URHOMU-ẸMRO UYONO 37

O Fori ne mi Bromarhame?

Kokarhọ ọrẹ o rhiẹ urhomẹmro yanghene ofian usuẹn ẹmro enana:

Olele Kristi ono vi bromarhame.

□ Urhomẹmro

□ Ofian

Ihworho e bromarhame nẹ aye i sabu kẹnoma nẹ ọdandan.

□ Urhomẹmro

□ Ofian

Omebrurhame ọnọ lẹrhuọ vwo usimirhọ.

□ Urhomẹmro

□ Ofian

We rhe bromarhame-e, Osolobrugwẹ ọ mọrọn edandan enọ ba obọ-ọ.

□ Urhomẹmro

□ Ofian

Igbehian enọ e rhe bromarhame, ọrana o mevirhọ taghene wu mwuegbe wu ne bromarhame ne.

□ Urhomẹmro

□ Ofian

WA RHA huvwele irhi Osolobrugwẹ, vwo obọdẹn onyerẹnkugbe rhẹ ọye, jeghwai ta rẹn awọrọ kpahen esegburhomẹmro ọnọ, ọnana ọnọ sabu rha lẹrhuọ roro kpahen omebrurhame. Ọrẹn, marhẹ wu ne ru rhe taghene wu mwuegbe omebrurhame ne? Na sabu kpahenrhọ onọ ọrana, jene ni ẹmro ri ha oberun na so sẹ aye efian yanghene urhomẹmro.

● Olele Kristi ono vi bromarhame.

Urhomẹmro. Jesu o jurhi rẹn idibo yi nẹ aye i bromarhame. (Matthew 28:19, 20) Itiọrurhomẹmro, Jesu ọ tobọ bromarhame. Ne wu sabu hẹrokele i Kristi, wu ne vi mwuovwan omebrurhame vwẹre jeghwai brorhiẹn wu na kpare idjaghwẹ na.

● Ihworho e bromarhame nẹ aye i sabu kẹnoma nẹ ọdandan.

Ofian. Omebrurhame o djephia taghene wu homakpahontọre rẹn i Jehova ne. Ohworho ọrhọ homakpahontọre, ọnọ ji sabu sẹrorẹ ekwakwa irhorhomu ri jerie ri ji rhiẹ odjahen riẹn. Wu homakpahontọre rẹn i Jehova nime wu guọlọ nyalele irhi enẹyen.

● Omebrurhame ọnọ lẹrhuọ vwo usimirhọ.

Urhomẹmro. Baibol na ọ tare taghene ohworho ono bromarhame vwẹre nọ ki sabu vwo usimirhọ. (1 Peter 3:21) Omebrurhame ọ họhọ igho ra kwa rhotọre rọ nọ sẹrorẹ ọwan orhianẹ emru kpregede ọ phiare-e. Wu bromarhame nime wu vwo ẹguọlọ kpahen i Jehova, wu ji guọlọ ha ọsoso ọmuduo ga ye bẹmẹdẹ.—Mark 12:29, 30.

● We rhe bromarhame-e, Osolobrugwẹ ọ mọrọn edandan enọ ba obọ-ọ.

Ofian. James 4:17 nọ tare: “Orhianẹ ohworho o rhe oborẹ e ruẹ oborẹ ọgbare ọrẹn o vwo ruie-e, ọnana ọdandan hariẹn”—sẹ o bromarhame yanghene o bromarhame-e. Omarana wu rhe rhe oborẹ ọgbare, wu ji do te edje ne wu ne brorhiẹn eghoghanren kpahen akpenyerẹn ọnọ, ọkezẹko ọnana yẹ ọke rọ mai serhọ wu ne lele eri vwiẹruọ yanghene Olele Kristi ọrọrọ rọ do te edje ne tẹmro kpahen erhirhiẹ na. Izede ọrana, ne wu na sabu rhe oborẹ wu ne ruo ne wu sabu mwuovwan omebrurhame.

● Igbehian enọ e rhe bromarhame, ọrana o mevirhọ taghene wu mwuegbe wu ne bromarhame ne.

