URHOMU-ẸMRO 8

Marhẹ mi ne ru mwu obọdẹn igbehian?

“Mia rha tuekwẹre, mi guọlọ ohworho mi na sabu ta ẹhẹn mẹ riẹn. Mie rhe mwuomarhọ, mi guọlọre nẹ ohworho ọ ta mẹ taghene ekwakwa ine serhọ. Oma ọrhọ merhen mẹ, ni mia guọlọ ohworho ro no leli mẹ ghọghọ. Ha mẹ, ọ ghanranren omamọ ne vwo igbehian.”—Brittany.

ỌKE wa ha ọmọvwerhe wu guọlọ emọvwerhe erọrọ re wu ne lele ruiruẹn, ọrẹn vwana we rhiẹ uphuphẹn ne na, wu guọlọ obọdẹn igbehian. Me yẹ ovẹnẹ na?

Emọvwerhe e lele awọrọ ruiruẹn neneyo aye i je rhe rhirhiẹ ye kologho.

Ọrẹn ugbehian o leluo ghwọghọ ọke kugbe, o ji vwo ọdamẹ kpahen oborẹ ọ ghanren wẹn.

Habaye, Baibol na ọ tare taghene “obọdẹn ugbehian o dje ẹguọlọ phia ọke ephian, ọye jeghwai omizu re vwiẹre uvuẹn ọke ebẹnbẹn.” (Proverbs 17:17) Aruẹ ugbehian ọnana ọ vẹnẹ ọrẹ ihworho we lele ruiruẹn ọke wa ha ọmọvwerhe!

Iroro rọ gbare: Wa rha ghwanran ne, wu guọlọ igbehian

1. Ri vwo omamọ uruemru

2. Ra dabu ruẹ dẹndẹn

3. Ri na ha userhumu wẹn rhiẹ omamọ ohworho

Onọ: Marhẹ wu ne ru mwu aruẹ igbehian erana? Jena ta kpahen aye owuowu.

Ọrukaro—Omamọ Uruemru

Oborẹ o fori ne wu rhe. Rhẹ ihworho ephian ri haruọ mwu ugbehian yi na sabu rhiẹ obọdẹn ugbehia-an. Baibol na ọ tare taghene “o vwo igbehian ri vwo omwemẹ rẹ aye ina ghwọghọ owuowọnwan.” (Proverbs 18:24) Ọrana ghini urhomẹmro? Roro kpahen ọnana: Ohworho ọ haruọ mwu ugbehian dẹ ne nime ọ guọlọre wu ruẹ emru riẹn? Ohworho rọ haruọ mwu ugbehian, ọ ta erharhere ẹmro kpahuọn oberhumuo dẹ ne? Aruẹ emru ọnana ọnọ sabu ghwọghọ ẹruẹhaso wu vwo kpahen ugbehian na. * Karorhọ taghene obọdẹn ugbehian owu, o rhomu ghwẹ erharhere igbehian buebun!

Oborẹ wu na sabu ru. Djẹ igbehian ri vwo uruemru wu na sabu hẹrokele.

“Ihworho ephian a ta omamọ ẹmro kpahen ugbehian mẹ Fiona. Mi ji guọlọ na ta omamọ ẹmro kpahen mẹ. Mi guọlọre na ha omamọ ukẹro ni mẹ. Uruemruie o jeri mẹ omamọ.”—Yvette, ẹgbukpe 17.

Damu ọnana.

1. Se Galatians 5:22, 23.

2. Nọ oma, ‘Igbehian mẹ e dje “omamọ ẹhẹn ọfuanfon na” phia?’

3. Ya odẹ igbehian ri mia kẹruọ rhotọre. Ya uruemru aye owuowu kẹrẹ odẹ aye.

Odẹ

․․․․․

Uruemru

․․․․․

Userhumu: Orhianẹ orharhere uruemru ye wu ya rhotọre, ono rhomu ne wu mwu igbehian erọrọ!

