Jene yono kpahen ohworho ọrọrọ ro nyerẹnren uvwre ọke Ezra. Nehemiah odibo Orodje Artaxerxes, ọye onyẹ Israel ro rhirhiẹ amwa i Shushan rọ ha uvuẹn ẹkwotọre i Persia. Omizu i Nehemiah nọ ha iyẹnrẹn omemwurhọ nẹ i Judah vwe yi, nọ tare: ‘Ofẹn ọ havwiẹ rẹn ihworho ri ghwẹrioma riẹ Jerusalem. A ji sabu rharhumu bọn ugbomoghwa na jeghwai kanren ighwe amwa i Jerusalem rẹ itu i Babylon i ghwọghọre na-a.’ Nehemiah no mwuomarhọ. Nehemiah ọ guọlọ riẹ i Jerusalem ya ha userhumu phia, omarana, nọ nẹrhomo vwe i Jehova no ruie nẹ orodje na ọ ha uphẹn riẹn nọ nyarhẹn.

Ọke oru, orodje na nọ mẹrẹnvwrurhe taghene i Nehemiah o mwuomarhọ. Orodje na nọ tare: ‘We ji mwuomarhọ omana dẹ-ẹ. Me yọ phia? Nehemiah nọ tare: ‘Mesoriẹ mi ne je mwuomarhọ, ra mẹriẹn taghene i Jerusalem ro rhiẹ amwa mẹ ọ ghwọghọ totọre oboran? Orodje na nọ nọriẹn: ‘Me wu guọlọre taghene mi ru wẹn?’ Ogege, Nehemiah nọ nẹrhomo vwe i Jehova uvuẹn ẹhẹn yen. Omarana, Nehemiah nọ tare: ‘Biko, ji mẹ riẹ i Jerusalem ya rharhumu bọn ugbomoghwa amwa na.’ Orodje Artaxerxes nọ ta rẹn i Nehemiah taghene ọnọ sabu nyarhẹn, nọ jeghwai ruie nẹ i Nehemiah ọ sabu te i Jerusalem ọrẹ omefuon. Orodje Artaxerxes nọ ha i Nehemiah mwu ẹrhẹ igọvunọ i Judah jeghwai yẹ ye erhan rọ nọ ha kanren ighwe amwa na.

Ọke i Nehemiah o te i Jerusalem, no ni ugbomoghwa amwa na so. No koko irherẹn ọrhẹ ekakuro amwa na, nọ ta rẹn aye: ‘Erhirhiẹ na o biomurun omamọ. Jenẹ a tuẹn owian rhọ ogege.’ Ihworho na ni kwerhọ ye, aye ni tuẹn ẹrharhumu bọn ugbomoghwa amwa na rhọ.’

Evwreghrẹn emọ Israel, na ha aye djechẹẹ, aye na ta: ‘Irhianko ina sabu ghwọghọ ugbomoghwa ọnana are a bọn na.’ Ihworho ra wian na, a kpahen ẹmro rẹn aye-e, aye na ji bọn ugbomoghwa amwa na. Aye na bọn ugbomoghwa amwa na rierun jeghwai ruie gbanhanrhọ.

Evwreghrẹn na ni djẹ iroro rẹ aye ina kparehaso i Jerusalem ọke aye i vwe fiẹrorhọ. Ọke itu i Jew na e rhon kpahen iroro na, ofẹn no mwu aye. Ọrẹn, Nehemiah nọ tare: ‘Are i vwa zofẹ-ẹn. Jehova ọnọ ha userhumu rẹn ọwan.’ Nehemiah nọ ta rẹn ehworhare ezẹko nẹ aye i dẹrẹ amwa na neneyo  evwreghrẹn na i ja rha sabu kparehaso ihworho ra wian owian na.

Aye ni bọn ugbomoghwa na jeghwai kanren ighwe amwa na hin uvwre ẹdọke 52 ọvo. Nehemiah nọ koko ọsoso irherẹn na ọrhẹ itu i Levi na uvuẹn Jerusalem nẹ aye i riorẹ, nime a bọn ugbomoghwa amwa na hin ne. Nehemiah nọ ghalẹ ọsoso irherẹn na ọrhẹ itu i Levi na rhẹ ẹko eva ra so ijoro. Ẹko eva na ni nya ugbomoghwa na kinhariẹ amwa na. Aye e kporo ukpori, akisẹ ọrhẹ ekwakwa erọrọ, aye a jeghwai so ijoro vwe i Jehova. Ezra o lele ẹko owu, Nehemiah no lele ẹko ọreva ye, bọmọke aye a vwoma uvuẹn oghwa ẹga na. Ihworho na ephian ni ze izobo harẹn i Jehova jeghwai riorẹ kugbe. Ihworho ne rhon edon omamerhomẹ aye na, ekete oseseri.