Ofian. Wẹwẹ ọvo yi ne brorhiẹn taghene wu guọlọ bromarhame. (Psalm 110:3) Wu ne ki bromarhame, jenẹ ọ dabu mwuo ẹro taghene wu rhe oborẹ o mevirhọ re ne rhiẹ owuọwan usuẹn Iseri Jehova, wu ji mwuegbe wu na kpare idjaghwẹ na ne.—Ecclesiastes 5:4, 5.

Omebrurhame o Wene Akpenyerẹn Ohworho

Omebrurhame idjaghwẹ ro wene akpenyerẹn ohworho rọ ji rhua erere buebun sa. Ọke owu ọvo, o ji vwo owian, nọyẹ ọrẹ ene nyerẹnmwu omẹhakpahontọre ọwan rẹn Jehova.

Wu mwuegbe wu na homakpahontọre ne? Orhiomaran, o fori nẹ oma ọ merhuọn. Erere ri ha obaruọ i bunrun omamọ—wu na sabu ga i Jehova rhẹ ọsoso ọmudu ọnọ, jeghwai nyerẹn akpọ ro djephia taghene wu ghini homakpahontọre riẹn ne.—Matthew 22:36, 37.

UVUẸN URHOMU-ẸMRO RỌ HA KPAHEN ỌNANA

Yono oborẹ wu ne ru bru ẹkẹ te oma, neneyo wu sabu nyerẹn akpọ ro serhọ.

KEY SCRIPTURE

“Are i ha oma are kpahontọre jerẹ izobo ro nyerẹn, rọ fonron, rẹ Osolobrugwẹ o ji vwo ekwerhọ kpahen, nọyẹ, ogame rọ fonron rhẹ omẹgbanhon iroro are.”—Romans 12:1.

URHEBRO

Nekpẹn userhumu mie eri vwiẹruọ yanghene ohworho ro te edje ne uvuẹn ukoko na, nọ sabu ha userhumu wẹn mwuovwan omebrurhame.—Acts 16:1-3.

WU RHERI . . .?

Omebrurhame owu usuẹn “oka” ọghoghanren rọ nọ sabu lẹrhuọ vwo usimirhọ.—Ezekiel 9:4-6.

OBORẸ WU NA SABU RU!

Ne mi sabu mwuovwan omebrurhame, mi ne ruẹ irherhe mẹ kpahen iyono i Baibol enana kodorhọ: ․․․․․

Oborẹ mi guọlọ nọ eri vwiẹre mẹ kpahen urhomu-ẹmro ọnana yẹ ․․․․․

ME WU RORORI?

● Mesoriẹ o fo na kpare idjaghwẹ omebrurhame?

● Me yọ nọ sabu lẹrhẹ uphuphẹn brokpakpa kpare idjaghwẹ omebrurhame?

● Me yọ nọ sabu lẹrhẹ uphuphẹn tirierhumu rọ nọ homakpahontọre jeghwai bromarhame?

[Ẹmro Ikpokpoto]

Omebrurhame ọ ha userhumu mẹ brorhiẹn ẹghwanren ọke ephian, jeghwai lẹrhe mẹ kẹnoma rẹn irueruo ri na sabu ha ẹkuọn mẹ.—Holly

[Ekpeti]

Enọ ra mai nọ kpahen omebrurhame

Me yẹ omebrurhame o mevirhọ? Ọke re dumuo rhẹ uvuẹn ame jeghwai kparuọ nẹ uvuien, ọrana o mevirhọ taghene wu rha hatua ọdamẹ omobọ-ọ, ọrẹn ọhọre i Jehova.

Me yo mevirhọ ne wu homakpahontọre rẹn i Jehova? O mevirhọ taghene ọhọre i Jehova ye wu na ha karo, ukperẹ ono rhiẹ emru ọrọrọ. (Matthew 16:24) Ne wu ki bromarhame, o fori ne wu homakpahontọre rẹn i Jehova nyoma ẹrhomo.

Me yo fori wu ha akpenyerẹn ọnọ ru bọmọke wu ne ki bromarhame? O fori ne wu rha nyalele oborẹ i Baibol na ọ tare, jeghwai ta rẹn awọrọ kpahen esegburhomẹmro ọnọ. O fori ne wu vwo obọdẹn onyerẹnkugbe rhẹ Osolobrugwẹ nyoma ẹrhomo ẹnẹ ọrhẹ uyono i Baibol. O fori ne wu brorhiẹn wu na ha ẹga rẹn i Jehova nẹ ẹhẹn rhe, ukperẹ wu na lẹrhẹ awọrọ gba ga i Jehova.