Ọreva—Ra Dabu Ruẹ Dẹndẹn

Oborẹ o fori ne wu rhe. Wu rhe brokpakpa mwu igbehian, wu sabu mwu obọdẹn igbehia-an. Baibol na ọrhọ ta: “Ohworho ro lele akpa ruẹ kugbe ọnọ rioja.” (Proverbs 13:20) Ẹmro na “akpa” o mevirhọ ihworho ra vwa damoma uvuẹn isukuru yanghene ihworho ri vwe rhe ọbe-e. Ukpomaran, enana ihworho ra vwa kerhọ urhebro, ji ruẹ oborẹ ọsọre. Wa guọlọ aruẹ igbehian enana-a!

Oborẹ wu na sabu ru. Ukperẹ wu na ha ihworho ephian mwu igbehian, dabu jomarhotọre sanọ igbehian enọ. (Psalm 26:4) A vwa haye ta taghene e ni ihworho ru-u. Uvuẹn erhirhiẹ ọnana, ne wu jomarhotọre sanọ igbehian enọ, o mevirhọ taghene wu na “mẹrẹn ovẹnẹ rọ havwiẹ uvwre ọvwata ọrhẹ ọvwọkon, uvwre ohworho rọ ga Osolobrugwẹ ọrhẹ ohworho rọ vwọ ga ye.”—Malachi 3:18.

“Oma ọ merhenren mẹ taghene eri vwiẹre mẹ i ha userhumu mẹ mwu igbehian, nọyẹ, otuẹdẹre mẹ re ruẹ rhomẹ uvuẹn ukoko na.”—Christopher, ẹgbukpe 13.

Kpahenrhọ enọ ri ha obotọre na:

Mie rhe lele igbehian mẹ ghwọghọ ọke kugbe, ofẹn o mwu mẹ taghene aye ina riẹrie mẹ ru oborẹ ọsọre?

□ Ee

□ Ẹjo

Ofẹn o mwu mẹ mi ne dje igbehian mẹ rẹn eri vwiẹre mẹ, nime mie roro taghene o je aye-e?

□ Ee

□ Ẹjo

Userhumu: Orhianẹ ẹkpahenrhọ ọnọ rẹn enọ ri ha oberun na ee, gbe mwu igbehian erọrọ ri vwo emamọ iruemru uvuẹn ukoko na.

Ọresa—Eri na ha Userhumu Wẹn Rhiẹ Omamọ Ohworho

Oborẹ o fori ne wu rhe. Baibol na ọrhọ ta: “Orharhere okugbe o biomu omamọ uruemru.” (1 Corinthians 15:33, Today’s English Version) Uphuphẹn owu re se Lauren nọ tare: “Mi rhe ruẹ oborẹ o je igbehian mẹ obẹ isukuru, aye ne rhiabọ dedi mẹ. Mie vwo igbehian bu-un, omarana ni mie ruẹ oborẹ aye i tare ephian, nẹ aye i ja rha fan ugbehian ame.” Lauren nọ mẹrẹnvwrurhe taghene wu rhe ru kemru kemru rẹ awọrọ i tare, aye ni ne rhe suon. O fo ne ruo omara-an!

Oborẹ wu na sabu ru. Kẹnoma rẹn ihworho ri guọlọre taghene wu wene akpenyerẹn ọnọ fọkiẹ aye. Wu rha kpare udjoghwẹ ọnana, igbehian buebun ina zẹ jovwo; ọrẹn oma ọnọ merhuọn, wu ne ji vwo uphẹn wu ne mwu emamọ igbehian ri na lẹrhuọ rhiẹ omamọ ohworho.—Romans 12:2.

“Ugbehian mẹ re se Clint ọ sasare, o ji roro rẹn ohworho, fọkiẹ ọnana, mia mẹrẹn urhebro mie yi ọke ephian.”—Jason, ẹgbukpe 21.

Nọ oma enọ ri ha obotọre na:

Mia sẹ osẹme, tẹmro, yanghene ruẹ oborẹ ọsọre nẹ oma ọ sabu merhen igbehian mẹ?

□ Ee

□ Ẹjo

Mia fọkiẹ igbehian mẹ riẹ ekete ri vwe serhọ, ri mia vwa nya bi?

□ Ee

□ Ẹjo

Userhumu: Orhianẹ ẹkpahenrhọ ọnọ rẹn enọ enana ee, gba nekpẹn userhumu mie eri vwiẹruọ yanghene omirẹghwa ọrọrọ. Wu rhe rhiẹ Oseri Jehova, wu na ji sabu nekpẹn userhumu mie ọkpako ukoko ọnọ, ji ta riẹn nọ ha userhumu wẹn mwu emamọ igbehian ri na lẹrhuọ rhiẹ omamọ ohworho.

