Ọke i Jesu ọrhẹ inyikọ ye a ha uvuẹn oghwa owu, nọ ta rẹn aye: ‘Are ephian i samọ sẹrerhumuji mẹ uvuẹn ason ọnana.’ Peter nọ tare: ‘Rhẹ omẹmẹ-ẹ! Ọsoso ere hẹrhẹre na i rha tobọ nyajuo vwo, mi nyajuo vwo-o.’ Ọrẹn, Jesu nọ ta rẹn i Peter: ‘Bọmọke ogberhualẹ ono bo, wu na ten mẹ ọgbọ esa taghene we rhe mẹ-ẹ.’

A ki ha i Jesu te oghwa i Caiaphas, inyikọ ye buebun i zẹ je vwo ne. Ọrẹn, ihworho awanva ne lele otu na. Owu usuẹn aye yi Peter. Nọ ruẹ egodo Caiaphas, nọ karhẹ erhanren. Ọvrẹn ọgbọtọ owu nọ mẹrẹn ughwaro i Peter, nọ tare: ‘Mi rhe ruo! Wẹwẹ odibo i Jesu!’

Peter nọ tare: ‘Ẹjo, rhẹ omẹmẹ-ẹ! Mie rhe oborẹ wa ta kpahan na-a!’ Nọ nya riẹ anurẹsẹ egodo na. Ọrẹn, ọvrẹn ọgbọtọ ọrọrọ, nọ mẹren riẹn, nọ ta rẹn otu na: ‘Ọhworhare ọnana odibo i Jesu!’ Peter nọ tare: ‘Mia tobọ rhe i Jesu-u!’ Ọhworhare owu nọ tare: ‘Wẹwẹ usuẹn aye! Oborẹ wa tẹmro lele o djephia taghene wẹwẹ onyẹ i Galilee jerẹ i Jesu.’ Ọrẹn, Peter no dumirhonrin: ‘Mie rhe yi-i!’

Ogege, ogberhualẹ no bori. Peter nọ mẹrẹn i Jesu ro nie. Nọ karorhọ ẹmro i Jesu, no riẹ otafe ya viẹ gbangbanhon.

Ọke oru, iguẹnzọn ri ha uvuẹn i Sanhedrin na ni ruẹ ẹghware uvuẹn oghwa Caiaphas nẹ aye i guẹnzọn i Jesu. Aye i brorhiẹn aye ine kpe i Jesu ne, vwanrana, aye na guọlọ ekete i Jesu o rusọ. Ọrẹn, aye a mẹrẹn emru owuorowu mwu ba ye obọ-ọ. Ọke oru, Caiaphas nọ nọ i Jesu: ‘Wẹwẹ yẹ Ọmọ Osolobrugwẹ na?’ Jesu nọ tare: ‘Mẹmẹ yẹ ọye.’ Caiaphas nọ tare: ‘Ame a guọlọ oseri ọrọrọ-ọ. Ọnana aruehinmo kpahen Osolobrugwẹ!’ Ihworho ri ha uvuẹn ẹghware na ni kwerhọ ye, aye ni tare: ‘Ọhworhare ọnana ono vi hwu.’ Aye na ghwiẹ i Jesu, djen erhẹnrhen ghwie, aye ni gbariẹ ikẹro, ezẹko a ha emru fomie, aye na ta: ‘Wu rhe ghini rhiẹ ọmẹraro, ta rẹn ame ohworho ro fomiruon!’

 Ọke urhiọke o te, aye ni ha i Jesu riẹ i Sanhedrin na, aye ni nọ riẹn ọgbọrọrọ: ‘Wẹwẹ yẹ Ọmọ Osolobrugwẹ na?’ Jesu nọ tare: ‘Are ọvo yi tariẹ.’ Omarana, aye ni brorhiẹn kpe yi taghene o hinmaro kpahen Osolobrugwẹ, aye ni ha i Jesu riẹ egodo i Pontius Pilate ro rhiẹ igọvunọ i Rome. Ni me yọ phiare? Jene yono kpahiẹn.