Ason owu, Nebuchadnezzar nọ menemena ro mwofẹn omamọ. No se ọsoso evwẹghwanren ri ha uvuẹn amwa na, nẹ aye i rhian emena na riẹn. Ọrẹn, o vwo ohworho owuorowu rọ sabu rhian emena na-a. Ọke oru, Nebuchadnezzar no se i Daniel.

Nebuchadnezzar nọ ta rẹn i Daniel: ‘Mi mẹrẹn orhan ọduado uvuẹn emena mẹ. Orhan na o rhiri omamọ te ivwrevwrede na. Ihworho ri ha uvuẹn akpọ na ephian a sabu mẹriẹn. Orhan na o vwo ẹbe ọrhẹ emamọ irhorhomu. Eranmo e ronmoma uvuẹn ophie orhan na, efen a jeghwai bọn eghwa aye rhẹ abọ orhan na. Ọke oru, ọmakashe no nẹ odjuwu rhe. Nọ tare: “Hẹn orhan na se, ne wu bru abọ ye. Ọrẹn, nyaji esiri orhan na ọrhẹ aghwẹ ye vwo uvuẹn otọre, ne wu ha egbange uteru ọrhẹ ọrẹ erẹnmo mwuie. Ọmudu orhan na nọ samọ wene nẹ ọmudu onyakpọ riẹ ọrẹ aranmo, ẹdọke irhiruẹ ni samọ nyavrẹn. Ihworho ephian ni na mẹrẹnvwrurhe taghene Osolobrugwẹ yo suẹn, habaye, ọ ha omẹgbanhon usun rẹn ohworho rẹ ọye ọ guọlọre.”’

Jehova no dje oborẹ emena na o mevirhọ harẹn i Daniel. Ọke i Daniel o vwẹruọ oborẹ emena na o mevirhọ, ofẹn no mwu rien. Daniel nọ tare: ‘O orodje, mi guọlọre taghene emena ọnana o sekpahen ọvwreghrẹn ọnọ, ọrẹn, o sekpahuọn. Wẹwẹ yẹ orhan ra hẹnren na. Uvie ọnọ, ono nẹ obọ ọnọ, wu na riẹ odin ri ha uvuẹn ikebi jerẹ eranmo. Ọrẹn, nime ọmakashe na ọ tare taghene a nyaji esiri orhan na ọrhẹ aghwẹ ye vwo, wu na rharhumu rhiẹ orodje.’

Ẹgbukpe owu ọ vrẹn hin, Nebuchadnezzar nọ nya uvuẹn oberun oghwa ye, no nẹ oborẹ i Babylon o rhomu te. Nebuchadnezzar nọ tare: ‘Nughe amwa orhorhomu ọnana mi bọnren na. Nughe oborẹ mi do te!’ Ọke rọ tẹmro na, uvwele no nẹ odjuwu rhe, nọ tare: ‘Nebuchadnezzar! Uvie ọnọ o nẹ obọ ọnọ ne.’

Ogege, Nebuchadnezzar no kpomorhuẹ, no ruẹ jerẹ aranmo rọ djoma. Nọ ruẹ egbo ye lele eranmo rhirhiẹ. Ẹton i Nebuchadnezzar ni sereri jerẹ ilele egodi, ififanbọ ye ni họhọ ififanbọ afen.

Ọke ẹgbukpe irhiruẹ a nyavrẹn hin, iroro i Nebuchadnezzar  nọ gbare, Jehova nọ rharhumu haye mwu ẹrhẹ orodje yi uvuẹn i Babylon. Omarana, Nebuchadnezzar nọ tare: ‘Mi jiri Jehova, ro rhiẹ Orodje idjuwu na. Vwarana, mi mẹrẹnvwrurhe ne taghene i Jehova yo suẹn. O ruie nẹ ihworho ra kparoma i homariotọre, habaye, ọye ọ ha omẹgbanhon usun rẹn kohworho kohworho rẹ ọye ọ guọlọre.’