Ẹdọke ikpe a vrẹn hin ọke i Jesu ọ ghwẹrioma riẹ odjuwu ne, ẹhẹn ọfuanfon na nọ ruẹ oma idibo na. Uvuẹn ẹdẹ Pentecost 33 C.E., ihworho buebun ni nẹ ekete sansan riẹ Jerusalem ya riorẹ. Idibo i Jesu ri te 120, ni kokori uvuẹn oghwa owu. Ogege, emru igbevwunu nọ phiare. Emru jerẹ erhanren nọ homaphia oberun urhomu idibo na owuowu, aye ephian na djẹ edjadjẹ sansan. Edon rọ họhọ ogiribo ọgbogbanhon nọ vuọn oghwa na.

Epha ri nẹ ẹkwotọre erọrọ riẹ i Jerusalem i ji rhon edon na, aye ni zẹ riẹ oghwa na nẹ aye i mẹrẹn oborẹ ọ phia. No gberẹ aye unu ọke aye e rhon idibo na ra djẹ edjadjẹ sansan. Aye na ta: ‘Ihworho enana itu i Galilee. Ọrẹn, marhẹ aye e ru djẹ edjadjẹ ame?’

Peter ọrhẹ inyikọ na erọrọ ni mevi obaro otu na. Peter nọ ta rẹn ihworho na oborẹ e ru kpe i Jesu, nọ ji ta rẹn aye taghene i Jehova ọ rhọmọ i Jesu nẹ uhwu ne. Peter nọ tare: ‘Vwarana, Jesu ọ ha obọrhe Osolobrugwẹ ne, habaye, o tiobọnu ẹhẹn ọfuanfon ro vive kpahen na ne. Ọyẹ ọsoriẹ are e rhon jeghwai mẹrẹn igbevwunu enana.’

 Ẹmro i Peter o te ihworho na ẹhẹn, aye ni nọren: “Me yẹ ame ine ruo?” Peter nọ ta rẹn aye: ‘Are i ghwẹriẹ nẹ edandan are, nẹ are i bromarhame uvuẹn odẹ i Jesu. Are ni ne vwo ẹhẹn ọfuanfon na.’ Ihworho ri te 3,000 ni bromarhame ẹdẹ ọrana. Nẹ ọke ọrana nyarhẹn, idibo na ne buẹnrhọ uvuẹn i Jerusalem phẹphẹrẹ. Nyoma userhumu ẹhẹn ọfuanfon na, inyikọ na ni ha ikoko buebun mwu neneyo aye i sabu yono idibo na ọsoso oborẹ i Jesu o jurhie rẹn aye.