Ọke i Nebuchadnezzar o mwu ihworho ri na sabu rhiẹ orodje uvuẹn i Judah riẹ i Babylon, nọ ha Ashpenaz rọ wian riẹn mwu nọ hẹrote aye. Nebuchadnezzar nọ ta rẹn Ashpenaz nọ sanọ idama ri vwe kpomẹ, ri ji mai sasa usuẹn aye. Ene yono idama na te ẹgbukpe esa. Ene yono aye nẹ aye i rhiẹ ihworho oghẹnrensan uvuẹn i Babylon. Ene yono idama na oborẹ e se edjadjẹ Akkad rẹ itu i Babylon a djẹ, oborẹ a ya ye ọrhẹ oborẹ a djẹ ye lele. E ji fiẹrorhọ taghene aye ina riẹ aruo emaren rẹ orodje na ọrhẹ ekakuro yi, a ria. Awan ẹne usuẹn idama na yẹ Daniel, Hananiah, Mishael, ọrhẹ Azariah. Ashpenaz no mwu odẹ i Babylon rẹn aye, edẹ na yẹ: Belteshazzar, Shadrach, Meshach, ọrhẹ Abednego. Uyono ọnana ọnọ lẹrhẹ aye sẹrerhumuji Jehova?

 Idama awan ẹne enana i vwo omwemẹ rẹ aye ina huvwele i Jehova. Aye i rheri taghene ọsọre rẹ aye ina riẹ emaren orodje na, nime Urhi Jehova ọ tare taghene emaren na ezẹko a fo-on. Omarana, aye ni ta rẹn Ashpenaz: ‘Biko, wu vwa gba ame riẹ emaren orodje na-a.’ Ashpenaz nọ ta rẹn aye: ‘Are arha riẹ emaren na-a, are ine kpomu, habaye, orodje na ọrhọ mẹrẹnvwrurhe taghene are e kpomẹ, ono kpe mẹ!’

Daniel nọ djẹ iroro owu. Daniel nọ ta rẹn ohworho rọ hẹrote aye na: ‘Biko yẹ ame emaren ro vwo ẹbe ọvo ọrhẹ ame te ẹdọke ikpe. Orho ru, ne wu ha ame vwanvwọn idama ri riẹ emaren orodje na.’ Ohworho rọ hẹrote aye na, no kwerhọ ye.

Ẹdọke ikpe na a vrẹn hin, oma i Daniel ọrhẹ igbehian yen awansa na, i kpokpọ ghwẹ idama ri hẹrhẹre na. Oma ọ merhen i Jehova taghene aye i huvwele yi. Jehova ọ tobọ yẹ i Daniel ẹghwanren ro no vwẹruọ emena ọrhẹ emena arudo.

Ọke e yono aye hin, Ashpenaz nọ ha idama na vwe Nebuchadnezzar. Orodje na no lelirẹ aye tẹmro, nọ mẹrẹnvwrurhe taghene Daniel, Hananiah, Mishael, ọrhẹ Azariah i sasare jeghwai rhe ẹbe ghwẹ idama ri hẹrhẹre na. Nọ djẹ idama awan ẹne na ni wian uvuẹn egodo yi. Orodje na orho vwo ẹmro eghoghanren ezẹko, nọ nekpẹn urhebro mie aye. Jehova o rurie nẹ aye i ghwanren ghwẹ egba ẹghwanren orodje na ọrhẹ ihworho re ru irueruo imajiki.

Dedevwo, Daniel, Hananiah, Mishael, ọrhẹ Azariah i ha uvuẹn ẹkwotọre ọrọrọ, ọ sẹrẹ aye ẹro taghene aye ihworho i Jehova-a. Wu na hẹrokele aye nyoma wu na huvwele i Jehova dedevwo ọsẹ ọrhẹ izuo a ha ekete wu havwọ-ọ?