Jesu o simi ihworho re kpomẹ, ọ jeghwai rhọmọ eri hwuru, habaye, o ji vwo omẹgbanhon rọ sabu sun ogiribo ọrhẹ oso. Ọke i Jesu ọ nẹrhomo uvuẹn ugbenu na hin, nọ kpararo ni Urhie i Galilee, nọ mẹrẹn ogiribo ro zuẹ gbangbanhon. Inyikọ ye i ha uvuẹn owọ, aye a damoma rẹ aye ina ghwa owọ na totọre fọkiẹ ogiribo ọgbogbanhon na. Jesu nọ ruẹ otọre, nọ nya oberun ame na riẹ ekete owọ aye ọ havwọ. Ọke inyikọ na a mẹrẹn ohworho rọ nya oberun ame na, ofẹn no mwu aye. Ọrẹn, Jesu nọ ta rẹn aye: ‘Omẹmẹ. Are i vwa zofẹ-ẹn.’

Peter nọ tare: ‘Ọrovwori, orho ghini rhiẹ owẹwẹ, gba ta mẹ ni mi bruo rhe.’ Jesu nọ ta rẹn i Peter: ‘Bru mẹ rhe.’ Omarana, Peter nọ ruẹ otọre nẹ owọ na, nọ nya oberun ame na bru i Jesu. Ọrẹn, ọke ọ joma te ekete i Jesu, Peter no ni ogiribo na, ofẹn no mwurien. Ọye no dimẹ ruẹ ame na. Peter no bunu: ‘Ọrovwori, simi mẹ!’ Jesu nọ mọrọn obọ ye, nọ tare: ‘Mesoriẹ we vwo ẹhẹn eveva? Esegburhomẹmro ọnọ ne?’

Jesu ọrhẹ Peter ni ruẹ owọ na, ogege ogiribo na nọ dobọji. Wu na sabu ha ẹhẹn roro oborẹ oma o ru inyikọ na? Inyikọ na ni tare: “Wẹwẹ ghini Ọmọ Osolobrugwẹ.”

Rhẹ ẹdẹ ọrana ọvo yi Jesu o sun aruọke na-a. Ẹdẹ ọrọrọ, ọke rẹ inyikọ na a ghwa owọ riẹ obọreva urhie na, Jesu no yo semerhẹn uvuẹn owọ na. Ọke rọ merhẹn, ogiribo ọgbogbanhon no zuẹ. Ukoli ame nọ kpara ruẹ owọ na, owọ na nọ vuọnren rhẹ ame. Inyikọ na ne bunu se i Jesu: ‘Oyono, ame a guọlọ hwuẹ ne! Simi ame!’ Jesu no vẹnrẹnren, nọ ta rẹn urhie na: “Fọ!” Ogege, ogiribo na ọrhẹ urhie na ni fọre. Jesu nọ nọ inyikọ na: ‘Esegburhomẹmro are ne?’ Aye na ta rẹn omoma aye: “Aphẹrẹ na ọrhẹ urhie na, a tobọ huvwele yi.” Inyikọ na ni yonorin taghene aye i rha hẹroso i Jesu rhẹ ọsoso ẹhẹn aye, aye i zofẹn emru owuorowu-u.