Orodje ọrọrọ ro sun i Babylon yẹ Darius ro rhiẹ onyẹ Media. Darius ọ mẹrẹnvwrurhe taghene Daniel ohworho ọghoghanren omamọ. Nọ ha i Daniel mwu ẹrhẹ ro rierun vrẹn ihworho erọrọ uvuẹn ẹkwotọre na. Ihworho ri hẹrhẹre na, na rioma kpahen i Daniel, aye na guọlọ izede rẹ aye ine kpe yi. Aye i rheri taghene i Daniel ọ nẹrhomo vwe i Jehova ọgbọ esa kẹdẹkẹdẹ, omarana, aye ni ta rẹn i Darius: ‘O orodje, jene jurhi taghene ihworho ephian i nẹrhomo rẹn owẹwẹ ọvo. Kohworho kohworho rọ vwọ nyalele urhi na, jene fi ọravwọ rhẹ unu ikporokpo.’ Ẹmro enana i jẹ i Darius, omarana no fiobọ rhọ ẹbe sekpahen urhi ọrana.

Ogege i Daniel o rhon kpahen urhi ọkpokpọ na, no riẹ oghwa ye. No sighwẹ obaro ivakpọ ro rhiefirhọ, nọ nẹrhomo vwe i Jehova. Ihworho ra rioma na, ni bru rie nya uvuẹn oghwa ye, aye ni mẹrenriẹn rọ nẹrhomo. Aye ni zẹ bru i Darius, aye ni tare: ‘Daniel ọ tiẹn uvwele ọnọ. Ọ nẹrhomo vwe Osolobrugwẹ ye, ọgbọ esa kẹdẹkẹdẹ.’ Fọkiẹ ẹguọlọ ri Darius o vwo kpahen i Daniel, ọrhọ guọlọ ne kpe yi-i. No roro kpahen oborẹ ono ru simi Daniel. Ọrẹn, orodje na dede ọ sabu wene urhi rẹ ọye o fiobọ rhọ ne-e. Omarana, nọ ta rẹn idibo yi nẹ aye i fi Daniel rhẹ unu ikporokpo na.

 Ason ọrana, ẹhẹn i Darius no kpokpie fọkiẹ i Daniel, ọrhọ sabu merhẹ-ẹn. Urhiọke ẹdẹ ọreva ye, nọ zẹ riẹ ekete unu ikporokpo na ọ havwọ, no se i Daniel, nọ nọriẹn: ‘Osolobrugwẹ ọnọ ọ sabu simuo?’

Darius no rhon uvwele i Daniel. Daniel nọ ta rẹn i Darius: ‘Ọmakashe i Jehova o rhurhu unu ikporokpo na. Aye a kon mẹ-ẹ.’ Oma nọ merhen i Darius omamọ! Darius nọ tare taghene e ti Daniel nẹ unu ikporokpo na. Daniel o vwo oka owuorowu uvuẹn omaye-en. Omarana, orodje na nọ tare: ‘Are i doron ehworhare ri mọrenfian baren Daniel na rhẹ unu ikporokpo na.’ Ọke e doron ehworhare na rhẹ unu ikporokpo na, ikporokpo na ni sha rẹ aye re.

Darius no jurhi ọnana rẹn ihworho yi ephian: ‘Ihworho ephian i vi zofẹn Osolobrugwẹ i Daniel. Ọye yo simi Daniel nẹ unu ikporokpo na.’

Wa nẹrhomo vwe i Jehova kẹdẹkẹdẹ jerẹ oborẹ i Daniel o ruru?