sabu suon nẹ ekete emọyen i havwọ. Wu rhe ohworho rọ nọ sabu sẹrorẹ ọwan jerẹ oborẹ izu afen ọ sẹrorẹ emọyen?— Baibol na ọ ha Jehova dje afen re se ugo, rọ ha userhumu rẹn emọyen.—Deuteronomy 32:11, 12.

Ọmọ rọ mai ghanren rẹn i Jehova, yi Jesu. Ọke rọ ha obẹ odjuwu, ọye ohworho ẹhẹn ro vwo omẹgbanhon jerẹ Ọsẹ ye. Ọnọ sabu hẹrote omayen. Ọrẹn, ọke e vwiẹ i Jesu rhiẹ otọrakpọ na, orho vwo omẹgbanho-on. Ọ guọlọ ẹruete.

Neneyo i Jesu ọ sabu ruẹ ọhọre Osolobrugwẹ gba uvuẹn otọrakpọ na, no no rhiẹ ọhworhare ro te dje ne rọ dabu gba. Ọrẹn, Echu nọ damoma ro no kpe i Jesu bọmọke ọke na ono te. Ikuegbe kpahen oborẹ Echu ọ damoma ro no kpe i Jesu ọke rọ ha ọmọvwerhe, ọrhẹ oborẹ i Jehova ọ sẹrorẹ i Jesu lele ọ merhoma omamọ. Wu guọlọ rhe kpahiẹn?—

Ọke re vwiẹ i Jesu, o jiri Echu no ru riẹ nẹ oborẹ ọ họhọ ikereti nọ homaphia uvuẹn obọrẹ ọren ọ va nẹ sa. Ikereti na no suẹn ehworhare ezẹko ra ha ikereti bepha nya ugbo nya oseseri riẹ Jerusalem. Omarana, aye ni nọ kpahen ekete re ne vwiẹ ọmọ onyẹ i Jew ro no rhiẹ orodje na. Ọke ra nọ ehworhare ezẹko ri rhe kpahen aruẹmẹrẹn i Baibol na, aye ni kpahenrhọ ye taghene: “Uvuẹn i Bethlehem.”—Matthew 2:1-6.

Ọke Herod ro rhiẹ orharhere orodje uvuẹn Jerusalem, o rhon kpahen orodje ọkpokpọ re vwiẹre obọ rọ kẹrẹ amwa rọ ha uvuẹn Bethlehem, nọ ta rẹn ihworho ra ha ikereti bepha na: ‘Are i ya guọlọ ọmọ na, nẹ are i rharhumu bru mẹ rhe ma ta mẹ ekete rọ havwọ.’ Wu rhe oborẹ ọsoriẹ Herod ọ guọlọ i Jesu?— Herod ọ guọliẹ nime ọ rioma kpahiẹn, ọ ji guọlọ kpe yi!

Marhẹ Osolobrugwẹ o ru sẹrorẹ ọmọyen?— Ọke ihworho ra ha ikereti bepha na a mẹrẹn i Jesu, aye ni yẹriẹ ẹghẹlẹ. Ọke oru, Osolobrugwẹ nọ nyoma emena ta rẹn ihworho ra ha ikereti bepha na taghene aye i vwa ghwẹrioma bru Herod ghwomara-an. Omarana, aye ni nya izede ọrọrọ rie, aye arha ghwẹrioma riẹ Jerusalemu-u. Ọke Herod o rhon taghene aye i rie ne, nọ tuekwẹre gbangbanhon. Nime Herod ọ guọlọ kpe i Jesu, nọ tare taghene e kpe ọsọsọ emọvwerhe ri ha uvuẹn Bethlehem, ri ha ẹgbukpe eva riotọre! Ọrẹn ọke ọrana, a kpare i Jesu zẹ ne.

Wu rhe oborẹ e ru kpare i Jesu zẹ?— Ọke ihworho ra ha ikereti bepha na e rie hin, Jehova nọ ha orhetio rẹn Joseph ro rhiẹ esa i Mary, taghene aye i zẹ riẹ Egypt. Herod ọ sabu kpe i Jesu avwaye-e. Ọke ẹgbukpe buebun a vrẹn, ọke i Mary ọrhẹ Joseph a kpare i Jesu ghwẹrioma nẹ Egypt, Osolobrugwẹ nọ ha orhetio ọrọrọ rẹn Joseph. Nọ ta riẹn uvuẹn emena taghene ọ kwa riẹ Nazareth, ro rhiẹ ekete i Jesu ono vwo omefuon.—Matthew 2:7-23.

