URHOMU-ẸMRO UYONO 25

Marhẹ mi ne ru tiobọnu irueruo ọfanrhiẹn ra bẹlẹ oma?

“Mi tuẹn irueruo ra bẹlẹ oma rhọ ọke mia ha ẹgbukpe ẹrẹnren. Ọke oru, ni mi yono kpahen ukẹro Osolobrugwẹ ọ ha ni uruemru ọrana. Omarana, mi rha bẹlẹ omamẹ hin, ẹhẹn mẹ no seriotọre. Ni mia nọ omamẹ, ‘Osolobrugwẹ ọnọ sabu vwo ẹguọlọ kpahen aruẹ ohworho jerẹ omẹmẹ?’”—Luiz.

Wu rhe te uphuphẹn ne, ojemẹ ehware nọ gbanhan omamọ. Fọkiẹ ọnana, wu na sabu se rhẹ ufi irueruo ọfanrhiẹn ra bẹlẹ oma. * Ihworho buebun ina sabu ta taghene uruemru ọrana ọ sọ-ọ. Aye ina tobọ sabu ta taghene uruemru na “ọ vwọ ha ẹkuọn rẹn owuorọwa-an.” Ọrẹn, o vwo iroro ro serhọ ro soriẹ o fo na kẹnoma rẹn uruemru ọrana. Ọnyikọ Paul nọ tare: ‘Are i gbe kpe oruru ugboma are jerẹ oruru ehware ọgbogbanhon.’ (Colossians 3:5) Irueruo ọfanrhiẹn ra bẹlẹ oma ọ lẹrhẹ oruru ehware gbanhanrhọ ukperẹ ono kpe yi. Habaye, roro kpahen iroro enana:

●Irueruo ra bẹlẹ oma ọ lẹrhẹ ohworho ni awọrọ sakamu. Jerẹ udje, ohworho ọrhọ bẹlẹ oma, omayen ọvo yo roro kpahan ọke ọrana.

●Irueruo ra bẹlẹ oma ọ lẹrhẹ ohworho ni awọrọ taghene aye ekwakwa ra ha ruẹ irueruo ehware, neneyo oruru ehware aye ọ sabu zien.

●Ọdamẹ omobọ re vwo fọkiẹ irueruo ra bẹlẹ oma, ọ vwọ sabu lẹrhẹ eri rọnmọ ne lele ere aye i rọnmọren bru ehware izede rọ nọ vuọn aye evwa-an.

Ukperẹ wu ne fiomarhẹ irueruo ọfanrhiẹn ra bẹlẹ oma neneyo oruru ehware wu vwori ọ sabu zien, damoma vwo omerhesun. (1 Thessalonians 4:4, 5) Ne wu sabu ruẹ ọrana, Baibol na ọ ha urhebro phia ne wu kẹnoma rẹn erhirhiẹ ri na sabu lẹrhuọ vwo oruru ehware. (Proverbs 5:8, 9) Ọrẹn, me wu ne ruo orhianẹ wu vwo uruemru ra bẹlẹ oma? Ọkezẹko wu damoma wu na dobọji ne, ọrẹn wa ji sabu dobọji-i. Ọnọ sabu phẹrẹ wu ne roro taghene wu sabu dobọjẹ, ji ruẹ oborẹ Osolobrugwẹ ọ guọlọre-e. Aruẹ iroro ọrana yo gberẹ idama owu re se Pedro. Nọ tare, “Mi rha bẹlẹ omamẹ hin ne, ẹhẹn mẹ no seriotọre. Ni mie roro taghene mi sabu ghwẹriẹ-ẹ. Nọ bẹn mi na nẹrhomo.”

Orhianẹ wu vwo aruẹ iroro ọrana, wu vwe fiobọrhotọre-e. Wu na sabu fikparobọ. Iphuphẹn ọrhẹ imirẹghwa buebun i fiẹ irueruo ra bẹlẹ oma kparobọ ne. Wu na ji sabu dobọ ye ji!

Re Nyerẹnghele Ẹhẹn Iborhin

Jerẹ oborẹ wu mẹrẹn ne, ihworho ri vwo uruemru ra bẹlẹ oma e vwo ẹhẹn iborhin omamọ. O vwo ẹfro-o, “omemwurhọ uvuẹn izede Osolobrugwẹ,” ọnọ sabu lẹrhẹ ohworho tiobọnu uruemru ọrana. (2 Corinthians 7:11) Ọrẹn wu rhe mwuomarhọ phan, ọnana ọnọ lẹrhẹ ẹhọn seriotọre. Ọnọ sabu lẹrhuọ roro taghene wu sabu fiẹkparobọ-ọ.—Proverbs 24:10.