O vwo ẹgbukpe re te vwẹre e ki mwuovwan omebrurhame? Ẹjo. Ọrẹn, o fori ne wu vwo irherhe rọ gbare jeghwai vwẹruọ oborẹ omebrurhame o mevirhọ.

Me wu ne ruo orhianẹ wu guọlọ bromarhame ọrẹn eri vwẹruọ e kwe-e? Ọkezẹko aye i guọlọre ne wu ji vwo irherhe i Baibol na rhọ. Ha ukẹro ọghoghanren ni urhebro aye, jeghwai ha ọke ọnana bọn onyerẹnkugbe ọnọ rhẹ i Jehova gbanhon.—1 Samuel 2:26.

[Ekpeti]

Worksheet

Wa djiroro wu ne bromarhame?

Ha enọ ọrhẹ ẹmro ri ha obotọre na ni oma so, sẹ wu mwuovwan omebrurhame ne. Wu na ki ya ẹkpahenrhọ ọnọ, jenẹ o mwuo ẹro taghene wu se ekete i Baibol sansan ra rionbọrhọ.

Izede ego we ru djephia taghene wa hẹroso i Jehova?—Psalm 71:5. ․․․․․

Marhẹ wu ru djephia taghene wu yono omẹgbanhon iroro ọnọ ne, nọ sabu rhe ovẹnẹ oborẹ ọgbare ọrhẹ oborẹ ọsọre?—Hebrews 5:14. ․․․․․

Ọgbọ emwa wa nẹrhomo? ․․․․․

Me wa nẹrhomo kpahan, me yẹ ẹrhomo na o djephia kpahen ẹguọlọ wu vwo kpahen i Jehova?—Psalm 17:6. ․․․․․

Ya ekwakwa wu guọlọ hunute uvuẹn ẹrhomo ọnọ rhotọre.

Ọgbọ emwa yi we ruẹ uyono i Baibol omobọ ọnọ?—Joshua 1:8. ․․․․․

Me wa haba ruẹ uyono i Baibol omobọ ọnọ? ․․․․․

Ya ekwakwa wu guọlọ haba uyono i Baibol omobọ ọnọ rhotọre. ․․․․․

Owian aghwoghwo ọnọ o mwidjẹn? (Jerẹ udje: Wu na sabu dje irhomu-ẹmro i Baibol elolọhọ rẹn awọrọ? Wa rharhumu bru ihworho ri dje omamerhomẹ phia? Wa damoma ne wu sabu vwo ihworho wa ha i Baibol yono?)

□ Ee □ Ẹjo

We vwobọrhọ owian aghwoghwo na ọrhọ tobọ rhianẹ eri vwiẹruọ a nya-a?—Acts 5:42.

□ Ee □ Ẹjo

Ya ekwakwa wu guọlọ wian kpahen uvuẹn owian aghwoghwo na.—2 Timothy 2:15. ․․․․․

We riẹ uyono ukoko ọke ephian, gbinẹ wa nyajẹ ezẹko vwo?—Hebrews 10:25. ․․․․․

Marhẹ we ru toroba uyono ukoko na? ․․․․․

We riẹ uyono ukoko orhianẹ eri vwiẹruọ a nya-a (orhianẹ aye yi ta wẹn taghene wu vwa nya vwo-o)?

□ Ee □ Ẹjo

Wu na sabu ta taghene oma ọ merhuọn wu ne ruẹ ọhọre Osolobrugwẹ?—Psalm 40:8.

□ Ee □ Ẹjo

Wu na sabu hunute erhirhiẹ we fiẹ ọhiẹn otuẹdẹre kparobọ?—Romans 12:2. ․․․․․

Me wu ne ruo neneyo ẹguọlọ wu vwo kpahen i Jehova ọ sabu gbanhon?—Jude 20, 21. ․․․․․

Wu na ji ga i Jehova ọrhọ tobọ rhianẹ eri vwiẹruọ ọrhẹ igbehian enọ i dobọ ogame yen ji?—Matthew 10:36, 37.

□ Ee □ Ẹjo

[Ifoto]

Omebrurhame ọ họhọ orọnmo nime o wene akpenyerẹn ohworho, o fo na ha ukẹro ghemeghe nie-e.