Wu mẹrẹn oborẹ Osolobrugwẹ o ru sẹrorẹ Ọmọyen?— Ọrọmo yẹ wu na ha dje efen ekokamu rẹ izu aye ọ sẹrorẹ aye uvuẹn egbo na, yanghene i Jesu ọke rọ ha ọmọvwerhe? Wa họhọ aye?— Ihworho ezẹko a guọlọ ha ẹkuọn wẹn. Wu rhere aye?—

Baibol na ọ tare taghene Echu ọ họhọ okporokpo ro kwenu, rọ guọlọ ohworho rọ nọ sha re. Jerẹ oborẹ ikporokpo a guọlọ eranmo ekokamu, Echu ọrhẹ ikpodje yi a ji kparahasuẹ emọvwerhe. (1 Peter 5:8) Ọrẹn, Jehova o vwo omẹgbanhon ghwẹ Echu. Jehova ọnọ sabu sẹrorẹ emọyen, yanghene simi aye nẹ kemru kemru rẹ Echu ọ guọlọ ruẹ aye.

Wu ji karorhọ oborẹ urhomu-ẹmro ọrẹ 10 uvuẹn ọbe ọnana ọ tare taghene Dẹbolo ọrhẹ ikpodje yi i guọlọre ne ru?— Ee, aye i guọlọre ne vwobọrhọ irueruo ehware rẹ Osolobrugwẹ o vwo utuoma kpahen. Ọrẹn, ayọmo yi na sabu bru ehware ?— Dẹn, ọhworhare ọrhẹ ọmase ri rọnmọ ne.

Ọrẹn ọrẹ omemwurhọ, imirẹghwa ezẹko a gbẹ emọvwerhe. Orho ru, emọvwerhe na ne yono orharhere uruemru ọnana mie aye. Habaye, aye na ji ha eghọn ehware aye ruiruo izede rọ sọre. Ọnana yẹ oborẹ ọ phiare uvuẹn amwa i Sodom ọke ahwanren. Baibol na ọ tare taghene ihworho ri ha amwa na, “nẹ ọmọvwerhe riẹ ọmomaren,” ni damoma aye ine lele ehworhare ri rhiẹ ọpha ruẹ i Lot bru ehware.—Genesis 19:4, 5.

Omarana, jerẹ oborẹ i Jesu ọ guọlọ ẹruete, omaran wu ji guọlọ ohworho rọ nọ sẹroruọ nẹ abọ imirẹghwa, ọrhẹ emọvwerhe erọrọ ra guọlọ leluo bru ehware. Ọgbọ buebun, ihworho enana a gemai ruẹ taghene aye igbehian. Aye ina sabu ta wẹn taghene aye ina dẹ emru wẹn, orhianẹ wu vive taghene wu ta rẹn awọrọ kpahen oborẹ aye a guọlọ leluo ruẹ na-a. Ọrẹn ihworho enana i họhọ Echu, nime oborẹ ọnọ lẹrhẹ oma merhen aye ọvo yẹ aye e roro kpahan. Aye na damoma ruẹ ọnana nyoma aye e lele emọvwerhe bru ehware. Uruemru ọnana ọsọre omamọ!

Wu rhe oborẹ aye e ruẹ ọnana lele?— Aye ina sabu rha ha abọ gbule eghọn ehware ọnọ. Yanghene aye ina sabu ha eghọn ehware aye gbule ọnọ. Ọrẹn, wu vwe jenẹ ohworho owuorowu hobọte osiọ yanghene ohoro-o. Wu vwe jenẹ omizuo, ọsọ, yanghene izuo dede nọ haye ruiruẹ-ẹn. Eghọn ugboma enana erẹ odjahen.

Marhẹ wu ne ru sẹrorẹ oma nẹ ihworho re ruẹ ekwakwa ri biomurun?— Ọrukaro, wu we jenẹ ohworho owuorowu nọ ha eghọn ehware ọnọ ruiruẹ-ẹn. Orhianẹ ohworho ọ guọlọ haye ruiruẹn, gbe korunu ji ta: “Jovwo! Mi na ta!” Ohworho na ọrhọ ta taghene wẹwẹ yi suẹ oborẹ ọ phiare na, wu vwe kwerhọ ye-e. Ọrana ofian. Ya ta rẹn awọrọ kpahiẹn, o toro oborẹ ohworho na ọ havwọ-ọ! Ta rẹn awọrọ kpahiẹn, ọrhọ tobọ rhianẹ ohworho na ọ ta wẹn taghene wu vwa ta rẹn ohworho owuorowu-u. Ohworho na ọrhọ tobọ djofẹn mwuo yanghene vive wẹn taghene ono ruẹ ẹghẹlẹ wẹn, zẹ je vwo ne wu ya ta rẹn awọrọ kpahen oborẹ o ruru.

Wu vwa zofẹ-ẹn, ọrẹn rhe oma rhua. Eri vwiẹruọ i rha ha orhetio wẹn ne wu kẹnoma rẹn aruẹ ihworho ezẹko, yanghene aruẹ ekete ezẹko, o fori ne wu kerhọ aye. Wu rhe ru te omaran, ihworho ibiobiomu i sabu ha ẹkuọn wẹ-ẹn.