Ọke orẹ Ọnyavrẹn na o hin, Jesu ọrhẹ idibo yi ni nya i Samaria vrẹn, ọke aye a ghwẹrioma riẹ Galilee. Ọrẹn, ọke aye a joma te amwa i Sychar, Jesu nọ domaji uvuẹn ekete edje i Jacob ọ havwọ. Ọke ro ronmoma avwaye, idibo yi ni ya dẹ emaren uvuẹn amwa na.

Ọmase owu nọ rhiẹ edje na me vo ame. Jesu nọ ta riẹn: “Yẹ mẹ ame mi da.” Ọmase na nọ tare: ‘Mesoriẹ wa tẹmro mẹ? Mẹmẹ onyẹ i Samaria. Itu i Jew i vwe lele ihworho i Samaria tẹmro kugbe-e.’ Jesu nọ ta riẹn: ‘Orhianẹ wu rheri mẹ, manẹ wẹwẹ ya ta mẹ taghene mi yọ ame, ni mi na yọ ame rọ yẹ ohworho arhọ.’ Ọmase na nọ nọriẹn: ‘Me wa haye ta? Wa tobọ vwo ukoroba wu ne vo ame-e.’ Jesu nọ ta riẹn: ‘Kohworho kohworho mi yẹre ame da, uhrun ame ọrhọ ka ye ghwomara-an.’ Ọmase na nọ tare: ‘Ọga, biko yẹ mẹ ame ọnana.’

Jesu nọ ta riẹn: ‘Ye se esa ọnọ rhiẹ edje na.’ Ọmase na nọ tare: ‘Mie vwo esa-a.’ Jesu nọ kpahenrhọ riẹn: ‘Urhomẹmro wu tare. Wu rọnmọ te ọgbọ isionrin ne, vwarana, ọhworhare rọ vwọ ji rọnmuọ yi we lele rhirhiẹ.’ Ọmase na nọ tare: ‘Mi mẹrẹnvwrurhe taghene wẹwẹ ọmẹraro. Ihworho mẹ i vwo imwẹro taghene ana sabu ga Osolobrugwẹ uvuẹn ugbenu ọnana, ọrẹn, itu i Jew na a ta taghene uvuẹn i Jerusalem ọvo ya na sabu ga Osolobrugwẹ. Mi vwo imwẹro taghene i Messiah na ọrhọ rhe, ọye ono yono ọwan kpahen izede ro fori ra na ga Osolobrugwẹ.’ Jesu nọ ta oborẹ ọ vwọ ji ta rẹn ohworho owuorowu rẹn ọmase na: ‘Mẹmẹ yi Messiah na.’

 Ọmase na no brokpakpa riẹ amwa yen, nọ ta rẹn ihworho i Samaria: ‘Ọ họhọre taghene mi mẹrẹn i Messiah na ne. Ọye o rhe i kemru kemru kpahen mẹ. Are i ma mẹriẹn!’ Aye ni lele ọmase na riẹ edje na, jeghwai kerhọ uyono i Jesu.

Ihworho i Samaria na ni se i Jesu riẹ amwa aye. Jesu no yono ihworho na te ẹdọke eva, buebun ihworho na ni vwo esegburhomẹmro kpahiẹn. Aye ni ta rẹn ọmase onyẹ i Samaria na: ‘Ra mẹriẹn taghene ame i dabu kerhọ ọhworhare ọnana ne na, ame i rheri taghene ọye yo no ghini simi akpọ na.’