Ọgbọ buebun, ihworho i Judah ni nyaji Jehova vwo ya ga isolobrugwẹ efian. Jehova nọ damoma rọ nọ ha userhumu rẹn aye uvwre ẹgbukpe buebun. O dje emẹraro buebun ya ha orhetio rẹn aye, ọrẹn, aye a kerhọ-ọ. Ukpomaran, aye na ha emẹraro na djechẹẹ. Marhẹ i Jehova o ru fioba rhẹ irueruo emẹgọ ra homaphia uvuẹn amwa na?

Orodje i Babylon rẹ odẹ ye o rhiẹ Nebuchadnezzar, o fi egbamwa buebun kparobọ. Ọke i Nebuchadnezzar o tu fi Jerusalem kparobọ, no mwu Orodje Jehoiachin ọrhẹ emọyen, egba owọnren enẹyen, ihworho ri tẹn ona uvuẹn amwa na, nọ kparerẹ aye riẹ Babylon. Nọ jeghwai kpare efe ri ha uvuẹn oghwa ẹga i Jehova riẹ Babylon. Ọke oru, Nebuchadnezzar nọ ha i Zedekiah mwu ẹrhẹ orodje i Judah.

Ukukaro, Zedekiah ọ huvwele i Nebuchadnezzar. Ọrẹn, ihworho ri kẹrẹ amwa i Judah ọrhẹ emẹraro efian na, ni ha urhebro rẹn i Zedekiah nọ kparehaso orodje i Babylon. Jeremiah nọ ha orhetio rẹn Zedekiah, nọ tare: ‘Wu rha kparehasuiẹ, ihworho enọ ine hwuo, orhọmo ono rhirhiẹ ye, emiamo ọnọ ji homaphia uvuẹn i Judah.’

Ọke i Zedekiah o sun te ẹgbukpe ẹrẹnren ne, nọ kparehaso orodje i Babylon. Nọ nekpẹn userhumu mie isodja Egypt. Nebuchadnezzar no dje isodja ye nẹ aye i ye lele i Jerusalem fiuvweri, aye ni kinhariẹ i Jerusalem. Jeremiah nọ ta rẹn Zedekiah: ‘Jehova ọ tare taghene wu rha homakpahontọre rẹn i Babylon, wẹwẹ rhẹ amwa na ine simirhọ. Ọrẹn, wa rha homakpahontọre-e, isodja i Babylon ina torhẹ i Jerusalem jeghwai mwuo riẹ evrẹn.’ Ọrẹn, Zedekiah nọ tare: ‘Mi homakpahontọre-e!’

 Ọke ẹgbukpe owu gbẹ uphrophro a vrẹn hin, isodja i Babylon ni ghwọghọ ogba i Jerusalem, aye ni torhẹ amwa na. Aye i torhẹ oghwa ẹga na, aye i kpe ihworho buebun jeghwai mwu ihworho buebun riẹ evrẹn.

Zedekiah nọ zẹ nẹ i Jerusalem, ọrẹn, isodja i Babylon ni hatua ye. Aye ni mwurien ọke ọ joma zẹ te i Jericho ne, aye ni kpareriẹ vwe Nebuchadnezzar. Nebuchadnezzar nọ ta rẹn Zedekiah no rho ni emọyen ọke e kpe aye. Ọke oru, Nebuchadnezzar no tu ikẹro i Zedekiah jeghwai fie rhẹ ekanron, Zedekiah no hwu rhẹ ekanron na. Ọrẹn, Jehova no vive rẹn ihworho i Judah: ‘Ẹgbukpe 70 i rha vrẹn ne, mi na ha are ghwẹrioma riẹ Jerusalem.’

Me yọ nọ phia rẹn iphuphẹn re mwu riẹ evrẹn uvuẹn i Babylon na? Aye ina sẹrorẹ atamwu aye i vwo kpahen i Jehova?