Esther onyẹ i Jew ro rhirhiẹ amwa i Shushan rọ ha uvuẹn ẹkwotọre i Persia. Nebuchadnezzar ro rhiẹ orodje i Babylon, yo mwu ekrun Esther nẹ i Jerusalem riẹ evrẹn ẹgbukpe ezẹko ri vrẹnren na. Mordecai ro rhiẹ ọmọ omizu ọsẹ ye, ro rhiẹ odibo Orodje Ahasuerus ro sun i Persia, nọ yọ hẹrote yi.

Ọke oru, Orodje Ahasuerus nọ guọlọ ọmase ọrọrọ ro no rhiẹ aniẹ. Idibo orodje na ni guọlọ egbọtọ ri mai vwo erhumu uvuẹn ẹkwotọre na vwe yi, Esther ọ ha usuẹn egbọtọ na. Esther ọvo ya djẹre no rhiẹ ane orodje na usuẹn egbọtọ na ephian. Mordecai nọ ta rẹn Esther taghene o vwo dje omayen phia taghene ọye onyẹ i Je-ew.

Ọhworhare owu rọ kparoma rẹ odẹ ye o rhiẹ Haman, ya ha mwu ẹrhẹ rọ mai rierun usuẹn ekakuro na. Ọye ọ guọlọre nẹ kohworho kohworho i gburhomu rhotọre riẹn. Mordecai orho kwe gburhomu rhotọre riẹ-ẹn, Haman nọ tuekwẹre ọgbogbanhon te erhirhiẹ ọ guọlọ kpe yi. Ọke i Haman ọ mẹrẹnvwrurhe taghene Mordecai onyẹ i Jew, nọ djẹ iroro re ne kpe ọsoso itu i Jew ri ha uvuẹn ẹkwotọre na. Haman nọ ta rẹn orodje na: ‘Itu i Jew na erharhere ihworho, o fori ne wu kpe aye.’ Ahasuerus nọ tare: ‘Ru i kemru kemru wu guọlọre,’ habaye, nọ ji yẹ ye omẹgbanhon ro no jurhi. Haman no jurhi taghene e kpe ọsoso itu i Jew uvuẹn ẹdọke ọrẹ 13 uvuẹn ubiamo Adar. Jehova ọ mẹrẹn oborẹ ọ phia na.

Ọke ọrana, Esther o ji rhe kpahen urhi na-a. Omarana, Mordecai nọ ha owu usuẹn ọbe urhi na vwe Esther, nọ ji ta riẹn: ‘Bru orodje na nya, ne wu tẹmro riẹn.’ Esther nọ tare: ‘Kohworho kowhorho ro bru orodje na nya, ọrẹn, o se yi-i, ene kpe yi. O te ẹdọke 30 ne, orodje na o ji se mẹ-ẹ! Ọrẹn, mi na nya. Ọrhọ riẹn ukorọkpọ usun na mẹ, mi ne nyerẹn. Ọrhọ riẹn ukorọkpọ usun na mẹ-ẹ, mi ne hwuo.’

Esther no riẹ egodo orodje na. Ọke orodje na ọ mẹriẹn, nọ riẹn ukorọkpọ usun na riẹn. Esther no bru rie, orodje na nọ nọriẹn:  ‘Esther, me mi ne ru wẹn?’ Esther nọ tare: ‘Mi guọlọre nẹ wẹwẹ ọrhẹ Haman i ma riẹ emaren mi mwuegbe rẹn are owuọnwọn na.’ Ọke aye a riẹ emaren na, Esther nọ ha use rẹn aye ọgbọrọrọ. Ọke aye a riẹ emaren ọgbọreva ye na, orodje na nọ rharhumu nọ Esther: ‘Me mi ne ru wẹn?’ Esther nọ tare: ‘Ohworho ọ guọlọ kpe mẹ ọrhẹ ihworho mẹ. Biko simi ame.’ Orodje na nọ nọriẹn: ‘Ọrọmo yọ guọlọ kpe are?’ Esther nọ tare: ‘Orharhere ọhworhare ọnana re se Haman na.’ Ahasuerus nọ tuekwẹre gbangbanhon te erhirhiẹ ọ ta taghene e ye kpe Haman ogege.

Ọrẹn, o vwo ohworho rọ nọ sabu wene urhi Haman na-a, orodje na dede ọ sabu wenie-e. Omarana, orodje na nọ ha i Mordecai mwu ẹrhẹ rọ mai rierun usuẹn ekakuro na, nọ jeghwai yẹ ye omẹgbanhon ro no jurhi ọrọrọ. Mordecai no jurhi rọ nọ sabu lẹrhẹ itu i Jew na chochọn oma aye, arha guọlọ kpe aye. Uvuẹn ẹdọke ọrẹ 13 uvuẹn ubiamo Adar, itu i Jew na ni fi evwreghrẹn aye kparobọ. Nẹ ọke ọrana nyarhẹn, aye na riorẹ ẹdẹ aye e fikparobọ na, kẹgbukpe kẹgbukpe.