Saul onyẹ i Rome re vwiẹre uvuẹn Tarsus. Ọye onyẹ i Pharisee rọ dabu rhe urhi itu i Jew na, habaye, ọye o vwo utuoma kpahen Ilele Kristi. Ọye o mwu Ilele Kristi nẹ oghwa aye ye, no fi aye rhẹ ekanron. Ọ tobọ mevi kẹrẹ ilogbozighi, ọke aye e fi odibo i Jesu owu re se Stephen kpe.

Rhẹ Ilele Kristi ri ha uvuẹn i Jerusalem ọvo yi Saul ọ guọlọ mwu rhẹ ekanro-on. Saul nọ ta rẹn orherẹn ọduado na no dje yi riẹ i Damascus neneyo ọ sabu mwu Ilele Kristi re ha avwaye rhẹ ekanron. Ọke i Saul ọ joma te amwa na ne, ukpẹ no lo mwuie gbangbanhon, no sebru otọre. Saul no rhon uvwele owu rọ tare: ‘Saul, mesoriẹ wa kparahaso mẹ?’ Saul nọ nọren: ‘Wẹwẹ ọrọmo?’ Uvwele na nọ tare: ‘Mẹmẹ i Jesu. Nyarhẹn riẹ i Damascus, ne wu rhe oborẹ wu ne ruo.’ Ogege, ikẹro i Saul ni turu, na mọrọn obọ ye ruẹ amwa na.

O vwo Olele Kristi owu uvuẹn i Damascus rẹ odẹ ye o rhiẹ Ananias. Jesu nọ ta riẹn uvuẹn emena: ‘Nyarhẹn riẹ oghwa i Judas uvuẹn udumu re se Ọphiọnphiọn, ya guọlọ i Saul.’ Ananias nọ tare: ‘Ọrovwori, mi dabu rhe aruo ohworho ọhworhare ọrana ọ havwọ! O mwu idibo enọ rhẹ ekanron!’ Ọrẹn, Jesu nọ tare: ‘Bruie nya. Mi djẹ i Saul ha no ghwoghwo iyẹnrẹn esiri na harẹn egbamwa buebun.’

Omarana, Ananias nọ mẹrẹn i Saul, nọ ta riẹn: ‘Omizu Saul, Jesu o djeri mẹ vwo ni mi rhie ikẹruọ.’ Ogege, Saul nọ mẹrẹn ude. Saul no yono kpahen i Jesu, no rhiẹ odibo yi. Ọke i Saul o bromarhame ne, ọye ọrhẹ Ilele Kristi erọrọ ne ghwoghwo uvuẹn i synagogue sansan. Wu na sabu ha ẹhẹn roro oborẹ o gbe ihworho unu te ọke aye a mẹrẹn i Saul ro yono ihworho kpahen i Jesu? Aye ni tare: ‘Rhẹ ọhworhare ọnana yo mwu idibo i Jesu na?’

 Saul o ghwoghwo rẹn ihworho re rhirhiẹ i Damascus te ẹgbukpe esa. Itu i Jew na i vwo utuoma kpahen i Saul, aye ni djẹ iroro aye ine kpe yi. Ọrẹn, imizu ri ha avwaye ni rhon kpahen iroro na, aye ni ha userhumu riẹn zẹ vabọ. Imizu na ni fi Saul rhẹ okalokpọ, aye ni lọreriẹ nya ophiọ owu rọ ha uvuẹn ugbomoghwa amwa na.

Ọke i Saul o te i Jerusalem, nọ damoma ro no kwomakugbe imizu re ha avwaye. Ọrẹn, Ilele Kristi na, na zofẹn i Saul. Ọke oru, Barnabas ro rhiẹ ohworho esiri, nọ ha i Saul vwe inyikọ na jeghwai lẹrhẹ aye kwerhọ ye taghene i Saul o ghini ghwẹriẹ ne. Saul ọrhẹ imizu re ha uvuẹn i Jerusalem ne ghwoghwo iyẹnrẹn esiri na. Ọke oru, ne rhe rie rhẹ i Paul.