SE URHOMU-ẸMRO ỌNANA RIARORHỌ UVUẸN VOLUME 2, URHOMU-ẸMRO 9

UVUẸN URHOMU-ẸMRO RỌ HA KPAHEN ỌNANA

Ugbehian wu vwori yanghene ọmuduo, ọ riẹruọ ne wu ruẹ oborẹ ọsọre? Se kpahen oborẹ wu ne ru kẹnoma rẹn oriẹriẹme na!

[Ekete Ra Djokarhọ]

KEY SCRIPTURE

“O vwo ugbehian rọ kpẹnkpẹn ghwẹ omizu.”—Proverbs 18:24.

URHEBRO

Wu rha damoma nyerẹnmwu irhi egbagba Osolobrugwẹ, awọrọ ra ji damoma ruẹ omaran ni na sabu tikẹruọ. Aye ni ne rhiẹ obọdẹn igbehian wẹn!

WU RHERI . . .

Osolobrugwẹ o vwo ni ọwan ruẹ-ẹ, ọrẹn ọ dabu sanọ ihworho ri ne ‘rhiẹ ọpha ruiẹ uvuẹn oghwọgbọ ọnẹyen.’—Psalms 15:1-5.

oborẹ wu na sabu ru!

Ne mi sabu mẹrẹn obọdẹn igbehian, mi ne ․․․․․

Ihworho ri kpako ghwẹ mẹ mi guọlọ rhiẹ ugbehian aye yẹ ․․․․․

Oborẹ mi guọlọ nọ eri vwiẹre me kpahen oghwẹmro ọnana yẹ ․․․․․

ME WU RORORI?

● Iruemru ego ye wu guọlọre nẹ igbehian enọ i vwo, mesoriẹ?

● Iruemru ego yo fori ne wu vwo ne wu sabu rhiẹ omamọ ugbehian?

Ẹmro Ikpokpoto]

Ọke eri vwiẹre mẹ a ha urhebro mẹ mi kẹnoma rẹn igbehian mẹ ezẹko, ni mie roro taghene igbehian enana ọvo yo fori mi kwomakugbe. Urhebro aye i yẹre mẹ na o serhọ omamọ, nime ọke mia kẹnoma rẹn igbehian erana, ni mi mẹrẹnvwrurhe taghene mi na ji sabu mwu obọdẹn igbehian erọrọ.—Cole

[Ekpeti]

damẹ irorẹdjẹ enana

Lele eri vwiẹruọ ta kpahen igbehian aye. Nọ aye kpahen aruẹ igbehian aye i vwori ọke aye a ha ẹgbukpe wu havwọ na. Aye i vioja nime aye i djẹ aruẹ igbehian erana? Orhiomaran, mesoriẹ? Nọ aye oborẹ wu ne ru kẹnoma rẹn aruẹ ebẹnbẹn ezẹko aye i dẹrughwaroghwu.

Dje igbehian enọ rẹn eri vwiẹruọ. Orhianẹ ofẹn o mwuo wu ne dje igbehian enọ rẹn eri vwiẹruọ, gba nọ oma, ‘Mesoriẹ?’ Igbehian we lele i vwo iruemru ezẹko ri na lẹrhẹ eri vwiẹruọ biomevwan? Orho rhiomaran, o fori ne wu gbẹro rhotọre sanọ igbehian enọ.

Rhiẹ ohworho rọ dabu kerhọ awọrọ. Dje ọdamẹ okokodo rẹn igbehian enọ.—Philippians 2:4.

Rhiẹ ohworho rọ harhomẹ. Wu vwe fiẹrorhọ taghene awọrọ i ruo sọ-ọ. “Ọwan ephian e ruẹ sọ ọgbọ buebun.”—James 3:2.

Wu vwe kpokpo igbehian enọ ọke ephia-an. O fo ne wu rhe lele aye sa lelie rie-e. Obọdẹn igbehian e rhirhiẹ ye ọke ephian ra guọlọ aye.—Ecclesiastes 4:9, 10.

[Ifoto]

Wu rhe ru kemru kemru rẹ awọrọ i tare, aye ni ne rhe suon