Omarana, damoma ha ukẹro ro serhọ ni erhirhiẹ na. Irueruo ọfanrhiẹn ra bẹlẹ oma uruemru ijẹfuọn. Ọnọ sabu lẹrhuọ rhiẹ ọvrẹn rẹn “ojemẹ sansan,” ọ ji lẹrhẹ ohworho vwo iruemru ri vwe serhọ. (Titus 3:3) Ọrẹn, irueruo ra bẹlẹ oma ọrhẹ irueruo ọfanrhiẹn i vẹnẹren. (Jude 7) Orhianẹ wa ji sabu dobọ uruemru ra bẹlẹ oma ji-i, wu vwe ni oma taghene wu ruẹ ọdandan ra na ja sabu harhomu ne-e. Oborẹ ọnọ ha userhumu wẹn yẹ ọrẹ wu ne vwo omerhesun, ne wu je fiobọrhotọre!

Wu rha bẹlẹ oma hin, ẹhọn ọnọ sabu kiki seriotọre. Ọrana ọrhọ phia, karorhọ ẹmro rọ ha uvuẹn Proverbs 24:16: “Ọvwata ọnọ sabu se ọgbọ irhiruẹ, ọnọ ji rharhumu vẹnrẹn, ọrẹn, ọvwọkon na, ọnọ kproghwẹ nyoma ukpokpogho.” Wu rhe se ukwọgbọ dede, ọrana o mevirhọ taghene wẹwẹ nẹ ọvwọko-on. Omarana, wu vwe fiobọrhotọre-e. Ukpomaran, roro kpahen erhirhiẹ rọ lẹrheruọ se rhẹ ufi na, jeghwai damoma kẹnoma riẹn ọke ọrọrọ.

Dabu roro kpahen ẹguọlọ ọrhẹ arodọmẹ Osolobrugwẹ. Ọbo ijoro David ro ji ruẹ ọdandan fọkiẹ ovwiẹlẹme omobọ ye nọ tare: “Jerẹ oborẹ ọsẹ o dje arodọmẹ harẹn emọyen, Jehova o dje arodọmẹ harẹn era zofẹn yen. Fọkime ọye ọ dabu rhe oborẹ a maren ọwan lele, ọ karorhọ taghene ọwan eyẹn.” (Psalm 103:13, 14) Jehova o rheri taghene ọwan iruedandan, o ji ‘mwuegbe rọ nọ harhomu” ọwan. (Psalm 86:5) Habaye, ọ guọlọre na rha damoma ruẹ riaro. Omarana, idjaghwẹ ego ya na sabu kpare ne fiẹ uruemru ra bẹlẹ oma kparobọ?

Ni iruẹn ọrhẹ ughe enọ so. We nughe, kerhọ ikpekporo, yanghene riẹ iwẹbsaiti re jiri irueruo ọfanrhiẹn? Uvuẹn ẹrhomo ọbo ijoro na ọ nẹ vwe Osolobrugwẹ, nọ tare: “Wu ne jẹ ukẹro mẹ mẹrẹn ogbegbemẹrẹ-ẹn.” *—Psalms 119:37.

Rha damoma roro kpahen ekwakwa erọrọ. Olele Kristi owu re se William nọ ha urhebro ọnana phia: “Bọmọke wu ne ki semerhẹn, se ekwakwa ra bọn kpahen i Baibol na. Ọ ghanranren omamọ neneyo oborẹ wu ne roro kẹta uvuẹn ẹdẹ na, no sekpahen i Baibol na.”—Philippians 4:8.

