ONYAKPỌ owuorowu ọnọ sabu fuevwan kpahen Osolobrugwẹ udabọ ọdamuni, ọrhọ tobọ rhianẹ ọdamuni na ọ rhua erere owuorowu vwe yi-i? Ọhworhare owu re se i Job yọ lẹrhẹ onọ ọnana homaphia, na ji kpahenrhọ ye.

Ọke emọ Israel a ji ha uvuẹn Egypt, Job ro rhiẹ omizu Abraham o rhirhiẹ ekete re se Arabia ọke ọnana. Ọke ọrana, emakashe ri ha obẹ odjuwu ni kokori obaro Osolobrugwẹ, Echu rọ kparahasuẹ awan ọ ji ha usuẹn aye. Udaro emakashe na ephian, Jehova nọ ta kpahen imwẹro ro vwo kpahen atamwu odibo yi Job. Jehova nọ tobọ ta taghene o vwo onyakpọ owuorowu ro vwo emevigbanhon jerẹ i Jobu-u. Ọrẹn, Echu nọ tare taghene Job ọ ga Osolobrugwẹ fọkime Osolobrugwẹ ọ ha ebrurhọ riẹn jeghwai sẹroriẹ. Echu nọ haye ta taghene ekwakwa ephian i rhe vru nẹ abọ i Job, ono phien Osolobrugwẹ.

Osolobrugwẹ nọ ha uphẹn rẹn Echu nọ ghwọghọ efe i Job, kpe emọyen, jeghwai lẹrhiẹ kpomu emiamo ọgbogbanhon. Dedevwo Job o rhe taghene Echu o vwobọrhọ ekwakwa enana-a, ọrẹn o vwẹruọ oborẹ ọsoriẹ Osolobrugwẹ o kwe nẹ ekwakwa enana i phia riẹ-ẹn. Udabọ ọrana, Job ọ kparehaso Osolobrugwẹ-ẹ.

Erharhere igbehian i Job awansa ni brurie rhe. Uvuẹn ẹmro buebun aye i tare ra ya rhẹ uvuẹn ọbe i Job, ehworhare enana i damoma aye ina phiẹ i Job rhọ taghene, Osolobrugwẹ yọ ha oja riẹ fọkiẹ edandan ro ruru uvuẹn odjahen. Aye i tobọ ta taghene Osolobrugwẹ o vwo ọdamẹ kpahen idibo yi jeghwai hẹrosuiẹ-ẹ. Job ọ tiẹn iroro ọsoso aye. Job nọ tare rhẹ imwẹro taghene ọnọ sẹrorẹ emevigbanhon ọnẹyen ye te uhwu!

Ọrẹn, Job no rusọ nyoma ro djephia taghene oborẹ o ruẹ yọ gbare. Uphuphẹn owu re se Elihu rọ kerhọ oborẹ aye a ta, nọ kpọ iroro i Job ọrhẹ igbehian yen awansa vi. Elihu nọ ghwọghwu i Job, nime ọ chochọn omayen ukperẹ ono rhiẹ ọdo-usun Osolobrugwẹ. Elihu ọ ji ghwọghwu igbehian i Job awansa gbangbanhon.

Jehova nọ kpọ iroro i Job vi. Jehova nọ nyoma emama dje rẹn i Job oborẹ onyakpọ ọ kamu te, arha ha aye vwanvwọn Osolobrugwẹ. Job nọ homariotọre rhiabọ dede ọkpọvi Jehova. Ra mẹriẹn taghene Jehova “o dje ẹguọlọ okokodo ọrhẹ arodọmẹ phia” na, nọ lẹrhẹ oma i Job gbanhon jeghwai rharhumu yẹ ye efe yi bun ghwẹ oborẹ o vwori bi, Job no ji vwiẹ emọ ikpe erọrọ. (James 5:11) Nime Job ọ sẹrorẹ emevigbanhon udabọ ẹkparehaso ọgbogbanhon, no dje oborẹ Echu ọ tare rhẹ ofian taghene ituakpọ i sabu vwo atamwu kpahen Osolobrugwẹ aye i rha dẹrughwaroghwu ọdamuni-i.

—A bọn ikuegbe ọnana kpahen oborẹ ọ ha uvuẹn ọbe i Job.