John ro rhiẹ ọmọ i Zechariah ọrhẹ Elizabeth, no rhiẹ ọmẹraro ọke rọ ghwanren ne. Jehova ọ ha i John yono ihworho kpahen ẹrhiọ i Messiah na. Ọrẹn, ukperẹ i John ono yono uvuẹn synagogue yanghene uvuẹn emwa na, no ghwoghwo uvuẹn ato. Ihworho ne nẹ i Jerusalem ọrhẹ i Judea sa, nẹ aye i sabu yono mie i John. John no yonirin aye taghene nẹ aye i sabu ru oborẹ ọnọ merhen Osolobrugwẹ oma, aye ina dobọ ekwakwa ibiobiomu e ru ji. Ọke aye a dabu kerhọ i John, buebun usuẹn aye ni ghwẹriẹ nẹ edandan aye, John no bru rẹ aye rhẹ ame uvuẹn Urhie i Jordan.

John o nyerẹn akpọ ọlolọhọ. Ewun ra ha ẹton ekẹrẹkẹtẹ ru yi John o kuẹrhọ, ọ jeghwai riẹ ebaka jeghwai lalọ amiahon. No gbe ihworho unu kpahen aruo ohworho i John ọ havwọ. Otu i Pharisee ọrhẹ Sadducee ra kparoma dede, i ji ya mẹrẹn i John. John nọ ta rẹn aye: ‘O fori nẹ are i vi wene uruemru are, nẹ are i ghwẹriẹ. Are i vwe roro taghene nime are a ta taghene are emọ Abraham, are nẹ ihworho oghẹnrensa-an. Ọnana o mevirhọ taghene are emọ Osolobrugwẹ-ẹ.’

Ihworho buebun ne bru i John sa, aye na nọ yen: ‘Me yo fori taghene ame i ru neneyo ame i sabu ru oborẹ ọnọ merhen Osolobrugwẹ oma?’ John nọ ta rẹn itu i Jew na: ‘Are i rhe vwo ewun eva, are i ha owu rẹn ohworho ro vwo vwo.’ Wu rhe oborẹ ọsoriẹ ọ ta omaran? John ọ guọlọre nẹ idibo yi, i rhe taghene nẹ aye i sabu ru oborẹ ọnọ merhen Osolobrugwẹ oma, aye ine vi vwo ẹguọlọ kpahen ihworho.

John nọ ta rẹn ihworho re toro osa urhomu na: ‘Are i ta urhomẹmro, are i vwa ghwa ihworho re-e.’ Nọ ji ta rẹn isodja na: ‘Are i vwa ha ufan mie ihworho yanghene mọrenfia-an.’

 Irherẹn na ọrhẹ itu i Levi na ni ji bru i John nya, aye ni nọriẹn: ‘Wẹwẹ ọrọmo? Kohworho kohworho i guọlọ rhe kpahuọn.’ John nọ tare: ‘Mẹmẹ uvwele uvuẹn ato na, ro sun ihworho vwe i Jehova, jerẹ oborẹ Isaiah ọ mẹraruiẹ rhotọre.’

Ihworho i vwo ẹguọlọ kpahen oborẹ i John o yono aye. Ihworho buebun ne roro taghene i John yi Messiah na. Ọrẹn, John nọ ta rẹn aye: ‘Ohworho rọ do ghwẹ mẹ ọ sa. Mia tobọ mwuovwan mi na rhan ufi isabatuiẹ-ẹ. Mia ha ame bru ihworho rhẹ ame, ọrẹn, ọye ọnọ nyoma ẹhẹn ọfuanfon na bru ihworho rhẹ ame.’