Ta rẹn ohworho kpahen obẹnbẹn wu vwori. Ọkezẹko fọkiẹ ofa wu kwe ta rẹn ọwọrọ kpahen obẹnbẹn na-a. Ọrẹn, wu rha ta rẹn ohworho kpahiẹn, ọnọ sabu ha userhumu wẹn fiẹ obẹnbẹn na kparobọ! Ọrana yẹ oborẹ Olele Kristi owu re se David ọ mẹrẹnvwrurhe. Nọ tare: “Mi lele ọsẹ mẹ ta kpahen ẹmro na ọrẹ odjahen. Oborẹ ọ ta mẹ ọ sẹre mẹ ẹro-o. Rhẹ echẹẹ vwiọrọvwiọrọ, nọ ta mẹ, ‘Wa lẹrhẹ oma merhen mẹ.’ Ọsẹ mẹ o rheri taghene ọ lọhọ mi ki ta riẹn kpahen ẹmro na-a. Ẹmro urhebro ọrana rọ ta mẹ, nọ lẹrhẹ omwemẹ mi ne tiobọnẹ uruemru na gbanhonrhọ.

“Ọke oru, ọsẹ mẹ no dje ekete i Baibol ezẹko mẹ rọ lẹrhere mẹ rhe taghene ‘mi na sabu dobọ ye ji,’ no ji dje ekete i Baibol erọrọ mẹ ni mi sabu rhe oborẹ orusọ mẹ ọ ghwa te. Nọ ta mẹ taghene ana dobọ ikuegbe na ji avwaye vwẹre, jeghwai ta kpahiẹn ọke ọrọrọ. Nọ ta mẹ taghene mi rha bẹlẹ omamẹ ọgbọrọrọ mi vwe jẹ ẹhẹn iborhin kpokpi mẹ pha-an, ọrẹn mi damoma neneyo mi suẹn omamẹ jiri vrẹn ọke ọrukaro na.” Marhẹ ọnana ọ hobọte i David lele? Nọ tare: “Ohworho ọrọrọ orho rhe kpahen obẹnbẹn wu vwori jeghwai ha userhumu wẹn, ọ rhua erere ọduado sa.” *

UVUẸN URHOMU-ẸMRO RỌ HA KPAHEN ỌNANA

O vwo irueruo ehware owuorowu re se ehware ghemeghe-e. Se kpahiẹn.

[Ekete Ra Djokarhọ]

KEY SCRIPTURE

“Kẹnoma rẹn ojemẹ iphuphẹn, ọrẹn, hatua irueruo ọvwata, esegburhomẹmro, ẹguọlọ, ufuoma kugbe ihworho re se Ọrovwori na rhẹ ọmudu ọsoso.”—2 Timothy 2:22.

URHEBRO

Nẹrhomo bọmọke oruru ehware na ọnọ ki gbanhon. Rẹ i Jehova nọ yọ “omẹgbanhon rọ vrẹn ovwan” ne wu sabu fiẹ obẹnbẹn na kparobọ.—2 Corinthians 4:7.

WU RHERI . . .?

Ọvwiẹlẹ yo fiomarhotọre rẹn oruru ehware ọnẹyen. Ọrẹn ọgba o dje omerhesun phia ọrhọ tobọ ha uvuẹn odjahen.

OBORẸ WU NA SABU RU!

Mi na sabu kpọ ẹhẹn mẹ vi ekwakwa ri fonron orhianẹ mi ․․․․․

Ukperẹ mi ne fiomarhotọre nẹ oruru ehware na o fi mẹ kparobọ, mi ne ․․․․․

Oborẹ mi guọlọ nọ eri vwiẹre mẹ kpahen urhomu-ẹmro ọnana yẹ ․․․․․

ME WU RORORI?

● Mesoriẹ ọ ghanren na karorhọ taghene Jehova o ‘mwuegbe rọ nọ harhomu’ ọwan?—Psalms 86:5.

● Ra mẹriẹn taghene Osolobrugwẹ rọ ma oruru ehware, ọ tare taghene wu dje omerhesun phia, imwẹro ọgo yẹ Osolobrugwẹ o vwo kpahuọn?

[Ẹmro Ikpokpoto]

Avwọke mie fiẹ obẹnbẹn na kparobọ, ẹhẹn obrorhiẹn mẹ nọ fonron obaro i Jehova, mi sabu haye wene emru ọrọrọ-ọ!—Sarah

[Ifoto]

Wu rhe se ọke wa rha zorhẹ, ọrana o mevirhọ taghene wu na rharhumu riẹ ọtonrhọ ya tuẹn orhẹ na rhọ-ọ—omaran ọ ji havwọ, wu rhe vwobọrhọ irueruo ọfanrhiẹn ra bẹlẹ oma ukwọgbọ, ọrana ọ mevirhọ taghene wu sabu dobọ ye jẹ-ẹ