Moses o nyerẹnren uvuẹn Midian ọsoso ẹgbukpe 40. Nọ rọnmọren jeghwai vwiẹ emọ. Ẹdẹ owu, ọke i Moses ọ hẹrote igegede enẹyen uvuẹn Ugbenu i Sinai, nọ mẹrẹn emru igbevwunu. Erhanren ọ bara uvuẹn orhan owu, ọrẹn, orhan na ọ vwọ torhẹ-ẹ! Ọke i Moses o ti kẹrẹ orhan na, nọ mẹrẹn oborẹ ọ phia, no rhon uvwele ro nẹ orhan na rhe, rọ tare: ‘Moses! Daji ekete wu havwọ. Ku isabatu enọ nu, nime ekete wu mevi na ekete ọfuanfon.’ Jehova yọ tẹmro riẹn nyoma ọmakashe.

Ofẹn no mwu i Moses, no rhurhu ughwaruiẹ. Uvwele na nọ ji ta: ‘Mi mẹrẹn ojẹriọ emọ Israel ne. Mi ne simi aye nẹ abọ itu Egypt jeghwai yẹ aye omamọ otọre. Wẹwẹ yi ne sun ihworho mẹ nẹ Egypt.’ O mwuo ẹro taghene ọnana o gbe i Moses unu?

Moses nọ nọren: ‘Me mi na ta, ihworho na i rha nọ mẹ kpahen ohworho ro djeri mẹ rhe?’ Osolobrugwẹ nọ ta riẹn: ‘Ta rẹn aye taghene i Jehova ro rhiẹ Osolobrugwẹ Abraham, Osolobrugwẹ Isaac, ọrhẹ Osolobrugwẹ Jacob, yo dje ruo rhe.’ Moses nọ ji nọ: ‘Orhianẹ ihworho na e kwerhọ oborẹ mi tare na vwo?’ Jehova no dje oborẹ ọnọ lẹrhẹ i Moses vwo imwẹro taghene ọnọ ghini ha userhumu riẹn. Jehova nọ ta rẹn i Moses no doron ukorọkpọ ye rhotọre. Ukorọkpọ na nọ dẹriẹrhiẹ obodirin! Ọke i Moses ọ mọrọn urhurhomu obodirin na, nọ rharhumu dẹriẹrhiẹ ukorọkpọ. Jehova nọ tare: ‘Wu rhe dje eka enana harẹn aye, aye ine kwerhọ ye taghene mẹmẹ yi dje ruo rhe.’

Moses nọ tare: ‘Mia ghwai rhe oborẹ a tẹmro-o.’ Jehova nọ yẹriẹ imwẹro: ‘Mi na ta wẹn oborẹ wu na ta, mi na ta rẹn omizuo ro rhiẹ Aaron, nọ ha userhumu wẹn.’ Ọke i Moses ọ mẹrẹnvwrurhe taghene i Jehova ọrhẹ ọye i gba havwiẹ, ọye ọrhẹ ekrun ọnẹyen ni rharhumu riẹ Egypt.