O vwo ọvrẹn ọgbọtọ owu rẹ okpodje ọ ha uvuẹn omayen uvuẹn Philippi. Okpodje na, ọ lẹrhẹ ọgbọtọ na mẹraro, inini ọgbọtọ na, na mẹrẹn igho buebun nyoma ọgbọtọ na. Ọke i Paul ọrhẹ Silas e riẹ Philippi, ọgbọtọ na o leli rẹ aye ẹdẹ buebun. Okpodje na, nọ lẹrhẹ ọgbọtọ na bunu, nọ ta: “Ehworhare enana evrẹn rẹn Osolobrugwẹ rọ mai rierun na.” Obẹtaye, Paul nọ ta rẹn okpodje na, ‘Uvuẹn odẹ i Jesu, vẹnrẹn nẹ omayen!’ Ogege, okpodje na no nẹ oma ọgbọtọ na.

Ọke inini ọgbọtọ na, a mẹriẹn taghene ọ vwọ rhọ wian igho vwe aye-e, aye na tuekwẹre. Aye ni kpolo i Paul ọrhẹ Silas bru iguẹnzọn ri ha uvuẹn oghwa ẹghware na, aye ni tare: ‘Ehworhare enana, i vwa mọrẹn urhi na-a, aye na suẹ ọyanghan rhẹ amwa na.’ Iguẹnzọn na ni tare taghene a fa i Paul ọrhẹ Silas, ne ji doron aye rhẹ ekanron. Ohworho rọ dẹrẹ ekanron na, no fi rẹ aye rhẹ ekete rọ mai mwuokuku kparobọ uvuẹn ekanron na, na kanren abọ aye ọrhẹ aghwẹ aye mwu erhan.

Ihworho ri ha uvuẹn ekanron na, a kerhọ ọke Paul ọrhẹ Silas a so ijoro vwe i Jehova. Ogege, uvuẹn erhẹrhẹ ason, otọre ekpogho ọgbogbanhon nọ homaphia uvuẹn ekanron na. Ighwe ekanron na no rhiefirhọ, abọ aye ọrhẹ aghwẹ aye ni rhan nẹ ejọrọ ọrhẹ erhan ra kanrenrẹn aye mwu na. Ohworho rọ dẹrẹ ekanron na, no brokpakpa ruẹ uvuẹn ekanron na, nọ mẹrẹnvwrurhe taghene ighwe na i rhiefirhọ. No rorori taghene ọsoso ihworho na i zẹ ne, nọ ha odan ọlọkọ rọ nọ ha kpe omayen.

Ọke ọrana, Paul nọ ta riẹn: ‘Wu vwa ha ẹkuọn rẹn oma ọnọ-ọ! Ame ephian i ha ekete aran!’ Ohworho rọ dẹrẹ ekanron na, no brokpakpa ruẹ uvuẹn ekanron na, no gburhomu rhotọre harẹn i Paul ọrhẹ Silas. Nọ nọrẹn aye: “Me me mi ne ruo ni mi sabu simirhọ?” Aye ni ta riẹn: ‘Wẹwẹ rhẹ ekrun ọnọ i vwo imwẹro kpahen i Jesu.’ Paul ọrhẹ Silas ni yonirin aye kpahẹn ẹmro i Jehova, ohworho rọ dẹrẹ ekanron na ọrhẹ ekrun ọnẹyen ephian ni bromarhame.