Uvuẹn amwa re se Uz, o vwo ọhworhare owu re se i Job rọ ga i Jehova. Ọye ọdafe ro vwo ekrun ọduado. O vwo uruemru esiri, ọ jeghwai ha userhumu rẹn ivwiegbere, emẹse uku ọrhẹ emọ ri vwe vwo esẹ ọrhẹ izu. Ọrẹn, nime i Job o ru oborẹ ọgbare, ọrana no mevirhọ taghene ọ mẹrẹn ebẹnbẹn owuorowu-u?

Echu ro rhiẹ i Dẹbolo, o vwo oniso kpahen i Job, ọrẹn, Job o rhe-e. Jehova nọ ta rẹn Echu: ‘Wu vwo oniso kpahen odibo mẹ Job ne? O vwo ohworho rọ họheriẹ uvuẹn otọrakpọ na-a. Ọ huvwele mẹ, ọ jeghwai ruẹ oborẹ ọgbare. Echu nọ tare: ‘Itiọrurhomẹmro, Job ọ huvwele ọnọ. Wa sẹroriẹ jeghwai ha ebrurhọ riẹn. Wu yẹriẹ omamọ otọre ọrhẹ isurhe. Ha aye ephian mie yi, ọye nọ nọ dobọ ẹga rọ ha wẹn ji.’ Jehova nọ tare: ‘Wu na sabu damu i Job ni. Ọrẹn, wu vwe kpe yi hwu-u.’ Mesoriẹ i Jehova ọ ha uphẹn rẹn Echu nọ damu i Job ni? O mwu i Jehova ẹro taghene Job ọnọ vrẹn ọdamuni na.

Echu nọ ha ikpokpogho sansan damu i Job ni. Ọrukaro, no dje itu Sabean ye so ikẹrẹkẹtẹ ọrhẹ erhuẹn ri Job o vwori. Ọke oru, erhanren nọ torhẹ igegede i Job ephian. Itu Chaldean ni ji ye so eranmo i Job erọrọ ri ji họhọ ikẹrẹkẹtẹ. A jeghwai kpe idibo i Job ra hẹrote isurhe enẹyen. Ukpokpogho rọ mai biomu nọ homaphia. Oghwa o se bru emọ i Job ọke aye a riorẹ, aye ni hwuru. Ẹhẹn i Job no seriotọre, ọrẹn, ọ dobọ i Jehova ẹga ji-i.

Echu ọ guọlọre nẹ i Job ọ rioja omamọ, omarana, no rurie nẹ era i vuọn oma i Job. Job nọ mẹrẹn omiamiamo ọgbogbanhon. Job o rhe oborẹ ọsoriẹ ekwakwa  erana a phia riẹ-ẹn. Udabọ ọrana, Job ọ ji ga i Jehova. Osolobrugwẹ ọ mẹrẹn enana ephian, oma nọ merhen riẹn kpahen i Job.

Ọke oru, Echu no dje ehworhare awansa ya damu i Job ni. Aye ni ta riẹn: ‘Wu ruẹ ọdandan, wa guọlọ ta-a. Ọ yọ lẹrhẹ Osolobrugwẹ ha oja riọ na.’ Job nọ tare: ‘Mie ruẹ ọdanda-an.’ Ọrẹn, Job no roro taghene i Jehova yọ suẹ ikpokpogho erana, nọ tare taghene Osolobrugwẹ o sehiẹn yen.

Idama owu re se Elihu ọ dabu kerhọ ọke aye a tẹmro. Ọke oru, nọ tare: ‘Oborẹ are ephian i tare na, ọ gba-a. Jehova ọ do ghwẹ oborẹ ana sabu vwẹruọ ye. Ọ sabu ru oborẹ o biomuru-un. Ọ mẹrẹn i kemru kemru, ọ jeghwai ha userhumu rẹn ihworho ra dẹrughwaroghwẹ ukpokpogho.’

Ọke oru, Jehova nọ tẹmro rẹn i Job. Nọ nọriẹn: ‘Bọgo wu havwọ ọke mia ma idjuwu na ọrhẹ otọrakpọ na? Mesoriẹ wa ta taghene mie sehiọn? Wa tẹmro, ọrẹn, we rhe oborẹ ọsoriẹ ekwakwa a phia-a.’ Job no kwe orusọ ye, nọ tare: ‘Mi ru sọ. Mi rhon kpahuọn bi ne, ọrẹn, vwana, mi dabu rhe owẹwẹ ne. O vwo oborẹ ọ bẹn harẹn owẹwẹ-ẹ. Biko harhomu mẹ fọkiẹ oborẹ mi tare na.’

Ọke ọdamuni na o hin, Jehova nọ lẹrhẹ oma i Job sasa jeghwai lẹrhiẹ vwo efe ghwẹ oborẹ o vwori bi. Job no nyerẹnren jijiri, no ji vwo omamerhomẹ. Dedevwo i Job ọ mẹrẹn ebẹnbẹn, Jehova ọ ha ebrurhọ riẹn, nime ọ huvwele yi. Wu guọlọ họhọ i Job jeghwai rha ga i Jehova, udabọ ebẹnbẹn wu dẹrughwaroghwu?